Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

 Dipotso Tse di Tswang Kwa Babading

E re ka thobo e ne e simolola semmuso fa banna botlhe ba Baiseraele ba ne ba le kwa Moletlong wa Dikuku Tse di sa Bedisiwang, ke mang yo o neng a roba mabutswapele a barele a a neng a tlisiwa mo lefelong le le boitshepo?

Molao wa ga Moshe o ne o laetse Baiseraele jaana: “Motho mongwe le mongwe wa gago wa monna a bonale fa pele ga ga Jehofa Modimo wa gago gararo ka ngwaga mo lefelong le a tla le tlhophang: mo moletlong wa dikuku tse di sa bedisiwang le mo moletlong wa dibeke le mo moletlong wa diobo.” (Duteronome 16:16) Go tloga ka motlha wa ga Kgosi Solomone go ya pele, lefelo le Modimo a neng a le tlhopha e ne e le tempele e e kwa Jerusalema.

Moletlo wa ntlha mo go e meraro eno o ne o tshwarwa fa go tsena dikgakologo. O ne o bidiwa Moletlo wa Dikuku Tse di sa Bedisiwang, mme o ne o simologa letsatsi morago ga go ketekwa ga moletlo wa Tlolaganyo ka Nisane 14 o bo o tswelela pele malatsi a le supa go fitlha ka Nisane 21. Letsatsi la bobedi la moletlo, Nisane 16, e ne e le tshimologo ya thobo ya ntlha ya ngwaga go ya ka khalendara e e boitshepo. Ka letsatsi leo, moperesiti yo mogolo o ne a tshwanetse go tsaya “ngata ya mabutswapele a thobo” ya barele a bo a e ‘fokisetsa kwa le kwa fa pele ga ga Jehofa’ mo lefelong le le boitshepo. (Lefitiko 23:5-12) E re ka banna botlhe ba ne ba tshwanetse go nna teng kwa Moletlong wa Dikuku Tse di sa Bedisiwang, ke mang yo o neng a roba tshupelo eno?

Taelo ya gore go isiwe mabutswapele a thobo kwa go Jehofa ka nako ya Moletlo wa Dikuku Tse di sa Bedisiwang e ne e neelwa setšhaba sotlhe. Ga se gore mongwe le mongwe o ne a tshwanetse go itshimololela thobo a bo a tlisa mabutswapele ka boene kwa lefelong le le boitshepo. Go na le moo, setšhaba se ne se laetswe go dira jalo se direlwa ke baemedi. Ka jalo, dingata tsa Moletlo wa Dikuku Tse di sa Bedisiwang di ne di ka kgaolwa ke setlhopha se se rometsweng kwa masimong a a fa gaufi a barele. Encyclopaedia Judaica e bolela jaana fa e akgela ka seno: “Fa barele e ne e budule e ne e rojwa gaufi le Jerusalema; e seng jalo e ne e ka rojwa gongwe le gongwe mo Iseraele. E ne e rojwa ke banna ba le bararo, mongwe le mongwe a na le sekele ya gagwe le seroto sa gagwe.” Go tswa foo ngata ya barele e ne e tlisiwa kwa moperesiting yo mogolo, ene a bo a e isetsa Jehofa.

Taelo ya gore go isiwe mabutswapele a thobo e ne e naya Baiseraele sebaka se se molemo sa go bontsha gore ba anaanela masego a Modimo mo nageng ya bone le mo thobong. (Duteronome 8:6-10) Le fa go ntse jalo, sa botlhokwa le go feta, moletlo wa go ntsha tshupelo eno e ne e le “moriti wa dilo tse di molemo tse di tla tlang.” (Bahebera 10:1) Sa botlhokwa ke gore, Jesu Keresete o ne a tsosiwa ka Nisane 16 ya 33 C.E., e leng letsatsi la go isa mabutswapele a thobo kwa go Jehofa. Moaposetoloi Paulo o ne a kwala jaana kaga Jesu: “Keresete o tsositswe mo baswing, mabutswapele a ba ba robetseng mo losong. . . . Mme mongwe le mongwe a le mo maemong a gagwe: Keresete mabutswapele, morago ga moo ba e leng ba ga Keresete mo nakong ya go nna gone ga gagwe.” (1 Bakorintha 15:20-23) Ngata ya mabutswapele e moperesiti yo mogolo a neng a e fokisetsa kwa le kwa fa pele ga ga Jehofa e ne e tshwantshetsa Jesu Keresete yo o tsositsweng—ene wa ntlhantlha go tsosiwa mo baswing gore a bo a tshelela ruri. Ka jalo Jesu o ne a bula tsela gore batho ba gololwe mo boleong le mo losong.

[Motswedi wa Setshwantsho mo go tsebe 26]

© 2003 BiblePlaces.com