‘Tlhomamisang dilo tse di botlhokwa thata.’—BAFIL. 1: 10.

1, 2. Barutwa ba ga Jesu ba ka tswa ba ile ba kgatlhiwa ke boporofeti bofe jo bo malebana le metlha ya bofelo, mme ka ntlha yang?

KGABAGARE Petere, Jakobe, Johane le Anderea ba ne ba le bosi le Mong wa bone. Se Jesu a ileng a se bua pelenyana malebana le go senngwa ga tempele se ne se ba tshwentse fela thata. (Mar. 13:1-4) Ka jalo, ba ne ba mmotsa jaana: “Re bolelele, Dilo tseno di tla nna leng, mme sesupo e tla nna eng sa go nna gone ga gago le sa bokhutlo jwa tsamaiso eno ya dilo?” (Math. 24:1-3) Jesu o ne a simolola go ba bolelela ka ditiragalo le maemo a a neng a ka se dire fela gore go nne le diphetogo tse dikgolo mme gape a ne a tla supa gore bofelo jwa tsamaiso e e boikepo ya ga Satane bo gaufi. Go na le tiragalo nngwe e e tshwanetseng ya bo e ile ya kgatlha barutwa ba ga Jesu fela thata. Morago ga go bua ka dilo tse di utlwisang botlhoko tse di jaaka dintwa, ditlhaelo tsa dijo le go oketsega ga tlolomolao, Jesu o ne a bolelela pele sengwe se se molemo se se neng se tla tshwaya metlha ya bofelo. O ne a re: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.”—Math. 24:7-14.

2 Barutwa ba ga Jesu ba ile ba itumelela go rera dikgang tse di molemo tsa Bogosi ba na le Keresete. (Luke 8:1; 9:1, 2) Ba ka tswa ba ile ba gakologelwa mafoko a ga Jesu a a reng: “Thobo e kgolo, eleruri, mme badiri ba mmalwa. Jalo kopang Mong wa thobo gore a romele badiri mo thobong ya gagwe.” (Luke 10:2) Mme gone, ba ne ba tla rera jang mo “lefatsheng lotlhe le le nang le banni” le go neela “bosupi mo ditšhabeng tsotlhe”? Badiri ba ne ba tla tswa kae? E kete go ka bo go kgonega gore ba bone se se neng se tla direga mo isagweng fa ba ntse ba na le Jesu mo letsatsing leo! Ga go pelaelo gore ba ne ba tla gakgamadiwa ke go bona go diragadiwa ga mafoko ao, a jaanong re a balang mo go Mathaio 24:14.

3. Luke 21:34 e diragadiwa jang gompieno, mme re tshwanetse go itlhatlhoba jang?

 3 Re tshela mo motlheng o boporofeti jwa ga Jesu bo diragadiwang mo go one. Batho ba le dimilionemilione ba ile ba nna seoposengwe gore ba rere dikgang tse di molemo tsa Bogosi mo lefatsheng lotlhe. (Isa. 60:22) Le fa go ntse jalo, Jesu o ne a bontsha gore e ne e tla nna kgwetlho gore bangwe ba nne ba tlhomile mogopolo mo go direng tiro eno mo metlheng eno ya bofelo. Ba ne ba tla iteega tsebe le go “imelwa.” (Bala Luke 21:34.) Le rona re bona go diragadiwa ga mafoko ano. Bangwe ba batho ba Modimo ba iteega tsebe. Seno se ka bonwa mo ditshwetsong tse ba di dirang malebana le tiro ya boitshediso, thuto ya ditheo tse di kwa godimo, go batla go nna le dilo tse di bonalang mmogo le nako e ba e fetsang mo metshamekong le mo boitlosobodutung. Ba bangwe ba a lapa ka ntlha ya dikgatelelo le ditlhobaelo tsa botshelo jwa letsatsi le letsatsi. Ipotse jaana: ‘Go tweng ka nna? A ditshwetso tse ke di dirang di bontsha gore ke dira gore thato ya Modimo e nne yone e tlang pele mo botshelong?’

