Fetela kwa tshedimosetsong

Fetela go diteng

Dira Gore Phuthego e Tswelele E na Le Moya o o Siameng

Dira Gore Phuthego e Tswelele E na Le Moya o o Siameng

 Dira Gore Phuthego e Tswelele E na Le Moya o o Siameng

“Bopelonomi jo bo sa re tshwanelang jwa Morena Jesu Keresete bo nne le moya o lo o bontshang.”—BAFIL. 4:23.

RE KA DIRA JANG GORE GO NNE LE MOYA O O SIAMENG MO PHUTHEGONG . . . 

fa re ntse re kopanela le bakaulengwe ba rona?

fa re tlhagafetse mo bodireding jwa tshimo?

ka go bega boleo jo bo masisi?

1. Phuthego ya kwa Filipi le ya kwa Thiatira di ne tsa akgolelwa eng?

BAKERESETE ba lekgolo la ntlha la dingwaga ba kwa Filipi ba ne ba humanegile. Le fa go ntse jalo, ba ne ba le pelotshweu e bile ba bontsha badumedimmogo le bone lorato lo logolo. (Bafil. 1:3-5, 9; 4:15, 16) Fa moaposetoloi Paulo a ne a konela lekwalo le le tlhotlheleditsweng le a neng a ba kwalela lone, o ne a re: “Bopelonomi jo bo sa re tshwanelang jwa Morena Jesu Keresete bo nne le moya o lo o bontshang.” (Bafil. 4:23) Ka gonne Bakeresete ba kwa Thiatira le bone ba ne ba bontsha moya o o tshwanang le oo, Jesu Keresete yo o galaleditsweng o ne a ba bolelela jaana: “Ke itse ditiro tsa gago, le lorato lwa gago le tumelo le bodiredi le boitshoko, le gore ditiro tsa gago tsa morago di feta tsa pele.”—Tshen. 2:19.

2. Re na le seabe sefe mo go tokafatseng moya o phuthego ya rona e o bontshang?

2 Ka tsela e e tshwanang, le gompieno phuthego nngwe le nngwe ya Basupi ba ga Jehofa e na le moya mongwe o e itsegeng ka one. Diphuthego dingwe di itsege thata ka go bontsha moya wa lorato. Tse dingwe di itsege ka go tlhagafalela go ema nokeng tiro ya go rera ka Bogosi le ka go tseela bodiredi jwa nako e e tletseng kwa godimo. Fa mongwe le mongwe wa rona a leka ka natla go nna le moya o o siameng, o thusa gore phuthego e nne seoposengwe le gore e gole semoyeng. (1 Bakor. 1:10) Kafa letlhakoreng le lengwe, fa re na le moya o o sa siamang, re ka dira gore phuthego e otsele semoyeng, e nne le boikutlo jwa go nna mololo le e leng go letlelela dilo tse di phoso mo phuthegong. (1 Bakor. 5:1; Tshen. 3:15, 16) Phuthego ya lona e na le moya o o ntseng jang? Wena ka bowena o ka thusa jang gore go nne le moya o o siameng mo phuthegong?

KGOTHALETSA MOYA O O SIAMENG MO PHUTHEGONG

3, 4. Re ka “baka [Jehofa] mo phuthegong e kgolo” jang?

3 Mopesalema o ne a opela jaana: “[Wena Jehofa] ke tla go baka mo phuthegong e kgolo; ke tla go baka mo  gare ga batho ba bantsi.” (Pes. 35:18) Mopesalema ga a ka a ithiba go baka Jehofa fa a ne a na le batlhanka ba bangwe ba Modimo. Dipokano tsa phuthego tsa beke le beke, go akaretsa le Thuto ya Tora ya Tebelo, di re naya ditshono tsa go bontsha moya wa go tlhagafala fa re akgela le fa re tlhalosa tumelo ya rona. Go tla bo go le molemo gore rotlhe re ipotse jaana: ‘A ke dirisa ka botlalo tshiamelo ya go nna le seabe kwa dipokanong? A ke di baakanyetsa sentle e bile ke akgela ka tsela e e utlwalang? E re ka ke le tlhogo ya lelapa, a ke thusa bongwanake go baakanyetsa dikakgelo go sa le gale le go ba ruta gore ba arabe ka mafoko a bone?’

