Fetela kwa tshedimosetsong

Fetela go diteng

Ba ne Ba Itumedisa Dipelo Tsa Batsadi ba Bone

Ba ne Ba Itumedisa Dipelo Tsa Batsadi ba Bone

 Ba ne Ba Itumedisa Dipelo Tsa Batsadi ba Bone

“MORWAAKA, fa pelo ya gago e tlhalefile, pelo ya me e tla ipela.” (Diane 23:15) Eleruri batsadi ba Bakeresete ba a itumela fa bana ba bone ba nna le botlhale jwa bomodimo. Ka Matlhatso wa September 10, 2005, setlhopha sa batho ba le 6 859 ba ba tswang mo ditšhabeng tse di farologaneng se ne sa nna gone kwa dikalogong tsa tlelase ya bo119 ya Sekolo sa Baebele sa Watchtower sa Gileade. Dipelo tsa botlhe ba ba neng ba le gone di ne di phophoma boitumelo, bogolosegolo tsa batsadi ba baalogi ba le 56.

David Walker, yo e ntseng e le leloko la lelapa la Bethele la United States ka lobaka lo loleele o ne a bula thulaganyo ka thapelo e e tswang pelong. Mme morago ga moo, modulasetulo e bong David Splane yo e leng leloko la Setlhopha se se Laolang sa Basupi ba ga Jehofa o ne a simolola thulaganyo ka go raya batsadi ba baalogi bano a re: “Ruri lo tshwanelwa ke go akgolwa. Dinonofo tse lo thusitseng bana ba lona gore ba nne le tsone di ba tlhotlheleditse go tsaya tirelo ya borongwa.” Batsadi bano ba tshwanetse ba bo ba ne ba tshwenyegile tota gonne go ise go ye kae bana ba bone ba ne ba tla bo ba tsamaya ba ya kwa dikabelong tsa bone tse di kgakalakgakala. Le fa go ntse jalo, Mokaulengwe Splane o ne a ba kgothatsa ka gore: “Lo se ka lwa tshwenyega ka bana ba lona. Jehofa a ka kgona go ba tlhokomela go feta kafa lona lo ka ba tlhokomelang ka teng.” Mme morago ga moo o ne a re: “Akanyang ka dilo tse di molemo tse bana ba lona ba tlileng go di dira. Batho ba ba bogang ba tla bona kgomotso ya mmatota la ntlha mo botshelong jwa bone.”

Kafa ba ka Tswelelang ba Leretse ba Bangwe Boipelo ka Gone

Modulasetulo o ne a itsise dibui tse nnè. Sebui sa ntlha e ne e le leloko la Komiti ya Lekala ya kwa United States e bong Ralph Walls o ne a tlotla ka setlhogo se se reng, “Nna o Butse Matlho.” O ne a gatelela ntlha ya gore go nna sefofu semoyeng go kotsi go feta go nna sefofu sa mmatota. Phuthego ya lekgolo la ntlha la dingwaga ya kwa Laodikia e ne ya foufala semoyeng. Bakeresete ba phuthego eo ba ba neng ba foufetse semoyeng ba ne ba thusiwa, mme gone go botoka gore ka metlha re itise gore re se ka ra foufala semoyeng ka go boloka matlho a rona a semoya a bulegile. (Tshenolo 3:14-18) Sebui se ne sa re: “Nna o butse matlho mme o lebe banna ba ba eteletseng pele jaaka Jehofa a ba leba.” Baalogi ga ba a tshwanela go tlhobaela ka mo go feteletseng fa go na le mathata mo phuthegong. Morena Jesu Keresete o bona dilo tseno tsotlhe. O tla tlhomamisa gore ka nako e e tshwanetseng, dilo tseo di a baakanngwa.