4. (a) Fa Paulo a ne a rapelela Bakeresete ba kwa Filipi o ne a rapelela eng, mme ka ntlha yang? (b) Re tla ithuta eng mo setlhogong seno le se se latelang, mme e le ka boikaelelo bofe?

4 Bakeresete ba ba neng ba tshela mo lekgolong la ntlha la dingwaga ba ne ba tshwanetse go dira ka natla go dira gore dilo tsa semoya di tle pele mo matshelong a bone. Moaposetoloi Paulo o ne a bona go le botlhokwa gore a rapelele Bakeresete ba ba kwa Filipi gore ba “tlhomamise dilo tse di botlhokwa thata.” (Bala Bafilipi 1:9-11.) Fela jaaka moaposetoloi Paulo, batho ba le bantsi mo metlheng eo ba ne ba “bontsha bopelokgale le go feta, jwa go bua lefoko la Modimo ka go tlhoka poifo.” (Bafil. 1:12-14) Ka tsela e e tshwanang, bontsi jwa rona gompieno re rera Lefoko la Modimo ka bopelokgale. Go ntse go le jalo, a go akanyetsa se gone jaanong se fitlhelelwang ke phuthego ya ga Jehofa go ka re thusa go tlhoma mogopolo le go feta mo tirong e e botlhokwatlhokwa ya go rera? Eleruri go ka re thusa! Mo setlhogong seno, a re sekasekeng se Jehofa a se dirileng go dira gore Mathaio 24:14 e diragadiwe. Phuthego ya gagwe e tshwaregile ka eng, mme go itse seno go tla tlhotlheletsa rona le ba malapa a rona jang? Mo setlhogong se se latelang, re tla ithuta ka se se ka re thusang go itshoka le go nna re tsamaisana le phuthego ya ga Jehofa.

KAROLO E E KWA LEGODIMONG YA PHUTHEGO YA GA JEHOFA E GATELA PELE

5, 6. (a) Ke eng fa Jehofa a ile a naya batlhanka ba gagwe diponatshegelo tsa karolo e e kwa legodimong ya phuthego ya gagwe? (b) Esekiele o ne a bona eng mo ponatshegelong?

5 Go na le dilo di le dintsi tse Jehofa a tlhophileng gore di se ka tsa kwalwa mo Lefokong la gagwe. Ka sekai, le fa go ne go kgatlha go itse gore boboko bo bereka jang kgotsa gore lobopo lo dira jang, ga a ka a re naya dintlha ka botlalo ka dilo tseno! Go na le moo, Jehofa o re neile tshedimosetso e re e tlhokang gore re tlhaloganye boikaelelo jwa gagwe le gore re tshele go dumalana le jone. (2 Tim. 3:16, 17) A bo go kgatlha jang ne go bo Baebele e re naya maoko a karolo e e sa bonaleng ya phuthego ya ga Jehofa! Re itumelela go bala tshedimosetso eno mo dibukeng tsa Baebele tsa Isaia, Esekiele, Daniele le Tshenolo. (Isa. 6:1-4; Esek. 1:4-14, 22-24; Dan. 7:9-14; Tshen. 4:1-11) Go ntse jaaka e kete Jehofa o tlositse sesiro a bo a re letla gore re tlhodumele ka kwa ga magodimo. Ke ka ntlha yang fa a ile a re naya tshedimosetso eno?

6 Jehofa o ne a batla gore re se ka ra lebala gore re karolo ya phuthego ya lobopo lotlhe. Go na le dilo di le dintsi tse re sa di boneng tse di dirwang, e le gore boikaelelo jwa ga Jehofa bo diragadiwe. Ka sekai, Esekiele o ne a bona kara e e boitshegang ya kwa legodimong e tshwantshetsa karolo e e sa bonaleng ya phuthego ya ga Jehofa. Kara eno e ne e  kgona go tsamaya ka bofefo e bile e kgona go fetola kwa e lebileng gone ka ponyo ya leitlho. (Esek. 1:15-21) Fa leotwana lengwe le lengwe la yone le ntse le dikologa, kara eno e ne e kgona go tsamaya sekgala se seleele. Gape mo ponatshegelong eno, Esekiele o ne a kgona go bona Mokgweetsi wa kara eno go se kae fela. O ile a re: “Ka bona sengwe se se tshwanang le go tsabakela ga gouta e e tlhakantsweng le selefera, jaaka ponalo ya molelo gotlhe fela . . . E ne e le ponalo ya setshwano sa kgalalelo ya ga Jehofa.” (Esek. 1:25-28) Ruri ponatshegelo eno e tshwanetse ya bo e ile ya jesa Esekiele kgakge! O ne a bona Jehofa a laola phuthego ya gagwe ka botlalo, a e kaela kafa e tshwanetseng go tsamaya ka gone ka moya wa gagwe o o boitshepo. A bo eno e le tsela e e gakgamatsang jang ne e karolo e e kwa legodimong ya phuthego ya ga Jehofa e e gatelang pele e tshwantshediwang ka yone!