4 Mopesalema Dafide o ne a bontsha gore go nitama ga pelo go amana le go opela ga rona. O ne a re: “Pelo ya me e nitame, wena Modimo, pelo ya me e nitame. Ke tla opela ke bo ke letse pina.” (Pes. 57:7) Dipina tse di opelwang kwa dipokanong tsa Bokeresete di re naya tshono e e molemo ya go ‘opela le go leletsa Jehofa pina’ ka pelo e e nitameng. Fa e le gore ga re itse dipina tse dingwe, ke eng fa re sa ithute go di opela ka nako ya maitseboa a Kobamelo ya Lelapa? E kete re ka ititaya sehuba go ‘opelela Jehofa botshelo jwa rona jotlhe, le go mo leletsa pina fa fela re sa ntse re le teng.’—Pes. 104:33.

5, 6. Re ka bontsha ba bangwe jang moya wa go amogela baeng le wa bopelotshweu, mme go dira jalo go tlhotlheletsa phuthego go dira eng?

5 Go bontsha bakaulengwe ba rona le bokgaitsadi moya wa go tshola baeng ke tsela e nngwe e ka yone re ka dirang gore go nne le moya wa lorato mo phuthegong. Mo kgaolong ya bofelo ya lekwalo le Paulo a neng a le kwalela Bahebera, o ne a ba tlhagisa jaana: “A lorato lwa lona lwa bokaulengwe lo tswelele. Lo se ka lwa lebala go tshola baeng.” (Baheb. 13:1, 2) Go direla balebedi ba ba etang le basadi ba bone kgotsa badiredi ba nako e e tletseng ba mo phuthegong dijo, ke tsela e e molemolemo e o ka bontshang go tshola baeng ka yone. Gape akanya ka batlholagadi, malapa a a nang le motsadi a le esi kgotsa bangwe ba ba ka solegelwang molemo ke gore ka dinako dingwe ba tle go ja le rona kgotsa ba nne gone mo kobamelong ya rona ya lelapa.

6 Paulo o ne a laela Timotheo gore a tlhagise ba bangwe “go dira molemo, go huma ditiro tse di molemo, go aba ka bopelontle, go iketleeletsa go abelana, ba ipolokela motheo o o molemo wa isagwe ka pabalesego, gore ba tshware botshelo jwa mmatota ka thata.” (1 Tim. 6:17-19) Paulo o ne  a akantsha gore baobamedimmogo le ene ba leke ka natla go nna le moya wa bopelotshweu. Tota le mo maemong a a thata a ikonomi, re ka kgona go bontsha moya wa bopelotshweu. Tsela e e molemo ya go dira jalo ke ka go pega batho ba ba tlhokang thuso mo koloing fa ba ya tirelong ya tshimo kgotsa fa ba ya dipokanong le fa ba boa. Mme go tweng ka batho ba ba solegelwang molemo ke ditiro tse di ntseng jalo tsa bopelonomi jwa lorato? Ba tla bo ba kgothaletsa moya o o siameng mo phuthegong fa ba bontsha kanaanelo, gongwe ka go ntsha se ba ka se kgonang go thusa go duelela ditshenyegelo tse di nnang di tlhatloga tsa lookwane. Mo godimo ga moo, go rulaganya go fetsa nako e e oketsegileng le bakaulengwe le bokgaitsadi ba rona go ka dira gore ba ikutlwe ba le botlhokwa e bile ba ratiwa. Fa re tota mo ditirong tse di molemo, “mo go ba ba amanang le rona mo tumelong” e bile re iketleeditse go dirisa nako ya rona le dilo tsa rona go ba thusa, re godisa lorato lo re ba ratang ka lone e bile re dira gore go nne le moya wa lorato le o o siameng mo phuthegong.—Bagal. 6:10.

