Fetela kwa tshedimosetsong

Fetela go diteng

“Lo Tla Nna Basupi ba Me”

“Lo Tla Nna Basupi ba Me”

“[Jesu] a ba raya a re: ‘. . . Lo tla nna basupi ba me . . . go ya karolong e e kwa kgakalakgakala ya lefatshe.’”—DIT. 1:7, 8.

1, 2. (a) Mosupi yo o tlhomologileng thata wa ga Jehofa ke mang? (b) Leina Jesu le kaya eng, mme Morwa wa Modimo o ne a tshela go dumalana le bokao jwa leina leo jang?

“KE TSALETSWE sone seo, e bile ke tletse sone seo mo lefatsheng, gore ke supe ka ga boammaaruri.” (Bala Johane 18:33-37.) Fa Jesu Keresete a ne a le mo tshekong ka ntlha ya tsela e a neng a tshela ka yone, o ne a bolelela mmusi wa Moroma yo o neng a busa kwa Judea mafoko ao. Jesu o ne a sa tswa go mmolelela gore ene ke kgosi. Dingwaga morago ga moo, moaposetoloi Paulo o ne a umaka bopelokgale joo jwa ga Jesu, “yo jaaka mosupi a neng a dira polelo e e molemo ya phatlalatsa fa pele ga ga Ponto Pilato.” (1 Tim. 6:13) Gone ke boammaaruri gore ka dinako tse dingwe bopelokgale bo a tlhokega gore motho a nne “mosupi yo o ikanyegang le yo o boammaaruri,” mo lefatsheng le le tletseng letlhoo la ga Satane!—Tshen. 3:14.

2 E re ka Jesu e ne e le leloko la setšhaba sa Bajuda, o ne a tshotswe e le mosupi wa ga Jehofa. (Isa. 43:10) Tota o ne a nna mosupi yo mogolo go feta botlhe ba Modimo a kileng a ba tlhopha go emela leina la Gagwe. Jesu o ne a tsaya masisi bokao jwa leina le Modimo a neng a mo neile lone. Fa moengele a ne a tlhalosetsa Josefa yo o neng a tla godisa Jesu, gore Marea o ne a imisitswe ke moya o o boitshepo, o ne a oketsa ka gore: “O tla tshola morwa, mme o tshwanetse go mo raya leina o re Jesu, gonne o tla boloka batho ba gagabo mo maleong a bone.” (Math. 1:20, 21) Bakanoki ba le bantsi ba Baebele ba dumela gore leina Jesu le tswa mo leineng la Sehebera, Jeshua, mme le na  le khutshwafatso ya leina la Modimo; le kaya gore “Jehofa ke Poloko.” Jesu o ne a tshelela bokao jwa leina la gagwe ka gonne o ile a thusa ‘dinku tse di latlhegileng tsa ntlo ya Iseraele’ go ikwatlhaela maleo a tsone, gore Jehofa a di amogela gape. (Math. 10:6; 15:24; Luke 19:10) Gore Jesu a kgone go dira seo, o ne a rera ka Bogosi jwa Modimo ka tlhagafalo. Mokwadi wa Efangele e bong Mareko o ne a re: “Jesu a tsena mo Galalea, a rera dikgang tse di molemo tsa Modimo a re: ‘Nako e e tlhomilweng e diragaditswe, mme bogosi jwa Modimo bo atametse. Ikwatlhayeng, mme lo nne le tumelo mo dikgannyeng tse di molemo.’” (Mar. 1:14, 15) Gape Jesu o ne a bontsha bopelokgale mme a kgala baeteledipele ba bodumedi ba Bajuda, e leng sengwe sa dilo tseo di ileng tsa dira gore a bolaelwe mo koteng.—Mar. 11:17, 18; 15:1-15.

“DILO TSE DI DIKGOLO TSA MODIMO”

3. Go ne ga diragala eng mo letsatsing la boraro fa Jesu a sena go swa?

3 Jehofa o ne a dira kgakgamatso e kgolo. Mo letsatsing la boraro Jesu a sena go swa loso lo lo setlhogo, Jehofa o ne a mo tsosa mo baswing, e seng ka mmele wa nama, go na le moo e le sebopiwa sa semoya se se sa sweng. (1 Pet. 3:18) Go naya bosupi jwa seo, Morena Jesu o ne a fetola mmele wa gagwe mme a nna motho go bontsha gore o ne a tshela gape. Mo go lone letsatsi le a tsositsweng ka lone, o ne a iponatsha mo e ka nnang makgetlho a le matlhano mo go bangwe ba barutwa ba gagwe.—Math. 28:8-10; Luke 24:13-16, 30-36; Joh. 20:11-18.

