Fetela kwa tshedimosetsong

Fetela go diteng

Moya o o Boitshepo Ke Eng?

Moya o o Boitshepo Ke Eng?

 Moya o o Boitshepo Ke Eng?

NAKO nngwe Jesu o ne a botsa barutwa ba gagwe jaana: “Go na le rrabana ofe mo go lona yo, fa morwawe a kopa tlhapi, gongwe a tla mo nayang noga mo boemong jwa tlhapi? Kgotsa fa gape a kopa lee, a tla mo nayang phepheng?” (Luke 11:11, 12) Bana ba kwa Galalea ba ne ba rata go ja mae le tlhapi; ba ne ba itse gore ba batla go ja dijo tse di ntseng jang.

Jesu o ne a re re tshwanetse go nna re kopa moya o o boitshepo re sa kgaotse, fela jaaka ngwana yo o tshwerweng ke tlala a nnela go kopa dijo. (Luke 11:9, 13) Go itse gore moya o o boitshepo ke eng go tla dira gore re tlhaloganye kafa o leng botlhokwa ka gone mo matshelong a rona. Ka jalo, sa ntlha mma re sekaseke gore Baebele e ruta eng ka moya o o boitshepo.

“Maatla a Mogodimodimo”

Dikwalo di tlhalosa sentle gore moya o o boitshepo ke maatla a Modimo a a dirisang go diragatsa thato ya gagwe. Fa moengele Gabariele a ne a bolelela Marea gore o ne a tla nna le morwa le fa e ne e le lekgarebane, o ne a mo raya a re: “Moya o o boitshepo o tla tla mo go wena, le maatla a Mogodimodimo a tla go okama. Ka lebaka leo le se se tsalwang se tla bidiwa boitshepo, Morwa Modimo.” (Luke 1:35) Go ya ka mafoko a ga Gabariele, moya o o boitshepo le “maatla a Mogodimodimo” di a amana.

Kgopolo e e ntseng jalo e teng mo Baebeleng. Moporofeti Mika o ne a re: “Nna ke tletse maatla, ka ntlha ya moya wa ga Jehofa.” (Mika 3:8) Jesu o ne a solofetsa barutwa ba gagwe jaana: “Lo tla amogela maatla fa moya o o boitshepo o goroga mo go lona.” (Ditiro 1:8) Mme moaposetoloi Paulo o ne a bua ka “maatla a moya o o boitshepo.”—Baroma 15:13, 19.

Ka jalo re ka swetsa ka go reng go ya ka se se tlhalositsweng fa godimo? Moya o o boitshepo o amana le maatla a Modimo. Jehofa o dirisa maatla a gagwe ka moya o o boitshepo. Ka bokhutshwane fela re ka re moya o o boitshepo  ke maatla a Modimo a a dirisang kgotsa maatla a gagwe a a dirang. A bo e le maatla a a gakgamatsang jang ne! Re ka se itse gore go ile ga tlhokega maatla a a kana kang gore go bopiwe lefatshe. Jehofa o ne a dirisa moporofeti Isaia go re bolelela go ela tlhoko dilo tse di latelang: “Tsholeletsang matlho a lona kwa godimo lo bone. Ke mang yo o bopileng dilo tseno? Ke Ene yo o tlisang masomosomo a tsone ka palo, a di bitsa tsotlhe ka maina. Ka ntlha ya bogolo jwa maatla a a boitshegang, le ka go bo a na le nonofo e kgolo, ga go le fa e le nngwe ya tsone e e tlhaelang.”—Isaia 40:26.

Ka jalo, Baebele e bontsha gore lobopo lo bopegile ka tsela e lo leng ka yone ka ntlha ya “maatla a a boitshegang” kgotsa maatla a Modimo Mothatayotlhe. Go bonala sentle gore maatla a Modimo a a dirang a magolo le gore  re a a tlhoka gore re tswelele re tshela.—Bona lebokose le le reng “Kafa Moya o o Boitshepo o Dirang ka Gone.”

Jehofa a ka dirisa moya wa gagwe go dira dilo tse dikgolo jaaka a dirile lobopo. Mme gape a ka o dirisa go thusa batho. Baebele e na le dikai tse dintsi tse di bontshang kafa Modimo a neileng batlhanka ba gagwe maatla ka gone.