7. Ponatshegelo ya ga Daniele e dira jang gore re nne le tumelo?

7 Daniele le ene o bone dilo tse dintsi tse di ka dirang gore re nne le tumelo. O ne a letlelelwa go bona Jehofa a tshwantshitswe e le “Mogologolo wa Malatsi” a ntse mo setulong sa bogosi se se nang le dikgabo tsa molelo. Setulo seno sa bogosi se ne se na le maotwana. (Dan. 7:9) Jehofa o ne a batla gore Daniele a bone gore phuthego ya Gagwe e gatela pele go diragatsa boikaelelo jwa Gagwe. Gape Daniele o ne a bona “mongwe yo o tshwanang le morwa motho” e bong Jesu, a newa taolo ya karolo e e mo lefatsheng ya phuthego ya ga Jehofa. Puso ya ga Keresete e e itekanetseng ga e kitla e busa dingwaga di le mmalwa fela. Go na le moo, ke “bobusi jo bo nnang ka bosakhutleng, jo bo se kitlang bo feta, mme bogosi jwa gagwe ke jo bo se kitlang bo senngwa.” (Dan. 7:13, 14) Re tlhotlheletsega go ikanya Jehofa le go anaanela se a se dirang. O  neile Morwawe e bong Jesu, “bobusi le seriti le bogosi.” Jehofa o ikanya Morwawe. Ka jalo, le rona re ka ikanya boeteledipele jwa ga Jesu.

8. Esekiele le Isaia ba ile ba amiwa jang ke diponatshegelo tse di tswang kwa go Jehofa, mme rona di tshwanetse go re ama jang?

8 Diponatshegelo tseno tsa karolo e e kwa legodimong ya phuthego ya ga Jehofa, di tshwanetse go re ama jang? Fela jaaka Esekiele, ruri le rona re jesiwa kgakge ke se Jehofa a se dirang. (Esek. 1:28) Fela jaaka Isaia, go tlhatlhanya ka phuthego ya ga Jehofa go ka re tlhotlheletsa gore re dire go le gontsi mo tirong ya Modimo. Morago fela ga gore Isaia a bone tshono ya go bolelela ba bangwe ka se Jehofa a se dirang, o ne a dirisa tshono eo kwantle ga go okaoka. (Bala Isaia 6:5, 8.) Isaia o ne a tlhatswegile pelo gore Jehofa o ne a tla mo thusa gore a kgone go lebana le kgwetlho nngwe le nngwe. Ka tsela e e tshwanang, go bona maoko ano a karolo e e kwa legodimong ya phuthego ya ga Jehofa go tshwanetse ga re jesa kgakge le go re tlhotlheletsa go dira go le gontsi mo tirong ya Modimo. Ruri go a kgothatsa go itse gore re karolo ya phuthego e ka metlha e nnang e dira thato ya ga Jehofa!

KAROLO E E MO LEFATSHENG YA PHUTHEGO YA GA JEHOFA

9, 10. Ke eng fa go tlhokega gore go nne le karolo e e mo lefatsheng ya phuthego ya ga Jehofa?

9 Jehofa o dirisitse Morwawe go tlhoma karolo e e mo lefatsheng ya phuthego ya Gagwe e e dirisanang mmogo le karolo e e kwa legodimong. Ke ka ntlha yang fa go tlhokega karolo e e mo lefatsheng ya phuthego ya ga Jehofa gore tiro e go boletsweng ka yone mo go Mathaio 24:14 e dirwe? Ela tlhoko mabaka ano a mararo.

