Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

 Dipotso Tse di Tswang Kwa Babading

Dikota tse di neng di rwala letlole la kgolagano di ne di beilwe jang, ka gonne 1 Dikgosi 8:8 e bolela gore di ne di bonala go tswa kwa Boitshepong?

Fa Jehofa a ne a naya Moshe tsela ya go aga motlaagana kwa nageng, selo se se neng se le botlhokwa thata e ne e le letlole la kgolagano. Letlole leno le le khutlonnè le le apesitsweng ka gouta le ne le tsentse matlapanakwalelo a Molao le dilo tse dingwe. Le ne le beilwe mo phaposing e e kwa tengteng, Boitshepo jwa Maitshepo. Mo sekhurumelong sa Letlole go ne go na le ditshwantsho tse pedi tsa gouta tsa ditšheruba tse di nang le diphuka tse di tsharolotsweng. Mo letlhakoreng lengwe le lengwe la Letlole, go ne go na le mehiri e e neng e diretswe gore e tle e tshwarwe ka dikota di le pedi, tse di dirilweng ka legong la mokala le le apesitsweng ka gouta. Dikota tseno di tshwanetse tsa bo di ne di tsena mo teng ga mehiri eo di bo di tlhamalala go lekana le boleele jwa Letlole. Ka gone, fa Letlole le ne le ntse mo lefelong la lone mo Boitshepong jwa Maitshepo mo motlaaganeng, o o neng o lebile ntlheng ya botlhaba, dikota di ne di lebile kwa bokone le borwa. Go ne ga nna jalo le moragonyana fa Letlole le ne le le mo tempeleng e Solomone a neng a e aga.—Ekesodo 25:10-22; 37:4-9; 40:17-21. *

Go ne go na le sesiro se se neng se kgaoganya Boitshepo jwa Maitshepo le Boitshepo (phaposi e e ka kwa ntle). Baperesiti ba ba mo teng ga Boitshepo ba ne ba sa tshwanela go leba mo teng ga Boitshepo jwa Maitshepo go bona Letlole, le Modimo a neng a itlhagisa mo go lone. (Bahebera 9:1-7) Ka gone, 1 Dikgosi 8:8 e ka nna ya bonala e tlhakanya tlhogo: “Dikota di ne di le ditelele, mo e leng gore dintlha tsa dikota tseno di ne di bonala go tswa kwa Boitshepong fa pele ga phaposi e e kwa tengteng, mme di ne di sa bonale kwa ntle.” Go tlhalosiwa se se tshwanang mo go 2 Ditiragalo 5:9. Dikota tseno di ne di bonala jang mo mothong yo o mo Boitshepong jwa tempele?

Bangwe ba ile ba akanya gore dikota di ne di ama sesiro, mme di dira gore go bonale go khumpoga ga tsone mo go sone. Mme go ka se ka ga nna jalo fa e le gore dikota tseo di ne di lebile bokone le borwa, mme sesiro se bapile le dikota. (Dipalo 3:38) Go na le tlhaloso e e utlwalang botoka go na le eo. Dikota di ka tswa di ne di bonala fa e le gore go ne go na le phatlhanyana fa gare ga sesiro le lebota la tempele kana fa moperesiti yo mogolo a ne a tshwanela gore a tsene mo Boitshepong jwa Maitshepo. Sesiro se ne se fitlha Letlole ka bolone gore le se ka la bonala mme dikota tse di elang kafa dintlheng tsoopedi di tshwanetse tsa bo di ne di bonala mo phatlheng eo. Le fa tlhaloso eno e utlwala, ga re a tshwanela go gatelela gore go ntse jalo.

Kwantle ga pelaelo, go sa ntse go na le dilo tse dintsi tse re sa ntseng re ka di ithuta. Moaposetoloi Paulo o ne a umaka dintlha dingwe mo lekwalong la gagwe le a neng a le kwalela Bahebera. Morago ga foo o ne a bolela jaana: “Jaanong ga se nako ya go bua dintlha tsotlhe ka dilo tseno.” (Bahebera 9:5) Tsogo ya baswi e e tlang ya batho ba ba ikanyegang e tshwanetse ya re neela sebaka se se itumedisang sa go ithuta mo bathong ba ba jaaka Moshe, Arone, Besalele le ba bangwe ba ba neng ba itse sentle tsela e motlaagana o neng o ntse ka yone le ditiro tsa one.—Ekesodo 36:1.

[Ntlha e e kwa tlase]

^ ser. 3 Dikota tseo di ne di sa tshwanela go ntshiwa mo mehiring tota le fa Letlole le ne le le mo teng ga motlaagana. Ka gone, dikota di ne di ka se dirisediwe tiro nngwe e sele. Mme gape, Letlole le ne le sa tshwanela go amiwa; fa dikota di ne di ka ntshiwa mo mehiring ya tsone, nako nngwe le nngwe fa go tshwanetse go tsamaiwa go ne go tla tlhoka gore Letlole le le boitshepo le amiwe gore dikota di boe di tsenngwe gape mo mehiring. Kakgelo e e mo go Dipalo 4:6 e e buang ka go ‘tsenya dikota’ e ka tswa e kaya go rulaganya kana go baakanya dikota gore letlole le le boima leno le tle le tseelwe kwa bothibelelong jo bongwe.