Fetela kwa tshedimosetsong

Fetela go diteng

Ruri Modimo o Araba Dithapelo

Ruri Modimo o Araba Dithapelo

 Ruri Modimo o Araba Dithapelo

Korenelio e ne e le monna yo o neng a batla go amogelwa ke Modimo ka go mo rapela gangwe le gape go tswa pelong. Mo godimo ga moo, o ne a dirisa maemo a gagwe a go nna molaodi wa masole ka tsela e e molemo. Go ya ka Baebele, o ne a abela batho ba ba tlhokang “dimpho tsa kutlwelobotlhoko di le dintsi.”—Ditiro 10:1, 2.

KA NAKO eo, go ne go na le Bajuda ba ba dumelang, basokologi le Basamaria mo phuthegong ya Bokeresete. Korenelio e ne e le Moditšhaba yo o sa rupisiwang e bile a se mo phuthegong ya Bokeresete. A seo se raya gore dithapelo tsa gagwe e ne e le tsa lefela? Nnyaa. Jehofa Modimo o ne a lemoga Korenelio le ditiro tsa gagwe tse a neng a di dira ka thapelo.—Ditiro 10:4.

Ka kaelo ya baengele, Korenelio o ne a itse phuthego ya Bokeresete. (Ditiro 10:30-33) Ka ntlha ya seo, ene le bantlo ya gagwe ba ne ba nna le tshiamelo ya gore e nne bone Baditšhaba ba ntlha ba ba sa rupisiwang go amogelwa mo phuthegong ya Bokeresete. Jehofa Modimo o ne a tsaya se se diragaletseng Korenelio e le se se tshwanelwang ke go tsenngwa mo pegong ya Baebele. Ga go na pelaelo gore o ne a dira diphetogo di le dintsi gore botshelo jwa gagwe bo dumalane ka botlalo le molao wa Modimo. (Isaia 2:2-4; Johane 17:16) Se se diragaletseng Korenelio e tshwanetse ya nna kgothatso e kgolo mo bathong ba ditšhaba tsotlhe ba ba batlang go amogelwa ke Modimo mo motlheng ono. Sekaseka dikai dingwe.

Dikai Tsa Motlha wa Segompieno

Mosadi mongwe yo mosha wa kwa India o ne a tlhoka go gomodiwa thata. O ne a nyalwa a na le dingwaga di le 21, mme jaanong o ne a na le bana ba le babedi. Ka bonako morago ga gore a tshole ngwana wa gagwe wa bobedi, ke fa monna wa gagwe a tlhokafala. Ka bonako fela, a le dingwaga di le 24, o ne a nna motlholagadi yo o nang le morwadi wa dikgwedi di le pedi le morwa wa dikgwedi di le 22. Ga go gakgamatse go bo a ne a tlhoka go gomodiwa! O ne a ka ya kae? Bosigo bongwe, fa a ntse a tlaletswe thata, o ne a rapela a re, “Rara yo o kwa legodimong, ako o nkgomotse ka Lefoko la gago.”

Moso o o latelang, o ne a etelwa ke mongwe. E ne e le mongwe wa Basupi ba ga Jehofa. Ka letsatsi leo, bodiredi jwa gagwe jwa ntlo le ntlo bo ne bo le boima ka gore go ne go na le batho ba sekae fela ba ba neng ba mo amogela mo matlong a bone. O ne a setse a re o boela gae ka gonne a lapile e bile a kgobegile marapo, mme ka tsela nngwe o ne a ikutlwa a patelesega go tsena mo ntlong e le nngwe fela gape. Ke mo a ileng a kopana le motlholagadi yo mosha yoo. O ne a mo kopa gore a tsene mme a amogela kgatiso e e tlhalosang Baebele. Mosadi yoo o ne a gomodiwa thata ke se a neng a se bala mo kgatisong eo le ke motlotlo o a nnileng nao le Mosupi yoo. O ne a ithuta ka tsholofetso ya Modimo ya go tsosa baswi  le ka Bogosi jwa Modimo, jo bo tla tlogang bo dira lefatshe paradaise. Se se botlhokwa le go feta, o ne a simolola go itse le go rata Modimo o o osi wa boammaaruri e bong Jehofa, yo o ileng a araba thapelo ya gagwe.