10 La ntlha, Jesu o ne a re tiro ya go rera e ne e tla dira gore barutwa ba gagwe ba fitlhe kwa “karolong e e kwa kgakalakgakala ya lefatshe.” (Dit. 1:8) La bobedi, go ne go tla tlhokega dithulaganyo tsa go aba dijo tsa semoya le go tlhokomela ba ba dirang tiro eno. (Joh. 21:15-17) La boraro, go ne go tla tshwanela gore go dirwe dithulaganyo gore ba ba rerang dikgang tse di molemo ba kopane mmogo go obamela Jehofa le go rutiwa gore ba ka dira tiro eno jang. (Baheb. 10:24, 25) Go fitlhelela dilo tseno go ne go ka se itiragalele fela. Go ne go tla tlhokega gore tiro eno e rulaganngwe sentle e le gore balatedi ba ga Keresete ba atlege go e dira.

11. Re bontsha jang gore re ema nokeng dithulaganyo tse di dirwang ke phuthego ya ga Jehofa?

11 Re bontsha jang gore re ema nokeng dithulaganyo tse di dirwang ke phuthego ya ga Jehofa? Tsela nngwe e e molemolemo ya go dira jalo ke ka go nna re ikanya batho ba Jehofa le Jesu ba ba neileng maikarabelo a go okamela tiro ya go rera. Gompieno go na le dilo di le dintsi mo lefatsheng tse di ka itayang ba ba eteletseng pele tsebe. Le fa go ntse jalo, ke eng se phuthego ya ga Jehofa ya mo lefatsheng e nnang e tlhomile mogopolo mo go sone?

BA TLHOMILE MOGOPOLO MO ‘DILONG TSE DI BOTLHOKWA THATA’

12, 13. Bagolwane ba Bakeresete ba diragatsa maikarabelo a bone jang, mme ke eng fa seno se go kgothatsa?

12 Go tlhomilwe bagolwane ba Bakeresete ba ba nang le maitemogelo mo lefatsheng lotlhe, gore ba okamele tiro ya go rera ka Bogosi le gore tiro eno e dirwe ka potlako mo mafelong a ba direlang mo go one. Fa bakaulengwe bano ba ntse ba dira ditshwetso, ba batla kaelo mo Lefokong la Modimo, ba le dira ‘lobone lwa dinao tsa bone le lesedi la tsela ya bone’ mme gape ba rapela Jehofa ka tlhoafalo gore a ba kaele.—Pes. 119:105; Math. 7:7, 8.

13 Fela jaaka bagolwane ba lekgolo la ntlha la dingwaga ba ile ba dira, le gompieno bagolwane ba Bakeresete ba ba okametseng tiro ya go rera ba ineetse “mo bodireding jwa lefoko.” (Dit. 6:4) Ba ipelela kgatelopele e e dirwang mo go rerweng ga dikgang tse di  molemo kwa ba nnang gone le mo lefatsheng ka bophara. (Dit. 21:19, 20) Ga ba beye melao le ditaelo tse dintsintsi. Go na le moo, ba latela kaelo ya Dikwalo le ya moya o o boitshepo wa Modimo fa ba ntse ba dira dithulaganyo tse di tlhokegang gore tiro ya go rera e tswelele pele. (Bala Ditiro 15:28.) Fa bakaulengwe bano ba ba nang le maikarabelo ba dira jalo, ba tlhomela botlhe ba ba leng mo diphuthegong tsa bone sekao se se molemo.—Baef. 4:11, 12.

14, 15. (a) Go dirilwe dithulaganyo dife go ema nokeng tiro ya go rera e e dirwang mo lefatsheng lotlhe? (b) O ikutlwa jang ka seabe se o nnang le sone mo go emeng nokeng tiro ya go rera ka Bogosi?

