Fetela kwa tshedimosetsong

Fetela go diteng

Ela Tlhoko Lefoko la Modimo la Boporofeti

Ela Tlhoko Lefoko la Modimo la Boporofeti

 Ela Tlhoko Lefoko la Modimo la Boporofeti

“Re na le lefoko la boporofeti le tlhomamisitswe segolo; e bile lo dira sentle go le tlhokomela.”—2 PETERE 1:19.

1, 2. Ke sekai sefe sa mesia wa maaka se o ka se umakang?

GO FETILE makgolo a dingwaga bomesia ba maaka ba leka go bolelela isagwe pele. Mo lekgolong la botlhano la dingwaga C.E., monna mongwe yo o neng a ipitsa Moshe o ne a dira gore Bajuda ba setlhaketlhake sa Kereta ba dumele gore e ne e le mesia le gore o tla ba golola mo kgatelelong. Fa letsatsi le le neng le tlhomilwe la go gololwa goo le fitlha, ba ne ba mo sala morago go ya kwa setlhoeng sengwe se se kwa godimo se se okameng Lewatle la Mediterranean. O ne a ba bolelela gore se ba neng ba tshwanetse go se dira fela, e ne e le go itatlhela mo lewatleng mme le ne le tla bulega. Bontsi jwa batho ba ba neng ba ithabuetsa mo metsing ba ne ba nwela, mme mesia yoo wa maaka o ne a tsena ka lenga la seloko.

2 Mo lekgolong la bo12 la dingwaga, go ne ga tlhaga “mesia” yo mongwe kwa Yemen. Mmusi o ne a mo kopa go bontsha sesupo sa gore e ne e le mesia. “Mesia” yono o ne a kopa mmusi gore a mo kgaole tlhogo. O ne a porofeta gore o ne a tla tsoga ka ponyo ya leitlho e leng se e neng e tla nna bosupi. Mmusi o ne a dumalana le kakantsho eo—mme “mesia” yono o ne a swela ruri.

3. Mesia wa boammaaruri ke mang, mme bodiredi jwa gagwe bo ne jwa supa eng?

3 Bomesia ba maaka le dipolelelopele tsa bone ga di atlege, mme go ela tlhoko lefoko la Modimo la boporofeti ga nke go swabisa. Mesia wa boammaaruri e bong Jesu Keresete, o ne a diragatsa dipolelelopele tse dintsi tsa Baebele. Ka sekai, fa mokwadi wa Efangele e bong Mathaio a nopola boporofeti jwa Isaia o ile a kwala jaana: “‘Ao tlhe lefatshe la Sebulone le lefatshe la Nafetali, go bapa le tsela ya lewatle, kwa moseja ga Joredane, Galalea wa merafe! batho ba ba ntseng mo lefifing ba ne ba bona lesedi le legolo, mme fa e le ka ba ba ntseng mo kgaolong ya moriti wa loso, lesedi le ne la ba tlhabela.’ Go tloga ka nako eo go ya pele Jesu a simolola go rera a re: ‘Ikotlhayeng, gonne bogosi jwa magodimo bo atametse.’” (Mathaio 4:15-17; Isaia 9:1, 2) Jesu e ne e le ene “lesedi le legolo” leo, mme bodiredi jwa gagwe bo ne jwa supa fa e le Moporofeti yo Moshe a neng a boleletse pele ka ene. Batho ba ba ganang go reetsa Jesu ba tla senngwa.—Duteronome 18:18, 19; Ditiro 3:22, 23.

4. Jesu o ne a diragatsa Isaia 53:12 jang?

4 Jesu o ne a diragatsa le boporofeti jono jwa Isaia 53:12: “O [ne] a goromeletsa mowa wa gagwe mo losong, a balwa le batlodi; le fa go ntse jalo o ne a rwele boleo jwa batho ba le bantsi, le batlodi a ba rapelela thata.” Jesu o ne a nonotsha tumelo ya barutwa ba gagwe ka gonne a ne a lemoga gore o tla tloga a ntsha botshelo jwa gagwe go nna thekololo. (Mareko 10:45) O ne a dira seno ka tsela e e gakgamatsang ka go fetoga ponalo.

