Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

 Dipotso Tse di Tswang Kwa Babading

A Jehofa o dirile kgolagano ya gagwe le Aborahame kwa Ure kana kwa Harana?

Pego ya ntlha ya fa Jehofa a ne a dira kgolagano le Aborahame e fitlhelwa mo go Genesise 12:1-3, e e bolelang jaana: “Jehofa a raya Aberame a re: ‘Tswa mo nageng ya gaeno le mo go ba losika lwa gago le mo ntlong ya ga rraago o ye kwa nageng e ke tla e go bontshang; mme ke tla dira setšhaba se segolo ka wena . . . Mme malapa otlhe a lefatshe ruri a tla itshegofatsa ka wena.’” * Go ka direga gore Jehofa o ile a dira kgolagano eno le Aborahame fa a ne a le kwa Ure mme a bo a e tlhomamisa fa Aborahame a ne a le kwa Harana.

Mo lekgolong la ntlha la dingwaga, Setefane o ne a bua ka taelo ya ga Jehofa ya gore Aborahame a fudugele kwa Kanana. Fa a ne a bua le Sanehederine, o ne a bolela jaana: “Modimo wa kgalalelo o ne a bonala kwa go rraaronamogologolwane Aborahame fa a ne a ntse a le kwa Mesopotamia, pele ga a aga kwa Harana, mme a mo raya a re, ‘Tswa mo lefatsheng la gaeno le mo go ba losika lwa gago mme o tle mo lefatsheng le ke tla le go bontshang.’” (Ditiro 7:2, 3) Go ya ka tsalo Aborahame o ne a tswa kwa Ure, me jaaka Setefane a bontshitse, ke koo a utlwileng la ntlha teng taelo ya go ya kwa Kanana. (Genesise 15:7; Nehemia 9:7) Setefane ga a ka a umaka kgolagano ya Modimo le Aborahame, mme mo go Genesise 12:1-3, kgolagano eo e amanngwa le taelo ya go ya kwa Kanana. Ka jalo, go a utlwala go dumela gore Jehofa o ile a dira kgolagano le Aborahame kwa Ure.

Le fa go ntse jalo, go bala pego ya Genesise ka kelotlhoko go akantsha gore Jehofa o ne a boeletsa kgolagano ya gagwe le Aborahame kwa Harana, fela jaaka a ile a boeletsa a bo a oketsa dintlha tsa yone ka makgetlho a le mmalwa kwa Kanana. (Genesise 15:5; 17:1-5; 18:18; 22:16-18) Go ya ka Genesise 11:31, 32, rraagwe Aborahame e bong Tera, o ne a tswa kwa Ure a ya Kanana, a tsamaya le Aborahame, Sara le Lote. Ba ne ba fitlha kwa Harana mme ba nna koo go fitlha Tera a swa. Aborahame a nna kwa Harana ka nako e e lekaneng mo a neng a kgona go kgobokanya khumo e ntsi. (Genesise 12:5) Mo e ka nnang ka yone nako eo, Nahore, morwarraagwe Aborahame, le ene o ne a fudugela koo.

Fa Baebele e sena go bega ka loso lwa ga Tera, e bega mafoko a ga Jehofa a a neng a a bolelela Aborahame mme e bo e tswelela jaana: “Foo Aberame a tsamaya fela jaaka Jehofa a buile le ene.” (Genesise 12:4) Ka jalo, Genesise 11:31–12:4 e re naya kgopolo e e nonofileng ya gore Jehofa o ne a bua mafoko a a kwadilweng mo go Genesise 12:1-3 morago ga loso lwa ga Tera. Fa e le gore go ntse jalo, Aborahame o ne a tswa kwa Harana mme a fudugela kwa nageng e Jehofa a neng a mo kaela go ya kwa go yone a tsibogela taelo e a neng a sa tswa go e utlwa, le e a neng a e utlwile dingwaga pelenyana ga moo kwa Ure.

Go ya ka Genesise 12:1, Jehofa o ne a laela Aborahame jaana: “Tswa mo nageng ya gaeno le mo go ba losika lwa gago le mo ntlong ya ga rraago.” Nako nngwe ‘naga ya gaabo’ Aborahame e ne e le Ure mme ‘ntlo’ ya ga rraagwe e ne e le koo. Le fa go ntse jalo, rraagwe Aborahame o ne a fudusetsa lelapa la gagwe kwa Harana mme Aborahame o ne a bitsa lefelo leo naga ya gaabo. Dingwaga di le dintsi fa a ntse a nna kwa Kanana, o ne a roma molebedi wa gagwe kwa ‘nageng ya gagabo le kwa go ba losika lwa gagwe’ go ya go batlela Isake mosadi, molebedi o ne a ya kwa “motseng wa Nahore” (e ka tswa e le kwa Harana kana gongwe gaufi le moo). (Genesise 24:4, 10) Molebedi o ne a bona Rebeka koo mo go ba losika lwa ga Aborahame, lelapa le legolo la ga Nahore.—Genesise 22:20-24; 24:15, 24, 29; 27:42, 43.

Setefane o ne a bolela jaana ka Aborahame mo puong ya gagwe le Sanehederine: “Fa rraagwe a sena go swa, Modimo a dira gore a fetole boago jwa gagwe a tle mo lefatsheng leno le jaanong lo nnang mo go lone.” (Ditiro 7:4) Se se supa gore Jehofa o ne a buisana le Aborahame kwa Harana. Go a utlwala gape go dumela gore gangwe le gape Jehofa o ne a boeletsa kgolagano ya gagwe le Aborahame jaaka go kwadilwe mo go Genesise 12:1-3, e re ka kgolagano eno e ne ya diragadiwa fa Aborahame a ne a fudugela Kanana. Ka gone, go sekaseka dintlha tsotlhe go dira gore re swetse ka gore Jehofa o ka tswa a ile a dira kgolagano ya gagwe le Aborahame kwa Ure mme a e tlhomamisa kwa Harana.

[Ntlha e e kwa tlase]

^ ser. 3 Jehofa o ne a fetola leina la ga Aberame go nna Aborahame kwa Kanana fa Aborahame a ne a le dingwaga di le 99.—Genesise 17:1, 5.