MORWA wa ga Noa e bong Sheme o ne a falola fa lefatshe le a neng a tshela mo go lone le fedisiwa mme a tswelela a tshela morago ga moo. A o itse gore ke ka ntlha yang fa lefatshe le Sheme a neng a tshela mo go lone le ne la fedisiwa le gore ene le ba lelapa la gagwe ba ne ba kgona jang go tswelela ba tshela morago ga moo?— * Mma re tlotle ka kgang eno.

Baebele ya re fa Sheme a ne a le mmotlana, “bosula jwa motho bo ne bo le bogolo” thata. Dilo tse batho ba neng ba di akanya di ne di le “bosula fela ka dinako tsotlhe.” Ka jalo a o itse gore Modimo o ne a dira eng?— O ne a tlisa morwalela o o neng wa senya batho bao ba ba boikepo. Moaposetoloi Petere o ne a kwala jaana: “Lefatshe la nako eo le ne la senngwa . . . fa le ne le rwalelelwa ka metsi.”—Genesise 6:5; 2 Petere 3:6.

A o bona gore ke ka ntlha yang fa Modimo a ne a senya lefatshe leo?— Batho ba ne ba le bosula e bile ba ne ba akanya ‘bosula ka dinako tsotlhe.’ Jesu o ne a bua ka gone. O ne a re batho ba ne ba ijesa monate ‘pele ga morwalela, baa ja e bile baa nwa, ba nyala e bile ba neelwa nyalong.’ Gape Jesu o ne a oketsa ka go re: “Ba se ka ba tsaya tsia go fitlha morwalela o tla o bo o ba gogola botlhe.”—Mathaio 24:37-39.

Ke eng se batho bao ba neng ba palelwa ke go se ela tlhoko kgotsa go se bona?— Rraagwe Sheme e bong Noa, e ne e le “moreri wa tshiamo,” le fa go ntse jalo, batho ga ba a ka ba reetsa se a neng a se bua. Noa o ne a reetsa Modimo mme a aga araka, mokoro o o kokobalang o o neng o tla sireletsa ene le ba lelapa la gagwe ka nako ya Morwalela. Noa, mosadi wa gagwe le bomorwawe—Sheme, Hame le Jafethe—le basadi ba bone ke bone fela ba ba neng ba dira se Modimo a neng a batla gore ba se dire. Batho ba bangwe botlhe ba ne ba itirela maratwaepelo, ka jalo ba gogolwa ke Morwalela.—2 Petere 2:5; 1 Petere 3:20.

Mo e ka nnang ngwaga morago ga Morwalela, Sheme le lelapa la gagwe ba ne ba tswa mo arakeng mme ba nna mo lefatsheng le le omileng. Batho botlhe ba ba bosula ba ne ba fedisitswe mme go ise go ye kae dilo di ne tsa fetoga. Kanana, morwa wa morwarraagwe Sheme e bong Hame, o ne a dira sengwe se se bosula thata mo Noa a neng a re: “A go hutsege Kanana.” Nimerode, setlogolo sa ga Hame, le ene o ne a le bosula. O ne a nna  kgatlhanong le Modimo wa boammaaruri Jehofa mme a raya batho a re ba age tora e kgolo e e bidiwang Babele gore ba itirele leina. O akanya gore seno se ne sa dira gore Sheme le rraagwe ba ikutlwe jang?—Genesise 9:25; 10:6-10; 11:4, 5.

Ba ne ba utlwa botlhoko mme Jehofa le ene o ne a utlwa botlhoko. A o itse gore Jehofa o ne a dira eng?— O ne a tlhakatlhakanya dipuo tsa batho gore ba se ka ba tlhola ba tlhaloganyana. Ka jalo, batho ba ne ba emisa go aga mme ba ba neng ba bua puo e e tshwanang ba ne ba ya kwa lefelong le le lengwe. (Genesise 11:6-9) Mme Modimo ga a ka a fetola puo ya ga Sheme le ba lelapa la gagwe. Ka jalo, ba ne ba kgona go nna mmogo le go thusana fa ba ntse ba direla Modimo. A o itse gore Sheme o ne a direla Jehofa nako e e kana kang?—

Sheme o ne a tshela dingwaga di le 600. O ne a tshela dingwaga di le 98 pele ga morwalela mme a tshela di le 502 morago ga one. Re ka tlhomamisega gore o ne a thusa Noa go aga araka le go tlhagisa batho ka go tla ga Morwalela. Mme gone, o akanya gore Sheme o ne a dira eng mo dingwageng tse di fetang 500 tse a di tshedileng morago ga Morwalela?— Noa o ne a re Jehofa ke “Modimo wa ga Sheme.” Sheme o tshwanetse a bo a ile a tswelela go direla Jehofa le go thusa ba lelapa la gagwe gore le bone ba dire se se tshwanang. Moragonyana, dingwe tsa ditlogolwana tsa gagwe e ne ya nna Aborahame, Sara le Isake.—Genesise 9:26; 11:10-31; 21:1-3.

Jaanong akanya ka lefatshe la gompieno le le ntseng le nnela boikepo go ya pele fa e sa le ka motlha wa ga Sheme. Go tla diragalang ka lone?— Baebele ya re “le a feta.” Le fa go ntse jalo, ela tlhoko tsholofetso eno: “Yo o dirang thato ya Modimo o ntse ka bosaengkae.” Ka jalo, fa re dira thato ya Modimo, re ka nna bangwe ba batho ba ba tla falolelang mo lefatsheng le lesha la Modimo. Go tswa foo, Modimo o tla re thusa gore re tshelele ruri mo lefatsheng re itumetse!—1 Johane 2:17; Pesalema 37:29; Isaia 65:17.

^ ser. 3 Fa o bala le ngwana, letshwao la thaladi le go gakolola gore o eme mme o kgothaletse ngwana go ntsha maikutlo a gagwe.