14 Letsatsi le letsatsi bakaulengwe ba le bantsi ba rona ba dira ka natla go rulaganya dikgatiso, dipokano le dikopano. Baithaopi ba le diketekete ba dira ka natla go ranolela dijo tsa semoya mo dipuong di ka nna 600 e le gore batho ba le bantsi ka mo go ka kgonegang ka gone ba ithute “dilo tse dikgolo tsa Modimo” ka dipuo tsa bone. (Dit. 2:7-11) Bakaulengwe le bokgaitsadi ba basha ba dirisa metšhini e e gatisang ka lobelo lo lo kwa godimo le e e tshwaraganyang dibuka go dira dikgatiso tsa rona. Go tswa foo, dikgatiso tseno di romelwa le e leng kwa diphuthegong tse di kwa dikarolong tse di kgakalakgakala tsa lefatshe.

15 Go dirwa dithulaganyo di le mmalwa gore re tlhome mogopolo mo go rereng dikgang tse di molemo le phuthego ya lefelo la rona. Ka sekai, fa re umaka ditiro di le mmalwa fela tse gantsi batho ba sa di boneng, baithaopi ba le diketekete ba thusa mo go agiweng ga Diholo Tsa Bogosi le Diholo Tsa Dikopano, ba thusa ba ba amilweng ke masetlapelo a tlholego kgotsa maemo a tshoganyetso a tsa kalafi e bile ba ruta mo dikolong tsa bogosi. Boikaelelo jwa tiro eno yotlhe ke eng? Ke go thusa gore dikgang tse di molemo di rerwe, go nonotsha semoyeng ba ba dirang tiro eno le go tsweletsa pele kobamelo ya boammaaruri. A karolo e e mo lefatsheng ya phuthego ya ga Jehofa e ntse e tlhomile mogopolo mo dilong tse di botlhokwa thata? Eleruri e ntse e dira jalo!

LATELA SEKAO SA PHUTHEGO YA GA JEHOFA

16. Wena kgotsa lelapa la gago lo ka nna le thulaganyo efe e e molemo ya go ithuta Baebele?

16 A gantsi re ipha nako ya go akanya ka dilo tse di dirwang ke phuthego ya ga Jehofa? Bangwe ba ile ba dirisa nako ya kobamelo ya lelapa kgotsa fa ba ithuta ba le nosi go dira dipatlisiso ka dintlha tseno le go tlhatlhanya ka tsone. Go ka nna molemo gore motho a ithute diponatshegelo tsa ga Isaia, Esekiele, Daniele le Johane. Buka ya Basupi ba ga Jehofa—Baboledi ba Bogosi jwa Modimo le dikgatiso tse dingwe kgotsa di-DVD tse di leng gone ka puo ya gago di na le tshedimosetso e e kgatlhang ya phuthego ya Modimo.

17, 18. (a) O solegetswe molemo jang ke thuto eno? (b) Re tshwanetse go sekaseka dipotso dife?

17 Go tlhatlhanya ka se Jehofa a se fitlhelelang a dirisa phuthego ya gagwe go re solegela molemo. A re ikemisetseng go dirisana le phuthego eno e e molemolemo ya ga Jehofa, ka go dira gore dilo tsa botlhokwa di tle pele mo botshelong jwa rona. Go dira jalo go tla re nonotsha gore le rona re ikemisetse fela jaaka Paulo, yo o neng a re: ‘Ga re ineele, e re ka re na le bodiredi jono go ya ka kutlwelobotlhoko e re neng ra e bontshiwa.’ (2 Bakor. 4:1) Gape o ne a rotloetsa badirimmogo le ene jaana: “A re se leseng go dira se se molemo, gonne re tla roba mo pakeng e e leng yone fa re sa lape.”—Bagal. 6:9.

18 A go na le diphetogo dingwe tse di tlhokang go dirwa ke motho a le nosi kgotsa ke malapa go tlhomamisa gore dilo tse di botlhokwa thata mo botshelong jwa letsatsi le letsatsi di tla pele? A re ka tlhofofatsa matshelo a rona kgotsa ra fokotsa dilo tse di ka re itayang tsebe, e le gore re tlhome mogopolo mo tirong ya botlhokwatlhokwa ya go rera? Mo setlhogong se se latelang, re tla sekaseka dilo di le tlhano tse di ka re thusang go nna re tsamaisana le phuthego ya ga Jehofa.