Fetela kwa tshedimosetsong

Fetela go diteng

Lebaka La go Bo re Gopola Sejo sa Morena sa Maitseboa

Lebaka La go Bo re Gopola Sejo sa Morena sa Maitseboa

“Nnang lo dire seno e le go nkgopola.” —1 BAKOR. 11:24.

1, 2. Jesu o ne a dira eng mo maitseboeng a Nisane 14, 33 C.E.? (Bona setshwantsho se se kwa tshimologong ya setlhogo seno.)

LETSATSI le phirimile mme ngwedi o o feletseng o apesitse Jerusalema ka lesedi le le phatsimang sentle. Ke maitseboa a Nisane 14, 33 C.E. Jesu le baaposetoloi ba gagwe ba sa tswa go keteka Tlolaganyo, ba gopola fa Baiseraele ba ne ba gololwa mo bokgobeng kwa Egepeto mo dingwageng di le 1 500 tse di fetileng. Jesu o na le baaposetoloi ba gagwe ba ba ikanyegang ba le 11, jaanong o tlhoma dijo tse di kgethegileng—tse di tla nnang segopotso sa loso lwa gagwe pele letsatsi leno le wela. *Math. 26:1, 2.

2 Jesu o a leboga mme o fetisetsa senkgwe se se sa bedisiwang mo baaposetoloing ba gagwe a bo a re: “Tsayang, jang.” Gape, a tsaya senwelo mme, ya re a sena go leboga, a se ba naya, a re: “Nwang mo go sone, lotlhe.” (Math. 26:26, 27) Jesu ga a kitla a tlhola a naya balatedi ba gagwe ba ba ikanyegang dijo tse dingwe gape mme go na le dilo di le dintsi tse a tla ba bolelelang tsone mo bosigong jono jo bo botlhokwa.

3. Setlhogo seno se tla sekaseka dipotso dife?

 3 Ka jalo, eo ke yone tsela e Jesu a ileng a tlhoma Segopotso sa loso lwa gagwe ka yone, se gape se bidiwang “dijo tsa maitseboa tsa Morena.” (1 Bakor. 11:20) Batho bangwe ba ka ipotsa jaana malebana le Segopotso: Ke ka ntlha yang fa re tshwanetse go gopola loso lwa ga Jesu? Senkgwe le beine di kaya eng? Re ka ipaakanyetsa Segopotso jang? Ke bomang ba ba tshwanetseng go ja? Mme Bakeresete ba tsibogela jang se Dikwalo di se buang ka tsholofelo e ba nang le yone?

LEBAKA LA GO BO RE GOPOLA LOSO LWA GA JESU

4. Loso lwa ga Jesu lo ne lwa dira gore re kgone go nna le eng?

4 E re ka re le ditlogolwana tsa ga Adame, re ile ra rua boleo le loso. (Bar. 5:12) Ga go na motho ope yo o ka kgonang go ntsha botshelo jwa gagwe kgotsa jwa ba bangwe go bo naya Modimo e le thekololo. (Pes. 49:6-9) Le fa go ntse jalo, Jesu o ne a ntsha botshelo jwa gagwe go duela tlhwatlhwa ya thekololo e e amogelesegang—mmele wa gagwe o o itekanetseng le madi a gagwe a a tsholotsweng. Fa Jesu a ne a naya Modimo boleng jwa thekololo ya gagwe, o ne a dira gore re kgone go gololwa mo boleong le mo losong mme re amogele mpho ya botshelo jo bo sa khutleng.—Bar. 6:23; 1 Bakor. 15:21, 22.

5. (a) Re itse jang gore Modimo le Keresete ba rata batho botlhe? (b) Ke ka ntlha yang fa re tshwanetse go nna gone kwa segopotsong sa loso lwa ga Jesu?

5 Thulaganyo ya thekololo e bontsha gore Modimo o rata batho botlhe. (Joh. 3:16) Setlhabelo sa ga Jesu se bontsha gore le ene o a re rata. Tota e bile pele Jesu a tla mo lefatsheng, e ne e le “modiri yo o setswerere” a na le Modimo e bile o ne a “rata bomorwa batho.” (Dia. 8:30, 31) Re tshwanetse go leboga Modimo le Morwawe ka go nna gone kwa Segopotsong sa loso lwa ga Jesu mme seo se tla bontsha gore re ikobela taelo eno: “Nnang lo dire seno e le go nkgopola.”—1 Bakor. 11:23-25.

