Fetela kwa tshedimosetsong

Fetela go diteng

Go Kgatlhegelwa ga “Baitshepi” Gompieno

Go Kgatlhegelwa ga “Baitshepi” Gompieno

 Go Kgatlhegelwa ga “Baitshepi” Gompieno

“A o gakologelwa nako e go neng go bonala re lapisiwa ke go umakiwa ga bagaka? Go bonala fa seo se ne se sa ame Baamerika ba ba dimilione di le 4,2 ba ba neng ba lebeletse phitlho ya ga Mmè Teresa ka Sept. 13. Fa e sa le a tlhokafala ka Sept. 5, batho ba ile ba sala Vatican morago ba kopa gore e mo tlhome go nna moitshepi kafa molaong. Ke batho ba se kae fela ba ba belaelang gore go tla diragala.”—Sun-sentinel, United States, October 3, 1997.

BATHO ba le bantsi ba tsaya gore ditiro tse di molemo le tsa bopelontle tse morongwa wa Mokatoliki e bong Mmè Teresa a neng a di direla batho di supa gore ke moitshepi tota. Madumedi a mangwe le one a na le bagaka ba one. Le fa go ntse jalo, go ka tswa go se na bape ba bone ba ba tsewang e le baitshepi kafa molaong jaaka ba ba tlhomilweng go nna baitshepi ke Kereke ya Katoliki ya Roma.

Mopapa John Paul II o ile a tlhoma batho ba ba fetang 450 go nna baitshepi kafa molaong fa e sa le e le mopapa, e leng palo e e fetang ya batho ba ba tlhomilweng go nna baitshepi kafa molaong ke bomopapa ba bangwe botlhe ba lekgolo la bo20 la dingwaga. * Ke ka ntlha yang fa batho ba tsweletse ka go obamela “baitshepi” ba bontsi jwa bone ba sa itsiweng thata ke Bakatoliki ka kakaretso?

Moithutabodumedi wa kwa Notre Dame University e bong Lawrence Cunningham o tlhalosa jaana: “Batho ba kgatlhiwa ke kgopolo ya gore go ka tswa go na le baitshepi mo lefatsheng. Baitshepi ba bontsha gore le gompieno go ka nna le bagaka.” Mo godimo ga moo, go dumelwa gore “baitshepi” ba na le tsela e e kgethegileng ya go bua le Modimo, mme seo se dira gore ba kgone go buelela batshedi. Fa go bonwa dilwana dingwe tsa “moitshepi” kgotsa masalela a mmele wa gagwe, di a sisimogwa ka gonne go dumelwa gore di na le maatla a a rileng.

Katekasima ya Lekgotla la Trent, e e gatisitsweng mo lekgolong la bo16 la dingwaga go tlhomamisa ditumelo tsa Katoliki sesha e ne ya bolela jaana: “Re na le lebaka le le utlwalang la go swetsa ka gore, go tlotla baitshepi ‘ba ba swetseng mo Moreneng,’ go ba kopa gore ba re buelele le go tlotla dilwana tsa bone le melora ya bone e e boitshepo, tota ga go fokotse kgalalelo ya Modimo mme go e oketsa fela thata, fela jaaka tsholofelo ya Mokeresete e nonotshiwa, le ene o tlhotlheletsega go etsa dinonofo tsa bone tse di molemo.” (The Catechism of the Council of Trent, 1905) Kwantle ga pelaelo Bakeresete ba boammaaruri ba batla gore ba tshele ka tsela e e siameng, ba buisane sentle le Modimo a bo a ba thuse. (Jakobe 4:7, 8) Ka jalo, go ya ka Lefoko la Modimo, ke bomang ba ba tshwanelegang go nna baitshepi ba boammaaruri? Mme seabe sa bone ke sefe?

[Ntlha e e kwa tlase]

^ ser. 4 Go tlhomiwa ga motho jaaka moitshepi kafa molaong go bontsha gore Mokatoliki wa Roma yono yo o suleng o tshwanelwa ke go sisimogwa gongwe le gongwe e bile batho ba patelesega go dira jalo.