Fetela kwa tshedimosetsong

Fetela go diteng

Jehofa o Batla Gore re Itlhophele

Jehofa o Batla Gore re Itlhophele

 Atamalana le Modimo

Jehofa o Batla Gore re Itlhophele

Duteronome 30:11-20

“GANTSI ke ne ke boifa gore ga nkitla ke ikanyega mo go Jehofa.” Go ne ga bua jalo mosadi mongwe wa Mokeresete yo o neng a akanya gore dilo tse di maswe tse di mo diragaletseng a sa le monnye di tla dira gore a palelwe mo botshelong. A go ntse jalo? A fa o diragaletswe ke dilo tse di maswe mo botshelong seo se kaya gore ga o motho wa sepe? Nnyaa. Jehofa Modimo o re neile kgololesego ya go itirela ditshwetso gore re itlhophele gore re batla go tshela jang. Jehofa o batla gore re dire ditshwetso tse di siameng, mme Lefoko la gagwe e leng Baebele le re bolelela kafa re ka dirang seo ka gone. Akanya ka mafoko a ga Moshe, a a mo go Duteronome kgaolo 30.

A go thata go itse se Modimo a se batlang re bo re se dira? * Moshe o tlhalosa jaana: “Taelo eno e ke e go laelang gompieno ga e thata go le kalo mo go wena, e bile ga e kgakala.” (Temana 11) Jehofa ga a batle gore re dire dilo tse re ka se kgoneng go di dira. Dilo tse a di batlang ga di dintsi e bile re ka kgona go di dira. Gape re ka kgona go itse gore o batla eng. Ga go tlhokege gore re tlhatlogele “kwa magodimong” kgotsa re ye “kwa ntlheng e nngwe ya lewatle” gore re itse gore Modimo o batla gore re dire eng. (Temana 12, 13) Baebele e re bolelela ka tlhamalalo gore re tshwanetse go tshela jang.—Mika 6:8.

Le fa go ntse jalo, Jehofa ga a re pateletse go mo ikobela. Moshe o ne a re: “Gompieno ke baya botshelo le molemo fa pele ga gago, le loso le bosula.” (Temana 15) Re gololesegile go tlhopha fa gare ga botshelo le loso, molemo le bosula. Re ka itlhophela go obamela Modimo le go mo ikobela mme a re segofatse kgotsa re ka itlhophela go se mo ikobele mme re bone ditlamorago tsa gone. Le fa go ntse jalo, ke rona re tla itlhophelang.—Temana 16-18; Bagalatia 6:7, 8.

A Jehofa o amega ka gore re tlhopha tsela efe? Ee ruri! Moshe yo o neng a tlhotlheleditswe ke Modimo o ne a re: ‘Tlhopha botshelo.’ (Temana 19) Le fa go ntse jalo, re tlhopha botshelo jang? Moshe o ne a tlhalosa jaana: “Ka go rata Jehofa Modimo wa gago, ka go reetsa lentswe la gagwe le ka go mo ngaparela.” (Temana 20) Fa re rata Jehofa, re tla batla go mo reetsa ka boikobo le go mo ikanya go sa kgathalesege gore go direga eng. Fa re dira jalo, re tlhopha botshelo—tsela e e molemolemo ya botshelo gone jaanong re na le tsholofelo ya go tshelela ruri mo lefatsheng le lesha la Modimo mo nakong e e tlang.—2 Petere 3:11-13; 1 Johane 5:3.

Mafoko a ga Moshe a re tlhomamisetsa boammaaruri jo bo kgothatsang. Le fa o ka tswa o diragaletswe ke eng mo lefatsheng leno le le boikepo, ga go reye gore ga o motho wa sepe; kgotsa gore o paletswe. Jehofa o re bontshitse gore o re tsaya re le botlhokwa ka go re naya kgololesego ya go itirela ditshwetso. Ee, o ka tlhopha go rata Jehofa, go mo reetsa le go nna o ikanyega mo go ene. Fa o dira tshwetso eo, Jehofa o tla segofatsa maiteko a gago.

Boammaaruri jono—jwa gore re kgona go itirela tshwetso ya go rata Jehofa le go mo direla—bo ne jwa gomotsa mosadi yo o umakilweng kwa tshimogolong. A re: “Ke rata Jehofa. Ka dinako dingwe, ke ne ke lebala gore selo se se botlhokwa thata ke gore ke rata Jehofa. Ka jalo nka kgona go ikanyega.” Le wena o ka kgona fa o thusiwa ke Jehofa.

[Ntlha e e kwa tlase]

^ ser. 5 Bona setlhogo se se reng “Atamalana le Modimo—Jehofa o Kopa Eng mo go Rona?” mo makasineng wa Tora ya Tebelo ya October 1, 2009.