Fetela kwa tshedimosetsong

Fetela go diteng

‘Ke Weditse Dithuto Tsa me ka Tsela e e Molemolemo’

‘Ke Weditse Dithuto Tsa me ka Tsela e e Molemolemo’

 ‘Ke Weditse Dithuto Tsa me ka Tsela e e Molemolemo’

MORUTABANA mongwe wa sekolo se segolwane sa kwa Spain o ne a kwala jaana: “Mo dingwageng di feta lekgolo Basupi ba ga Jehofa ba itshupile e le batho ba ba seoposengwe tota, ba ba nang le boikanyego jo bo se nang selabe mme mo godimo ga tsotlhe ba na le tumelo e e ka se kang ya senngwa.” Ke eng se se neng sa tlhotlheletsa morutabana yono—yo o reng ga a dumele gore Modimo o teng—gore a bue mafoko ano?

Kgang eno yotlhe e simolotse fa Noemí, yo e leng moithuti wa sekolo se segolwane e bile e le Mosupi wa ga Jehofa a ne a abelwa gore a kwale tlhamo e e neng e tla nna karolo ya tlhatlhobo ya makgaolakgang ya dithuto tsa gagwe tsa sekolo. O ne a swetsa ka go kwala ka setlhogo se se reng, “Batho ba Khutlotharo e Phepole Kafa Tlase ga Puso ya Banasi.”

Ke ka ntlha yang fa a ne a tlhopha setlhogo seno? Noemí a re: “E re ka morutabana a ne a tla bo a beile tiro ya me leitlho, ke ne ka akanya gore ke dirise tshono eno go mo rerela. Kgang ya kafa Basupi ba ga Jehofa ba kwa Jeremane ya Bonasi ba neng ba boloka bothokgami jwa bone ka yone e ne ya nkama pelo tota. Ka jalo ke ne ke dumela gore e tla kgatlha le batho ba bangwe.”

Tiro ya ga Noemí e ne ya ama thata batho ba bangwe ba bantsi go feta kafa a neng a akantse ka gone. Ka October 5, 2002, tlhamo ya gagwe e ne ya amogela sekgele mo kgaisanong ya setšhaba ya dipatlisiso tse di dirwang ka saense le matshelo a batho. Dikgele tsa kgaisano eo di ne di abiwa ke setlhopha sa boporofesa ba le 20 ba ba tswang mo diyunibesithing tse di itsegeng tsa Spain.

Tona ya thuto ya Mo-Spain e bong Pilar del Castillo e ne ya naya Noemí sekgele sa gagwe. Noemí o ne a dirisa tshono eno go naya tona khopi ya khasete ya bidio e e reng Jehovah’s Witnesses Stand Firm Against Nazi Assault. Tona e ne ya amogela mpho eno kwantle ga go okaoka.

Kwa motseng o Noemí a tswang kwa go one wa Manresa, lokwalodikgang lwa teng lo ne lwa gatelela tsela e a atlegileng ka yone mo tirong ya gagwe ya sekolo mme lwa kwala gape diteng tsa tlhamo ya gagwe. Mogokgo wa sekolo ene o ne a kopa khopi ya tlhamo ya ga Noemí gore a e tsenye mo thulaganyong ya go keteka segopotso sa ngwaga wa bo75 wa sekolo seo se segolwane.

Noemí o ne a re: “Ke weditse dithuto tsa me tsa sekolo se segolwane ka tsela e e molemo go gaisa tsotlhe tse ke neng nka di akanya. Ke ne ke itumetse tota fa ke bala mafoko a morutabana wa me e bong Rre Jorge Tomás Calot a neng a a kwadile e le karolo ya matseno a pego ya me:

“‘Ga ke dumele mo Modimong, mme gone ke tlhomamisegile gore go na le Mogodimodimo yo o tlhotlheletsang baobamedi ba gagwe gore ba nne le “lorato lwa mmatota mo baagelaning ba bone.”’”