Fetela kwa tshedimosetsong

Fetela go diteng

Itshwarelaneng lo Gololesegile

Itshwarelaneng lo Gololesegile

“Tswelelang lo itshokelana e bile lo itshwarelana lo gololesegile.”—BAKOL. 3:13.

1, 2. Ke ka ntlha yang fa re tshwanetse go sekaseka kafa re iketleeleditseng go itshwarela ba bangwe ka gone?

LEFOKO la ga Jehofa le le kwadilweng le dira gore re kgone go ithuta kafa a lebang boleo ka gone le kafa a ikutlwang ka gone fa re leofa. Gape Lefoko la gagwe le senola go le gontsi malebana le go itshwarela. Mo setlhogong se se fetileng, re ne ra sekaseka kafa boikutlo jwa ga Dafide le Manase bo neng jwa tlhotlheletsa Jehofa ka gone gore a ba itshwarele. Boikwatlhao jwa bone le go utlwa botlhoko go tswa pelong ka ntlha ya se ba se dirileng bo ne jwa dira gore ba ipolele maleo, ba tlogele ditiro tsa bone tse di bosula mme ba ikwatlhaye ka tsela ya mmatota. Mme seo se ne sa dira gore Jehofa a ba amogele gape.

2 Mma re sekasekeng kafa rona re ka itshwarelang ba bangwe ka gone. O akanya gore o ka bo o ile wa ikutlwa jang ka Manase, fa e le gore mongwe wa ba losika lwa gago o ne a swa ka ntlha ya se Manase a se dirileng? A o ne o tla kgona go mo itshwarela? Potso eno e a tshwanela gompieno ka gonne re tshela mo lefatsheng le le tletseng tlolomolao, thubakanyo le batho ba ba bogagapa. Ka jalo, ke ka ntlha yang fa Mokeresete a tshwanetse go lwela go nna le moya wa go itshwarela? Mme fa e le gore o utlwisitswe botlhoko kgotsa o diretswe tshiamololo, ke eng se se ka go thusang gore o laole maikutlo a gago, o itshware ka tsela e Jehofa a batlang gore o itshware ka yone, mme o iketleeletse go itshwarela?

LEBAKA LA GO BO RE TSHWANETSE GO ITSHWARELA

3-5. (a) Jesu o ne a dirisa setshwantsho sefe go thusa bareetsi ba gagwe gore ba akanye ka botlhokwa jwa go itshwarela ba bangwe? (b) Jesu o ne a gatelela ntlha efe mo setshwantshong se se mo go Mathaio 18:21-35?

3 Go botlhokwa gore re iketleeletse go itshwarela ba ba re kgopisang—e ka tswa e le Bakeresete kgotsa e se bone—gore re kgone go tswelela re na le kamano e e molemo le ba lelapa, ditsala, batho ba bangwe le Jehofa. Dikwalo di bontsha gore Mokeresete o tshwanetse go itshwarela ba bangwe go sa kgathalesege gore ba mo kgopisa ga kae. Jesu o  ne a dirisa setshwantsho sa motlhanka yo o neng a kolota mongwe, e le go bontsha lebaka la go bo re tshwanetse go itshwarela.

4 Motlhanka yono o ne a kolota mong wa gagwe madi a a lekanang le tuelo ya malatsi a le 60 000 000; le fa go ntse jalo, mong wa gagwe o ne a phimola molato wa gagwe. Morago ga foo, motlhanka yoo o ne a tswa mme a fitlhela motlhanka mmogo le ene yo o neng a mo kolota madi a a lekanang le tuelo ya malatsi a le 100 fela. Motlhanka yoo yo o neng a kolota yo mongwe o ne a kopa gore a newe nako e e oketsegileng, mme motlhanka yo o neng a itshwaretswe molato o mogolo o ne a dira gore motlhanka mmogo le ene a tsenngwe mo kgolegelong. Seno se ne sa galefisa mong wa bone. Mong wa bone o ne a re: “A . . . o ne o sa tshwanela go utlwela motlhankammogo le wena botlhoko, jaaka le nna ke ne ka go utlwela botlhoko? Foo mong wa gagwe, ka a shakgetse thata, a . . . naya bagolegi [motlhanka yo o sa itshwareleng], go fitlha a duela gotlhe mo a neng a go kolota.”—Math. 18:21-34.

