Fetela kwa tshedimosetsong

Fetela go diteng

Elisha O ne A Bona Dikara Tsa Molelo—A le Wena O a Di Bona?

Elisha O ne A Bona Dikara Tsa Molelo—A le Wena O a Di Bona?

Kgosi ya Siria e ne e tsoma moporofeti wa Modimo e bong Elisha mme ya mo latelela go fitlha kwa motseng o o mo thabeng wa Dothane o o dikaganyeditsweng ke dipota. Mmusi yoo wa kwa Siria o ne a romela dipitse, dikara tsa ntwa le masole kwa Dothane bosigo. Ka masa, ke fa mophato wa gagwe wa sesole o setse o dikaganyeditse motse.—2 Dikg. 6:13, 14.

Fa motlhokomedi wa ga Elisha a tsoga mme a tswela kwa ntle, o ne a bona batho ba ba neng ba tlile go tshwara moporofeti. O ne a goa jaana: “Ijoo, mong wa me! Re tla dirang?” Elisha o ne a mo raya a re: “O se ka wa boifa, gonne ba ba nang le rona ba bantsi go feta ba ba nang le bone.” Go tswa foo, moporofeti o ne a rapela jaana: “Ao tlhe Jehofa, bula matlho a gagwe, tsweetswee, gore a bone.” Pego eno e tswelela jaana: “Ka yone nako eo Jehofa a bula matlho a motlhokomedi, mme a bona; mme bona! kgaolo e e dithaba e ne e tletse dipitse le dikara tsa ntwa tsa molelo go dikologa Elisha gotlhe fela.” (2 Dikg. 6:15-17) Re ka ithuta eng mo tiragalong eno le mo go tse dingwe tse di diragaletseng Elisha?

Elisha o ne a ritibetse fa Basiria ba ne ba dikaganyeditse motse ka gonne o ne a ikanya Jehofa e bile a bone gore Modimo o na le maatla a go sireletsa. Rona gompieno ga re a solofela go bona dikgakgamatso, mme gone, re kgona go lemoga gore Jehofa o sireletsa batho ba gagwe e le setlhopha. Ka tsela nngwe, le rona re dikaganyeditswe ke dipitse le dikara tsa molelo. Fa re di “bona” ka matlho a tumelo e bile re ikanya Modimo ka metlha, re tla ‘nna ka polokesego’ mme Jehofa o tla re segofatsa. (Pes. 4:8) Mma re sekasekeng kafa re ka solegelwang molemo ka gone ke dilo dingwe tse di ileng tsa diragalela Elisha.

ELISHA O SIMOLOLA GO DIRELA ELIJA

Nako nngwe fa Elisha a ne a lema, moporofeti Elija o ne a tla kwa go ene mme a latlhela seaparo sa gagwe se se mo tlhaolang mo go ene. Elisha o ne a itse gore seo se kaya eng. O ne a dira moletlo, a laela rraagwe le mmaagwe, mme a tlogela legae la gaabo go ya go direla Elija. (1 Dikg. 19:16, 19-21) E re ka Elisha a ne a iketleeleditse go direla Modimo ka botlalo, Jehofa o ne a mo dirisa mme kgabagare o ne a nna moporofeti mo boemong jwa ga Elija.

Go lebega Elisha a ne a direla Elija dingwaga di ka nna thataro. Mo nakong eo, Elisha e ne e le ene “yo o neng a tshela metsi mo diatleng tsa ga Elija.”  (2 Dikg. 3:11) Mo metlheng eo, go ne go tlwaelegile gore batho ba je ka diatla, ba sa dirise dithipa, diforoko le dilo dingwe tsa go ja. Morago ga dijo, motlhanka o ne a tlhapisa mong wa gagwe diatla. Ka jalo, go ka direga gore dingwe tsa ditiro tsa ga Elisha e ne e le tsa maemo a a kwa tlase. Le fa go ntse jalo, o ne a tsaya go nna motlhokomedi wa ga Elija e le tshiamelo.

