Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

 Dipotso Tse di Tswang Kwa Babading

Baebele ga e bue sepe ka tlwaelo ya go bontsha boitumelo ka go tsholeletsa digalase tsa dino kwa godimo, ka jalo ke eng fa Basupi ba ga Jehofa ba tila tlwaelo eno?

Tlwaelo ya go supa boitumelo ka go tsholeletsa digalase tsa beine (kgotsa dino tse dingwe) kwa godimo ke tlwaelo e e sa bolong go nna gone e e dirwang ke batho ba le bantsi, le fa gone tlwaelo eno e farologana go ya ka mafelo. Ka dinako tse dingwe batho ba dira seno ka go thulanya digalase tsa bone. Gantsi motho yo o batlang gore go dirwe jalo o eleletsa mongwe boitumelo, botsogo jo bo molemo, botshelo jo boleele, kana sengwe se se jaaka tseo. Ba bangwe ba ba leng teng foo ba ka bontsha go dumalana le seo ka go tsholetsa digalase tsa bone go tswa foo ba bo ba nwa beine. Mo bathong ba le bantsi, seo se ka bonala e le tlwaelo fela e e se nang molato kana e le tsela fela ya go bontsha maitseo a mantle, mme gone Basupi ba ga Jehofa ba na le mabaka a a utlwalang a go bo ba sa dire selo se se ntseng jalo.

Ga se gore Bakeresete ga ba eleletse batho ba bangwe go nna le boitumelo le botsogo jo bo molemo. Mo lekwalong le setlhopha se se laolang sa lekgolo la ntlha la dingwaga se neng sa le kwalela diphuthego, se ne sa akaretsa lefoko le le ka ranolwang e le “nnang le botsogo jo bontle,” “tlholang sentle,” kana “dilo di lo tsamaele sentle.” (Ditiro 15:29) Mme gape, baobamedi bangwe ba boammaaruri ba ne ba raya dikgosi tsa batho ba re: “A morena wa me . . . a tshele ka bosakhutleng!” kgotsa “A kgosi e tshele ka bosakhutleng!”—1 Dikgosi 1:31; Nehemia 2:3.

Mme gone, tlwaelo eno e simologile kae? Tora ya Tebelo ya January 1, 1968 (ya Seesemane), e ile ya nopola The Encyclopædia Britannica (1910), Bolumo 13, tsebe 121: “Tlwaelo ya go nwa beine go eleletsa motho ‘botsogo jo bo molemo’ e ka tswa e tserwe mo moetlong wa bogologolo wa bodumedi wa go nwa dino e le go ntshetsa medimo le baswi ditlhabelo. Bagerika le Baroma ka nako ya dijo ba ne ba tshelela medimo ya bone beine mme ka nako ya meletlo ya bone ba ne ba nwa beine go tlotla medimo le baswi.” Saetlopedia eno e oketsa jaana: “Tlwaelo e e amanang thata le eno ya go ntsha ditlhabelo ka dino ke ya go nwa beine go eleletsa batho ba ba tshelang botsogo jo bo molemo.”

A go sa ntse go le jalo? Buka ya International Handbook on Alcohol and Culture ya 1995 ya re: “[Tlwaelo eno ya go tsholetsa digalase] e ka tswa e le masalela a meetlo ya bogologolo ya go ntshetsa medimo ditlhabelo ka dino: madi kana beine mo boemong jwa go eleletsa motho botsogo, go bua thapelo e e sobokantsweng ka mafoko a a reng, ‘botshelo jo boleele!’ kana ‘botsogo jo bo molemo!’”

Ke boammaaruri gore, kgang ya go bo selo sengwe kana tlwaelo nngwe e simologile kgotsa e tshwana le nngwe ya bodumedi jwa maaka jwa bogologolo, ga se ka metlha e bolelang gore baobamedi ba boammaaruri ga ba a tshwanela go e dira. Akanya ka leungo la garanata. Saetlopedia nngwe e e itsegeng ya Baebele e bega jaana: “Go bonala garanata le yone e ile ya dirisiwa go nna letshwao le le tsewang le le boitshepo mo madumeding a boheitane.” Le fa go ntse jalo, Modimo o ile a laela gore digaranata tse di dirilweng ka tlhale di tsenngwe mo momenong wa seaparo sa moperesiti yo mogolo mme gape digaranata di ne tsa dirisiwa go kgabisa dipilara tsa gauta tsa tempele ya ga Solomone. (Ekesodo 28:33; 2 Dikgosi 25:17) Mo godimo ga moo, nako nngwe reng ya lenyalo e ne e amana le ngwao ya bodumedi. Le fa go ntse jalo, gompieno batho ba le bantsi ga ba itse seo, ba tsaya reng ya lenyalo e le bosupi fela jwa gore motho o nyetse kgotsa o nyetswe.