Jesu o ne a gatelela ntlha efe ka setshwantsho seno?

5 Jesu o ne a gatelela ntlha efe mo setshwantshong seno? O ne a konela jaana: “Rre wa selegodimo o tla dirisana le lona ka mokgwa o o tshwanang fa lo sa itshwarele mongwe le mongwe morwarraagwe go tswa mo dipelong tsa lona.” (Math. 18:35) Ntlha ya ga Jesu e a utlwala. Maleo a re a dirileng mo botshelong jwa rona jwa bosaitekanelang a supa gore ga re ka ke ra kgona go fitlhelela ditekanyetso tsa ga Jehofa ka botlalo. Le fa go ntse jalo, Jehofa o iketleeleditse go re itshwarela le go phimola maleo a rona. Ka jalo, mongwe le mongwe yo o eletsang go nna tsala ya ga Jehofa o patelesega go itshwarela batho ba bangwe diphoso tsa bone, kgotsa fela jaaka Jesu a ile a bua jaana mo Therong ya kwa Thabeng: “Fa lo itshwarela batho ditlolo tsa bone, Rraalona wa selegodimo le ene o tla lo itshwarela; mme fa lo sa itshwarele batho ditlolo tsa bone, le Rraalona ga a na go itshwarela ditlolo tsa lona.”—Math. 6:14, 15.

6. Ke ka ntlha yang fa e se ka metlha go leng motlhofo go itshwarela?

6 O ka nna wa re, ‘go motlhofo go bua jalo, aitsane molomo o tlola noka e tletse.’ Seno ke ka gonne gantsi re kukega maikutlo fa mongwe a re kgopisitse. Motho a ka ikutlwa a galefile, a tsieditswe, a eletsa go direlwa tshiamiso kgotsa le e leng go batla go ipusolosetsa.  Tota e bile, bangwe ba ka nna ba akanya gore ga ba kitla ba itshwarela motho yo o ba kgopisitseng. Fa o ikutlwa jalo, o ka lwela jang go nna le moya wa go itshwarela o Jehofa a batlang re nna le one?

SEKASEKA MAIKUTLO A GAGO

7, 8. Ke eng se se tla go thusang gore o itshwarele ba bangwe fa ba go kgopisitse ka tsela e e sa siamang e ba itshwereng ka yone?

7 Gantsi re ka nna ra galefa thata fa re sa tshwarwa sentle kgotsa re akanya gore ga re a tshwarwa sentle. Akanya kafa lekawana lengwe le neng la itshwara ka gone, jaaka go tlhalositswe mo patlisisong nngwe e e malebana le go galefa: “Nako nngwe . . . fa ke ne ke galefile thata, ke ne ka tswa mo ntlong ke ikana gore ga nkitla ke tlhola ke boa. E ne e le letsatsi le lentle la selemo, ke ne ka tsamaya go bapa le ditselana tse dintle, go fitlha tidimalo le bontle jo ke neng ke bo bona bo dira gore ke ritibale, mme morago ga diura di le mmalwa ke ne ka boa, ke ikwatlhaile e bile ke sa tlhole ke galefile.” Fela jaaka maitemogelo ano a bontsha, go ipha nako ya go ritibala le go leba boemo o ritibetse go ka go thusa gore o tile go itshwara ka tsela e e sa siamang e moragonyana o ka e ikwatlhaelang.—Pes. 4:4; Dia. 14:29; Jak. 1:19, 20.

