Fetela kwa tshedimosetsong

Fetela go diteng

Go Itima Dijo—A go Dira Gore o Atamalane Thata le Modimo?

Go Itima Dijo—A go Dira Gore o Atamalane Thata le Modimo?

 Go Itima Dijo—A go Dira Gore o Atamalane Thata le Modimo?

‘Go itima dijo go go thusa gore o akanye thata ka kamano ya gago le Modimo e bile go go gakolola gore dithoto le dijo ga se tsone dilo tsa konokono mo botshelong.’—MOSADI WA MOKATOLIKI.

‘Go itima dijo go go thusa go nna le kamano le Modimo.’—MORUTI WA MOJUDA.

‘Go ya ka tumelo ya me, go itima dijo ke selo se motho a tshwanetseng go se dira, selo sa konokono se se bontshang gore o ineetse mo Modimong e bile o a mo leboga. Ke itima dijo ka gonne ke rata Modimo.’—MOLATEDI WA TUMELO YA BAHA’I.

GO ITIMA dijo ke mokgwa o o tlwaelegileng mo madumeding a le mantsi a lefatshe, a a jaaka Bobuda, Bohindu, Iselamo, Bojaini le Bojuda. Batho ba le bantsi ba dumela gore go itima dijo ka lobaka lo lo rileng lwa nako go dira gore motho a atamalane le Modimo.

O akanyang? A o tshwanetse go itima dijo? Lefoko la Modimo, Baebele, la reng ka kgang eno?

Go Itima Dijo mo Metlheng ya Ditiragalo Tsa Baebele

Mo metlheng ya ditiragalo tsa Baebele, batho ba ne ba itima dijo ka ntlha ya mabaka a a farologaneng a Modimo a neng a a amogela. Bangwe ba ne ba itima dijo go bontsha gore ba hutsafetse thata kgotsa ba ikwatlhaela maleo (1 Samuele 7:4-6), ba kopa Modimo gore a ba amogele kgotsa ba kopa kaelo ya gagwe (Baatlhodi 20:26-28; Luke 2:36, 37), kgotsa gore ba kgone go tlhoma mogopolo fa ba tlhatlhanya.—Mathaio 4:1, 2.

Le fa go ntse jalo, gape Baebele e bua ka go itima dijo go Modimo a neng a sa go amogele. Kgosi Saulo o ne a itima dijo pele a ya go kopana le motho yo o buang le meya. (Lefitiko 20:6; 1 Samuele 28:20) Batho ba ba bosula, ba ba jaaka Jesebele mmogo le batho ba ba ratang bodumedi ka tsela e e feteletseng ba ba neng ba loga leano la go bolaya moaposetoloi Paulo, le bone ba ne ba itima dijo. (1 Dikgosi 21:7-12; Ditiro 23:12-14) Bafarasai ba ne ba itsege thata ka go itima dijo ka metlha. (Mareko 2:18) Le fa go ntse jalo, Jesu o ne a ba kgala, mme ba ne ba palelwa ke go itumedisa Modimo. (Mathaio 6:16; Luke 18:12) Ka tsela e e tshwanang, Jehofa o ne a itlhokomolosa go itima dijo ga Baiseraele bangwe ka ntlha ya boitshwaro jwa bone jo bo sa siamang le ka ntlha ya maikaelelo a bone a a bosula.—Jeremia 14:12.

Dikai tseno di bontsha gore go itima dijo ka bogone fela ga go itumedise Modimo. Le fa go ntse  jalo, Modimo o ne a amogela go itima dijo ga batlhanka ba gagwe ba le bantsi ba ba peloephepa. Ka jalo, a Bakeresete ba tshwanetse go itima dijo?

A Bakeresete ba Tshwanetse go Itima Dijo?

Molao wa ga Moshe o ne o laela Bajuda gore ba ‘bogise meya ya bone,’ ke gore, ba itime dijo, gangwe ka ngwaga mo Letsatsing la Tetlanyo. (Lefitiko 16:29-31; Pesalema 35:13) Jehofa o ne a laetse batho ba gagwe gore ba itime dijo ka nako eno fela. * Bajuda ba ba neng ba tshela kafa tlase ga Molao wa ga Moshe ba ne ba tla ikobela taelo eo. Mme gone, ga go a lebelelwa gore Bakeresete ba ikobele Molao wa ga Moshe.—Baroma 10:4; Bakolosa 2:14.

