Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

 Dipotso Tse di Tswang Kwa Babading

A Esekiele 18:20 e e reng, “morwa ga a kitla a sikara sepe ka ntlha ya tlolo ya ga rraagwe,” e ganetsana le Ekesodo 20:5, e e reng Jehofa o tlisetsa “bana ba basimane kotlhao ya tlolo ya borraabone”?

Ditemana tseno ga di ganetsane. E nngwe e kaya gore motho o tshwanetse go ikarabelela ka ntlha ya phoso e a e dirileng, mme e nngwe e tlhalosa gore phoso ya motho e ka nna le ditlamorago tse di ka amang bana kana ditlogolwana tsa gagwe.

Ditemana tse di mo go Esekiele kgaolo 18 di gatelela gore motho o tshwanetse go ikarabelela ka ntlha ya phoso e a e dirileng. Temana 4 ya re: “Moya o o leofang—go tla swa one.” Go tla diragalang ka motho yo o ‘siameng mme a diragaditse tshiamiso le tshiamo’? “Ruri o tla tswelela a tshela.” (Esek. 18:5, 9) Ka jalo, fa motho a godile mo go lekaneng gore a ka ikarabelela, o atlholwa “kafa ditseleng tsa gagwe.”—Esek. 18:30.

Molaomotheo ono o bontshiwa ke se se neng sa diragalela Molefi yo o bidiwang Kora. Fa Baiseraele ba ne ba le kwa nageng, Kora o ne a se ka a kgotsofalela ditshiamelo tse a neng a di filwe ke Modimo. Kora le ba bangwe ba ne ba tsuologela baemedi ba ga Jehofa e bong Moshe le Arone, ka gonne ba ne ba batla go dira ditiro dingwe tse di neng di dirwa ke baperesiti. Jehofa o ne a bolaya Kora le ba ba neng ba tsuologa le ene ka gonne ba ne ba ipagololela mogodu mme ba itseela tshiamelo  e e neng e sa ba lebana. (Dipa. 16:8-11, 31-33) Le fa go ntse jalo, bomorwa Kora bone ga ba a ka ba tsuologa. Modimo ga a ka a ba pega molato ka ntlha ya boleo jwa ga rraabone. Go ikanyega ga bone mo go Jehofa go ne ga felela ka gore ba se ka ba bolawa.—Dipa. 26:10, 11.

Go tweng ka tlhagiso e e mo go Ekesodo 20:5, e e leng karolo ya Melao e e Lesome? Le fano a re sekasekeng ditemana tse di dikologileng temana eno. Jehofa o ne a dira kgolagano ya Molao le setšhaba sa Iseraele. Fa Baiseraele ba sena go utlwa melao ya kgolagano eo, ba ne ba bua jaana phatlalatsa: “Re iketleeleditse go dira sotlhe se Jehofa a se buileng.” (Ekes. 19:5-8) Ka go rialo setšhaba seo sotlhe se ne sa simolola go nna le kamano e e kgethegileng le Jehofa. Ka jalo, mafoko a a mo go Ekesodo 20:5 a ne a lebisitswe thatathata mo setšhabeng seo ka kakaretso.

Fa setšhaba sa Baiseraele se ne se ikanyega mo go Jehofa, se ne se solegelwa molemo e bile se bona masego a mantsi. (Lefi. 26:3-8) Mme fa se ne se sa ikanyege se ne se sa bone masego. Fa setšhaba sa Iseraele se ne se furalela Jehofa mme se obamela medimo ya maaka, Jehofa o ne a se ka a tlhola a se segofatsa le go se sireletsa mme se ne sa welwa ke masetlapelo. (Baatlh. 2:11-18) Mme gone, go na le bangwe ba ba neng ba nna ba ikanyega mme ba ikobela ditaelo tsa Modimo le fa setšhaba seo se ne se obamela medingwana. (1 Dikg. 19:14, 18) Maleo a setšhaba seo a tshwanetse a bo a ile a bakela batho ba ba ikanyegang mathata mangwe, mme Jehofa o ne a ba bontsha bopelonomi jwa lorato.

Fa Baiseraele ba ne ba tlola ditaelo tsa ga Jehofa ka tsela e e feteletseng mo leina la gagwe le neng la sotlwa mo ditšhabeng, Jehofa o ne a ikemiseditse go ba otlhaya ka go letla gore ba isiwe botshwarwa kwa Babelona. Seo se ne se akaretsa go otlhaya batho ka bongwe le setšhaba sa gagwe ka kakaretso. (Jer. 52:3-11, 27) Eleruri, Baebele e bontsha gore setšhaba sa Iseraele ka kakaretso se ne se le molato thata mo e leng gore dikokomana di le tharo, di le nnè, kana go feta foo di ne tsa amiwa ke ditlamorago tsa diphoso tsa borraabonemogologolwane, fela jaaka Ekesodo 20:5 e bontsha.

Lefoko la Modimo gape le na le dipego tsa malapa mangwe a a neng a amiwa ke ditlamorago tsa boitshwaro jo bo sa siamang jwa batsadi. Moperesiti yo Mogolo Eli o ne a kgopisa Jehofa ka go letla bomorwawe “ba ba se nang molemo wa sepe,” ba ba dirang boitsholo jo bo sa siamang, gore ba tswelele e le baperesiti. (1 Sam. 2:12-16, 22-25) Ka gonne Eli o ne a tlotla bomorwawe go feta Jehofa, Modimo o ne a laela gore ba lelapa la ga Eli ba se ka ba tlhola ba nna baperesiti ba bagolo, mme seo se ne sa simolola ka setlogotlogolwana sa gagwe, e bong Abiathare. (1 Sam. 2:29-36; 1 Dikg. 2:27) Sekai sa ga Gehasi le sone se bontsha kafa molaomotheo o o mo go Ekesodo 20:5 o dirang ka teng. Fa e ne e le motlhokomedi wa ga Elisha ga a ka a dirisa maemo a gagwe sentle mme o ne a a dirisa gore a bone dithoto fa Molaodi wa masole a Siria, e bong Naamane a sena go fodisiwa. Jehofa o ne a bolela katlholo a dirisa Elisha, a re: “Lepero la ga Naamane le tla go ngaparela wena le bana ba gago ka bosakhutleng.” (2 Dikg. 5:20-27) Ka jalo, bana ba ga Gehasi ba ne ba amiwa ke ditlamorago tsa phoso ya gagwe.

Ka gonne Jehofa e le Mmopi le Moneimolao, o na le tshwanelo ya go dira tshwetso ya gore ke katlholo efe e e siameng le e e tshwanetseng. Dikai tse di fa godimo di bontsha gore bana kana ditlogolwana ba ka amiwa ke ditlamorago tse di maswe tsa boleo jwa batsadi. Le fa go ntse jalo, Jehofa “o utlwa selelo sa ba ba bogisiwang,” mme a ka amogela batho ba ba tlang kwa go ene ba batla thuso e bile a ka ba namola ka selekanyo se se rileng mo mathateng a bone.—Jobe 34:28.

[Setshwantsho mo go tsebe 29]

Go ne ga dirwa gore Kora le ba ba neng ba tsuologa le ene ba ikarabelele ka ntlha ya se ba se dirileng