Fetela kwa tshedimosetsong

Fetela go diteng

Meneelo e e Itumedisang Modimo

Meneelo e e Itumedisang Modimo

 Meneelo e e Itumedisang Modimo

KGANG eno ga se e e itumedisang. Kgosigadi Athalia o ne a gapile bogosi jwa Juda a dirisa boferefere le polao. E ne ya re a ithaya a re botlhe ba ba tshwanetseng go nna baruaboswa ba sule a bo a itlhoma gore a nne kgosigadi. Mosadi yo mongwe, yo e neng e le morwadia kgosi, yo o neng a bidiwa Jehosheba, o ne a rata Jehofa le Molao wa gagwe thata, mme o ne a nna pelokgale a fitlha ngwana wa segosi e bong Jehoashe. Jehosheba le monna wa gagwe yo e neng e le Moperesiti yo Mogolo yo o bidiwang Jehoiada, ba ne ba fitlha moruaboswa yono dingwaga di le thataro mo phaposing nngwe ya tempele.—2 Dikgosi 11:1-3.

Fa Jehoashe a nna le dingwaga di le supa, Jehoiada Moperesiti yo Mogolo o ne a setse a siametse go diragatsa leano la gagwe la go tlosa kgosigadi e e dikgoka mo bogosing jo a bo boneng ka boferefere. O ne a ntsha mosimane yono mo a neng a mo fitlhile teng mme a mo rwesa serwalo sa bogosi gore e nne moruaboswa yo o tshwanetseng wa bogosi. Mme balebedi ba segosi ba ne ba gogela Kgosigadi Athalia yo o boikepo kwa ntle ga mabala a tempele mme ba mmolaya, mme seno se ne sa itumedisa batho thata. Se Jehoiada le Jehosheba ba se dirileng se ne sa thusa thata mo go tsosoloseng kobamelo ya boammaaruri mo lefatsheng la Juda. Mme sa botlhokwa le go feta, se ne sa thusa gore losika lwa ga Dafide lo lo neng lo tla tlisa Mesia lo tswelele mo setulong sa bogosi.—2 Dikgosi 11:4-21.

Kgosi e ntšha e e tlhomilweng le yone e ne e tshwanetse go dira dilo tse di neng di tla itumedisa pelo ya Modimo. Ntlo ya ga Jehofa e ne e senyegile thata mo e neng e tlhoka go baakanngwa. Keletso e e sa laolesegeng e Athalia a neng a na le yone ya go busa Juda a le esi e ne e sa dira fela gore tempele e tlhokomologiwe mme gape e ne e dirile gore e senyege. Ka jalo, Jehoashe o ne a ikemiseditse go aga tempele sesha le go e tsosolosa. Kwantle ga go diega o ne a ntsha taelo ya gore go kokoanngwe madi a a neng a tla thusa go tsosolosa ntlo ya ga Jehofa. O ne a re: “Madi otlhe a ditshupelo tse di boitshepo a a tlisiwang mo ntlong ya ga Jehofa, madi a nngwe le nngwe ya tsone e lekanyediwang ka one, madi a meya go ya kafa mongwe le mongwe a ipeetseng tlhwatlhwa ka gone, madi otlhe a go tlang mo pelong ya mongwe le mongwe gore a a tlise mo ntlong ya ga Jehofa, a baperesiti ba a itseele, mongwe le mongwe mo mothong yo a tlwaelaneng le ene; mme mma ba baakanye mathubego a ntlo, gongwe le gongwe kwa lethubego le fitlhelwang teng.”—2 Dikgosi 12:4, 5.