Mme go tweng ka go dirisa beine malebana le dilo tse di amanang le bodumedi? Ka sekai, nako nngwe banna ba Shekema ba ba obamelang Baale ba ne “ba tsena mo ntlong ya modimo wa bone mme ba ja ba nwa ba bo ba hutsa Abimeleke,” morwa wa ga Gidione. (Baatlhodi 9:22-28) A o akanya gore motho yo o ikanyegang mo go Jehofa o ne a ka nna le seabe mo go nweng go go ntseng jalo, gongwe a tlhaeletsa modimo wa maaka gore a hutse Abimeleke? Fa Amose a tlhalosa nako ya fa batho ba le bantsi kwa Iseraele ba ne ba tsuologetse Jehofa o ile a re: “Ba namalala fa thoko ga sebeso sengwe le sengwe mo godimo ga diaparo tse  di tserweng e le sebeelo; mme beine ya ba ba lefisitsweng, ba e nwela mo ntlong ya medimo ya bone.” (Amose 2:8) A baobamedi ba boammaaruri ba ne ba ka nna le seabe mo tiragalong e e ntseng jalo, e ka ne beine e tshetswe go nna setlhabelo sa medimo kana e nowa fela mo maemong a a ntseng jalo? (Jeremia 7:18) A kgotsa moobamedi wa boammaaruri o ne a ka tsholetsa galase ya beine go kopa modimo wa maaka go laola isagwe ya mongwe kana go mo segofatsa?

Ka dinako tse dingwe baobamedi ba ga Jehofa ba ne ba tle ba tsholetse diatla tsa bone le go kopa gore dilo di ba tsamaele sentle. Ba ne ba tsholeletsa Modimo wa boammaaruri diatla. Re bala jaana: “Solomone a simolola go ema fa pele ga sebeso sa ga Jehofa . . . mme jaanong a otlololela magofi a gagwe kwa magodimong; mme a re: ‘Jehofa Modimo wa Iseraele, ga go na Modimo o o tshwanang le wena . . . mme e kete wena ka bowena o ka utlwa kwa lefelong la gago la bonno, kwa magodimong, mme o utlwe o bo o itshwarele.’” (1 Dikgosi 8:22, 23, 30) Ka tsela e e tshwanang “Esera [o ne] a baka Jehofa . . . mme batho botlhe ba araba ba re, ‘Amen! Amen!’ ba tsholetsa diatla tsa bone. Go tswa foo ba obama mme ba ikobela Jehofa difatlhego tsa bone di lebile fa fatshe.” (Nehemia 8:6; 1 Timotheo 2:8) Go bonala sentle gore batho bao ba ba ikanyegang ba ne ba sa tsholeletse diatla tsa bone kwa legodimong ba kopa tshegofatso ya modimo mongwe wa masego.—Isaia 65:11.

Batho ba le bantsi gompieno ba ba tlwaetseng go bontsha boitumelo ka go tsholetsa digalase tsa dino ba ka tswa ba sa akanye gore ka go dira jalo ba a bo ba kopa thuso kana masego a modimo mongwe, mme gone gape ba ka se kgone go tlhalosa gore ke eng fa ba tsholeletsa digalase tsa bone tsa beine kwa legodimong. Le fa go ntse jalo, kgang ya go bo ba sa akanyetse seno ka kelotlhoko ga e neye Bakeresete ba boammaaruri lebaka la go ikutlwa ba tshwanelwa ke go etsa tlwaelo e e ntseng jalo.

Go a itsege gore le mo dilong tse dingwe, Basupi ba ga Jehofa ba tila go dira dilo tse bontsi jwa batho bo di dirang. Ka sekai, batho ba le bantsi ba na le go ema ka tsela ya go bontsha go tlotla matshwao a naga, kana difolaga; batho bano ga ba tseye go dira dilo tseo e le mokgwa mongwe wa kobamelo. Bakeresete ba boammaaruri ga ba thibele batho bao go dira ditiro tse di ntseng jalo, mme gone bone ka bobone ga ba di dire. Basupi ba le bantsi ba dirisa botlhale ka go tila go nna gone ka dinako tsa fa go dirwa ditiro tseno gore ba se ka ba kgopisa batho ba bangwe. Mme gone, ba ititeile sehuba go se dire ditiro tsa boratanaga, tse di sa dumalaneng le Baebele. (Ekesodo 20:4, 5; 1 Johane 5:21) Gompieno batho ba le bantsi ba ka nna ba se ka ba tsaya go tsholeletsa digalase kwa godimo e le mokgwa mongwe wa kobamelo. Le fa go ntse jalo, go na le mabaka a a utlwalang a go bo Bakeresete ba sa nne le seabe mo tlwaelong ya go tsholeletsa digalase kwa godimo, e e simologileng mo dilong tsa bodumedi mme le gone jaanong e ka tsewa e le go kopa ‘magodimo’ gore a segofatse motho, jaaka e kete motho o kopa thuso ya maatla mangwe a a fetang a motho.—Ekesodo 23:2.