Fetela kwa tshedimosetsong

 Ruta Bana ba Gago

Josia O ne A Tlhopha go Dira se se Neng se Siame

Josia O ne A Tlhopha go Dira se se Neng se Siame

A O AKANYA gore go thata go dira se se siameng? *— Fa o araba ka ee, batho ba le bantsi ba ka dumalana le wena. Tota le batho ba bagolo ba fitlhela go le thata go dira se ba itseng gore se siame. Mma re bone gore ke eng fa go ne go le thata segolobogolo mo go Josia gore a tlhophe go dira se se siameng. A o itse gore e ne e le mang?—

Josia e ne e le morwa Amone kgosi ya Juda, yo o neng a na le dingwaga di le 16 fela fa Josia a ne a tsholwa. Amone o ne a le bosula fela jaaka rraagwe e bong Kgosi Manase. Tota e bile, Manase e ne e le mmusi yo o boikepo thata ka dingwaga di le dintsi. Le fa go ntse jalo, o ne a gapiwa ke Baasiria mme ba mo isa kwa Babelona e le legolegwa. Fa a ntse a le kwa kgolegelong, Manase o ne a rapela Jehofa gore a mo itshwarele mme Jehofa o ne a dira jalo.

Fa Manase a sena go gololwa kwa botshwaro, o ne a boela kwa Jerusalema mme a simolola go busa gape e le kgosi. Ka yone nako eo o ne a baakanya dilo tsotlhe tse di bosula tse a neng a di dirile mme a thusa batho go direla Jehofa. O tshwanetse a bo a ile a utlwa botlhoko fa morwawe e bong Amone a ne a sa latele sekao sa gagwe se se molemo. Josia o ne a tsholwa mo e ka nnang ka yone nako eo. Baebele ga e tlhalose gore Manase o ne a fetsa nako e e kana kang a na le setlogolo sa gagwe e bong Josia. Mme gone, a o akanya gore Manase a ka tswa a ile a leka go mo thusa gore a direle Jehofa?—

Fa Josia a ne a le dingwaga di le thataro fela, Manase o ne a tlhokafala mme rraagwe Josia e bong Amone o ne a nna kgosi. Amone o ne a busa dingwaga di le pedi fela pele batlhanka ba gagwe ba mmolaya. Ka jalo, Josia o ne a nna kgosi ya Juda a le dingwaga di le robedi. (2 Ditiragalo, kgaolo 33) O akanya gore go ile ga diragala eng morago ga moo? A Josia o ne a tlhopha go latela sekao se se sa siamang sa ga rraagwe e bong Amone, kgotsa a o ne a latela se se molemo sa ga rraagwemogolo e bong Manase yo o neng a ikotlhaile?—

Tota le fa Josia a ne a le mmotlana, o ne a itse gore o batla go direla Jehofa. Ka jalo, o ne a reetsa batho ba ba neng ba rata Jehofa go na le go reetsa ditsala tsa ga  rraagwe. Le fa Josia a ne a na le dingwaga di le robedi fela, o ne a itse gore go ne go siame go reetsa batho ba ba ratang Modimo. (2 Ditiragalo 34:1, 2) A o ka rata go itse sengwe ka batho ba ba neng ba gakolola Josia e bile e le dikao tse di molemo mo go ene?—

Moporofeti Sefania ke mongwe wa batho ba ba neng ba tlhomela Josia sekao se se molemo. E ne e le wa losika lwa ga Josia ka gonne go ka direga gore e ne e le setlogolwana sa ga rraagwe Manase e bong Kgosi Hesekia yo o molemo. Fa Josia a ne a simolola go busa e le kgosi, Sefania o ne a kwala buka ya Baebele e e bidiwang ka leina la gagwe. Fa Sefania a ne a tlhagisa ka dilo tse di bosula tse di neng di tla diragalela batho ba ba neng ba sa tlhopha go dira se se siameng, ga go pelaelo gore Josia ene o ne a tlhwaela ditlhagiso tseno tsebe.

Gape go ne go na le Jeremia, yo o ka tswang o ile wa utlwela ka ene. Jeremia le Josia e ne e le makawana a a godileng mmogo. Jehofa o ne a tlhotlheletsa Jeremia go kwala buka ya Baebele e e bidiwang Jeremia. Fa Josia a ne a swa kwa ntweng, Jeremia o ne a kwala pina e e kgethegileng ya khutsafalo, a tlhalosa kafa a utlwileng botlhoko thata ka gone. (2 Ditiragalo 35:25) Re ka akanya kafa ba tshwanetseng ba bo ba ne ba kgothatsana ka gone gore ba nne ba ikanyega mo go Jehofa!

Sefania le Jeremia ba ka tswa ba thusitse Josia jang gore a dire se se siameng?

O akanya gore o ka solegelwa molemo jang fa o ithuta ka Josia?— Fa e le gore le wena fela jaaka Josia ga o na rre yo o direlang Jehofa, a go mongwe yo o ka go thusang go ithuta ka Modimo? Gongwe motho yoo ke mmè wa gago, rremogolo, mmèmogolo kgotsa mongwe wa losika. Kgotsa gongwe ke mongwe yo o direlang Jehofa yo mmè wa gago a ka mo letlang gore a ithute le wena.

Le fa Josia e ne e le ngwana, o ne a godile sentle mo tlhaloganyong go itse gore o tshwanetse go nna le ditsala tse di direlang Jehofa. E kete o ka dira se se tshwanang mme o tlhophe go dira se se siameng.

^ ser. 3 Fa o bala le bana, letshwao la thaladi le go gakolola gore o eme mme o ba kgothaletse go ntsha maikutlo a bone.