SE DITSHWANTSHETSO DI SE KAYANG

6. Senkgwe le beine tse di dirisiwang ka nako ya Segopotso di kaya eng?

6 Fa Jesu a ne a tlhoma Segopotso, ga a ka a fetola senkgwe le beine ka kgakgamatso go nna nama le madi a gagwe. Go na le moo, o ne a bua jaana ka senkgwe: “Seno se kaya mmele wa me.” O ne a bua jaana malebana le beine: “Seno se kaya ‘madi a kgolagano’ a me, a a tla tshololelwang ba le bantsi.” (Mar. 14:22-24) Ka jalo, go bonala sentle gore senkgwe le beine di ne di dirisiwa e le ditshwantshetso.

7. Senkgwe se se dirisiwang ka nako ya Segopotso se emela eng?

7 Mo tiragalong eo e e botlhokwa thata ya 33 C.E., Jesu o ne a dirisa senkgwe se se sa bedisiwang se se neng se setse morago ga dijo tsa Tlolaganyo. (Ekes. 12:8) Ka dinako dingwe Dikwalo fa di bua ka sebediso di kaya tlhotlheletso e e bosula kgotsa boleo. (Math. 16:6, 11, 12; Luke 12:1) Ka jalo, go dirisa ga ga Jesu senkgwe se se sa bedisiwang go botlhokwa ka gonne go ne go tshwantshetsa sentle mmele wa gagwe o o senang boleo. (Baheb. 7:26) Ke gone ka moo senkgwe se se ntseng jalo se dirisiwang ka nako ya Segopotso.

8. Senwelo sa beine se se dirisiwang ka nako ya Segopotso se emela eng?

8 Beine e Jesu a neng a e dirisa ka Nisane 14, 33 C.E., e ne e emela madi a gagwe mme le gompieno go ntse fela jalo ka senwelo sa beine se se dirisiwang ka nako ya Segopotso. Madi a ga Jesu a ne a tshololwa kwa Gologotha, lefelo le le ka kwa ntle ga Jerusalema, gore batho “ba le bantsi ba itshwarelwe maleo.” (Math. 26:28; 27:33) E re ka senkgwe le beine tse di dirisiwang ka nako ya Segopotso di emela setlhabelo se se tlhwatlhwakgolo sa ga Jesu se se neng sa ntshediwa batho ba ba kutlo e bile re anaanela thulaganyo eo e e lorato, go a tshwanela gore mongwe le mongwe wa rona a ipaakanyetse go nna gone ngwaga le ngwaga fa go gopolwa Sejo sa Morena sa Maitseboa.

 DITSELA DINGWE TSA GO IPAAKANYETSA SEGOPOTSO

9. (a) Ke ka ntlha yang fa go le botlhokwa go nna re bala mmalo wa Baebele wa Segopotso? (b) O ikutlwa jang ka thekololo?

9 Re ka tlhatlhanya ka se Jesu a ileng a se dira pele a swa, ka go bala mmalo wa Baebele wa Segopotso o thulaganyo ya one e fitlhelwang mo bukaneng ya Go Tlhatlhoba Dikwalo ka Malatsi Otlhe. Go dira jalo go tla re thusa go baakanya dipelo tsa rona pele ga Sejo sa Morena sa Maitseboa. * Kgaitsadi mongwe o ne a kwala jaana: “Re lebile pele go ya kwa Segopotsong. Ngwaga le ngwaga Segopotso e nna tiragalo e e kgethegileng thata. Ke gopola ke eme mo mmoshareng . . , ke lebile setopo sa ga rre mme seo se ne sa dira gore ke anaanele thekololo fela thata. . . . Ke ne ke itse ditemana tsotlhe e bile ke kgona go di tlhalosa! Mme fa ke lemoga gore tota rre o ne a sa tlhole a le gone, ke yone nako eo pelo ya me e neng ya phophoma ka boitumelo fa ke akanya ka se thekololo eo e e botlhokwatlhokwa e tla se dirang.” Eleruri fa re ipaakanyetsa Segopotso, re dira sentle go akanya kafa setlhabelo sa ga Jesu se re gololang ka gone mo diphelelong tsa boleo le loso.