Le fa Jesu a ile a itima dijo fela jaaka Molao o ne o laela, e ne e se selo se batho ba neng ba mo itse ka sone. O ne a bolelela barutwa ba gagwe gore ba ne ba tshwanetse go itshwara jang fa ba batla go itima dijo, mme ga a ka a ba laela gore ba itime dijo. (Mathaio 6:16-18; 9:14) Ka jalo, ke eng fa Jesu a ne a re barutwa ba gagwe ba tla itima dijo morago ga loso lwa gagwe? (Mathaio 9:15) Seno e ne e se taelo. Jesu o ne a kaya fela gore fa a se na go swa, barutwa ba gagwe ba ne ba tla hutsafala thata e bile ba ne ba ka se eletse go ja.

Go na le dipego di le pedi tsa Baebele tsa Bakeresete ba bogologolo ba ba neng ba itima dijo, tse di bontshang gore fa motho a tlhopha go itima dijo ka ntlha ya maikaelelo a a siameng, seno se a amogelesega mo Modimong. (Ditiro 13:2, 3; 14:23) * Ka jalo, Bakeresete ga ba patelesege gore ba itime dijo. Le fa go ntse jalo, motho yo o tlhophang go dira jalo o tshwanetse go ela tlhoko dikotsi dingwe.

Tlhokomela Dikotsi

Nngwe ya dikotsi tse o tlhokang go di tila malebana le go itima dijo ke go ipona o siame. Baebele e tlhagisa kgatlhanong le “boikokobetso jo e seng jone.” (Bakolosa 2:20-23) Setshwantsho sa ga Jesu sa Mofarasai yo o boikgogomoso yo o neng a akanya gore ene o siame go gaisa ba bangwe ka ntlha ya go bo a ne a tlwaetse go itima dijo se bontsha sentle gore Modimo o gana mokgwa o o ntseng jalo.—Luke 18:9-14.

Gape go tla bo go le phoso gore o bue phatlalatsa gore o itima dijo kgotsa o di itime ka gonne motho yo mongwe a go raya a re o dire jalo. Go ya ka Mathaio 6:16-18, Jesu o ne a gakolola gore go itima dijo e tshwanetse ya nna kgang ya motho ka boene fela, fa gare ga gagwe le Modimo, le gore ga a tshwanela go e bolelela batho ba bangwe.

Motho ga a tshwanela go akanya gore go siame go dira boleo a bo a re o tla itima dijo. Gore motho a amogelwe ke Modimo, fa a itima dijo o tshwanetse a ikobele le melao ya gagwe. (Isaia 58:3-7) Modimo o itshwarela motho maleo a gagwe fa a ikwatlhaya go tswa pelong e seng fa a itima  dijo. (Joele 2:12, 13) Baebele e gatelela gore re itshwarelwa ka ntlha ya bopelonomi jo bo sa re tshwanelang jwa ga Jehofa jo bo bontshiwang ka setlhabelo sa ga Keresete. Ga go kgonege gore motho a itshwarelwe fela ka gonne a dira ditiro dingwe, tse di akaretsang go itima dijo.—Baroma 3:24, 27, 28; Bagalatia 2:16; Baefeso 2:8, 9.

Isaia 58:3 e bontsha phoso e nngwe gape e e tlwaelegileng. Baiseraele ba ne ba akantsha gore Jehofa o ne a ba kolota sengwe ka ntlha ya go bo ba ne ba itimile dijo, jaaka e kete fa ba ne ba dira jalo, ba ne ba direla Modimo molemo. Ba ne ba botsa jaana: “Re ne re itima dijo ka lebaka lefe mme lo sa bone, re bogisa moya wa rona mme lo sa lemoge?” Batho ba le bantsi gompieno le bone ba akanya gore ka ntlha ya go bo ba itima dijo, ba ka lebelela gore Modimo a ba direle sengwe. A le ka motlha re se ka ra etsa sekao seo sa lenyatso le sa mokgwa o o sa dumalaneng le Dikwalo!

