Fetela kwa tshedimosetsong

Fetela go diteng

A o Ka Dira mo go Oketsegileng go Tlhagisa ba Bangwe?

A o Ka Dira mo go Oketsegileng go Tlhagisa ba Bangwe?

Babogedi ba ne ba kgatlhega fa ba ntse ba lebile filimi nngwe e e se nang modumo e e bidiwang, A Trip Down Market Street, e e bontshang kafa botshelo bo neng bo le ka gone kwa San Francisco, U.S.A., mo masimologong a lekgolo la bo20 la dingwaga. Badiri ba filimi eo ba ne ba beile khamera fa pele ga kolotsana e e tsamaisiwang ke kheibole, mme ba e lebisitse mo mmileng o o tlhanaselang. Filimi eo e ne e bontsha dikolotsana tse di gogiwang ke dipitse, dikoloi tsa modiro wa bogologolo, bareki mmogo le basimane ba ba rekisang makwalodikgang letsatsi le letsatsi.

Se se dirang gore filimi eno e utlwise botlhoko ke gore, e ka tswa e dirilwe ka Moranang 1906, nakwana fela pele ga thoromo ya lefatshe mmogo le molelo o o neng wa nna teng ka Moranang 18, tse di neng tsa bolaya batho ba le diketekete mme tsa batla di nyeletsa karolo eo ya toropo. Gongwe batho bangwe ba ba neng ba tlhagelela mo filiming eo ba ne ba saletswe ke malatsi a le mmalwa fela. Scott Miles yo e leng mongwe wa losika lwa batho ba ba neng ba dira filimi eo a re: “Fa ke ntse ke lebile filimi eno, ke ne ke bona batho ba iketlile fela mme ba ne ba sa itse gore ba tloga ba diragalelwa ke eng. Ke ne ke ba utlwela botlhoko, mme go ne go sena se nka se dirang.”

Thoromo ya lefatshe ya 1906 le molelo o o neng wa nna teng di ne tsa ripitla karolo e kgolo ya toropo ya San Francisco, ka gonne go ne go sena tlhagiso

Go na le sengwe se se masisi se re ka se bapisang le seno mo motlheng wa rona. Le rona re utlwela baagelani ba rona botlhoko tota. Ba tsweletse ka ditiro tsa bone tsa letsatsi le letsatsi, ba sa akanye gotlhelele ka masetlapelo a a tlileng go ba tlela—go senngwa ga tsamaiso eno ya dilo le tsela e ba tshelang ka yone. Le fa go ntse jalo, go farologana le thoromo eo ya lefatshe e e sa bonelwang pele, rona re sa ntse re na le nako e nnye ya gore re tlhagise baagelani ba rona ka letsatsi la ga Jehofa la katlholo. O ka tswa o beetse nako kwa thoko beke nngwe le nngwe gore o nne le seabe mo bodireding jwa ntlo le ntlo, mme gone, a o ka dira mo go oketsegileng go tlhagisa ba bangwe?

JESU O NE A IKEMISEDITSE GO RERA KA METLHA

Jesu o re tlhometse sekao se se tlhomologileng, ka gonne o ne a ikemiseditse go rera ka metlha. O ne a rerela mongwe le mongwe yo a neng a kopana le ene, e ka tswa e le mokgethisi yo a neng a kopana le ene mo tseleng, kgotsa mosadi yo a neng a kopana le ene ka sethoboloko fa a ne a ikhuditse kwa sedibeng. (Luke 19:1-5; Joh. 4:5-10, 21-24) Tota le fa Jesu a ne a ikhuditse, o ne a tlogela dilo tse a neng a ikaeletse go di dira gore a rerele ba bangwe. O ne a dira ka natla go rerela baagisani ba gagwe, ka gonne a ne a ba utlwela botlhoko. (Mar. 6:30-34) Tsela e Jesu a neng a bontsha boikutlo jwa go potlaka ka yone e bontshiwa jang gompieno?

BA DIRISA TSHONO NNGWE LE NNGWE

Melika o nna mo foleteng e e nang le tshireletsego ya maemo a a kwa godimo. Bontsi jwa baagisani ba gagwe ke baithuti ba ba tswang kwa dinageng di sele ba dinomoro tsa difouno tsa bone tsa selula le maina a bone a sa tlhageng mo bukeng ya lenaane la difouno la  mo ba nnang teng. O dirisa ditshono tse a nnang le tsone go simolola motlotlo wa Baebele le batho ba a kopanang le bone mo diphashiting le ba ba dirisang lefiti. A re: “Ke tsaya lefelo leno e le tshimo ya me.” Melika o nna a tshwere dimakasine tsa dipuo tse di farologaneng, mme batho ba le bantsi ba rata go tsaya dipampitshana le dimakasine mo go ene. Mme gape o ba kopa gore ba ye kwa atereseng ya rona ya Internet ya jw.org. O setse a simolotse go ithuta Baebele le batho ba le mmalwa.

Sonia le ene o nna a ntshitse matlho dinameng gore a rerele mongwe le mongwe yo a ka kgonang go mo rerela. O bereka kwa ngakeng mme o ipeetse mokgele wa go neela mongwe le mongwe yo a berekang le ene bosupi ka botlalo. Sa ntlha, o ne a ipha nako go leka go lemoga gore mongwe le mongwe wa bone o kgatlhegela eng le gore o tlhoka eng. Ka jalo, o dirisa nako ya gagwe ya dijo tsa motshegare gore a tlotle le mongwe le mongwe wa bone ka Baebele. Ka go dira jalo, Sonia o kgonne go simolola go ithuta Baebele le batho ba le babedi. Gape o ikaeletse go dirisa nako ya gagwe ya go ja gore a rerele batho ba ba mo phashiting ya lefelo la kalafi, ba ba letetseng go bona ngaka.

DIRISA TSHONO NNGWE LE NNGWE E E TLHAGANG

Motho mongwe yo o falotseng thoromo ya lefatshe ya 1906 o ne a e bitsa, “masetlapelo a a maswe le go feta a a kileng a direga mo toropong.” Mme gone, mo bogautshwaneng masetlapelo otlhe a a nnileng gone e ka se nne a sepe fa a bapisiwa le letsatsi le legolo la go ipusolosetsa, le le tla tlelang botlhe “ba ba sa itseng Modimo.” (2 Bathes. 1:8) Jehofa o eletsa thata gore batho ba fetole megopolo ya bone le dipelo tsa bone mme ba tsibogele molaetsa o Basupi ba o rerang.—2 Pet. 3:9; Tshen. 14:6, 7

A o ka dirisa tshono nngwe le nngwe go rera fa o ntse o dira ditiro tsa gago tsa letsatsi le letsatsi?

O na le tshiamelo ya go bula matlho a batho mo nakong eno ya botlhokwa le go ba thusa gore ba tlogele ditiro tsa bone tsa boithati mme ba batle Jehofa. (Sefa. 2:2, 3) A o ka dirisa tshono nngwe le nngwe go rerela ba o berekang le bone, baagisani ba gago le ba o kopanang le bone fa o ntse o dira ditiro tsa gago tsa letsatsi le letsatsi? A o tla dira mo go oketsegileng go tlhagisa ba bangwe?