Fetela kwa tshedimosetsong

Fetela go diteng

Go Ise go Ye Kae go Tla Nna le Lefatshe la Paradaise!

Go Ise go Ye Kae go Tla Nna le Lefatshe la Paradaise!

 Go Ise go Ye Kae go Tla Nna le Lefatshe la Paradaise!

“Rraarona yo o kwa legodimong, a leina la gago le nne boitshepo, bogosi jwa gago bo tle, thato ya gago e dirwe, mo lefatsheng jaaka kwa legodimong.”—Mathaio 6:9, 10, The Jerusalem Bible.

THAPELO eno e e tumileng, e batho ba le bantsi ba e bitsang Rara wa Rona kgotsa Thapelo ya Morena, e naya batho tsholofelo. Jang?

Jaaka thapelo eno e bontsha, Bogosi jwa Modimo bo tla dira gore thato ya Modimo e dirwe mo lefatsheng fela jaaka e dirwa kwa legodimong. Mme thato ya Modimo ke go dira lefatshe gore e nne Paradaise. (Tshenolo 21:1-5) Totatota Bogosi jwa Modimo ke eng mme bo tla dira jang gore lefatshe e nne Paradaise?

Puso ya Mmatota

Bogosi jwa Modimo ke puso ya mmatota. Gore puso nngwe le nngwe e dire sentle, e tlhoka go nna le babusi, melao le babusiwa. A Bogosi jwa Modimo bo na le dilo tseno? Ela tlhoko tsela e Baebele e arabang ka yone dipotso tse tharo tse di latelang:

Ke bomang ba ba busang mo Bogosing jwa Modimo? (Isaia 33:22) Jehofa Modimo o tlhomile Morwawe, Jesu Keresete gore a etelele pele Bogosi jono. (Mathaio 28:18) Jesu o ne a kaelwa ke Jehofa go tlhopha palo e e rileng ya batho go tswa mo “lotsong longwe le longwe le teme le batho le setšhaba” ba ba tla busang le ene e le ‘dikgosi mo lefatsheng.’—Tshenolo 5:9, 10.

Bogosi jwa Modimo bo tlhometse babusiwa ba jone melao efe gore ba e ikobele? Mengwe ya melao kgotsa ditaelo tseo di tlhoka gore ba tseye kgato e e rileng. Jesu o ne a bua ka molao o o botlhokwa thata mo melaong eo, a re: “‘O rate Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago.’ Eno ke taelo e kgolo thata e bile e le ya ntlha. Ya bobedi, e e tshwanang le yone, ke eno, ‘O rate moagelani wa gago jaaka o ithata.’”—Mathaio 22:37-39.

 Melao e mengwe e tlhoka gore babusiwa ba Bogosi jwa Modimo ba se ka ba dira dilo dingwe. Ka sekai, Baebele e bua jaana ka tlhamalalo: “O se ka wa itsietsa! Ga go na ope yo o sa siamang kgotsa yo o obamelang medingwana kgotsa yo o sa ikanyegeng mo lenyalong kgotsa yo o senang maitsholo a mantle kgotsa mosodoma yo o tla tsenang mo Bogosing jwa Modimo. Le fa e le legodu kgotsa motho yo o pelotshetlha kgotsa letagwa kgotsa ope fela yo o roganang le yo o tsietsang batho ba bangwe.”—1 Bakorintha 6:9, 10, Contemporary English Version.

Babusiwa ba Bogosi jwa Modimo ke bomang? Jesu o ne a tshwantsha babusiwa ba Bogosi jwa Modimo le dinku. O ne a re: “Di tla reetsa lentswe la me, mme di tla nna letsomane le le lengwe, modisa a le mongwe.” (Johane 10:16) Gore motho a busiwe ke Bogosi jwa Modimo, o tshwanetse gore a se ka a bua fela gore o latela Modisa yo o Molemo e bong Jesu mme o tshwanetse le go dira se a se laelang. Jesu o ne a re: “Ga se mongwe le mongwe yo o nthayang a re, ‘Morena, Morena,’ yo o tla tsenang mo bogosing jwa magodimo, mme yo o dirang thato ya ga Rre yo o kwa magodimong o tla tsena.”—Mathaio 7:21.

Ka jalo, babusiwa ba Bogosi jwa Modimo ba tlotla leina la Modimo e bong Jehofa le go le dirisa fela jaaka Jesu a ne a dira. (Johane 17:26) Ba ikobela taelo ya ga Jesu ya gore ba rute ba bangwe ka “dikgang tse di molemo tseno tsa bogosi.” (Mathaio 24:14; 28:19, 20) Mme ba tshwanetse go ratana ka lorato lwa mmatota.—Johane 13:35.

Go “Senya ba ba Senyang Lefatshe”

Maemo a gone jaanong mo lefatsheng a bontsha gore Bogosi jwa Modimo bo tla tloga bo tsaya kgato go tlisa diphetogo tse dikgolo mo lefatsheng. Re itse seo jang? Dingwaga di le dikete tse pedi tse di fetileng, Jesu o ne a tlhalosa sesupo se se nang le dikarolo tse di dintsi se se tla bontshang gore “bogosi jwa Modimo bo gaufi.” (Luke 21:31) Jaaka go bontshitswe mo setlhogong se se fetileng, dikarolo tsa sesupo seo di bonala sentle mo lefatsheng lotlhe.