Go Fetolwa Ponalo go Nonotsha Tumelo

5. O ne o ka tlhalosa jang go fetolwa ponalo ka mafoko a gago?

5 Go fetolwa ponalo e ne e le tiragalo e e neng e porofeta. Jesu o ne a re: “Morwa motho o laoletswe go tla ka kgalalelo ya ga Rraagwe a na le baengele ba gagwe . . . Ammaaruri ke a lo raya ka re go na le bangwe ba ba ba emeng fano ba ba se nang go utlwa loso ka gope go fitlha ba bona Morwa motho pele a tla a le mo bogosing jwa gagwe.” (Mathaio 16:27, 28) A bangwe ba baaposetoloi ba ne ba bona Jesu a tla a le mo Bogosing jwa gagwe ka mmatota? Mathaio 17:1-7 e bolela jaana: “Malatsi a le marataro moragonyana Jesu a tsaya Petere le Jakobe le Johane morwarraagwe mme a tlhatlogela le bone kwa thabeng e e kwa godimo ba le bosi. Mme o ne a fetolwa ponalo fa pele ga bone.” A tiragalo  e e gakgamatsang ruri! “Sefatlhego sa gagwe sa phatsima jaaka letsatsi, le diaparo tsa gagwe tsa kafa ntle tsa tsabakela jaaka lesedi. Mme, bona! ga bonala kwa go bone Moshe le Elija, ba tlotla le ene.” Gape, “leru le le phatsimang la ba tshutifalela,” mme ba utlwa lentswe la Modimo le re: “‘Yono ke Morwaake, moratwa, yo ke mo amogetseng; mo reetseng.’ Ya re barutwa ba utlwa seno ba wa ka difatlhego mme ba boifa fela thata. Go tswa foo Jesu a atamela, mme, ya re a ba ama, a re: ‘Nanogang mme lo se boife.’”

6. (a) Ke eng fa Jesu a ile a bitsa go fetolwa ponalo a re ke ponatshegelo? (b) Go fetolwa ponalo e ne e le ponelopele ya eng?

6 Tiragalo eno e e sa tlwaelegang e ka tswa e ile ya direga mo go lengwe la makhubu a Thaba ya Heremone, moo Jesu a neng a fetsa bosigo teng le baaposetoloi ba bararo. Go bonala go fetolwa ponalo gono go diragetse bosigo, e leng se se neng sa dira gore pono eo e bonale sentle. Lebaka le lengwe le le dirileng gore Jesu a e bitse ponatshegelo e ne e le ka go bo Moshe le Elija, ba ba neng ba sa bolo go swa, ba ne ba se foo ka tsela ya mmatota. Ke Keresete fela yo o neng a le foo ka tsela ya mmatota. (Mathaio 17:8, 9) Pono eno e e fatlhang matlho e ne ya naya Petere, Jakobe le Johane ponelopele e e kgatlhang thata ya go nna gone go go galalelang ga ga Jesu ka maatla a Bogosi. Moshe le Elija ba ne ba tshwantshetsa batlodiwa ba e leng baruaboswa mmogo le Jesu, mme ponatshegelo eno e ne ya nonotsha bosupi jo a neng a bo bua kaga Bogosi le go nna ga gagwe kgosi mo isagweng.

7. Re itse jang gore Petere o ne a sa ntse a gopola go fetolwa ponalo sentle?

7 Go fetolwa ponalo go ne ga thusa go nonotsha tumelo ya baaposetoloi ba bararo ba ba neng ba tlile go etelela dilo pele mo phuthegong ya Bokeresete. Go phatsima ga sefatlhego sa ga Keresete, go tsabakela ga diaparo tsa gagwe, le lentswe la Modimo ka boene le bolela gore Jesu e ne e le Morwawe yo o rategang yo ba tshwanetseng go mo reetsa—dilo tseno tsotlhe di ne tsa diragatsa boikaelelo jwa tsone ka tsela e e molemo. Mme gone, baaposetoloi ba ne ba sa tshwanela go bolelela ope ka ponatshegelo eno go fitlha Jesu a tsosiwa. Dingwaga di ka nna 32 moragonyana, Petere o ne a sa ntse a gopola ponatshegelo eno sentle. Fa a ne a bua ka yone le ka botlhokwa jwa yone, o ne a kwala jaana: “Nnyaa, e ne e se ka go latela dipolelo tsa maaka tse di logetsweng maano ka boferefere go bo re ne ra lo tlwaelanya le maatla le go nna gone ga Morena wa rona Jesu Keresete, mme e ne e le ka go bo re ne re fetogile basupi ba ba boneng tlotlomalo ya gagwe ka  matlho. Gonne o ne a amogela tlotlo le kgalalelo go tswa kwa Modimong Rara, fa mafoko a a tshwanang le ano a ne a bolelwa kaga gagwe ka kgalalelo e kgolo: ‘Yono ke morwaake, moratwa wa me, yo nna ka bonna ke mo amogetseng.’ Ee, mafoko ano re ne ra a utlwa a bolelwa go tswa legodimong fa re ne re na le ene mo thabeng e e boitshepo.”—2 Petere 1:16-18.