4. Jesu o ne a tshwara pokano efe mo letsatsing le a tsositsweng ka lone, mme o ne a re barutwa ba gagwe ba na le maikarabelo afe?

4 Mo lekgetlhong la botlhano, Jesu o ne a iponatsha fa pele ga baaposetoloi ba gagwe ba ba neng ba kokoane mmogo le batho ba bangwe. Mo tiragalong eo e e sa lebalesegeng, re ka re o ne a tshwara thuto ya Lefoko la Modimo. O ne a “bula megopolo ya bone ka botlalo gore e tlhaloganye se se kaiwang ke Dikwalo.” Ka jalo, ba ne ba kgona go tlhaloganya gore Dikwalo di ne di boleletse pele go sa le gale gore o ne a tla bolawa ke baba ba Modimo le gore o ne a tla tsoga ka tsela ya kgakgamatso. Kwa bokhutlong jwa pokano eo e e tshwerweng ka letsatsi le Jesu a tsositsweng ka lone, o ne a tlhalosetsa bareetsi ba gagwe gore ba ne ba na le maikarabelo afe. O ne a ba bolelela gore “go ne go tla rerwa boikwatlhao jwa boitshwarelo jwa maleo ka leina la gagwe mo ditšhabeng tsotlhe—go simolola kwa Jerusalema.” Gape o ne a re: “Lo tshwanetse go nna basupi ba dilo tseno.”Luke 24:44-48.

5, 6. (a) Ke ka ntlha yang fa Jesu a ne a re: “Lo tla nna basupi ba me”? (b) Barutwa ba ga Jesu ba ne ba tshwanetse go itsise batho sengwe sefe se sesha mo boikaelelong jwa ga Jehofa?

5 Ka jalo, malatsi a le 40 morago ga moo, ka nako ya fa Jesu a ne a iponatsha lekgetlho la bofelo mo baaposetoloing ba gagwe, ba tshwanetse ba bo ba ne ba tlhaloganya ka botlalo taelo eno e e sa raraanang mme e le maatla: “Lo tla nna basupi ba me mo Jerusalema mmogo le mo Judea yotlhe le Samarea le go ya karolong e e kwa kgakalakgakala ya lefatshe.” (Dit. 1:8) Ke ka ntlha yang fa Jesu a ne a re: “Lo tla nna basupi ba me,” e seng ba ga Jehofa? Jesu o ka bo a ile a re e nne basupi ba ga Jehofa mme gone batho ba a neng a bua le bone e ne e le Baiseraele, ka jalo e ne e setse e le basupi ba ga Jehofa.

E re ka re le balatedi ba ga Jesu, re tswelela pele re itsise batho ka dilo tse Jehofa a ikaeletseng go di dira mo isagweng (Bona serapa 5, 6)

6 Barutwa ba ga Jesu jaanong ba ne ba tshwanetse go itsise batho sengwe se sesha mo boikaelelong jwa ga Jehofa—sengwe se se fetang kgakala go gololwa ga Baiseraele mo bokgobeng kwa Egepeto mme morago ga moo le go gololwa mo botshwarong kwa Babelona. Loso lwa ga Jesu Keresete le go tsosiwa ga gagwe mo baswing go ne ga thusa gore batho ba gololwe mo bokgobeng jo bo setlhogo le go feta, e leng boleo le loso. Ka Pentekosete ya 33 C.E., barutwa ba ba sa tswang go tlodiwa ba ga Jesu ba ne ba itsise batho ka “dilo tse dikgolo tsa Modimo,” mme ba le bantsi ba ba neng ba utlwa molaetsa ba ne ba o amogela. Ka jalo, fa Jesu a ne a dutse kafa seatleng sa moja sa ga Rraagwe kwa legodimong, o ne a simolola go bona bokao jwa leina la gagwe bo  diragadiwa ka tsela e kgolwane fa diketekete tsa batho di ikwatlhaya mme di bontsha tumelo mo go ene, e le ene yo Jehofa a neng a mo dirisa go boloka batho.—Dit. 2:5, 11, 37-41.