Ke eng se se tla diregang morago ga moo? Jesu a re: “Ka nako eo go tla nna le pitlagano e kgolo e e jaaka e e iseng e ko e nne fa e sale ka tshimologo ya lefatshe go fitlha jaanong, nnyaa, le gone e se kitla e nna gone gape.” (Mathaio 24:21) Ano ga se masetlapelo a a bakiwang ke batho. Go na le moo, ke kgato e Modimo a e tsayang go “senya ba ba senyang lefatshe.” (Tshenolo 11:18) Batho ba ba boikepo, ba bopelotshetlha jwa bone bo batlileng bo senya lefatshe “ba tla kgaolwa mo lefatsheng.” Mme ba ba se nang molato, ba ba direlang Modimo ka tsela e a e amogelang ‘ba tla sala mo go lone.’—Diane 2:21, 22.

Jehofa Modimo o na le mabaka a a utlwalang sentle a go tsaya kgato eno e e masisi. Ka ntlha yang? Akanya ka setshwantsho seno: A re re o na le folete e o e hirisitseng. Bangwe ba batho ba ba hirileng moo ba itshwere sentle e bile ba a akanyetsa; ba duela rente mme ba tlhokomela folete sentle. Le fa go ntse jalo, batho ba bangwe ba ba hirileng bone ba itaya ba bangwe tsebe e bile ga ba ba akanyetse; ba gana go duela rente mme ba senya folete eo. Le fa o ba tlhagisa gangwe le gape, ba tswelela pele ba sa itshware sentle. O ne o ka dira eng? E re ka folete eo e le ya gago, ga go pelaelo gore o tla ba ntsha mo go yone.

Ka tsela e e tshwanang, Jehofa Modimo, ka e le ene Mmopi wa lefatshe le dilo tsotlhe tse di mo go lone, o na le tshwanelo ya go swetsa gore ke mang yo a tla mo letlang go nna mo go lone. (Tshenolo 4:11) Jehofa o ne a re boikaelelo jwa gagwe ke go fedisa batho ba ba sa siamang mo lefatsheng leno ba ba tlhokomologang thato ya gagwe le ba ba gatakang ditshwanelo tsa ba bangwe.—Pesalema 37:9-11.

Paradaise e e Tsosolositsweng

Go ise go ye kae, Bogosi jwa Modimo jo bo laolwang ke Jesu Keresete bo tla busa lefatshe. Jesu o ne a re tshimologo eno e ntšha ke “go dirwa sesha ga dilo tsotlhe.” (Mathaio 19:28, New International Version) Maemo a tla bo a ntse jang? Ela tlhoko se Baebele e se solofetsang:

Pesalema 46:9. “O dira gore dintwa di kgaotse go ya kwa ntlheng ya lefatshe.”

Isaia 35:1. “Naga le kgaolo e e se nang metsi di  tla itumela, le lebala le le sekaka le tla ipela le bo le ntsha dithunya jaaka saferone.”

Isaia 65:21–23. “Batho ba me ba ba tlhophilweng ba tla dirisa tiro ya diatla tsa bone ka botlalo. Ga ba kitla ba direla ka natla lefela, le fa e le go tsholela pheretlhego.”

Johane 5:28, 29. “Nako e etla e mo go yone botlhe ba ba mo mabitleng a kgakologelo ba tla utlwang lentswe la [ga Jesu] ka yone mme ba tla tswa.”

Tshenolo 21:4. “[Modimo] o tla phimola dikeledi tsotlhe mo matlhong a bone, mme loso lo tla bo lo seyo, le fa e le khutsafalo le fa e le selelo le fa e le botlhoko di tla bo di sa tlhole di le gone.”

Mabaka a go Dumela

A o dumela ditsholofetso tsa Baebele? Baebele e ne ya bolelela pele gore batho ba le bantsi ga ba na go di dumela. Ya re: “Mo metlheng ya bofelo go tla tla basotli . . . ba tswelela go ya ka dikeletso tsa bone mme ba re: ‘Go kae go nna gone mono ga gagwe mo go solofeditsweng? Aitsane, go tswa letsatsing le borraaronamogologolwane ba neng ba robala mo losong ka lone, dilo tsotlhe di sa ntse di ntse jaaka go tswa kwa tshimologong ya popo.’” (2 Petere 3:3, 4) Mme basotli bao ba fositse fela thata. Akanya ka mabaka a le manè a go bo o tshwanetse go dumela se Baebele e se bolelang:

(1) Modimo o ne a tsaya kgato ka batho ba ba boikepo mo nakong e e fetileng. Sekai se se tlhomologileng ke sa Morwalela wa motlha wa ga Noa.—2 Petere 3:5-7.

(2) Lefoko la Modimo le ne la bolelela pele ka tlhomamo maemo a a leng teng mo lefatsheng lotlhe gompieno.

(3) Dilo tsotlhe ga ‘di a nna jaaka go tswa kwa tshimologong ya popo.’ Tsela e batho ba tshelang ka yone, maitsholo a bone le tikologo ya rona di nnela maswe go ya pele.

(4) Gone jaanong “dikgang tse di molemo tsa Bogosi” di rerwa mo lefatsheng lotlhe go bontsha gore mo nakong e e sa fediseng pelo “bokhutlo bo tla tla.”—Mathaio 24:14.

Basupi ba ga Jehofa ba go laletsa gore o ithute le bone Lefoko la Modimo, Baebele, gore o kgone go ithuta mo go oketsegileng ka tsholofelo ya botshelo jo bo sa khutleng mo pusong ya Bogosi jwa Modimo. (Johane 17:3) Ee, re letetswe ke isagwe e e itumedisang. Go ise go ye kae, re tla itumelela dinako tse di monate! A le wena o tla nna teng koo?

[Mafoko a a mo go tsebe 7]

Batho ba ba reng dilo ga di kitla di fetoga mme di tla nna fela jaaka di ntse, ba fositse fela thata

[Setshwantsho mo go tsebe 8]

A le wena o tla nna teng koo?