Fetela kwa tshedimosetsong

Fetela go diteng

O ‘Rera Lefoko’ go a Lapolosa

O ‘Rera Lefoko’ go a Lapolosa

 “Tlang Mo go Nna, . . . Mme ke Tla lo Lapolosa”

O ‘Rera Lefoko’ go a Lapolosa

E NE e le monna yo o itekanetseng a na le tiro e e botlhokwa. Mekgwa ya gagwe ya go ruta e ne e le molemo jaana mo e leng gore “boidiidi bo ne jwa tshwarwa ke kgakge ka ntlha ya tsela ya gagwe ya go ruta.” (Mathaio 7:28) Gape e ne e le moreri yo o sa lapeng. O ne a dirisa nako, maatla le dithoto tsa gagwe thata go rera ka Bogosi jwa Modimo. Ebu, Jesu Keresete o ne a ralala nagagae ya gaabo ka botlalo e le moreri le moruti yo o sa tshwaneng le ope.—Mathaio 9:35.

Tiro ya ga Jesu e e potlakileng e ne e le go rerela batho ba motlha wa gagwe “dikgang tse di molemo tsa bogosi” le go thapisetsa barutwa ba gagwe yone tiro eno gore ba e dire mo lefatsheng lotlhe. (Mathaio 4:23; 24:14; 28:19, 20) A boikarabelo jo bogolo jwa tiro ya bone ya go rera le go potlaka ga yone mmogo le bogolo jwa tiro eo go ne go tla fekeetsa maikutlo a balatedi ba gagwe ba ba sa itekanelang le ba ba nang le ditlhaelo?

Le e seng! Fa Jesu a sena go laela barutwa ba gagwe gore ba rapele “Mong wa thobo,” Jehofa Modimo, gore a ba romelele badiri ba ba oketsegileng, o ne a ba roma gore ba ye go ruta batho. (Mathaio 9:38; 10:1) Morago ga foo o ne a ba tlhomamisetsa gore boikarabelo jo ba nang najo jwa go nna balatedi ba gagwe—mmogo le tiro ya go rera—bo tla ba tlisetsa kgololesego le kgomotso ya mmatota. Jesu o ne a re: “Tlang mo go nna, . . . mme ke tla lo lapolosa.”—Mathaio 11:28.

Motswedi wa Boipelo

A bo taletso eno e le e e lorato le e e molemo jang ne! E bontsha kafa Jesu a amegang thata ka balatedi ba gagwe ka teng. Barutwa ba gagwe ba a lapologa fa ba diragatsa maikarabelo a bone a go rera “dikgang tse di molemo” tsa Bogosi jwa Modimo. Seno se dira gore ba nne le boipelo jwa mmatota le kgotsofalo.—Johane 4:36.

Nako e telele pele ga Jesu a tla mo lefatsheng, Dikwalo di ne tsa gatelela gore boipelo e tshwanetse ya nna karolo ya tirelo e e boitshepo ya Modimo. Seo se ne sa tlhalosiwa sentle fa mopesalema a ne a opela jaana: “Goelang kwa go Jehofa ka phenyo, lona lotlhe batho ba lefatshe. Direlang Jehofa ka go ipela. Tsenang kwa go ene lo goa ka boipelo.” (Pesalema 100:1, 2) Gompieno, batho ba ditšhaba tsotlhe ba ipela mo go Jehofa mme dipako tsa bone di tshwana le loshalaba lwa phenyo ya masole a a fentseng. Ba ba ineetseng tota mo Modimong ba tla fa pele ga gagwe ka go “goa ka boipelo.” Mme seo se tshwanela tota, ka gonne Jehofa ke “Modimo yo o itumetseng,” yo o batlang gore batlhanka ba gagwe ba ipele fa ba ntse ba tshelela boineelo jwa bone mo go ene.—1 Timotheo 1:11.

Badiredi ba ba Lapologileng

Go tla jang gore go dira ka natla mo bodireding jwa tshimo go se ka ga re lapisa go na le moo go re lapolose? Aitsane, go dira tiro ya ga Jehofa go ne go ntse jaaka dijo tse di nonotshang mo go Jesu. O ne a re: “Dijo tsa me ke gore ke dire thato ya yo o nthomileng le go wetsa tiro ya gagwe.”—Johane 4:34.

