Fetela kwa tshedimosetsong

Fetela go diteng

Go Batla Dikarabo

Go Batla Dikarabo

 Go Batla Dikarabo

“Fa re se na go bona ‘kafa’ re ka itshedisang ka gone, re se na go nna le dilo tsa manobonobo—tse di jaaka sedirisiwa se se fetlhang moya o o tsididi le o o mogote, diletswa tse di maatla tsa mmino le maungo a a foreshe ngwaga otlhe—re sala re ntse re ipotsa gore ‘lebaka’ la go bo re tshela ke lefe. Ke ka ntlha yang fa re kgaratlha jaana? Boikaelelo jwa seo ke eng?” David G. Myers, porofesa wa thutotlhaloganyo kwa Hope College, Holland, Michigan, U.S.A.

O NE o ka araba jang dipotso tse di boditsweng ke porofesa yono? Batho bangwe ba ka nna ba ipotsa gore a tota go botlhokwa go senya nako ba ntse ba batlana le dikarabo tsa dipotso tseno. Le fa go ntse jalo, go leka go itlhokomolosa dipotso tseno go tshwana le go leka go itlhokomolosa letlapana le le mo setlhakong sa gago—o ka kgona go tswelela pele o tsamaya, mme ga o kitla o tsamaya sentle.

Fa e le gore o kile wa ipotsa gore boikaelelo jwa botshelo ke eng, ga se wena fela. Go ya ka nngwe ya dipatlisiso tse dikgolo tse di kileng tsa dirwa ke porojeke ya dipatlisiso ya World Values Survey kaga mekgwa ya batho, palo e e ntseng e oketsega ya batho mo dinageng di le dintsi ba akanya ka “bokao le boikaelelo jwa botshelo.”

Fa o batla go nna le kagiso ya mmatota ya mogopolo, o tshwanetse go bona dikarabo tsa dipotso tse tharo tse di botlhokwa.

Re tswa kae?

Boikaelelo jwa botshelo ke bofe?

Isagwe e re tsholetse eng?

O ka bona kae dikarabo tse di boammaaruri tsa dipotso tseno? Go na le go araba dipotso tseno ka go fopholetsa kgotsa go ya ka botlhale jwa batho, ditlhogo tse di latelang di tla re naya dikarabo tse di mo Lefokong la Modimo, e leng Baebele. Re go kopa gore o bule Baebele ya gago mme o iponele gore ya reng.