8. (a) Mafoko a Modimo malebana le Morwawe a ne a lemotsha eng? (b) Leru le le neng la tlhaga ka nako ya go fetolwa ponalo le ne le bontsha eng?

8 Selo se se neng se le botlhokwa thata e ne e le mafoko ano a Modimo: “Yono ke Morwaake, moratwa, yo ke mo amogetseng; mo reetseng.” Mafoko ano a re lemotsha gore Jesu ke Kgosi ya Modimo e e tlhomilweng, e popo yotlhe e tshwanetseng ya e ikobela. Leru le le neng le ba okame le ne le bontsha gore go diragadiwa ga ponatshegelo eno go ne go se kitla go bonwa ka matlho. Go ne go tla lemogwa fela ka matlho a go tlhaloganya ke batho ba ba lemogang “sesupo” sa go nna gone ga ga Jesu a sa bonale ka maatla a Bogosi. (Mathaio 24:3) Tota e bile, go bo Jesu a ile a ba tlhagisa gore ba se ka ba bolelela ope ponatshegelo eno go fitlha Morwa motho a tsogile mo baswing, go bontsha gore go tlotlomadiwa le go galalediwa ga gagwe go ne go tla diragala morago ga tsogo ya gagwe.

9. Ke eng fa go fetolwa ponalo go tshwanetse ga re nonotsha tumelo?

9 Fa Petere a sena go bua ka go fetolwa ponalo, o ile a re: “Ka gone re na le lefoko la boporofeti le tlhomamisitswe segolo; e bile lo dira sentle go le tlhokomela jaaka lo tlhokomela lobone lo lo phatsimang mo lefelong le le lefifi, go fitlha letsatsi le tloga le tswa le mphatlalatsane a tlhaba, mo dipelong tsa lona. Gonne santlha lo itse seno, gore ga go boporofeti bope jwa Lokwalo jo bo tswang mo phuthololong epe ya motho ka boene. Gonne ga go ka nako epe boporofeti bo neng jwa tlisiwa ka thato ya motho, mme batho ba ne ba bua se se tswang kwa Modimong e re ka ba ne ba tlhotlhelediwa ke moya o o boitshepo.” (2 Petere 1:19-21) Go fetolwa ponalo go gatelela go ikanyega ga lefoko la Modimo la boporofeti. Re tshwanetse go ela tlhoko lefoko leno e seng “dipolelo tsa maaka tse di logetsweng maano ka boferefere” tse di sa tsweng mo Modimong e bile e le tse di ka dirang gore a se ka a re amogela. Go fetolwa ponalo go tshwanetse ga nonotsha tumelo ya rona mo lefokong la boporofeti ka gonne ponatshegelo eno e e neng e le ponelopele ya kgalalelo ya ga Jesu le maatla a gagwe a Bogosi, e setse e diragetse jaanong. Ee, re na le bosupi jo bo ka se kang jwa ganediwa jwa gore gone jaanong Keresete o gone a busa e le Kgosi e e maatla ya selegodimo.

Kafa Mphatlalatsane a Tlhabang ka Teng

10. “Mphatlalatsane” yo Petere a buang ka ene ke mang kana ke eng, mme ke eng fa o araba jalo?

10 Petere o ile a kwala jaana: “Lo dira sentle [fa lo] tlhokomela [lefoko la boporofeti] jaaka lo tlhokomela lobone lo lo phatsimang mo lefelong le le lefifi, go fitlha letsatsi le tloga le tswa le mphatlalatsane a tlhaba.” “Mphatlalatsane” ke eng kana ke mang? Lefoko “mphatlalatsane” le tlhaga gangwe fela mo Baebeleng, mme bokao jwa lone bo tshwana le jwa lefoko “naledi ya moso.” Tshenolo 22:16 e bitsa Jesu Keresete e re ke “naledi ya moso e e phatsimang.” Mo dipakeng dingwe tsa ngwaga, dinaledi tse di ntseng jalo ke tsone tsa bofelo go tlhaba kwa kgaleng ya botlhaba. Di tlhaga pele fela ga letsatsi le tlhaba ka jalo di supa go tlhaba ga letsatsi le lesha. Petere o dirisa lefoko “mphatlalatsane” go bua ka Jesu fa A sena go amogela maatla a Bogosi. Ka nako eo, Jesu o tlhaba mo lobopong lotlhe, go akaretsa le lefatshe la rona! Jaaka Mesia wa Mphatlalatsane, o supa go tlhaba ga letsatsi le lesha, kgotsa motlha o mosha, o o tlhabelang batho botlhe ba ba kutlo.