8 Mme go tweng fa e le gore o tswelela o galefile? Leka go tlhomamisa lebaka la go bo o galefile. A ke ka gonne o sa tshwarwa sentle kgotsa gongwe o tlontlolotswe? Kgotsa gongwe o akanya gore motho yo mongwe o ne a batla go go utlwisa botlhoko ka boomo? A tota se a se dirileng se bosula go le kalo? Go sekaseka le go tlhaloganya lebaka la go bo o itshwere ka tsela eo, go tla go thusa gore o kgone go bona tsela e e molemo le e e dumalanang le Dikwalo e o neng o tshwanetse go itshwara ka yone. (Bala Diane 15:28; 17:27.) Tsela e e ntseng jalo ya go akanya e ka go thusa go leba dilo ka tsela e e siameng le go go thusa gore o iketleeletse go itshwarela. Fa o leba dilo ka tsela e e ntseng jalo, le fa go ka nna thata jang, o letlelela lefoko la Modimo go sekaseka “dikakanyo le maikaelelo a pelo” ya gago le go go kaela gore o etse boikutlo jwa ga Jehofa jwa go itshwarela.—Baheb. 4:12.

A O TSHWANETSE GO KGOPISEGA?

9, 10. (a) O ka itshwara jang fa o akanya gore o kgopisitswe? (b) Go leba dilo ka tsela e e siameng le go nna le moya wa go itshwarela go ka fetola jang tsela e o lebang botshelo ka yone?

9 Maemo a le mantsi mo botshelong a ka dira gore o galefe. Ka sekai, a re re fa o ntse o kgweetsa, mokgweetsi yo mongwe o batla a go thula. O tla itshwara jang? O ka tswa o badile ka kgang nngwe e e buang ka dintwa tsa mo ditseleng e mo go yone motho a ileng a galefa thata jaana mo a neng a tlhasela mokgweetsi yo mongwe. Le fa go ntse jalo, e re ka o le Mokeresete, ga o ka ke wa batla go dira sengwe se se ntseng jalo.

10 Ruri go tla bo go le molemo go ipha nako ya go sekaseka maemo. Gongwe le wena o ka tswa o le molato ka ntlha ya se se diragetseng, ka gonne o ile wa iteega tsebe ka tsela nngwe. Kgotsa koloi ya mokgweetsi yo mongwe e ka tswa e ne e na le mathata a a rileng. Ntlha mo kgannyeng eno ke gore re ka kgona go fokotsa bogale, go swabisiwa, kgotsa maikutlo a mangwe a a sa siamang, ka go leba dilo ka tsela e e siameng, go tlhaloganya maemo, le go iketleeletsa go itshwarela. Moreri 7:9 ya re: “O se ka wa itlhaganelela go kgopisega mo moyeng wa gago, gonne go kgopisega go nna mo sehubeng sa dimatla.” O se ka wa kgopisega motlhofo. Gantsi re ka tsaya gore motho o re kgopisitse ka boomo ntswa go sa nna jalo; gongwe e le fela ka ntlha ya bosaitekanelang kgotsa e le go sa tlhaloganyane. Leka go nna tekatekano ka se go ka lebegang e le ditiro kgotsa mafoko a a sa siamang, mme o iketleeletse go itshwarela ka lorato. Fa o ka kgona go dira jalo, o tla itumela.—Bala 1 Petere 4:8.

‘E KETE KAGISO YA LONA E KA BOELA MO GO LONA’

11. Re tshwanetse go ikutlwa jang go sa kgathalesege gore batho ba tsibogela molaetsa wa rona jang fa re le mo bodireding?

11 O ka bontsha jang boikgapo fa mongwe a go bifela mo tirelong ya tshimo? Fa Jesu a ne a  romela batho ba le 70 go ya go rera, o ne a ba bolelela gore ba eleletse ntlo nngwe le nngwe e ba tsenang mo go yone kagiso. Jesu o ne a re: “Fa tsala ya kagiso e le gone, kagiso ya lona e tla nna mo go ene. Mme fa e seyo, e tla boela mo go lona.” (Luke 10:1, 5, 6) Re a itumela fa batho ba re amogela mo bodireding, ka gonne ba ka nna ba solegelwa molemo ke molaetsa o re o rerang. Le fa go ntse jalo, ka dinako dingwe batho ba nna kgatlhanong le rona. Re tshwanetse go dira eng fa go le jalo? Jesu o ne a re kagiso e re e eleleditseng ba ntlo eo e tshwanetse go tswelela e na le rona. Re tshwanetse go tswa mo ntlong nngwe le nngwe re na le kagiso mo dipelong tsa rona go sa kgathalesege gore batho ba re tshwara jang. Fa re galefa ka gonne mongwe a sa re tshwara sentle, re ka se kgone go tswelela re na le kagiso.