Nora, yo o nnang kwa toropongkgolo ya George, mo Afrika Borwa, o ne a beela kgwedi kwa thoko gore a nne le seabe mo tirong ya go rera ya nako e e tletseng. Pele ga a simolola, o ne a rapela Jehofa ka tlhoafalo gore a mo thuse gore a bone mongwe yo o kgatlhegelang go ithuta Baebele tota. Tshimo e a neng a abetswe go bereka mo go yone e ne e akaretsa ntlo ya motho mongwe yo o neng a ile a tlhokela Nora maitseo thata mo makgetlong a mangwe a a neng a mo etetse ka one. Ka bopelokgale Nora o ne a tsena mo ntlong eo gape. Se se ileng sa mo gakgamatsa, o ne a fitlhela mohiri yo mosha, e bong Noleen a fudugetse moo. Mo godimo ga moo, Noleen le mmaagwe ba ne ba ntse ba rapela Modimo gore a ba thuse go tlhaloganya Baebele. Nora o tlhalosa jaana: “Fa ke ithaopela go ithuta Baebele le bone, ba ne ba itumela thata.” Noleen le mmaagwe ba ne ba gatela pele ka bonako. Fa nako e ntse e ya, ka bobedi jwa bone ba ne ba simolola go thusa Nora mo tirong ya go fodisa ka tsela ya semoya.

Sekai se sengwe se se supang maatla a thapelo ke sa banyalani bangwe ba ba nnang mo toropongkgolo ya Johannesburg mo Afrika Borwa. Mo bosigong bongwe jwa Matlhatso ka 1996, lenyalo la ga Dennis le Carol le ne la batla le thubega. Ba ne ba swetsa go rapelela thuso, e le tsholofelo ya bofelo e ba nang nayo, mme ba dira jalo kgapetsakgapetsa go fitlha go nna bosigo thata. Mo mosong o o latelang ka ura ya bo11, Basupi ba babedi ba ga Jehofa ba ne ba kokota mo lebating la bone. Dennis o ne a bula lebati mme a ba raya a re ba lete gore a bitse mosadi wa gagwe. Go tswa foo, Dennis o ne a tlhagisa Carol gore fa a ka dira gore Basupi ba tsene, go ka nna ga nna thata gore a dire gore ba tsamaye. Carol o ne a gakolola Dennis gore ba ne ba rapeletse thuso mme a re e ka tswa e le gore Modimo o araba dithapelo tsa bone. Ka jalo Basupi ba ne ba kopiwa gore ba tsene, mme go ne ga simololwa thuto ya Baebele ka buka ya Kitso E E Isang Botshelong Jo bo Sa Khutleng. Dennis le Carol ba ne ba itumelela se ba neng ba se ithuta. Ka yone thapama ya letsatsi leo, ba ne ba nna teng kwa pokanong ya bone ya ntlha kwa Holong ya Bogosi ya Basupi ba ga Jehofa e e mo lefelong la bone. Ka go dirisa kitso e ba e ithutileng mo Baebeleng, Dennis le Carol ba ne ba kgona go bona tsela e ba ka rarabololang mathata a bone a lenyalo ka yone. Gone jaanong ke babaki ba ba itumetseng ba ba kolobeditsweng ba ga Jehofa mme ka metlha ba bolelela baagelani ba bone ka dilo tse ba di dumelang tse di theilweng mo Baebeleng.

Go Tweng Fa e Le Gore o Ikutlwa o sa Tshwanelege go Rapela?

Batho bangwe ba ba peloephepa ba ka nna ba ikutlwa ba sa tshwanelege go rapela ka ntlha ya tsela ya bone ya botshelo e e maswe. Jesu Keresete o ne a bolela ka kgang ya monna mongwe yo o ntseng jalo, mokgethisi yo o nyatsegang. Fa monna yono a tsena mo lolwapeng lwa tempele o ne a ikutlwa a sa tshwanelege go tla mo lefelong le le tlwaelegileng la go rapela. “A eme kgakajana . . . a nna a itaya sehuba sa gagwe, a re, ‘Oo Modimo, nna pelontle mo go nna moleofi.’” (Luke 18:13) Go ya ka Jesu, monna yono o ne a utlwiwa. Se se supa gore eleruri Jehofa Modimo o pelontle e bile o batla go thusa baleofi ba ba ikwatlhayang tota.