Dirisa didirisiwa tse o nang le tsone go baakanya pelo ya gago pele ga Segopotso (Bona serapa 9)

10. Go ipaakanyetsa Segopotso go ka ama jang bodiredi jwa rona?

10 Go ipaakanyetsa Segopotso go ka nna ga akaretsa go dira dithulaganyo tsa go oketsa bodiredi jwa gago ka tsela nngwe, gongwe ka go nna mmulatsela yo o thusang ka paka ya Segopotso. Fa re ntse re laletsa batho ba re ithutang Baebele le bone le ba bangwe go nna gone ka nako ya Sejo sa Morena sa Maitseboa, re tla ipelela go bua ka Modimo, ka Morwawe le ka ditshegofatso tse di letetseng batho ba ba itumedisang Jehofa le go mmaka.—Pes. 148:12, 13.

11. Bakorintha bangwe ba ne ba ja le go nwa ditshwantshetso tsa Segopotso ka tsela e e sa tshwanelang jang?

11 Fa o ntse o ipaakanyetsa Sejo sa Morena sa Maitseboa, sekaseka se moaposetoloi Paulo a neng a se kwalela phuthego ya Bakeresete ba kwa Korintha. (Bala 1 Bakorintha 11:27-34.) Paulo o ne a re fa mongwe a ja senkgwe le go nwa senwelo a sa tshwanela o “molato mabapi le mmele wa Morena [Jesu Keresete] le madi” a gagwe. Ka jalo, motlodiwa o tshwanetse go ‘ipona a tshwanelega fa a sena go ikeleka’ mme ke fela fa a sena go dira jalo a ka nnang a ja le go nwa ditshwantshetso. Fa a sa dire jalo, o “ijela a bo a inwela katlholo.” Ka ntlha ya boitsholo jo bo sa siamang, Bakorintha ba le bantsi ba ne ba le “bokoa e bile ba bobolela ruri, mme ba le bantsi thata ba [ne ba] robetse mo losong  [lwa semoya].” Gongwe bangwe ba ile ba ja le go nwa thata jaana pele kgotsa ka nako ya Segopotso, mo ba neng ba sa tlhapogelwa mo tlhaloganyong e bile ba sa thanya semoyeng. Go ja le go nwa ditshwantshetso ka tsela eno e e sa tshwanelang, go dirile gore Modimo a se ka a ba amogela.

12. (a) Paulo o ne a tshwantsha Segopotso le eng, mme ke tlhagiso efe e a neng a e naya ba ba jang? (b) Motho yo o jang o tshwanetse go dira eng fa a dirile boleo jo bo masisi?

12 Paulo o ne a tshwantsha Segopotso le dijo tse motho a di jang le ba bangwe, mme o ne a bua jaana a tlhagisa batho ba ba jang le go nwa ditshwantshetso: “Ga lo ka ke lwa nwa senwelo sa ga Jehofa le senwelo sa madimona; ga lo ka ke lwa ja mo ‘tafoleng ya ga Jehofa’ le mo tafoleng ya madimona.” (1 Bakor. 10:16-21) Fa motho yo o jang le go nwa ditshwantshetso ka nako ya Sejo sa Morena sa Maitseboa a dirile boleo jo bo masisi, o tshwanetse go batla thuso ya semoya. (Bala Jakobe 5:14-16.) Fa motlodiwa yoo a bontshitse “maungo a a tshwanelang boikwatlhao” mme a ja le go nwa ditshwantshetso ka nako ya Segopotso, o tla bo a sa nyatse setlhabelo sa ga Jesu fa a dira jalo.—Luke 3:8.

13. Ke ka ntlha yang fa go le botlhokwa gore re rapele ka ditsholofetso tse Modimo a re solofeditseng tsone?

13 Fa re ntse re ipaakanyetsa Segopotso, go tla bo go le botlhokwa gore re akanyetse ka thapelo se Modimo a re solofeditseng sone. Ga go na motlhanka ope wa ga Jehofa le molatedi ope yo o ikanyegang wa Morwawe yo o batlang go tlontlolola setlhabelo sa ga Jesu ka go ja le go nwa ditshwantshetso tsa Segopotso fa a sa tlhomamisega ka botlalo gore ke Mokeresete yo o tloditsweng. Ka jalo, motho a ka itse jang gore o tshwanelegela go ja le go nwa ditshwantshetso?

KE MANG YO O TSHWANETSENG GO JA?