12. Go ya ka mafoko a ga Paulo a a mo go Baefeso 4:31, 32, re tshwanetse go itshwara jang?

12 Lwela go tswelela o na le kagiso mo maemong otlhe e seng fela fa o le mo bodireding jwa Bokeresete. Go bo o iketleeditse go itshwarela ba bangwe ga go reye gore o dumalana le se se phoso se ba se dirileng kgotsa o nyenyefatsa tshenyo e seo se e bakileng. Le fa go ntse jalo, go itshwarela go kaya gore o se ka wa nna o kgopisitswe ke diphoso tseo mme o tswelele o na le kagiso. Batho ba bangwe ba nna ba akanya ka dilo tse di sa siamang tse ba bangwe ba ba diretseng tsone le kafa ba sa ba tshwarang sentle ka gone, mme seo se dira gore ba se ka ba itumela. O se ka wa itetla go laolwa ke dikakanyo tse di ntseng jalo. Se lebale gore ga o ka ke wa itumela fa o nna o bolokile sekgopi. Ka jalo, o tshwanetse go itshwarela!—Bala Baefeso 4:31, 32.

ITSHWARE KA TSELA E E ITUMEDISANG JEHOFA

13. (a) Mokeresete a ka “koelela magala a a tukang” jang mo tlhogong ya mmaba wa gagwe? (b) Karabo e e bonolo e ka nna le diphelelo dife fa o sa tshwarwa sentle?

13 Fa go direga gore mongwe a go direle phoso, o ka nna wa kgona go mo thusa gore a anaanele melao ya Bokeresete. Moaposetoloi Paulo o ne a kwala jaana: “‘Fa mmaba wa gago a tshwerwe ke tlala, mo fepe; fa a nyorilwe, mo neye sengwe gore a nwe; gonne ka go dira seno o tla bo o koelela magala a a tukang mo tlhogong ya gagwe.’ Lo se ka lwa itetla gore lo fenngwe ke bosula, mme nnang lo fenye bosula ka molemo.” (Bar. 12:20, 21) Fa o bontsha go nna pelontle fa o sa tshwarwa sentle, o ka nna wa fetola tsela e ba bangwe ba ikutlwang ka yone mme wa dira gore e nne batho ba ba molemo. Fa o bontsha motho yo o go diretseng phoso gore o a mo tlhaloganya, o akanyetsa maikutlo a gagwe—tota le e leng go mo utlwela botlhoko—o ka nna wa mo thusa gore a ithute boammaaruri jwa Baebele. Le fa boemo e ka tswa e le bofe, karabo e e bonolo e thusa motho yo mongwe gore a bone gore o na le boitshwaro jo bo siameng.—1 Pet. 2:12; 3:16.

14. Go sa kgathalesege gore motho o go utlwisitse botlhoko go le kana kang, ke ka ntlha yang fa o sa tshwanela go boloka sekgopi?

14 Mo maemong a mangwe, go tla bo go sa siama go dirisana le batho ba ba rileng. Batho bao ba ka akaretsa ba e kileng ya bo e le maloko a phuthego mme ba leofile e bile ba sa ikwatlhaya, ka jalo ba kgaotswe. Fa motho yoo a go utlwisitse botlhoko, go ka nna thata gore o mo itshwarele, tota le fa a ikwatlhaya, go ka tsaya lobaka gore botlhoko joo bo fole. Mo maemong ao o ka nna wa tswelela o kopa Jehofa gore a go thuse go leka ka natla go nna le moya wa go itshwarela motho yo o go diretseng phoso mme a ikwatlhaile. Tota e bile, o ka itse jang se se mo pelong ya motho yo mongwe? Jehofa ke ene yo o itseng. O tlhatlhoba maitlhomo a a kwa teng a motho e bile o itshokela batho ba ba dirang diphoso. (Pes. 7:9; Dia. 17:3) Ke gone ka moo Baebele e reng: “Lo se ka lwa busetsa ope bosula ka bosula. Nayang dilo tse di molemo mo ponong ya batho botlhe. Fa go kgonega, kafa go ka kgonegang ka gone mo go lona, agisanang le batho botlhe. Lo se ka lwa ipusolosetsa, baratwa, mme thibogelang tšhakgalo; gonne go kwadilwe ga twe: ‘Pusoloso ke ya me; ke tla duela, go bua Jehofa.’” (Bar. 12:17-19) A tota re na le tshwanelo ya go atlhola motho yo mongwe? Nnyaa. (Math. 7:1, 2) Mme gone o  ka tlhomamisega gore Modimo o tla diragatsa tshiamiso.