“THEKOLOLO GORE A BONE BA LE BANTSI”

7. Ditiragalo tsa letsatsi la Pentekosete ya 33 C.E. di ne di bontsha eng?

7 Ditiragalo tsa letsatsi la Pentekosete ya 33 C.E., di ne di bontsha gore Jehofa o ne a amogetse ka bopelonomi boleng jwa setlhabelo sa ga Jesu e le tetlanyo kgotsa se bipa maleo a batho. (Baheb. 9:11, 12, 24) Jaaka Jesu a ile a tlhalosa o ne a tletse “e seng go direlwa, fa e se go direla le go ntsha moya wa gagwe e le thekololo gore a bone ba le bantsi.” (Math. 20:28) “Ba le bantsi” ba ba neng ba tla solegelwa molemo ke thekololo ya ga Jesu, e ne e se fela Bajuda ba ba ikwatlhayang. Go na le moo, thato ya Modimo ke gore “batho ba mefuta yotlhe ba bolokwe,” e re ka thekololo e ne e tla ‘tlosa boleo jwa lefatshe!’1 Tim. 2:4-6; Joh. 1:29.

8. Balatedi ba ga Jesu ba ne ba naya bosupi go ya bokgakaleng bofe, mme ba ne ba kgona seo jang?

8 A barutwa bao ba ga Jesu ba bogologolo ba ne ba na le bopelokgale jo bo tlhokegang gore ba tswelele ba naya bosupi ka ene? Ee, ba ne ba na le jone mme gone ba ne ba sa ikaega ka maatla a bone. Moya o o boitshepo wa ga Jehofa o ne wa ba tlhotlheletsa le go ba naya maatla a go tswelela pele ba naya bosupi. (Bala Ditiro 5:30-32.) Dingwaga di ka nna 27 morago ga Pentekosete ya 33 C.E., go ne go ka nna ga twe “boammaaruri jwa dikgang tse di molemo tseo” bo ne bo fitlheletse Bajuda le Baditšhaba “mo popong yotlhe e e kafa tlase ga legodimo.”—Bakol. 1:5, 23.

9. Jaaka go ile ga bolelelwa pele, go ne ga direga eng ka phuthego ya Bokeresete ya kwa tshimologong?

9 Le fa go ntse jalo, ka maswabi phuthego ya Bokeresete ya kwa tshimologong e ne ya leswafala ka bonya ka bonya. (Dit. 20:29, 30; 2 Pet. 2:2, 3; Jude 3, 4) Jesu o ile a tlhalosa gore botlhanogi joo jo bo neng bo tlhotlhelediwa ke “yo o boikepo,” e bong Satane, bo ne bo tla gola le go dira gore Bokeresete jwa boammaaruri bo se ka jwa bonala, go fitlha kwa “bokhutlong jwa tsamaiso ya dilo.” (Math. 13:37-43) Mme morago ga moo, Jehofa o ne a tla tlhoma Jesu gore e nne Kgosi ya lefatshe lotlhe. O ne a mo tlhoma ka Diphalane 1914, e leng se se neng se bontsha gore ‘metlha ya bofelo’ ya tsamaiso e e boikepo ya ga Satane e ne e simologile.—2 Tim. 3:1.

10. (a) Bakeresete ba batlodiwa ba motlha wa segompieno ba ne ba tlhalosa letlha lefe e le la botlhokwa? (b) Go ile ga direga eng ka Diphalane 1914, mme seo se ile sa bonala sentle jang?

10 Bakeresete ba batlodiwa ba motlha wa segompieno ba ne ba tlhalosa go sa le gale gore  Diphalane 1914 e ne e tla nna letlha la botlhokwa. Ba ne ba rialo ka gonne ba bone se boporofeti jwa ga Daniele bo neng bo se tlhalosa ka setlhare se segolo se se neng se kgaotswe mme se tla gola gape morago ga “metlha e supa.” (Dan. 4:16) Fa Jesu a ne a porofeta ka ga go nna gone ga gagwe le ka “bokhutlo jwa tsamaiso eno ya dilo,” o ne a bua ka one motlha ono a re ke “dinako tse di tlhomilweng tsa ditšhaba.” Fa e sa le ka ngwaga o o tshwailweng oo wa 1914, ‘sesupo sa go nna gone ga ga Keresete’ e le Kgosi e ntšha ya lefatshe se ntse se bonala sentle. (Math. 24:3, 7, 14; Luke 21:24) Ka jalo, go tloga ka nako eo go ya pele, “dilo tse dikgolo tsa Modimo,” di ne tsa akaretsa go tlhomiwa ga ga Jesu go nna Kgosi ya lefatshe lotlhe.