Morago ga moo, Samuel Herd wa Setlhopha se se Laolang o ne a araba potso e e reng, “A lo Ipaakanyeditse Tiro?” Fela jaaka motho yo o tsayang loeto a tsaya diaparo tse a tla di tlhokang, baalogi le bone ba tshwanetse gore ka metlha ba apare dinonofo tsa botho jo bosha. Ba tshwanetse go nna kutlwelobotlhoko jaaka Jesu. Fa molepero a ne a mo raya a re: “Fa fela o batla, o ka nntlafatsa,” Jesu o ne a re: “Ke a batla. Ntlafala.” (Mareko 1:40-42) Morago ga moo sebui se ne sa re: “Fa tota o batla go thusa batho, o tla bona tsela ya go ba thusa.” Bafilipi 2:3 e bolelela Bakeresete gore ba tshwanetse go tsaya ‘ba bangwe ba le kwa godimo ga bone.’ Mokaulengwe Herd o ne a re: “Go nna boikokobetso mo  pelong go botlhokwa thata go feta go nna le kitso. Batho ba o kopanang le bone mo bodireding mmogo le bakaulengwe le bokgaitsadi mo phuthegong ba tla solegelwa molemo ke kitso ya gago fa fela o le boikokobetso.” O ne a konela ka gore fa baalogi ba ka tswelela ba apere lorato lwa Bokeresete, seno se ne se tla bo se supa gore ba siametse go ya kwa dikabelong tsa bone mme ga go pelaelo gore ba tla atlega fa ba fitlha teng.—Bakolosa 3:14.

Mongwe wa batlhatlheledi ba Gileade e bong Mark Noumair o ne a dira gore bareetsi ba swegaswege ba ipotsa gore o tlile go bua ka eng fa a ne a dirisa setlhogo se se reng, “A o Tla Tswelela O na Le Boikutlo Joo?” “Boikutlo” jo go buiwang ka jone bo raya go nna re supa tebogo ka ntlha ya bomolemo jwa ga Jehofa. Pesalema 103:2 ya re: “Baka Jehofa, wena moya wa me, mme o se ka wa lebala ditiro tsotlhe tsa gagwe.” Baiseraele ba ne ba bontsha gore ga ba leboge mana a a neng a ba bolokile ba tshela ka gonne ba ne ba a bitsa, “senkgwe seno se se nyatsegang.” (Dipalo 21:5) Fa nako e ntse e tsamaya, mana ga a ka a fetoga mme kanaanelo e bone ba neng ba na le yone mo go one e ne ya fela. Motlhatlheledi o ne a re: “Fa lo ka lebala dilo tse Jehofa a lo diretseng tsone mme lwa leba kabelo ya lona e se e e botlhokwa go le kalo, seno se tla ama kafa lo lebang ka gone tiro e Jehofa a lo abetseng yone.” Pesalema 103:4 ya re Jehofa ‘o lo rwesa serwalo sa bopelonomi jwa lorato.’ Baalogi ba tla lemoga bopelonomi jo bo lorato jwa Modimo fa ba fitlha kwa diphuthegong tsa bone tse disha.

Motlhatlheledi yo mongwe wa Gileade e bong Lawrence Bowen o ne a tlotla ka setlhogo se se reng, “A lo Tla Tlelwa ke Masego?” O ne a bolela gore baalogi ba tlelase ya bo119 ya Gileade ba ithapisitse ka thata gore e nne barongwa ba ba atlegileng. Mme jaanong ba tshwanetse go kgomarela Jehofa le tiro e a ba abetseng yone. Mo go Tshenolo 14:1-4, ba ba 144 000 ba tlhalosiwa e le “ba ba nnang ba sala Kwana morago go sa kgathalesege gore o ya kae.” Botlhe ba ba leng mo setlhopheng seno ba kgomarela Jehofa le Morwawe ka boikanyegi go sa kgathalesege diteko tse ba lebanang le tsone mme ba kgona go fitlhelela mekgele ya bone. Sebui se ne sa re, “go sa kgathalesege gore go diregang le rona re tshwanetse go kgomarela Jehofa ka boikanyegi mmogo le tiro e a re abetseng yone.” Fa baalogi bano ba dira jalo ba tla ‘tlelwa ke ditshegofatso’ tsa ga Jehofa.—Duteronome 28:2.

Go Nna le Matswela mo Bodireding

Mafelobeke mangwe le mangwe fa baithuti ba ntse ba le mo khosong, ba ne ba nna le seabe mo bodireding jwa tshimo. Fa mokwadisi wa sekolo e bong Wallace Liverance a ne a buisana le bone, go ne go bonala sentle gore ba ne ba atlegile. Ba ne ba kgonne go rera dikgang tse di molemo ka dipuo di ka nna lesome mme ba kgonne go simolola dithuto di le mmalwa tsa Baebele. Banyalani bangwe ba ba leng mo sekolong sa Gileade ba ne ba simolola thuto ya Baebele le monna mongwe wa Mo-China. Morago ga go mo etela gabedi ba ne ba mmotsa gore o ne a ikutlwa jang ka kgang ya go itse Jehofa. O ne a bula Baebele ya gagwe mme a ba kopa gore ba bale Johane 17:3. O ne a ikutlwa gore o mo tseleng e e yang kwa botshelong.