14. Kgolagano e ntšha e amana jang le go ja le go nwa ditshwantshetso tsa Segopotso?

14 Batho ba ba tshwanelegelang go ja le go nwa ditshwantshetso tsa Segopotso ba tlhomamisegile tota gore ke maloko a kgolagano e ntšha. Jesu o ne a bua jaana malebana le beine: “Senwelo seno se kaya kgolagano e ntšha ka ntlha ya madi a me.” (1 Bakor. 11:25) Modimo o ne a dirisa moporofeti Jeremia go bolelela pele gore o tla dira kgolagano e ntšha e e sa tshwaneng le kgolagano ya Molao e a neng a e dirile le Baiseraele. (Bala Jeremia 31:31-34.) Modimo o ne a dira kgolagano e ntšha le Iseraele wa semoya. (Bagal. 6:15, 16) Kgolagano eno e ne ya tlhomamisiwa ka setlhabelo sa ga Keresete e bile e ne ya simolola go dira ka ntlha ya madi a gagwe a a tsholotsweng. (Luke 22:20) Jesu ke Motsereganyi wa kgolagano e ntšha mme batlodiwa ba ba ikanyegang ba ba mo go yone ba amogela boswa jwa go ya kwa legodimong.—Baheb. 8:6; 9:15.

15. Ke bomang batsayakarolo mo kgolaganong ya Bogosi mme ba letetswe ke tshiamelo efe fa ba ikanyega?

15 Ba ba tshwanelegelang go ja le go nwa ditshwantshetso tsa Segopotso ba a itse gore ke batsayakarolo mo kgolaganong ya Bogosi. (Bala Luke 12:32.) Ba ba ileng ba nna balatedi ba ba tloditsweng ba ga Jesu mme ba ikanyega mo go ene le go boga le ene, ba ne ba tla busa le ene kwa legodimong. (Bafil. 3:10) E re ka batlodiwa ba ba ikanyegang e le batsayakarolo mo kgolaganong ya Bogosi, ba tla busa le Keresete kwa legodimong ka bosakhutleng. (Tshen. 22:5) Batho bao ba na le tshwanelo ya go ja le go nwa ditshwantshetso ka nako ya Sejo sa Morena sa Maitseboa.

16. Ka bokhutshwane, tlhalosa bokao jwa Baroma 8:15-17.

16 Ba ba supelwang ke moya gore ke bana ba Modimo ke bone fela ba tshwanetseng go ja le go nwa ditshwantshetso tsa Segopotso. (Bala Baroma 8:15-17.) Ela tlhoko gore Paulo o dirisitse lefoko la Searamaika “Aba,” le le kayang “Wena Rara!” Ngwana a ka nna a dirisa lefoko leno fa a bua le rraagwe, ka gonne lefoko leno le akaretsa dilo tse pedi, lefoko “papa” le bontsha kamano e e lorato e a nang le yone le rraagwe mme lefoko “rra” le bontsha tlotlo e a nang le yone mo go ene. Ba ba ileng ba amogela “moya wa go tsholwa jaaka bana,” ke bana ba  Modimo ba semoya. Moya wa Modimo o supela moya wa bone mme seo se dira gore ba lemoge gore ke bana ba ba tloditsweng ba ga Jehofa. Ga se kgang fela ya gore ga ba kgatlhegele go tshela mo lefatsheng le lesha. Ba tlhomamisegile gore fa ba ikanyega go ya losong ba tla nna baruaboswa mmogo le Jesu mo Bogosing jo bo kwa legodimong. Gompieno, go setse ba le mmalwa fela mo go ba ba 144 000 ba ba latelang dikgato tsa ga Keresete ba ba ileng ba ‘tlodiwa go tswa kwa go yo o boitshepo’ e bong Jehofa. (1 Joh. 2:20; Tshen. 14:1) Moya wa gagwe o ba tlhotlheletsa go goa ba re, “Aba, Rara!” A bo ba na le kamano e e molemolemo jang ne le Modimo!