Batho ba ne ba ntsha meneelo eno ka go rata. Le fa go ntse jalo, baperesiti ba ne ba sa dire tiro ya bone ya go baakanya tempele ka dipelo tsotlhe. Ka jalo kgosi e ne ya swetsa ka gore e nne yone e okamelang tiro eno mme e ne ya laela gore meneelo yotlhe e isiwe ka tlhamalalo kwa lebokosong le le kgethegileng. O ne a tlhoma Jehoiada go okamela tiro eno, mme re bolelelwa jaana: “Jaanong moperesiti Jehoiada a tsaya letlole mme a phunya leroba mo sekhurumelong sa lone a le baya fa thoko ga sebeso kafa mojeng wa fa motho a tsena mo ntlong ya ga Jehofa, mme baperesiti, balebedi ba kgoro, ba tsenya madi otlhe a a neng a tlisiwa mo ntlong ya ga Jehofa mo go lone. Mme go ne ga diragala gore fela fa ba bona gore go ne go na le madi a mantsi fela thata mo letloleng, mokwaledi wa kgosi le moperesiti yo mogolo ba ne ba tlhola ba tla, ba bofe  madi a a neng a fitlhelwa kwa ntlong ya ga Jehofa ba bo ba a bala. Mme ba naya badiri ba tiro ba ba neng ba tlhomilwe mo ntlong ya ga Jehofa madi mo diatleng a a neng a badilwe. Le bone ba duela ba ba dirang ka dikgong le baagi ba ba neng ba dira mo ntlong ya ga Jehofa ka one, le ba ba agang ka leje le babetli ba leje, le go reka dikota le maje a a betlilweng gore go baakanngwe mathubego a ntlo ya ga Jehofa le sotlhe se se neng se dirisiwa mo ntlong go e baakanya.”—2 Dikgosi 12:9-12.

Batho ba ne ba tsibogela seno ka dipelo tsa bone tsotlhe. Ntlo ya ga Jehofa ya kobamelo e ne ya tsosolosiwa e le gore kobamelo ya gagwe e tswelele ka tsela e e tlotlegang. Ka jalo, madi otlhe a meneelo a ne a dirisitswe ka tshwanelo. Kgosi Jehoashe o ne a tlhomamisa gore seo se a direga!

Gompieno, phuthego ya ga Jehofa e e bonalang e ela tlhoko gore madi otlhe a meneelo a dirisiwe ka tshwanelo go tsweletsa kobamelo ya ga Jehofa pele, mme Bakeresete ba boammaaruri le bone ba dira fela jaaka Baiseraele ba bogologolo—ka pelo yotlhe. Gongwe o mongwe wa ba ba neng ba ntsha moneelo mo ngwageng o o fetileng wa tirelo go tsweledisetsa pele dilo tse di direlwang Bogosi. A re boneng ditsela tse dingwe tse moneelo wa gago o dirisitsweng ka tsone.

GO GATISA DIBUKA

Dikgatiso tse di latelang di ne tsa gatisiwa le go abiwa lefatshe ka bophara:

• Dibuka: 47 490 247

• Dibukana: 6 834 740

• Diboroutšhara: 167 854 462

• Dikhalendara: 5 405 955

• Dimakasine: 1 179 266 348

• Dipampitshana: 440 995 740

• Dibidio: 3 168 611

Tiro ya go gatisa e dirwa kwa Afrika, kwa Bokone, Borwa, le Bogare jwa Amerika, kwa Asia, Yuropa, le kwa dinageng tsa ditlhaketlhake tsa Pacific—palogotlhe ya dinaga di le 19.

“Leina la me ke Katelyn May. Ke na le dingwaga di le robedi. Ke na le madi a a kana ka R192 mme ke rata go lo naya one gore lo a dirise mo metšhining e e gatisang. Kgaitsadi wa lona yo mmotlana, Katelyn.”

“Re ne ra nna le pokano ya lelapa mo re neng re tlotla ka metšhini e mesha e e gatisang. Bana ba rona ba ba nang le dingwaga di le 11 le 9, ba ne ba swetsa ka gore ba tla tsaya madi a ba neng ba ipoloketse one mme ba a ntshe moneelo. Re itumelela go romela moneelo wa bone mmogo le wa rona.”

 TIRO YA GO AGA

Tseno ke dingwe tsa ditiro tsa go aga tse di dirwang go tshegetsa ditiro tsa Basupi ba ga Jehofa:

• Diholo Tsa Bogosi mo dinageng tse di humanegileng: 2 180

• Diholo Tsa Dikopano: 15

• Makala: 10

• Baithaopi ba ba direlang kwa dinageng di sele ba ba leng mo tirelong ya nako e e tletseng: 2 342

“Mo mafelobekeng ano re ne ra tshwara pokano ya ntlha mo Holong ya rona e ntšha ya Bogosi. Ruri re itumelela go nna le lefelo le le tshwanetseng la go baka Rraarona Jehofa Modimo. Re leboga Jehofa mmogo le lona go bo lo re tlamela ka dilo tse re di tlhokang ka go aga Diholo Tsa Bogosi tse di oketsegileng. Eleruri Holo ya rona ya Bogosi e thusa thata mo lefelong leno la rona.”—Chile.