Anthony Morris wa setlhopha se se laolang o ne a botsolotsa bakaulengwe ba le bararo ba e leng maloko a Dikomiti tsa Makala kwa Côte d’Ivoire, Dominican Republic, le Ecuador. Bakaulengwe bano ba ne ba tlhomamisetsa baalogi gore maloko a Dikomiti tsa Makala a lebeletse pele go goroga ga bone mme ba tla ba thusa go tlwaela dikabelo tsa bone.

Morago ga moo, Leonard Pearson wa lelapa la Bethele la kwa United States o ne a bua le maloko a le mararo a Komiti ya Lekala a a tswang kwa Democratic Republic of the Congo, Papua New Guinea, le kwa Uganda. Bakaulengwe bano ba ne ba kgothatsa baalogi gore ba dire ka thata mo bodireding jwa tshimo. Banyalani bangwe ba barongwa ba ba feditseng dingwaga di le 21 kwa Congo ba thusitse batho ba le 60 gore ba ineele le go kolobediwa. Gone jaanong banyalani bao ba tshwara dithuto di le 30 tsa Baebele mme batho ba le 22 ba ba ithutang le bone ba nna gone mo dipokanong. Gone jaanong ke nako e e siameng ya go nna morongwa gonne thobo ya semoya e kgolo tota mo tshimong eno.

Go Naya Bosupi Re na Le Moya wa go Potlaka

Gerrit Lösch wa Setlhopha se se Laolang o ne a neela puo ya bofelo. Setlhogo sa puo ya gagwe se ne se re, “Go Bua ka Modimo le go Neela Bosupi ka Jesu mo Letsatsing la Morena.” Mafoko a a reng “mosupi,” “basupi,” le go “neela bosupi” a tlhaga makgetlho a le 19 mo bukeng ya Tshenolo. Ka jalo Jehofa o tlhalosa ka tsela e e utlwalang sentle tiro e a batlang batho ba gagwe ba e dira. Ke leng mo re tshwanelwang ke go neela bosupi jono? Ke “mo letsatsing  la Morena.” (Tshenolo 1:9, 10) Letsatsi leo le simologile ka 1914, le tswelela mo motlheng wa rona go fitlha le mo isagweng. Go ya ka Tshenolo 14:6, 7, tiro ya go bua ka Modimo e tshegediwa ke baengele. Tshenolo 22:17 e bontsha gore boikarabelo jwa go kaela tiro eno ya go naya bosupi ka Jesu bo neilwe masalela a Bakeresete ba batlodiwa. Mme gone rotlhe re tshwanetse go diragatsa tshiamelo eo e re e neilweng ka botlalo gone jaanong. Tsh 22 Temana ya 20 e bega gore Jesu o ne a re: “Ke tla ka bofefo.” Mokaulengwe Lösch o ne a raya botlhe ba ba leng gone a re: “Bitsang batho lo ba reye lo re, ‘Tlayang lo tseye metsi a botshelo mahala.’ Jesu o tla ka bofefo. A re ipaakanyeditse go tla ga gagwe?”

Fred Rusk yo o kileng a nna motlhatlheledi wa Gileade dingwaga di le 11 o ne a konela thulaganyo ka go leboga Jehofa ka thapelo e e neng ya ama thata dipelo tsa botlhe ba ba neng ba le gone. E ne ya nna tsela e e tshwanelang tota ya go wetsa letsatsi leno la tiragalo e e itumedisang.

[Lebokoso mo go tsebe 13]

DIPALOPALO TSA SETLHOPHA

Palo ya dinaga tse ba tswang kwa go tsone: 10

Palo ya dinaga tse ba abetsweng go ya kwa go tsone: 25

Palo ya baithuti: 56

Palogare ya dingwaga tsa bone: 32.5

Palogare ya dingwaga ba le mo boammaaruring: 16.4

Palogare ya dingwaga mo bodireding jwa nako e e tletseng: 12.1

[Setshwantsho mo go tsebe 15]

Setlhopha sa bo119 sa Baalogi sa Sekolo sa Baebele sa Watchtower sa Gileade

Mo lenaaneng le le fa tlase, mela e balwa go tloga kwa pele go ya kwa morago, mme maina a tlhomagantswe go tloga kafa molemeng go ya kafa mojeng wa mola mongwe le mongwe.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.