11, 12. (a) Kgosi e ntšha ya lefatshe e ne ya simolola go dira eng morago fela ga ntwa ka ngwaga wa 1919? (b) Go tloga mo bogareng jwa dingwaga tsa bo1930 go ya pele, ke eng se se neng sa simolola go bonala sentle? (Bona setshwantsho se se kwa tshimologong ya setlhogo seno.)

11 E re ka Jesu Keresete e ne e le Kgosi e ntšha, go ise go ye kae o ne a simolola go golola balatedi ba gagwe ba batlodiwa mo botshwarong jwa “Babelona o Mogolo.” (Tshen. 18:2, 4) Mo ngwageng wa morago ga ntwa ka ngwaga wa 1919 go ne ga nna le tshono ya go neela bosupi mo lefatsheng lotlhe ka tsela e Modimo a tla bolokang batho ka yone le ka dikgang tse di molemo tsa Bogosi jo bo tlhomilweng. Bakeresete ba batlodiwa ba ne ba dirisa tshono eno go naya bosupi mme seo sa felela ka gore diketekete tsa batlodiwa di phuthiwe go tla go nna baruaboswa mmogo le Keresete.

12 Go tloga mo bogareng jwa dingwaga tsa bo1930 go ya pele, go ile ga bonala sentle gore Keresete o ne a simolotse go phutha dimilionemilione tsa “dinku tse dingwe,” tse di neng di tla nna “boidiidi jo bogolo” jo bo tswang mo merafeng e e farologaneng. Boidiidi jono jo bogolo jo bo kaelwang ke Bakeresete ba ba tloditsweng, le jone bo latela sekao sa ga Jesu sa bopelokgale mme bo bolela phatlalatsa gore poloko e tswa kwa Modimong le kwa go Keresete. Fa ba tswelela pele ka go naya bosupi le go bontsha tumelo mo thekololong ya ga Keresete, ba tla nna le tshiamelo ya go falola ‘pitlagano e kgolo,’ e e tla fedisang lefatshe la ga Satane.—Joh. 10:16; Tshen. 7:9, 10, 14.

‘NNA PELOKGALE GORE O BUE DIKGANG TSE DI MOLEMO’

13. E re ka re le Basupi ba ga Jehofa, re ikemiseditse go dira eng, mme gone re ka tlhomamisega jang gore re tla atlega?

13 A re tsweleleng pele go anaanela tshiamelo e re nang le yone ya go nna Basupi ba “dilo tse dikgolo” tse Jehofa Modimo a setseng a di dirile le ditsholofetso tsa gagwe tsa mo isagweng. Ke boammaaruri gore ga se ka metlha go nnang motlhofo go dira tiro eno ya go naya bosupi. Bakaulengwe ba rona ba le bantsi ba rera mo mafelong a mo go one batho ba le bantsi ba se nang kgatlhego, ba ba sotlang kgotsa ba ba bogisang. Re ka etsa sekao sa ga moaposetoloi Paulo le ditsala tsa gagwe. Paulo o ne a re: “Re ne ra nna pelokgale ka Modimo wa rona gore re lo bolelele dikgang tse di molemo tsa Modimo le fa re ne re ganediwa thata.”  (1 Bathes. 2:2, NW) Ka jalo, a le ka motlha re se ka ra ineela. Go na le moo, e kete re ka ikemisetsa go tshela tumalanong le boineelo jwa rona fa tsamaiso ya ga Satane e thubagana go nna marope. (Isa. 6:11) Ga re ka ke ra dira seno ka maatla a rona, mme gone, fela jaaka Bakeresete ba bogologolo re tshwanetse go rapelela gore Jehofa a re neye “maatla a a fetang a a tlwaelegileng” ka moya wa gagwe.—Bala 2 Bakorintha 4:1, 7; Luke 11:13.

