Fetela kwa tshedimosetsong

Fetela go diteng

A o A Gakologelwa?

A o A Gakologelwa?

 A o A Gakologelwa?

A o ile wa itumelela go bala dimakasine tsa bosheng tsa Tora ya Tebelo? Fa go ntse jalo, bona gore a o ka kgona go araba dipotso tse di latelang:

Ke ka ntlha yang fa go ne ga tlhophiwa letsatsi la December 25 gore e nne lone la go keteka botsalo jwa ga Jesu?

Lefoko la Modimo ga le re bolelele letsatsi le Jesu a tshotsweng ka lone. Enciclopedia Hispánica ya re: “Letsatsi la December 25 la go keteka Keresemose ga le a nna teng ka go latela letlha le le rileng ngwaga le ngwaga mme le nnile gone fa meletlo ya go tsena ga mariga e ne e fetolelwa gore e nne ya Bokeresete.” Baroma ba bogologolo ba ne ba keteka go tlhaba ga letsatsi ka mariga ka go dira mekete ya ditlhapelo le go abelana dimpho.—12/15, tsebe 4-5.

• A Ditiro 7:59 e raya gore Setefane o ne a rapela Jesu?

Nnyaa. Baebele e bontsha gore thapelo e tshwanetse go lebisiwa kwa go Jehofa Modimo fela. Fa Setefane a ne a bona Jesu mo ponatshegelong, go bonala a ne a ikutlwa a gololesegile go ikuela kwa go ene ka tlhamalalo a re: “Morena Jesu, amogela moya wa me.” Setefane o ne a itse gore Jesu o ne a neilwe maatla a go tsosa baswi. (Johane 5:27-29) Ka jalo Setefane o ne a kopa Jesu kgotsa a ikuela mo go ene gore a sireletse maatla a gagwe a botshelo go fitlhela ka nako ya tsogo.—1/1, tsebe 31.

• Re itse jang gore isagwe ya motho ga e a laolelwa gale?

Modimo o neile motho mpho ya go itlhophela e e sa akaretseng taolelogale. Jehofa o ne a tla bo a sa re rate e bile a le tshiamololo fa a ne a ka laola go sa le gale gore re tla dirang mme a bo a re otlhaela ditiro tsa rona. (Duteronome 32:4; 1 Johane 4:8)—1/15, tsebe 4-5.

• Ke eng fa go tla bo go se botlhale go bolela gore dikgakgamatso ga di ka ke tsa direga?

Fa baitsesaense bangwe ba sena go lemoga gore ba na le kitso e se kae fela ya dilo tse di gakgamatsang tsa saense tse di fitlhelwang mo popong ya Modimo, bangwe ba bone ba ile ba dumela gore ba ka se kgone go bolela ka tlhomamo gore sengwe se ka se direge. Gantsi ba eletsa gore bogolo ba re go ka direga gore se se ka sa direga.—2/15, tsebe 5-6.

• Ke ka ntlha yang fa Moatlhodi Samesone a ne a bolelela batsadi ba gagwe gore o batla go dira morwadia Bafilisitia mosadi wa gagwe? (Baatlhodi 14:2)

Go ne go le kgatlhanong le molao wa Modimo go nyala motho yo o obamelang medimo ya maaka. (Ekesodo 34:11-16) Le fa go ntse jalo, mosadi yono wa Mofilisitia o ne a ‘siame tota’ mo matlhong a ga Samesone. Samesone “o ne a batla sebaka sa go tsogologela Bafilisitia” mme mosadi yono o ne a siametse boikaelelo joo. Ka jalo Modimo o ne a tshegetsa Samesone a dirisa moya wa Gagwe. (Baatlhodi 13:25; 14:3, 4, 6)—3/15, tsebe 26.

• A Mokeresete o tshwanetse go naya modiredipuso madinyana a tebogo kgotsa mpho ya mofuta mongwe gore a mo direle sengwe?

Go phoso go naya modiredimogolo pipamolomo, go mo naya sengwe se se tlhwatlhwakgolo gore a go direle sengwe se se seng kafa molaong, go dira gore a kgopamise tshiamiso kgotsa gore a go tshware ka tsela e e kgethegileng. Mme gone ga se pipamolomo go naya modiredipuso madinyana a tebogo fa a go direla sengwe se tota a neng a tshwanetse go go direla sone kgotsa gore a se ka a go tshwara ka tsela e e sa siamang.—4/1, tsebe 29.