11. (a) Ke eng fa 2 Petere 1:19 e sa bolele gore “mphatlalatsane” e tlhaga mo dipelong tsa mmatota tsa batho? (b) O ka tlhalosa 2 Petere 1:19 jang?

11 Dithanolo di le dintsi tsa Baebele di buelela kgopolo ya gore mafoko a ga moaposetoloi Petere a a kwadilweng mo go 2 Petere 1:19 a bua ka pelo ya mmatota ya motho. Pelo ya mogolo e boima jwa digerama di le 250 go ya go di le 300. Ka jalo go ne go ka kgonega jang gore Jesu Keresete—yo jaanong e leng sebopiwa se se galalelang se se sa sweng sa semoya kwa legodimong—a tlhabe mo dirweng tseno tse dinnye tsa batho? (1 Timotheo 6:16) Ke boammaaruri gore, dipelo tsa rona tsa tshwantshetso di a amega mo kgannyeng eno, ka gonne ka tsone re ela tlhoko lefoko la Modimo la boporofeti. Mme gone, leba 2 Petere 1:19 ka kelotlhoko, mme o tla lemoga gore Thanolo ya Lefatshe le Lesha e dirisa diphegelwana go kgaoganya polelo e e reng “go fitlha letsatsi le tloga le tswa le mphatlalatsane a tlhaba,” le e e reng “mo dipelong tsa lona.” Temana eno e ka bewa ka tsela eno: ‘Re na le lefoko la boporofeti  le tlhomamisitswe segolo; e bile lo dira sentle go le tlhokomela jaaka lo tlhokomela lobone lo lo phatsimang mo lefelong le le lefifi, ke gore, dipelo tsa lona, go fitlha letsatsi le tloga le tswa le mphatlalatsane a tlhaba.’

12. Gantsi dipelo tsa batho di ntse jang, mme gone, go tweng ka Bakeresete ba boammaaruri?

12 Dipelo tsa tshwantshetso tsa batho ba ba sekametseng mo go direng boleo gantsi di ntse jang? Ebu, dipelo tsa bone di mo lefifing la semoya! Le fa go ntse jalo, fa e le gore re Bakeresete ba boammaaruri, go ntse jaaka e kete re na le lebone le le bonesitseng mo dipelong tsa rona, tse fa go sa nna jalo di ka bong di fifetse. Jaaka fa mafoko a ga Petere a bontsha, Bakeresete ba boammaaruri ba ka nna ba thantse le go phatsimelwa ke go tlhaba ga letsatsi le lesha ka go ela tlhoko lefoko la Modimo le le bonesang la boporofeti. Ba ne ba tla lemoga gore Mphatlalatsane o tlhabetse popo yotlhe, e seng dipelo tsa mmatota tsa batho.

13. (a) Ke eng fa re ka tlhomamisega gore Mphatlalatsane o setse a tlhabile? (b) Ke eng fa Bakeresete ba ka itshokela maemo a a boima a Jesu a a boleletseng pele mo motlheng wa rona?