Akanya ka lekawana lengwe la mo Afrika Borwa le le bidiwang Paul. Fa Paul a ne a sa le mosimane, o ne a ya kwa dipokanong tsa Bokeresete le mmaagwe. Mme ka nako ya fa a le kwa sekolong se segolwane, o ne a simolola go tsalana le basha ba ba neng ba sa latele ditsela  tsa Modimo. Fa a sena go fetsa sekolo, o ne a tsenelela sesole sa mo Afrika Borwa sa puso ya pele ya tlhaolele. Morago ga foo, a sa lebelela, kgarebe ya gagwe e ne ya fedisa botsala jwa bone. Botshelo jo bo sa kgotsofatseng jono bo ile jwa ngomola Paul pelo thata. O gakologelwa jaana: “Bosigo bongwe ke ne ka rapela Jehofa mme ka mo kopa gore a nthuse le fa gone ke ne ke ise ke bue le Modimo ka tlhoafalo ka dingwaga di le dintsi.”

Ka bonakonyana fela morago ga thapelo eno, mmaagwe Paul o ne a mo laletsa gore a nne teng kwa Segopotsong sa loso lwa ga Keresete sa ngwaga le ngwaga. (Luke 22:19) Paul o ne a bona go gakgamatsa gore mmaagwe a dire seno, ka go bo o ne a ile a tsuologa e bile o ne a sa kgatlhegele Baebele. “Ke ne ka tsaya taletso eno e le karabo ya ga Jehofa ya thapelo ya me mme ke ne ke ikutlwa gore ke tshwanetse gore ke e tsibogele.” Go tloga ka nako eo, Paul o ne a simolola go nna teng kwa dipokanong tsotlhe tsa Bokeresete. Morago ga gore a ithute Baebele ka dikgwedi di le nnè, o ne a tshwanelegela go kolobediwa. Mo godimo ga moo, o ne a tlogela dithuto tsa gagwe tsa boenjeniri mme a tlhopha tiro ya go rera ka nako e e tletseng. Gompieno, Paul ke monna yo o itumetseng, yo o sa tlholeng a ngomolwa pelo ke botshelo jwa gagwe jwa nako e e fetileng. Mo dingwageng tse 11 tse di fetileng, o ntse a dira mo ofising ya lekala ya Mokgatlho wa Watch Tower mo Afrika Borwa.

Ebu, Jehofa Modimo o araba dithapelo ka bopelontle mme “o nna moduedi wa ba ba [mo] senkang ka tlhoafalo.” (Bahebera 11:6) Go ise go ye kae letsatsi le legolo la ga Jehofa le tla fitlha mme le fedise boikepo jotlhe. Fa go ntse go le jalo, Jehofa o araba dithapelo tsa batho ba gagwe ba ba rapelelang nonofo le kaelo fa ba ntse ba dira tiro e e botlhokwa eno ya go neela bosupi ka tlhoafalo. Ka tsela eo, batho ba ba dimilione ba ditšhaba tsotlhe ba golaganngwa le phuthego ya Bokeresete mme ba segofadiwa ka kitso ya Baebele e e isang botshelong jo bo sa khutleng.—Johane 17:3.

[Setshwantsho mo go tsebe 5]

Thapelo ya ga Korenelio e e tswang pelong e ile ya dira gore a etelwe ke moaposetoloi Petere

[Setshwantsho mo go tsebe 6]

Thapelo e ile ya thusa batho ba le bantsi fa ba ne ba le mo ditlalelong

[Ditshwantsho mo go tsebe 7]

Go molemo go rapelela go thusiwa go tlhaloganya Baebele

Banyalani ba ka rapela gore ba thusiwe go nonotsha lenyalo la bone