Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

 Dipotso Tse di Tswang Kwa Babading

Fa mongwe a ipolaile, a go tla bo go siame gore modiredi wa Mokeresete a neele puo ya phitlho?

Modiredi mongwe le mongwe wa Mokeresete o tshwanetse go itirela tshwetso ya gore a segakolodi sa gagwe se a mo letla go neela puo ya phitlho ya mongwe yo go bonalang a ipolaile. Fa a dira tshwetso, o tshwanetse go akanyetsa dipotso tse di latelang: Jehofa o leba jang go ipolaya? A motho yoo o ipolaile ka boomo? A go nna le bothata jwa tlhaloganyo kana go tshwenyega mo maikutlong ke gone go dirileng gore a ipolaye? Go ipolaya go lebiwa jang mo lefelong la gaeno?

Jaaka Bakeresete re kgatlhegela thata go itse gore Jehofa o leba jang go ipolaya. Mo go Jehofa, botshelo jwa motho bo botlhokwa e bile bo boitshepo. (Genesise 9:5; Pesalema 36:9) Go ipolaya ga go itumedise Modimo. (Ekesodo 20:13; 1 Johane 3:15) A seo se raya gore ga go kgonege gore o neele puo ya phitlho ya motho yo o ipolaileng?

Akanya ka kgang ya ga Kgosi Saulo wa Iseraele. E ne ya re fa a lemoga gore o tlile go swela mo ntweng ya gagwe ya bofelo kgatlhanong le Bafilisitia, go na le gore a letle gore baba ba gagwe ba mo sotle, “Saulo a tsaya tšhaka a wela mo go yone.” Fa Bafilisitia ba fitlhela setopo sa gagwe ba ne ba se kokotela mo loboteng lwa Bethe-shane. Fa banni ba Jabeshe-gileade ba ne ba utlwa se Bafilisitia ba neng ba se dirile ba ne ba ntsha setopo seo, mme ba se fisa. Go tswa foo ba ne ba tsaya marapo a gagwe mme ba a fitlha. Ba ne ba bo ba itima dijo malatsi a le supa, e leng moetlo wa go hutsafala mo Baiseraeleng. (1 Samuele 31:4, 8-13; Genesise 50:10) Fa motlodiwa wa ga Jehofa e bong Dafide a sena go utlwa se banni ba Jabeshe-gileade ba se dirileng o ne a re: “A Jehofa a lo segofatse, ka gonne lo diretse Saulo morena wa lona bopelonomi jono jwa lorato, ka gonne lo mo fitlhile. Mme jaanong e kete Jehofa a ka lo direla bopelonomi jwa lorato le boikanyegi.” (2 Samuele 2:5, 6) Baebele ga e supe gore banni ba Jabeshe-gileade ba ne ba kgalelwa go dira se se neng se lebiwa e le moetlo wa phitlho ya ga Kgosi Saulo. Bapisa seo le kgang ya ba bangwe ba ba neng ba se ka ba fitlhwa ka ntlha ya go bo ba dirile phoso nngwe. (Jeremia 25:32, 33) Molebedi wa Mokeresete a ka nna a akanya ka pego e e buang ka Saulo fa a dira tshwetso ya gore a o ka neela puo ya phitlho ya mongwe yo o ipolaileng.

Gape molebedi a ka nna a rata go akanyetsa se boikaelelo jwa puo ya phitlho e leng sone. Go farologana le batho ba ba dumelang gore moya ga o swe, Basupi ba ga Jehofa ga ba tshware diphitlho ka mogopolo o o phoso wa gore motho yo o suleng o ile kwa lefatsheng le lengwe. Lebaka la konokono la go neela puo ya phitlho ke go gomotsa ba ba swetsweng le go neela ba ba leng teng bosupi ka boemo jwa baswi e seng go thusa moswi. (Moreri 9:5, 10; 2 Bakorintha 1:3-5) Lebaka le lengwe la botlhokwa la go nna le puo ya phitlho ke go thusa ba ba leng teng go lemoga gore botshelo bo bokhutshwane. (Moreri 7:2) A dilo tseno di tla fitlhelelwa fa go neelwa puo ya phitlho ya motho yo o ipolaileng?

Ke boammaaruri gore bangwe ba ka nna ba ikutlwa gore motho yoo o ipolaile ka boomo a itse sentle gore o ne a leofela Jehofa. Mme a gone go a kgonega go ntsha bosupi jwa seo? A gongwe ke sengwe se a se dirileng a sa akanya? Bangwe ba ba lekang go ipolaya ba ikotlhaela seo mme ga ba leke go ipolaya gape. Fa motho a sena go ipolaya ga a ka ke a ikotlhaela se a se dirileng.

Mabaka a mangwe a a dirang gore ba bangwe ba ipolaye ka bontsi ke go nna le mathata a tlhaloganyo kana go tshwenyega thata mo maikutlong. E le ruri re ka re bano ba dirilwe ke maemo. Go ya ka dipalopalo dingwe, diperesente di le 90 tsa batho  ba ba ipolayang ba na le bothata jo bo rileng jwa tlhaloganyo, jwa maikutlo kana jwa go tshwakgoga. A Jehofa o tla itshwarela batho ba ba ipolaileng ba ba nang le bothata jo bo ntseng jalo jwa tlhaloganyo? Ga re kgone go lemoga gore a moswi o dirile boleo jo bo sa itshwarelweng mo matlhong a ga Jehofa. Modiredi wa Mokeresete a ka nna a akanyetsa mabaka le rekoto ya botsogo jwa moswi fa a akanyetsa gore a o ka neela puo ya phitlho ya motho yo o ipolaileng.

Go na le sengwe gape se se tlhokang go akanyediwa: Batho ba mo lefelong la gaeno ba leba jang go ipolaya le loso la yoo? Bagolwane ba amegile segolobogolo ka tsela e phuthego ya Basupi ba ga Jehofa ya lefelo leo e lebiwang ka yone. Go ikaegile ka gore batho ba lefelo leo ba leba jang go ipolaya, le gore ke mabaka afe a a dirileng gore motho yoo a ipolaye, bagolwane ba ka nna ba se ka ba rata go neela puo eno ya phitlho kana go e tshwarela mo Holong ya Bogosi.

Le fa go tse jalo, fa modiredi wa Mokeresete a kopilwe gore a tshware phitlho, a ka itirela tshwetso ka boene gore a a ka dira seo. Fa a swetsa go dira jalo, o tshwanetse go nna kelotlhoko gore a se ka a bua sepe malebana le gore a motho yoo o tla tsoga kgotsa ga a kitla a tsoga. Tsholofelo epe fela ya mo isagweng ya motho yo o suleng e ikaegile ka Jehofa mme ga go na ope yo o nang le tshwanelo ya go bua gore a motho yoo o tla tsoswa kana ga a kitla a tsoswa. Modiredi a ka bua fela ka dithuto tse di mo Baebeleng tse di buang ka loso mme a gomotse ba ba swetsweng.