7. Go boloka dikgang tsa batho ba bangwe e le sephiri go ka thusa jang gore go nne le moya o o siameng mo phuthegong?

7 Akanya ka dilo dingwe tse di ka nonotshang sebofo sa lorato se re nang le sone le badumedimmogo le rona: botsala le go boloka sephiri. (Bala Diane 18:24.) Ditsala tsa mmatota ga di ntshe dikgang tsa sephiri. Fa bakaulengwe ba rona ba re bulela mafatlha, e bile ba tlhomamisegile gore ga re ka ke ra ntsha mosi ka sekhurumelo ka se ba re bolelelang sone, sebofo sa lorato se se ka tswang se le gone se a nonofa. A re direng gore mo phuthegong go nne le moya wa lorato o o jaaka wa mo lelapeng ka go nna ditsala tse di ka ikanngwang tse di bolokang sephiri.—Dia. 20:19.

TLHAGAFALA MO BODIREDING

8. Ke kgakololo efe e e neng ya newa Balaodikia, mme ka ntlha yang?

8 Fa Jesu a bua le phuthego ya kwa Laodikia, o ne a re: “Ke itse ditiro tsa gago, gore ga o tsididi le gone ga o mogote. Ke eletsa e kete o ka bo o ne o le tsididi kgotsa go sa nneng jalo o le mogote. Jalo, ka gonne o le mololo mme o se mogote le gone o se tsididi, ke tlile go go tlhatsa mo molomong wa me.” (Tshen. 3:15, 16) Balaodikia ba ne ba sa tlhagafala mo bodireding jwa Bokeresete. Go ka direga gore mokgwa oo o ne wa ama tsela e ba neng ba dirisana ka yone. Ka jalo, Jesu o ne a ba gakolola jaana ka lorato: “Botlhe ba ke ba ratang ke a ba kgalemela ke ba ke ba otlhaya. Jalo tlhoafala mme o ikwatlhaye.”—Tshen. 3:19.

9. Tsela e re ikutlwang ka yone ka bodiredi jwa tshimo e ama jang moya wa phuthego?

9 Gore re rotloetse moya o o siameng mo phuthegong, re tshwanetse go tlhagafala mo tirelong ya tshimo. Phuthego e rulagantswe ka boikaelelo jwa go batla batho ba sekadinku mo tshimong ya rona le gore re ba rute boammaaruri. Ke gone ka moo, re tshwanetseng go nna le seabe ka tlhagafalo  mo tirong ya go dira barutwa, fela jaaka Jesu a ne a dira. (Math. 28:19, 20; Luke 4:43) Fa re tlhagafala thata mo bodireding, re tla nna “badirimmogo le Modimo” ba ba seoposengwe. (1 Bakor. 3:9) Fa re bona ba bangwe mo tirelong ya tshimo ba femela tumelo ya bone le go tlhalosa kafa ba anaanelang dilo tsa semoya ka gone, re tlhotlheletsega go ba rata le go ba tlotla ka mo go oketsegileng. Gape go dira re le “seoposengwe” mo bodireding go dira gore go nne le moya wa kutlwano mo phuthegong.—Bala Sefania 3:9.

10. Go tokafatsa ga rona boleng jwa bodiredi jwa tshimo, go ama jang moya o ba bangwe ba o bontshang mo phuthegong?

10 Maiteko a re a dirang go tokafatsa bodiredi jwa rona, gape a ama ba bangwe ka tsela e e molemo. Fa re ntse re bontsha batho ba re kopanang le bone gore re amega ka bone e bile re leka ka natla go tokafatsa tsela e re amang dipelo tsa bareetsi ba rona ka yone, tlhagafalo e re nang le yone mo bodireding e tla tota. (Math. 9:36, 37) Fa o le matlhagatlhaga o ka dira gore ba bangwe le bone ba nne matlhagatlhaga. Jesu o ne a romela barutwa ba gagwe ka bobedi ka bobedi go ya go rera, go na le gore ba tsamaye ka bongwe ka bongwe. (Luke 10:1) Seno se ne se sa ba kgothatse le go ba thapisa fela mme gape se ne se oketsa tlhagafalo ya bone mo bodireding. A ga re itumelele go dira mmogo le baboledi ba Bogosi ba ba tlhagafetseng? Go tlhagafala ga bone go a re kgothatsa e bile go re thusa gore re tswelele mo tirong ya go rera.—Bar. 1:12.