Ka tsela e e tshwanang le gompieno, Bakeresete ba le bantsi ba tsenela mefuta e e farologaneng ya tirelo ya nako e e tletseng. Ba dira jalo ka gonne ba tlhotlhelediwa ke tumelo e bile ba batla go dirisa maatla a bone ka botlalo go direla Jehofa. Dingwe tsa dikabelo tsa bone di tlhoka gore ba tlogele magae a bone mme ba ye go direla kwa Bethele, mo diporojekeng tsa dikago le ditiro tse dingwe, e leng dikabelo tse bangwe ba di tsayang e le tsa maemo a a kwa tlase. Bakeresete ga ba a tshwanela go tsaya dikabelo tseo e se tsa botlhokwa kgotsa e le tse di dirang gore motho a tseelwe kwa tlase, ka gonne Jehofa ene o di tsaya di le botlhokwa.—Baheb. 6:10.

ELISHA O NE A TSWELELA A DIRA KABELO YA GAGWE

Pele ga Modimo a “tseela Elija ka sefefo kwa magodimong,” o ne a mo romela kwa Bethele a tswa kwa Gilegala. Elija o ne a kopa Elisha gore a se ka a tsamaya le ene, mme Elisha o ne a mo araba jaana: “Ga ke na go go tlogela.” Fa ba ntse ba tsweletse ka loeto, Elija o ne a kopa Elisha ka makgetlho a mangwe a mabedi gore a sale, mme o ne a gana. (2 Dikg. 2:1-6) Fela jaaka Ruthe a ne a kgomarela Naomi, Elisha le ene o ne a ngaparela Elija. (Ruthe 1:8, 16, 17) Ka ntlha yang? Ka gonne Elisha o ne a anaanela tshiamelo e a e neilweng ke Modimo ya go direla Elija.

Elisha o re tlhometse sekao se se molemo. Fa re newa tshiamelo nngwe ya tirelo mo phuthegong ya Modimo, re tla e anaanela thata fa re nna re gopola gore re direla Jehofa. Ga go na tlotla e e fetang eo.—Pes. 65:4; 84:10.

“KOPA SE O BATLANG GORE KE SE GO DIRELE”

Fa banna bano ba babedi ba ntse ba tsweletse ka loeto, Elija o ne a raya Elisha a re: “Kopa se o batlang gore ke se go direle pele ga ke tlosiwa mo go wena.” Fela jaaka Solomone a ne a dira kopo ya semoya dingwaga di le mmalwa pelenyana, Elisha le ene o ne a dira kopo e e ntseng jalo. O ne a kopa gore ‘dikarolo tse pedi tsa moya wa ga Elija di tle mo go ene.’ (1 Dikg. 3:5, 9; 2 Dikg. 2:9) Kwa Iseraele, ngwana wa leitibolo o ne a tshwanetse go amogela karolo ya boswa jwa ga rraagwe e menagane gabedi. (Dute. 21:15-17) Ka jalo, tota Elisha o ne a kopa gore e nne mojaboswa wa semoya wa ga Elija. Mo godimo ga moo, ga go pelaelo gore Elisha o ne a batla go nna pelokgale fela jaaka Elija, yo o neng a “fufegela Jehofa . . . fela thata.”—1 Dikg. 19:13, 14.

Elija o ne a araba jang kopo ya motlhokomedi wa gagwe? O ne a re: “O kopile selo se se thata. Fa o mpona ke tlosiwa mo go wena, go tla go diragalela ka tsela eo; mme fa o sa mpone, ga go na go direga.” (2 Dikg. 2:10) Go bonala karabo ya ga Elija e ne e kaya dilo tse pedi. Sa ntlha, ke Modimo fela yo a neng a ka diragatsa kopo ya ga Elisha. Sa bobedi, gore Elisha a bone se a se kopileng, o ne a tshwanetse go ikemisetsa go nna le Elija go sa kgathalasege gore o tla lebana le eng.

SE ELISHA A NENG A SE BONA

Modimo o ne a leba jang kopo ya ga Elisha ya gore a newe dikarolo tse pedi tsa moya wa ga Elija? Pego eno ya re: “Ga diragala gore fa ba ntse ba tsamaya, ba bua ba ntse ba tsamaya, bona! kara ya ntwa e e tukang molelo le dipitse tse di tukang molelo, tsa ba kgaoganya boobabedi; mme Elija a tlhatlogela kwa magodimong mo sefefong. Nako eo yotlhe Elisha o ne a bona seo.” * Eno e ne e le tsela e Jehofa a neng a araba kopo ya ga Elisha ka yone. Elisha o ne a bona Elija a tlosiwa fa go ene, a amogela dikarolo tse pedi tsa moya wa ga Elija a bo a nna mojaboswa wa semoya wa moporofeti yoo.—2 Dikg. 2:11-14.