“Moya wa ga Jehofa O mo Go Nna”

Bodiredi jwa ga Jesu bo re naya bosupi jo bo kgatlhang jwa kafa moya wa Modimo o o boitshepo o ka nayang batlhanka ba gagwe maatla ka gone. Jesu o ne a raya batho ba kwa Nasaretha jaana: “Moya wa ga Jehofa o mo go nna.” (Luke 4:18) Jesu o ne a kgona go dira eng ka ‘maatla a moya?’ (Luke 4:14) O ne a fodisa mefuta yotlhe ya malwetse, a ritibatsa makhubu a lewatle le le shakgetseng, a fepa boidiidi jwa batho ka dinkgwe di le mmalwa le tlhapi a bo a tsosa le baswi. Moaposetoloi Petere o ne a tlhalosa Jesu e le “monna yo Modimo a neng a . . . mmontsha phatlalatsa ka ditiro tse di maatla le dikgakgamatso le ditshupo tse Modimo a neng a di dira ka ene.”—Ditiro 2:22.

Gompieno moya o o boitshepo ga o dire dikgakgamatso tse di ntseng jalo. Le fa go ntse jalo, o ka re direla dilo tse di tlhomologileng. Fela jaaka Jesu a ne a tlhomamisetsa barutwa ba gagwe, Jehofa o naya baobamedi ba gagwe moya o o boitshepo ka go rata. (Luke 11:13) Ke ka moo moaposetoloi Paulo a neng a re: “Mo dilong tsotlhe ke na le nonofo ka ntlha ya yo o nnayang maatla.” (Bafilipi 4:13) A moya o o boitshepo o ka dira se se tshwanang mo go wena? Setlhogo se se latelang se tla araba potso eno.

[Lebokoso/Setshwantsho mo go tsebe 5]

Lebaka la go bo moya o o boitshepo e se motho

Baebele e tshwantsha moya o o boitshepo le metsi. Modimo o ne a bua jaana fa a ne a solofetsa batho ba gagwe masego mo isagweng: “Ke tla tshela metsi mo go yo o nyorilweng, le melatswana mo lefelong le le omeletseng. Ke tla tshela moya wa me mo losikeng lwa gago, le tshegofatso ya me mo ditlogolwaneng tsa gago.”—Isaia 44:3.

Fa Modimo a tshela moya wa gagwe mo batlhankeng ba gagwe, ba “tlala moya o o boitshepo” kgotsa “ba tladiwa ka moya o o boitshepo.” Jesu, Johane Mokolobetsi, Petere, Paulo, Barenabase le barutwa ba ba neng ba phuthegile ka letsatsi la Pentekosete ya 33 C.E., botlhe ba tlhalosiwa ba tletse kgotsa ba tladitswe moya o o boitshepo.—Luke 1:15; 4:1; Ditiro 4:8; 9:17; 11:22, 24; 13:9.

Akanya ka seno: A motho a ka ‘tshelwa’ mo bathong ba bantsi ba ba farologaneng? A o ka re motho a le mongwe a ka ‘tlala’ mo setlhopheng sotlhe sa batho? Ga go kgonege. Baebele e bua ka batho ba tlala botlhale, tlhaloganyo kgotsa le e leng kitso ya boammaaruri mme ga e ke e bua ka motho a tladiwa ka motho yo mongwe.—Ekesodo 28:3; 1 Dikgosi 7:14; Luke 2:40; Bakolosa 1:9.

Lefoko la Segerika le le ranotsweng e le “moya” ke pneuʹma, le le lone le kayang maatla a a sa bonaleng. Go ya ka Vine’s Expository Dictionary of New Testament Words, lefoko pneuʹma “totatota le kaya phefo . . . gape le kaya mohemo; mme segolobogolo le kaya moya, o jaaka phefo o sa bonaleng, o se na sebopego e bile o le maatla.”

Ka jalo, go bonala sentle gore moya o o boitshepo ga se motho. *

[Ntlha e e kwa tlase]

^ ser. 19 Go bona tshedimosetso e e oketsegileng, bona setlhogo se se reng “Boammaaruri ka Rara, Morwa le Moya o o Boitshepo,” tsebe 201-204, mo bukeng ya Totatota Baebele e Ruta Eng? e e gatisitsweng ke Basupi ba ga Jehofa.

[Motswedi wa Setshwantsho]

Photodisc/SuperStock