13 Mphatlalatsane o setse a tlhabile! Re ka tlhomamisega ka seo ka go ela tlhoko boporofeti jo bogolo jwa ga Jesu jo bo malebana le go nna gone ga gagwe. Gompieno, re bona go diragadiwa ga jone ka ditiragalo tse di jaaka dintwa tse dikgolo, ditlala, dithoromo tsa lefatshe le tiro ya lefatshe lotlhe ya go rerwa ga dikgang tse di molemo. (Mathaio 24:3-14) Le fa maemo a a boima a Jesu a a boleletseng pele a ama le rona Bakeresete, re kgona go a itshokela ka kagiso le boipelo. Ka ntlha yang? Ka gonne re ela tlhoko lefoko la Modimo la boporofeti e bile re dumela dilo tse a re solofetsang tsone malebana le isagwe. Re a itse gore re tloga re tsena mo dinakong tse di molemo go gaisa tsotlhe ka gonne re mo karolong ya bofelo ya ‘motlha wa bokhutlo’! (Daniele 12:4) Lefatshe le mo mathateng a a seng kana ka sepe a a boleletsweng pele mo go Isaia 60:2 e e reng: “Bona, lefifi le tlaa bipa lefatshe, le lefifi le lentshontsho le tlaa bipa ditšhaba.” Motho a ka bona jang tsela mo lefifing leno? Ka go ela tlhoko lefoko la Modimo la boporofeti ka boikokobetso gone jaanong pele go nna thari. Batho ba ba dipelo di ikanyegang ba tshwanetse go leba kwa go Jehofa Modimo, Motswedi wa botshelo le lesedi. (Pesalema 36:9; Ditiro 17:28) Ke ka go dira seno fela motho a ka solofelang go bona tshedimosetso ya boammaaruri le tsholofelo ya go itumelela isagwe e e molemo e Modimo a e solofeditseng batho ba ba kutlo.—Tshenolo 21:1-5.

 “Lesedi le Tlile mo Lefatsheng”

14. Ke eng se re tshwanetseng go se dira gore re bone dipolelelopele tse di molemo tsa Baebele di diragadiwa?

14 Dikwalo di bontsha sentle gore Jesu Keresete jaanong o busa e le Kgosi. Ka ntlha ya go tlhongwa ga gagwe mo bogosing ka 1914, dipolelelopele tse dingwe tse di molemo di sa ntse di tla diragadiwa. Gore re bone di diragadiwa, re tshwanetse ra itshupa re le batho ba ba pelonolo ba ba dumelang mo go Jesu Keresete, re ikwatlhaela ditiro tsa boleo le diphoso tse re di dirileng ka ntlha ya go tlhoka kitso. Ke boammaaruri gore, batho ba ba ratang lefifi ga ba kitla ba bona tsholofetso ya ga Jehofa ya botshelo jo bo sa khutleng. Jesu o ile a re: “Ono ke motheo wa katlholo, gore lesedi le tlile mo lefatsheng mme batho ba ratile lefifi bogolo go lesedi, gonne ditiro tsa bone di ne di le boikepo. Gonne yo o dirang dilo tse di bifelesegang e le tlwaelo o tlhoile lesedi mme ga a tle mo leseding, e le gore ditiro tsa gagwe di tle di se ka tsa kgalemelwa. Mme yo o dirang se se boammaaruri o tla mo leseding, gore ditiro tsa gagwe di tle di bonatshiwe e le tse di dirilweng tumalanong le Modimo.”—Johane 3:19-21.

15. Go tla direga eng fa re tlhokomologa poloko e Modimo a re diretseng yone ka Morwawe?

15 Lesedi la semoya le tlile mo lefatsheng ka Jesu, mme go botlhokwa gore re mo reetse. Paulo o ile a kwala jaana: “Modimo, o bogologolo tala o neng wa bua ka makgetlo a le mantsi le ka ditsela di le dintsi le borraaronamogologolwane ka baporofeti kwa bokhutlong jwa malatsi ano o buile le rona ka Morwa, yo o mo tlhomileng moruaboswa wa dilo tsotlhe.” (Bahebera 1:1, 2) Go tla direga eng fa re tlhokomologa poloko eno e Modimo a dirileng gore re nne le yone ka Morwawe? Paulo o tswelela pele a re: “Fa lefoko le le neng la buiwa ka baengele le ne la supega le nitame, le tlolo nngwe le nngwe le tiro ya go sa utlwe e ne ya amogela tefetso tumalanong le tshiamiso; re tla falola jang fa re tlhokomologile poloko ya bogolo jo bo kalo ka e ne ya simolola go buiwa ka Morena wa rona mme ra e tlhomamisediwa ke ba ba neng ba mo utlwa, fa Modimo o ne o kopanela mo go neyeng bosupi ka ditshupo mmogo le dikgakgamatso tse di bolelelang pele isagwe le ditiro tsa maatla tsa methalethale le ka dikabo tsa moya o o boitshepo go ya ka thato ya one?” (Bahebera 2:2-4) Ee, Jesu ke ene yo o botlhokwa thata mo go bolelweng ga lefoko la boporofeti.—Tshenolo 19:10.