Bareri ba ba tlhoafetseng ba Bakeresete le bone ba ipela fa ba ntse ba “rera lefoko.” (2 Timotheo 4:2) Connie, yo e leng mosadi wa Mokeresete wa dingwaga tsa bogare yo o dirisang diura di le 70 ka kgwedi mo tirong ya go rera, o bolela jaana: “Fa ke sena go nna le seabe mo bodireding, ke ikutlwa ke kgotsofetse e bile ke itumetse, le fa ke lapile mo bokhutlong jwa letsatsi.”

Go tweng fa e le gore molaetsa wa Bogosi ga o amogelwe? Connie o tswelela jaana: “Go sa kgathalesege gore batho ba arabela jang, ga ke ise ke tle ke ikutlwe ke ikwatlhaela go nna le seabe mo bodireding. Mo godimo ga go itse gore ke dira se se itumedisang Jehofa, ke itumelela go bua le batho ka boammaaruri ka gonne fa ke ntse ke dira jalo, tsholofelo e  e itumedisang e e mo Baebeleng e a nonotshiwa mo pelong ya me.”Ba bangwe ba fitlhela gore go thusa batho go nna le kitso ya boammaaruri ka Modimo go dira gore matshelo a bone ka bobone a nne le bokao. Meloney, mosadi mongwe yo mosha yo o dirisang diura tse di fetang 50 ka kgwedi mo tirong ya go rera o akgela jaana: “Bodiredi bo a lapolosa ka gonne bo dira gore botshelo jwa me bo tlhomame le go nna le boikaelelo. Mathata a botho le ditlalelo tsa letsatsi le letsatsi di a nyelela fa ke nna le seabe mo tirelong.”

Millicent, modiredi yo mongwe yo o tlhoafetseng wa Basupi ba ga Jehofa, o bolela jaana: “Bodiredi bo dira gore letsatsi lengwe le lengwe e nne le le botlhokwa fa ke ntse ke bua le ba bangwe ka maikaelelo a Modimo ka batho le fa ke tlhalosa kafa Paradaise e tla tsosolosiwang mo lefatsheng ka teng. Bo dira gore Jehofa e nne motho wa mmatota mo go nna letsatsi le letsatsi mme bo dira gore ke nne le kagiso le boitumelo jo bo rileng jo motho a ka se kang a bo bona ka tsela epe e nngwe.”

Baamogedi ba ba Lapolositsweng

Tota bareri ba Bogosi ba lapolosiwa ke bodiredi jwa Bokeresete, mme o gomotsa batho ba ba amogelang molaetsa wa botshelo. Le mororo morutabana mongwe wa kwa Portugal a ne a thapisitswe ke baitlami le baruti, o ne a ikutlwa gore kereke ya gagwe ga e mo kgotsofatse ka dilo tse a di tlhokang mo semoyeng. Dipotso tsa gagwe tsa Baebele di ne di sa arabiwe. Thuto ya ka metlha ya Baebele e e neng e tshwarwa ke mongwe wa Basupi ba ga Jehofa e ne ya dira gore a tlhaloganye Dikwalo ka bonya ka bonya. Morutabana yono o ne a itumela thata. O bolela jaana: “Ke ne ke letela thuto ya me ka tlhoafalo ka Laboraro mongwe le mongwe, ka gonne dipotso tsa me di ne di arabiwa ka bongwe ka bongwe, ke neelwa bosupi jo bo tlhatswang pelo jo bo tswang mo Baebeleng.” Gompieno, mosadi yono ke motlhanka yo o ineetseng wa ga Jehofa, mme le ene o lapolosa ba bangwe ka boammaaruri jwa Baebele.

Ka gone, go ga na pelaelo gore Basupi ba ga Jehofa ga ba fekeediwe maikutlo ke bomasisi jwa tiro ya bone ya go rera kana bogolo jwa tshimo ya bone ya lefatshe lotlhe. Mme e bile ga ba kgobiwe marapo ke go sa kgatlhege ga batho kana go bo ba ganediwa. Ba ile ba ineela ka bojotlhe go diragatsa thomo ya bone ya go rera ka Bogosi. Ba bolelela batho ka dikgang tse di molemo gongwe le gongwe koo ba ka bonwang teng—mo dilori di emang teng kwa United States, (1), mo boemafofaneng kwa Korea (2), kwa Andes (3), kana mo lebenkeleng kwa Lontone (4). Balatedi ba ga Jesu ba motlha wa rona ba dira tiro ya bone e e duelang ya lefatshe lotlhe ka boipelo. Mme fela jaaka a ne a solofeditse, o ile a ba lapolosa le go ba dirisa go lapolosa ba bangwe ba bantsi.—Tshenolo 22:17.