Elisha o ne a sela seaparo sa ga Elija se se mo tlhaolang se se neng se ole mme a se apara. Seaparo seo se ne se bontsha gore jaanong Elisha ke moporofeti wa Modimo. Bosupi jo bongwe jwa gore o tlhomilwe bo ne jwa bonala moragonyana fa a ne a kgaoganya metsi a Noka ya Joredane.

Ga go pelaelo gore Elisha o ne a amiwa thata ke se a neng a se bona fa Elija a ne a tlhatlogela kwa magodimong mo sefefong. Kana e bile, rona ga re ise re ko re bone dikara tsa ntwa tsa molelo le dipitse tsa molelo! Seo e ne e le bosupi jwa gore Jehofa o amogetse kopo ya ga Elisha. Fa Modimo a araba dithapelo tsa rona, ga re ke re bona ponatshegelo ya kara ya ntwa ya molelo le dipitse tsa molelo. Mme gone, re kgona go lemoga gore Modimo o dirisa maatla a gagwe a magolo go tlhomamisa gore thato ya gagwe e a diragala. Mme fa re lemoga gore Jehofa o segofatsa karolo e e mo lefatsheng ya phuthego ya gagwe, tota re “bona” kara ya gagwe ya kwa legodimong e tsamaya.—Esek. 10:9-13.

 Elisha o bone dilo di le dintsi tse di mo tlhomamiseditseng gore Jehofa o na le maatla a magolo thata. Tota e bile, moya o o boitshepo wa Modimo o ne wa thusa moporofeti yoo go dira dikgakgamatso di le 16—palo e e menaganeng gabedi go feta ya dikgakgamatso tse Elija a di dirileng. * Lekgetlho la bobedi fa Elisha a ne a bona dipitse le dikara tsa ntwa tsa molelo, e ne e le fa a ne a le mo dipharagobeng kwa Dothane, jaaka go tlhalositswe mo tshimologong ya setlhogo seno.

ELISHA O NE A IKANYA JEHOFA

Le fa Elisha a ne a dikaganyeditswe ke baba kwa Dothane, o ne a nna a ritibetse. Ka ntlha yang? Ka gonne o ne a na le tumelo e e nonofileng mo go Jehofa. Le rona re tlhoka tumelo e e ntseng jalo. Ka jalo, a re kopeng moya o o boitshepo wa Modimo gore re kgone go bontsha tumelo le dinonofo tse dingwe tse moya o di tlhagisang.—Luke 11:13; Bagal. 5:22, 23.

Gape tiragalo ya kwa Dothane e ne ya dira gore Elisha a nne le lebaka le le utlwalang la gore a ikanye Jehofa le masomosomo a Gagwe a a sa bonaleng a a sireletsang. O ne a lemoga gore Modimo o ne a rometse baengele gore ba dikaganyetse motse le batho ba ba neng ba o dikaganyeditse. Modimo o ne a sireletsa Elisha le motlhanka wa gagwe ka kgakgamatso ka go foufatsa baba ba bone. (2 Dikg. 6:17-23) Mo nakong eo e e thata, Elisha o ne a bontsha tumelo mme a ikanya Jehofa ka botlalo, fela jaaka a ne a dira le mo maemong a mangwe.

Fela jaaka Elisha, a re ikanyeng Jehofa Modimo. (Dia. 3:5, 6) Fa re dira jalo, “Modimo ka boene o tla re utlwela botlhoko a bo a re segofatse.” (Pes. 67:1) Gone ke boammaaruri gore ga re a dikaganyediwa ka tsela ya mmatota ke dikara tsa molelo le dipitse. Le fa go ntse jalo, ka nako ya “pitlagano e kgolo” e e tlang, Jehofa o tla re sireletsa re le bakaulengwe mo lefatsheng lotlhe. (Math. 24:21; Tshen. 7:9, 14) Go fitlha nako eo e goroga, a re nneng re gopola gore “Modimo ke botshabelo jwa rona.”—Pes. 62:8.

^ ser. 16 Elija ga a ka a tlhatlogela kwa magodimong a e leng bonno jwa semoya jwa ga Jehofa le barwa ba gagwe ba baengele. Bona Tora ya Tebelo ya September 15, 1997, tsebe 15.

^ ser. 19 Bona Tora ya Tebelo ya August 1, 2005, tsebe 10.