14, 15. (a) Bakeresete ba lekgolo la ntlha la dingwaga ba ne ba tshwarwa jang, mme moaposetoloi Petere o ne a reng ka seo? (b) Re tshwanetse ra ikutlwa jang fa re tshwarwa makgwakgwa ka gonne re le Basupi ba ga Jehofa?

14 Gompieno batho ba le bantsi ba ka nna ba ipitsa Bakeresete, “mme ba . . . itatola [Modimo] ka ditiro tsa bone, ka gonne ba makgapha mme ga ba utlwe e bile ga ba amogelelwe tiro e e molemo ya mofuta ope.” (Tito 1:16) Go botlhokwa gore re se ka ra lebala gore mo lekgolong la ntlha la dingwaga, Bakeresete ba boammaaruri ba ne ba tlhoilwe ke batho ba le bantsi ba ba neng ba tshela le bone. Ke gone ka moo moaposetoloi Petere a neng a re: “Fa lo kgobelwa leina la ga Keresete, lo itumetse, ka gonne . . . moya wa Modimo . . . o ntse mo go lona.”—1 Pet. 4:14.

15 A mafoko ano a a tlhotlheleditsweng a ka thusa le Basupi ba ga Jehofa gompieno? Ee ruri, ka gonne le rona re naya bosupi gore Jesu ke kgosi. Ka jalo, fa re tlhoiwa ka gonne re bidiwa ka leina la ga Jehofa go tshwana le fa re “kgobelwa leina la ga [Jesu] Keresete,” yo o neng a raya baganetsi ba gagwe a re: “Ke tlile ka leina la ga Rre, mme ga lo nkamogele.” (Joh. 5:43) Ka gone, fa ka nako nngwe o ntse o rera o bo o kopana le motho yo o ganetsang, o se ka wa kgobega marapo. Go tshwarwa makgwakgwa jalo go bontsha gore Modimo o itumelela se o se dirang le gore moya wa gagwe ‘o ntse mo go wena.’

16, 17. (a) Ke eng se batho ba ga Jehofa ba bonang se direga mo dikarolong tse dintsi tsa lefatshe? (b) Ke eng se o ikemiseditseng go se dira?

16 Gape gopola gore go ntse go nna le koketsego mo dikarolong tse dintsi tsa lefatshe. Tota le mo tshimong e e berekiwang sentle, re sa ntse re kopana le batho ba ba batlang go re reetsa le ba re ka ba bolelelang molaetsa o o itumedisang wa poloko. A re lekeng ka natla go boela kwa bathong ba ba bontshitseng kgatlhego mme fa go kgonega, re ba tshwarele dithuto tsa Baebele re bo re ba thuse gore ba gatele pele go fitlha ba ineela le go kolobediwa. Gongwe o ka tswa o ikutlwa jaaka Sarie wa Afrika Borwa, yo o feditseng dingwaga di feta 60 a ntse a rerela batho. A re: “Ke leboga fela thata setlhabelo sa thekololo sa ga Jesu ka gonne ka sone ke kgona go nna le kamano e e molemo le Jehofa, Molaodimogolo wa lobopo lotlhe, e bile ke itumedisiwa ke gore ke kgona go itsise batho leina la gagwe le le galalelang.” Ene le monna wa gagwe e bong Martinus ba ne ba thusa batho ba le bantsi go akareletsa le bana ba bone ba bararo gore e nne baobamedi ba ga Jehofa. Sarie o oketsa ka go re: “Ga go na tiro epe e e kgotsofatsang thata jaana, mme Jehofa o dirisa moya wa gagwe o o boitshepo go naya botlhe maatla a ba a tlhokang go tswelela pele ka tiro eno e e bolokang matshelo.”

17 Le fa re ka tswa re le Bakeresete ba ba kolobeditsweng kgotsa re berekela go fitlhelela mokgele oo, re na le mabaka a le mantsi tota a go lebogela tshiamelo ya go kopanela le phuthego ya lefatshe lotlhe ya Basupi ba ga Jehofa. Ka jalo, tswelela pele o neela bosupi ka botlalo mme ka fa letlhakoreng le lengwe o ntse o ipolokile o se na selabe mo lefatsheng leno le le bosula la ga Satane. Fa o dira jalo, o tla tlotla Rrarona yo o kwa legodimong yo o lorato, yo re nang le tshiamelo ya go bidiwa ka leina la gagwe.