Fetela kwa tshedimosetsong

Fetela go diteng

“Letsatsi Le ke Le Itumeletseng Thata mo Botshelong”

“Letsatsi Le ke Le Itumeletseng Thata mo Botshelong”

 “Letsatsi Le ke Le Itumeletseng Thata mo Botshelong”

MOKGATLHO mongwe wa kwa Australia o o bidiwang Beyondblue o o etleediwang ke puso ka madi o bolela gore: “Go tshwenyega thata mo maikutlong ke bongwe jwa malwetse a a begwang thata mme gongwe e le jo bo nang le go tshwara basha ba le bantsi thata.” Dipatlisiso di bontsha gore ngwaga le ngwaga basha ba ba ka nnang 100 000 ba kwa Australia ba na le bothata jwa go tshwenyega thata mo maikutlong.

Basha ba Bakeresete le bone ba ka nna le bothata jono. Le fa go ntse jalo, go nna le tumelo mo go Jehofa go thusitse ba le bantsi ba bone gore ba kgone go fenya maikutlo a a sa siamang a ba ka nnang le one ka ntlha ya bolwetse jono mme ba atlege mo bosheng jwa bone. Mme se ba se dirang se ama ba bangwe ka tsela e e molemo thata. Ba dira seno jang?

Akanya ka boitemogelo jwa ga Claire yo o nang le dingwaga di le 18. Ene le mmaagwe ba mo phuthegong ya Basupi ba ga Jehofa ya kwa Melbourne. Fa rraagwe Claire a sena go tlogela lelapa la bone, Claire o ne a tshwenyega thata mo maikutlong. Le fa go ntse jalo, tumelo e a neng a na le yone mo go Rraagwe yo o kwa legodimong Jehofa, e ne ya mo thusa gore a nne a nonofile. Letsatsi lengwe ngaka ya bone ya lelapa e bong Lydia e ne ya etela Claire kwa lapeng e ya go tlhola mmaagwe Claire yo o neng a lwala. Morago ga moo o ne a ithaopa go isa Claire kwa mabenkeleng. Fa ba le mo tseleng o ne a botsa Claire gore a o na le lekau le a ratanang le lone. Claire o ne a mo tlhalosetsa gore ene ke Mosupi wa ga Jehofa, mme ga a itlose bodutu ka go intsha le basimane. Seno se ne sa gakgamatsa ngaka eno thata. Mme Claire o ne a mo tlhalosetsa kafa Baebele e mo thusitseng ka gone gore a kgone go dira ditshwetso tse di botlhale mo botshelong. Kwa bofelong Claire o ne a ithaopa gore o tla tlisetsa ngaka eno kgatiso nngwe e e theilweng mo Baebeleng e e mo thusitseng thata. E ne e le buka ya Dipotso Tse Basha Ba Di Botsang—Dikarabo Tse Di Nang le Tharabololo.

Malatsi a le mararo Lydia a se na go amogela buka eno o ne a founela mmaagwe Claire go mmolelela kafa a itumeletseng go bala buka eno ka gone. Mme o ne a kopa dibuka tse dingwe gape di le thataro tse a neng a tla di neela badirimmogo le ene. Fa Claire a isitse dibuka tseno, ngaka e ne ya mmolelela kafa e kgatlhilweng ke tumelo ya gagwe ka gone. Claire o ne a mmolelela gore a ka rata go ithuta Baebele le ene mme ngaka e ne ya dumela.

Mo dikgweding di le mmalwa, Claire o ne a ithuta le ngaka eno ka nako ya dijo tsa motshegare. Lydia o ne a botsa Claire gore a o ne a ka kgona go bua kwa seminareng ka kgang ya go tshwenyega thata mo maikutlong ga basha. Le fa gone Claire a ne a tshogile, o ne a dumela. Go ne go na le batho ba ba fetang 60 mo seminareng eno. Dingaka di le nnè tse di berekang ka malwetse a tlhaloganyo—tse tsotlhe fela e neng e le bagolo—di ne tsa bua le bareetsi. Fa ba fetsa, e ne e le nako ya ga Claire ya go bua jaanong. O ne a gatelela kafa go leng botlhokwa ka gone gore basha ba nne le kamano e e molemo le Modimo. O ne a bolela gore Jehofa Modimo o amegile thata ka basha mme o thusa botlhe ba ba tlang kwa go ene gore a ba tshegetse le go ba gomotsa. Mo godimo ga moo, o ne a bua a tlhatswegile pelo gore go ise go ye kae, Jehofa o tla tlosa malwetse otlhe a mmele le a tlhaloganyo. (Isaia 33:24) Matswela a bosupi jono jo bo molemo e ne ya nna afe?

Claire o bolela jaana: “Bontsi jwa bone ba ne ba tla kwa go nna morago ga thulaganyo mme ba mpolelela kafa ba kgatlhilweng thata ka gone ke go utlwa mosha a bua ka Modimo. Ke ne ka tsamaisa dibuka di le 23 tsa setlhogo se se reng, Dipotso Tse Basha Ba Di Botsang. Basetsana ba le bararo ba ba neng ba le mo bareetsing ba ne ba nnaya dinomoro tsa bone tsa founo. Mongwe wa basetsana bano o ithuta Baebele. Leno e ne e le lengwe la malatsi a ke a itumeletseng thata mo botshelong.”