“Bakaulengwe le bokgaitsadi ba itumelela thata thuso e ba e bonang mo phuthegong ya ga Jehofa. Go fitlha mo letsatsing leno re sa ntse re itumelela nako e e molemo e re neng ra nna le yone le setlhopha se se neng se aga.”—Moldova.

“Bosheng jaana nna le mosadi wa me re ne re keteka dingwaga di le 35 re nyalane. Re ne re leka go akanya gore re ka rekelana eng ka nako eo, mme re ne ra swetsa ka gore re neye Jehofa le phuthego ya gagwe sengwe ka gonne kwantle ga thuso ya bone gongwe re ka bo re sa atlega mo lenyalong la rona. Re rata gore madi a a tsentsweng mono a dirisediwe go aga Diholo Tsa Bogosi kwa go nngwe ya dinaga tse di humanegileng.”

“Bosheng jaana ke ne ka amogela boswa, mme e re ka go se na dilo tse dintsi tse ke di ‘batlang’ le tse ke di ‘tlhokang’ nka rata gore lo amogele madi a a tsentsweng fano gore a thuse ka go aga Diholo Tsa Bogosi tse di tlhokegang thata kwa dinageng di le dintsi.”

 DITHUSO TSA NAMOLO

Mo malatsing ano a bofelo, dikotsi tsa masetlapelo di wela batho ba sa lebelela. Basupi ba ga Jehofa ba le bantsi ba ntsha meneelo e e oketsegileng gore bakaulengwe ba bone ba ba nnang mo mafelong a a wetsweng ke masetlapelo ba tle ba thusiwe. Re rata go gakolola botlhe gore meneelo eno e e ntshediwang dikotsi tsa masetlapelo e tsewa e le karolo ya meneelo ya tiro ya lefatshe lotlhe. Mafelo a a latelang ke a Basupi ba ga Jehofa ba thusitseng batho ba ba wetsweng ke masetlapelo kwa go one:

• Afrika

• Asia

• Kgaolo ya Caribbean

• Ditlhaketlhake tsa Pacific

“Nna le monna wa me re rata go lo leboga ka dilwana tse lo re romeletseng tsone go re thusa morago ga tshenyegelo e re nnileng le yone e e bakilweng ke kgwanyape. Re ne ra kgona go rulela ntlo ya rona ka marulelo a masha. Ruri re anaanela thata go bo lo ne lwa tsiboga ka bonako jaana.”

“Leina le me ke Connor, mme ke na le dingwaga di le 11. Ke ne ke batla go thusa fa ke se na go bona se se neng sa direga fa ‘tsunami’ e se na go tlhasela. Ke solofela gore seno se tla thusa bakaulengwe le bokgaitsadi ba me.”

 BA BA MO TIRELONG E E KGETHEGILENG YA NAKO E E TLETSENG

Go na le Bakeresete ba le mmalwa ba ba leng mo tirong ya go rera efangele kana ba ba direlang ka nako e e tletseng kwa magaeng a Bethele. Baithaopi bangwe ba nako e e tletseng ba thusiwa ka meneelo. Mme bangwe ba bone ke ba ba latelang:

• Barongwa: 2 635

• Balebedi ba ba etang: 5 325

• Badiredi ba Bethele: 20 092

“E re ka ke sa kgone go ya go direla kwa Bethele gone jaanong [mosimanyana wa dingwaga di le tlhano], ke batla go lo romelela moneelo ono ka lorato lo logolo. Fa ke gola ke tlile go ya kwa Bethele go ya go bereka ka thata.”

Go Tsweletsa Pele Thulaganyo ya go Ithuta ka Baebele

Jesu Keresete o ne a laela balatedi ba gagwe gore ba “dire batho ba ditšhaba tsotlhe barutwa.” (Mathaio 28:19) Basupi ba ga Jehofa ba ikobela mafoko ano a gagwe ka go tshwarega ka go rera le go ruta molaetsa wa Baebele mo dinageng di le 235. Ba gatisa le go anamisa dikgatiso tsa Baebele ka dipuo di le 413.