Ba bangwe ba dumela gore go a kgonega gore motho a amogelwe ke Modimo ka go ikutlwisa botlhoko mo mmeleng ka go itima dijo, go ititaya kgotsa sengwe sa mofuta oo. Lefoko la Modimo le kgala go akanya jalo, le bontsha gore “tshwaro e e botlhoko ya mmele” ga e “mosola ope mo go lwantsheng” dikeletso tse di sa siamang.—Bakolosa 2:20-23.

Go Leba Dilo ka Tsela e e Siameng

Motho ga a patelediwe go itima dijo; e bile ga go phoso. Mo mabakeng mangwe go ka nna molemo gore motho a itime dijo fa a sa go dire ka ntlha ya maitlhomo a a tlhalositsweng fa godimo. Le fa go ntse jalo, go itima dijo ga se sone selo sa konokono se re tshwanetseng go tlhoma mogopolo wa rona mo go sone gore kobamelo ya rona e amogelwe. Jehofa ke “Modimo yo o itumetseng” mme o batla gore batlhanka ba gagwe le bone ba itumele. (1 Timotheo 1:11) Lefoko la gagwe la re: “Ga go na sepe se se botoka mo go bone . . . gore motho mongwe le mongwe a je a bo a nwe mme a bone molemo ka ntlha ya tiro yotlhe ya gagwe ya bonatla. Ke mpho ya Modimo.”—Moreri 3:12, 13.

Re tshwanetse go itumelela go obamela Modimo, mme Baebele ga e ke e amanya go itima dijo le boitumelo. Gape, fa go itima dijo go ka ama botsogo jwa rona kgotsa ga re lapisa gore re dire tiro e e itumedisang e Modiri wa rona a e neileng Bakeresete ba boammaaruri—ya go bolela dikgang tse di molemo tsa Bogosi—go tla bo go se na mosola ope.

E ka ne re tlhopha go itima dijo kgotsa nnyaa, ga re a tshwanela go atlhola ba bangwe. Mo Bakereseteng ba boammaaruri, ga go a tshwanela go nna le kganetsano ka kgang eno, “gonne bogosi jwa Modimo ga bo reye go ja le go nwa, mme bo raya tshiamo le kagiso le boipelo ka moya o o boitshepo.”—Baroma 14:17.

[Dintlha tse di kwa tlase]

^ ser. 12 Modimo o ne a sa laela gore Esethere a itime dijo pele ga Moletlo wa Purime, le fa go bonala e kete Modimo o ne a go amogela.

^ ser. 14 Dibaebele dingwe di na le ditshupiso tse di seng boammaaruri tse di buang ka go itima dijo, mme ditshupiso tseo ga di tlhagelele gope mo mekwalong ya seatla ya bogologolo ya Segerika.—Mathaio 17:21; Mareko 9:29; Ditiro 10:30; 1 Bakorintha 7:5, King James version.

[Mafoko a a mo go tsebe 28]

Bafarasai ba ne ba bontsha boikokobetso jo e seng jone fa ba itima dijo

[Mafoko a a mo go tsebe 29]

“Bogosi jwa Modimo ga bo reye go ja le go nwa, mme bo raya tshiamo le kagiso le boipelo”

[Lebokoso mo go tsebe 29]

Go Tweng ka Lent?

Go itima dijo ka malatsi a le 40 go go bidiwang Lent go tsewa e le go gopola malatsi a le 40 a Keresete a neng a itima dijo ka one. Le fa go ntse jalo, Jesu ga a ka a laela barutwa ba gagwe gore ba keteke go itima dijo ga gagwe, e bile ga go na bosupi bope jo bo bontshang gore barutwa ba ile ba dira jalo. Go akanngwa gore lekgetlo la ntlha la go itima dijo ka malatsi a le 40 pele ga Ista lo umakilwe mo makwalong a ga Athanasius a a neng a a kwala ka 330 C.E.

E re ka Jesu a ile a itima dijo fa a sena go kolobediwa mme e seng pele a swa, kgang ya go bo madumedi mangwe a keteka Lent mo dibekeng tse di tlang pele ga Ista e ka tswa e lebega e sa tlwaelega. Le fa go ntse jalo, go ne go tlwaelegile gore Bababelona, Baegepeto le Bagerika ba bogologolo ba itime dijo ka malatsi a le 40 fa ngwaga o simologa. Go bonala mokgwa ono o batho bangwe ba reng ke wa Bokeresete o tserwe mo go bone.