O SE KA WA NGONGOREGA KGOTSA WA FITLHA BOLEO JO BO MASISI

11. Ke moya o o ntseng jang o Baiseraele bangwe mo motlheng wa ga Moshe ba ileng ba nna le one, mme seno se ne sa ba ama jang?

11 Dibeke di le mmalwa fela setšhaba se se ntšha sa Iseraele se sa tswa go tlhomiwa, se ne sa simolola go nna le moya wa go se kgotsofale le wa go ngongorega. Seno se ne sa felela ka gore ba tsuologele Jehofa le baemedi ba gagwe. (Ekes. 16:1, 2) Ke Baiseraele ba le mmalwa fela ba ba ileng ba tswa kwa Egepeto ba ba ileng ba tsena mo Lefatsheng le le Solofeditsweng. Ebu, tota le Moshe ga a ka a letlelelwa go tsena mo lefatsheng leo ka ntlha ya tsela e a neng a itshwara ka yone fa phuthego ya Iseraele e ne e bontsha moya o o bosula! (Dute. 32:48-52) Gompieno re ka dira eng gore re se ka ra wela mo seraing sa go nna le moya o o sa siamang?

12. Re ka kgona jang go ikela tlhoko gore re se ka ra nna le moya wa go ngongorega?

12 Re tshwanetse go ikela tlhoko gore re se ka ra nna le moya wa go ngongorega. Le fa go lwela go nna le boikokobetso le go tlotla taolo go ka re thusa, re tshwanetse go ela tlhoko gore re tlwaelana le batho ba ba ntseng jang. Go sa tlhophe boitlosobodutu sentle kgotsa go fetsa nako e ntsi re na le batho ba re berekang le bone kgotsa ba re tsenang sekolo le bone ba ba sa tlotleng melaometheo e e siameng go ka nna le ditlamorago tse di botlhoko. Re tla bo re le botlhale fa re fokotsa go tsalana le batho ba ba nang le moya o o sa siamang kgotsa ba ba rotloetsang moya wa boitaolo.—Dia. 13:20.

13. Tlhotlheletso e e sa siamang ya go ngongorega e ka felela ka dilo dife tse dingwe tse di ka senyang bomoya jwa phuthego?

13 Tlhotlheletso e e sa siamang ya go ngongorega e ka felela ka dilo tse dingwe tse di ka senyang bomoya jwa rona. Ka sekai, go ngongorega go ka senya kagiso le kutlwano ya phuthego. Mo godimo ga moo, go nna re ngongorega ka badumedimmogo le rona go ka ba utlwisa botlhoko ga bo ga felela ka maleo a a jaaka go senya motho leina kgotsa go nna mogobolodi. (Lefi. 19:16; 1 Bakor. 5:11) Batho bangwe ba ba neng ba ngongorega mo phuthegong ya lekgolo la ntlha la dingwaga ba ne ba “itlhokomolosa borena e bile ba kgoba ba ba galalelang.” (Jude 8, 16) Ga go pelaelo gore Modimo o ne a sa amogele go ngongorega go  go ntseng jalo kgatlhanong le banna ba ba nang le maikarabelo mo phuthegong.

14, 15. (a) Go letla boleo bo tswelela go sa dirwe sepe ka gone go ka ama phuthego yotlhe jang? (b) Re tshwanetse go dira eng fa re lemoga gore mongwe o dirile boleo mo sephiring?

14 Go tweng fa re lemoga gore mongwe o dira boleo mo sephiring, gongwe o nwa bojalwa ka tsela e e feteletseng, o leba ditshwantsho tse di hepisang kgotsa o tshela botshelo jwa boitsholo jo bo sa siamang? (Baef. 5:11, 12) Go itlhokomolosa boleo jo bo masisi go ka kgoreletsa moya o o boitshepo wa ga Jehofa gore o se ka wa dira ka kgololesego mme ga tsenya kagiso ya phuthego yotlhe mo kotsing. (Bagal. 5:19-23) Fela jaaka Bakeresete ba bogologolo ba kwa Korintha ba ne ba tshwanelwa ke go tlosa bosula, le rona gompieno re tshwanetse go tlosa tlhotlheletso epe fela e e sa siamang mo phuthegong gore phuthego e tswelele e na le moya o o siameng. Ke eng se o ka se dirang gore go nne le kagiso mo phuthegong?