Eleruri moneelo o o botlhokwatlhokwa o Mokeresete a ka o ntshang go thusa batho ba ba oketsegileng gore ba ithute ka Modimo le maikaelelo a gagwe ke tsela e a dirisang nako ya gagwe ka yone. Basupi ba ga Jehofa ba dirisitse nako ya bone le nonofo ya bone ka botlalo go thusa baagelani ba bone. Gape ba ne ba ntsha moneelo wa madi ka seatla se se bulegileng, mme meneelo ya bone e ba e ntshang ka ditsela tse di farologaneng e thusitse mo go direng gore leina la ga Jehofa le maikaelelo a gagwe di itsiwe lefatshe ka bophara. E kete Jehofa a ka tswelela pele a segofatsa maiteko ano a bone a go thusa ba bangwe go ithuta go le gontsi ka ene. (Diane 19:17) Go nna ga bone le moya oo wa go rata go thusa go itumedisa pelo ya ga Jehofa!—Bahebera 13:15, 16.

[Lebokoso mo go tsebe 28-30]

Ditsela Tse Bangwe ba Tlhophang go Aba ka Tsone

MENEELO YA TIRO YA LEFATSHE LOTLHE

Batho ba le bantsi ba beela madi kwa thoko gore ba tle ba a tsenye mo mabokosong a moneelo a a tshwailweng “Meneelo ya Tiro ya Lefatshe Lotlhe—Mathaio 24:14.”

Kgwedi le kgwedi, diphuthego di romela madi ano kwa ofising ya lekala ya Basupi ba ga Jehofa e e tlhokometseng naga ya tsone. Meneelo eno e e ntshiwang ka go rata gape e ka romelwa ka tlhamalalo kwa Watch Tower Bible and Tract Society of Pennsylvania, Attention Accounting Office, Private Bag X2067, Krugersdorp, 1740, South Africa, kana kwa ofising ya lekala ya Basupi ba ga Jehofa ya naga ya gaeno. Ditšheke tse di romelwang mo atereseng e e fa godimo di tshwanetse go kwalwa ka leina la “Watch Tower.” Dilo dingwe tse di tlhwatlhwakgolo le tsone di ka ntshiwa moneelo. Go tla tlhokega gore meneelo eno e romelwe le lekwalo le le khutshwane le le tlhalosang gore moneelo oo ke mpho.

GO RULAGANYETSA GO ABA

Mo godimo ga go ntsha dimpho tsa madi ka tlhamalalo, go na le mekgwa e mengwe gape ya go aba e e ka solegelang tiro ya Bogosi ya lefatshe lotlhe molemo. E akaretsa:

Inshorense: Mokgatlho wa Watch Tower o ka kwalwa gore ke one o tla amogelang madi a inshorense morago ga loso lwa gago kana a thulaganyo ya go tlogela tiro/phenshene.

Ditoko le Dibonto: Ditoko le dibonto di ka abelwa Mokgatlho wa Watch Tower e le mpho.

Ditsha le Dikago Tsa Tsone: Ditsha le dikago tsa tsone tse di ka rekisiwang di ka abiwa e le mpho, kana fa e le ntlo, go kwalwe gore ke ya mong wa yone fa a sa ntse a tshela go fitlha a swa. Ikgolaganye le ofisi ya lekala ya naga ya gaeno pele ga o kwadisa ditsha le dikago tsa tsone.

Diwili: Dithoto kana madi a ka tlogelelwa Mokgatlho wa Watch Tower ka wili e e kwadilweng semmuso.

Go bona tshedimosetso e e oketsegileng o ka ikgolaganya le Accounting Office, ka go e kwalela kana ka mogala, mo atereseng e e kwadilweng fa tlase fano kana o ka ikgolaganya le ofisi ya lekala ya Basupi ba ga Jehofa e e tlhokometseng naga ya gaeno.

Accounting Office:

Watch Tower Bible and Tract Society of Pennsylvania

Private Bag X2067

Krugersdorp 1740

South Africa

Nomoro ya mogala: (011) 761-1000

[Motswedi wa Setshwantsho mo go tsebe 27]

Faithful video: Stalin: U.S. Army photo