16. Ke eng fa re ka ikanya dipolelelopele tsotlhe tsa ga Jehofa Modimo ka botlalo?

16 Jaaka go boletswe, Petere o ile a re: “Ga go boporofeti bope jwa Lokwalo jo bo tswang mo phuthololong epe ya motho ka boene.” Batho ka bobone fela ba ka se tlhame boporofeti jo bo boammaaruri, mme re ka ikanya dipolelelopele tsotlhe tsa Modimo ka botlalo. Bo tswa kwa go Jehofa Modimo ka boene. O ile a thusa batlhanka ba gagwe ka moya wa gagwe o o boitshepo gore ba tlhaloganye kafa dipolelelopele tsa Baebele di diragadiwang ka teng. Ee ruri, re leboga Jehofa go bo re ile ra bona bontsi jwa dipolelelopele tse di ntseng jalo di direga fa e sa le ka 1914. Re tlhomamisegile gore dipolelelopele tse di iseng di diragadiwe tse di malebana le go fedisiwa ga tsamaiso eno e e boikepo ya dilo di tla diragadiwa tsotlhe. Go botlhokwa thata gore re nne re ele tlhoko dipolelelopele tsa Modimo fa re ntse re phatsimisa lesedi la rona. (Mathaio 5:16) A bo re leboga jang ne go bo Jehofa a dira gore ‘lesedi le re tlhabele mo lefifing le lentshontsho’ leno le le apesitseng lefatshe gompieno!—Isaia 58:10.

17. Ke eng fa re tlhoka lesedi la semoya la Modimo?

17 Lesedi la mmatota le re thusa go bona. Gape le dira gore dijalo tse di re nayang mefutafuta ya dijo di gole. Re ka se kgone go tshela kwantle ga lesedi la mmatota. Go tweng ka lesedi la semoya? Le a re kaela e bile le re bontsha isagwe jaaka e boleletswe pele mo Lefokong la Modimo, Baebele. (Pesalema 119:105) Ka lorato Jehofa Modimo o ile a ‘romela lesedi la gagwe le boammaaruri jwa gagwe.’ (Pesalema 43:3) Ruri re tshwanetse go bontsha gore re anaanela dithulaganyo tseno thata. Ka jalo, a re direng  bojotlhe jwa rona go nna le lesedi la “kitso ya kgalalelo ya Modimo” gore le tle le phatsimise pelo ya rona ya tshwantshetso.—2 Bakorintha 4:6; Baefeso 1:18.

18. Ke eng se Mphatlalatsane wa ga Jehofa a ipaakanyeditseng go se dira?

18 A bo re le lesego jang ne go itse gore ka 1914, Jesu Keresete, Mphatlalatsane, o ne a tlhabela lobopo lotlhe mme a simolola go diragatsa ponatshegelo ya go fetolwa ponalo! Jaanong Mphatlalatsane wa ga Jehofa o teng, o ipaakanyeditse go diragatsa maikaelelo a Modimo e le fa a tla bo a diragatsa ponatshegelo ya go fetolwa ponalo go ya pele—“kwa ntweng ya letsatsi le legolo la Modimo, Mothatayotlhe.” (Tshenolo 16:14, 16) Fa tsamaiso eno ya kgale ya dilo e sena go nyelediwa, Jehofa o tla diragatsa tsholofetso ya gagwe ya “magodimo a masha le lefatshe le lesha,” moo re tla bong re mmaka teng ka bosakhutleng e le Morena Molaodimogolo wa lobopo le Modimo wa boporofeti jwa boammaaruri. (2 Petere 3:13) A re tsweleleng pele re tsamaya mo leseding la Modimo ka go ela tlhoko lefoko la Modimo la boporofeti go fitlha mo letsatsing leo le legolo.

O ka Araba Jang?

• O ka tlhalosa jang go fetolwa ponalo ga ga Jesu?

• Go fetolwa ponalo go aga tumelo jang?

• Mphatlalatsane wa ga Jehofa ke mang kana ke eng, mme o ne a tlhaba leng?

• Ke eng fa re tshwanetse go ela tlhoko lefoko la Modimo la boporofeti?

[Dipotso Tsa Thuto]

[Setshwantsho mo go tsebe 13]

A o ka kgona go tlhalosa bokao jwa go fetolwa ponalo?

[Setshwantsho mo go tsebe 15]

Mphatlalatsane o setse a tlhabile. A o itse gore go diregile leng mme jang?