15 Jaaka go setse go umakilwe pelenyana, go botlhokwa go boloka sephiri mo dikgannyeng dingwe, segolobogolo fa bangwe ba re tshololetse maikutlo kgotsa ba re buletse mafatlha. Ruri go phoso go anamisa dikgang tsa mongwe tsa sephiri! Le fa go ntse jalo, fa mongwe a dirile boleo jo bo masisi, ba ba neilweng maikarabelo a Dikwalo—bagolwane mo phuthegong—ba tshwanetse go bolelelwa. (Bala Lefitiko 5:1.) Ka jalo, fa re itse ka mokaulengwe mongwe kgotsa kgaitsadi mongwe yo o dirileng boleo jo bo masisi, re tshwanetse go mo kgothaletsa go ya kwa bagolwaneng go batla thuso. (Jak. 5:13-15) Le fa go ntse jalo, fa a sa dire jalo, re tshwanetse go bega boleo joo.

16. Go bega ga rona boleo jo bo masisi go thusa jang go sireletsa bomoya jwa phuthego?

16 Phuthego ya Bokeresete ke lefelo la tshireletsego la semoya, mme re tshwanetse go e sireletsa ka go bega maleo a a masisi. Fa bagolwane ba thusa motho yo o dirileng phoso gore a itharabologelwe mme a ikwatlhae a bo a amogele kgalemelo, ga a tlhole a tsenya bomoya jwa phuthego mo kotsing. Mme go tweng fa motho yo o dirileng boleo jo bo masisi a sa ikwatlhae kgotsa a sa amogele kgakololo e e lorato ya bagolwane? Go lelekiwa ga gagwe mo phuthegong go tla felela ka ‘go senngwa’ ga selo se se senyang mo gare ga rona mme go tla sireletsa moya wa phuthego. (Bala 1 Bakorintha 5:5.) Ee, go sireletsa moya wa phuthego go tlhoka gore mongwe le mongwe wa rona a tseye kgato e e tshwanetseng, a dirisane le bagolwane a bo a sireletse boitekanelo jwa badumedimmogo le ene.

KGOTHALETSA “BONGWEFELA JWA MOYA” MO PHUTHEGONG

17, 18. Ke eng se se tla re thusang go “boloka bongwefela jwa moya”?

17 Fa balatedi ba bogologolo ba ga Jesu ba ne ba “ineela mo thutong ya baaposetoloi” seo se ne sa ba thusa gore ba nne le moya wa kutlwano mo phuthegong. (Dit. 2:42) Ba ne ba tseela kwa godimo kgakololo ya Dikwalo e ba neng ba e amogela mo banneng ba bagolwane. E re ka bagolwane ba motlha wa gompieno ba dirisana le setlhopha sa motlhanka yo o boikanyego le yo o botlhale, botlhe ba ba mo phuthegong ba a kgothadiwa le go thusiwa gore phuthego e nne seoposengwe. (1 Bakor. 1:10) Fa re ikobela ditaelo tse di theilweng mo Baebeleng tse di tswang mo phuthegong ya ga Jehofa re bo re latela dikaelo tsa bagolwane, re naya bosupi jwa gore re ‘tlhoafaletse go boloka bongwefela jwa moya mo sebofong se se kopanyang sa kagiso.’—Baef. 4:3.

18 Ka jalo, a re direng ka natla go dira gore go tswelele go na le moya o o siameng mo phuthegong. Fa re dira jalo, re tlhomamisediwa gore ‘bopelonomi jo bo sa re tshwanelang jwa Morena Jesu Keresete bo tla nna le moya o re o bontshang.’—Bafil. 4:23.

[Dipotso Tsa Thuto]

[Setshwantsho mo go tsebe 19]

A o dira gore go nne le moya o o siameng ka go baakanyetsa dikakgelo tse di utlwalang?

[Setshwantsho mo go tsebe 20]

Dira gore go nne le moya o o siameng ka go ithuta dipina tsa rona