GO TSIBOGELA TSHOLOFELO E E MO DIKWALONG

17. Batlodiwa ba na le tsholofelo efe mme ba ikutlwa jang ka yone?

17 Fa o le Mokeresete yo o tloditsweng, tsholofelo ya go nna kwa legodimong ke sengwe sa botlhokwa se o se umakang mo dithapelong tsa gago tsa botho. Fa Baebele e bua ka go ‘solofediwa go nyalwa’ ke Monyadi yo o kwa legodimong e bong Jesu Keresete, o lebisa kgang eno mo go wena e bile o nna o lebile pele go nna karolo ya “monyadiwa” wa ga Keresete. (2 Bakor. 11:2; Joh. 3:27-29; Tshen. 21:2, 9-14) Fa Lefoko la Modimo le tlhalosa tsela e Jehofa a ratang bana ba gagwe ba semoya ka yone, o bua jaana: “Fano go buiwa le nna.” Mme fa Lefoko la ga Jehofa le laya bana ba gagwe ba ba tloditsweng, moya o o boitshepo o go tlhotlheletsa gore o nne kutlo e bile o bue jaana mo pelong ya gago: “Fano go buiwa le nna.” Ka jalo, moya wa Modimo o supela moya wa gago gore o na le tsholofelo ya go tshela kwa legodimong.

18. Ba “dinku tse dingwe” ba na le tsholofelo efe mme o ikutlwa jang ka yone?

18 Ka fa letlhakoreng le lengwe, fa o le karolo ya “boidiidi jo bogolo” jwa “dinku tse dingwe,” Modimo o go solofeditse gore o tla tshela mo lefatsheng. (Tshen. 7:9; Joh. 10:16) O batla go tshelela ruri mo Paradaiseng e bile o itumelela go tlhatlhanya ka se Baebele e se buang malebana le tsela e botshelo bo tla bong bo le ka yone mo lefatsheng le lesha. O lebile pele go itumelela letlotlo la kagiso o tshela le ba lelapa la gago mmogo le batho ba bangwe ba ba siameng. O swegaswega pelo go tshela ka nako eo batho ba tla bong ba sa tlhole ba tshwenngwa ke tlhaelo ya dijo, khumanego, pogo, bolwetse le loso. (Pes. 37:10, 11, 29; 67:6; 72:7, 16; Isa. 33:24) O eletsa ka pelo yotlhe go amogela bao ba tla bong ba tsositswe mo baswing mme ba na le tsholofelo ya go tshela ka bosakhutleng mo go lone. (Joh. 5:28, 29) A bo o leboga Jehofa jang ne go bo a go segofaditse ka tsholofelo ya go tshela mo lefatsheng! Le fa o sa je le go nwa ditshwantshetso, o nna gone kwa Segopotsong e le go bontsha gore o anaanela thekololo ya setlhabelo sa ga Jesu Keresete.

A O TLA NNA GONE?

19, 20. (a) Tsholofetso e Modimo a go solofeditseng yone e tla direga fa o dira eng? (b) Ke ka ntlha yang fa o tlile go nna gone kwa Sejong sa Morena sa Maitseboa?

19 Le fa o na le tsholofelo ya go tshela mo lefatsheng kgotsa kwa legodimong, tsholofelo eo e ka direga fela fa o bontsha tumelo mo go Jehofa Modimo, Jesu Keresete le mo thekololong. Ka go nna gone kwa Segopotsong, o tla nna le tshono ya go tlhatlhanya ka tsholofelo ya gago le ka botlhokwa jwa loso lwa ga Jesu. Ka jalo, ikemisetse go nna mongwe wa dimilione tsa batho ba ba tla nnang gone kwa Sejong sa Morena sa Maitseboa se se tla tshwarwang fa letsatsi le sena go phirima ka Labotlhano, Moranang 3, 2015, kwa Diholong Tsa Bogosi le kwa mafelong a mangwe go ralala lefatshe.

20 Go nna gone kwa Segopotsong go ka nna ga dira gore o anaanele le go feta setlhabelo sa thekololo sa ga Jesu. Go reetsa ka kelotlhoko fa puo e neelwa go ka nna ga go tlhotlheletsa gore o bontshe go rata baagelani ba gago ka go ba bolelela se o ileng wa se ithuta ka lorato lwa ga Jehofa le ka boikaelelo jo bogolo jo a nang le jone ka batho. (Math. 22:34-40) Dira sotlhe se o ka se kgonang go nna gone kwa Sejong sa Morena sa Maitseboa.

^ ser. 1 Mo Bahebereng, letsatsi le ne le simolola fa letsatsi le phirima go fitlha ka phirimo ya letsatsi le le latelang.

^ ser. 9 Bona Appendix B12 mo Baebeleng ya Thanolo ya Lefatshe le Lesha ka Seesemane.