15. Ke eng se se tla re thusang gore re se ka ra tshwarela batho ba ba sa re tshwarang sentle sekgopi?

15 Fa o akanya gore o diretswe tshiamololo ka tsela nngwe mme go le thata go itshwarela motho yo o go diretseng phoso le fa gone a ikwatlhaile, go ka nna molemo go lemoga gore le ene o boga ditlamorago tsa go rua bosaitekanelang. (Bar. 3:23) Jehofa o utlwela batho botlhe ba ba sa itekanelang botlhoko. Ka jalo, go molemo gore re rapelele motho yo o re kgopisitseng. Ga re kitla re tswelela re galefetse motho yoo fa re mo rapelela. Mme kgang ya gore ga re a tshwanela go tshwarela batho ba ba sa re tshwareng sentle sekgopi, e bonala sentle mo mafokong ano a ga Jesu: “Tswelelang lo rate baba ba lona lo bo lo rapelele ba ba lo bogisang.”—Math. 5:44.

16, 17. O tshwanetse go itshwara jang fa bagolwane ba Bakeresete ba swetsa ka gore moleofi o ikwatlhaile, mme ka ntlha yang?

16 Go dumalana le thato ya ga Jehofa, bagolwane Bakeresete ba neilwe maikarabelo a go atlhola dikgetsi tsa batho ba ba dirileng diphoso mo phuthegong. Bakaulengwe bano ga ba na temogo e e feletseng e Modimo a nang le yone, mme gone, ba ikaeletse go dira ditshwetso tse di dumalanang le kaelo e e mo Lefokong la Modimo ba kaelwa ke moya o o boitshepo. Ka jalo, tshwetso e ba e dirang mo dikgannyeng tse di ntseng jalo fa ba sena go batla thuso ya ga Jehofa ka thapelo, e tla bontsha tsela e Jehofa a lebang dilo ka yone.—Math. 18:18.

Mokeresete o tshwanetse go itshwarela ba bangwe

17 Mo maemong a a ntseng jalo, re tshwanetse go ikanyega. A o tla itshwarela batho ba ba ikwatlhaileng mme o ba tlhomamisetse gore o a ba rata? (2 Bakor. 2:5-8) Go ka nna ga se nne motlhofo go dira jalo, segolobogolo fa e le wena yo o diretsweng phoso kgotsa o amana ka losika le motho yo o diretsweng phoso. Le fa go ntse jalo, fa o ikanya Jehofa le tsela e a dirang dilo ka yone a dirisa phuthego ya gagwe, o tla dira dilo ka botlhale. O tla bo o bontsha gore tota o itshwarela o gololesegile.—Dia. 3:5, 6.

18. O ka solegelwa molemo ka ditsela dife fa o itshwarela o gololesegile?

18 Baitse ba tsa botsogo jwa tlhaloganyo, ba lemogile gore go na le melemo fa motho a iketleeleditse go itshwarela. Go dira gore o ikutlwe o imologile mo maikutlong, go fedisa maikutlo a a ka koafatsang botsogo jwa gago e bile go dira gore o nne le botsogo jo bo molemo o bo o itumelele botsala le ba bangwe. Seo se farologane le maikutlo a go sa batle go itshwarela—o ka feleletsa o lwala, o se na kamano e e molemo le ba bangwe, o na le kgatelelo ya maikutlo, e bile o sa kgone go buisana le ba bangwe sentle. Tshegofatso e kgolo go di gaisa tsotlhe ya go iketleeletsa go itshwarela ke go nna le kamano e e molemo le Rraarona yo o kwa legodimong e bong Jehofa.—Bala Bakolosa 3:12-14.