Fetela kwa tshedimosetsong

Fetela go diteng

Se Boele mo Lefelong le le Kotsi!

Se Boele mo Lefelong le le Kotsi!

 Se Boele mo Lefelong le le Kotsi!

KE TIRO ya batho ba ba ithutang ka makgwamolelo gore ba batlisise le go sekaseka bosupi jo bo leng teng jwa gore lekgwamolelo le tla thunya mme go tswa foo ba bo ba tlhagisa batho ka gone. (Fa Thaba ya Fugen e setse e thuntse, mapodise a ne a tshwanela gore a thibele batho go tsena mo lefelong le le kotsi.) Ka mo go tshwanang, baithuti ba Baebele ba ela tlhoko sesupo sa “bokhutlo jwa tsamaiso eno ya dilo” mme ba tlhagisa ba bangwe ka kotsi e e tlang.—Mathaio 24:3.

Mo go yone kgaolo ya Baebele e e tlhagisang ka masetlapelo a a tla welang lefatshe lotlhe, re ka bala jaana ka tlhaloso ya dilo tse di tla diragalang pele: “Morafe o tla tsogologela morafe le bogosi bo tsogologele bogosi, mme go tla nna le ditlhaelo tsa dijo le dithoromo tsa lefatshe mo mafelong ka go latelana. . . . Mme baporofeti ba le bantsi ba maaka ba tla tsoga ba ba ba timetsa ba le bantsi; mme ka ntlha ya go oketsega ga bosenangmolao lorato lwa ba le bantsi lo tla tsidifala. . . . Mme dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo merafeng yotlhe; mme go tswa foo bokhutlo bo tla tla.”—Mathaio 24:7-14.

Ga re tlhoke go nna batho ba ba sekasekang dikgang gore re tle re lemoge go diragadiwa ga boporofeti jono ga jaanong. Re ile ra go bona bogolo jang fa e sa le ka 1914. Mo lekgolong leno la dingwaga go ile ga nna le dintwa tse pedi tsa lefatshe, dintwa tse dintsi tsa selegae, dintwa tse di amang mafelo a a rileng le dintwa tsa setso le tsa bodumedi. Batho ba ile ba tlhaelelwa ke dijo ka ntlha ya dintwa tseo, mo godimo ga go latlhegelwa ke dilo tse ba di tlhokang ka ntlha ya masetlapelo a tlholego. Batho ba le bantsi ba ile ba swa ka ntlha ya dithoromo tsa lefatshe. Go ile ga tsoga makoko a a belaetsang a a nang le baeteledipele ba ba sa ikanyegeng le balatedi ba ba tseegang maikutlo. Ka ntlha ya “go oketsega ga bosenang-molao” batho ba le bantsi ga ba sa tlhole ba na le lorato mme go nna botsalano ga e sa tlhole e le selo se se tlwaelegileng.

Tiro ya go rera ya lefatshe lotlhe, e e leng karolo e nngwe ya sesupo, e dirwa ka botlalo. Lebelela ka fa ntle ga makasine ono mme o tla bona mafoko a a reng “E Itsise Bogosi Jwa ga Jehofa” a e leng karolo ya setlhogo sa yone. Tora ya Tebelo, e e gatisiwang ka dipuo di le 132 mme e anamisetswa batho ba ba fetang dimilione di le 22, ke sedirisiwa se segolo  sa batho ba ba bolelang “dikgang tse di molemo tseno tsa bogosi” mo lefatsheng lotlhe. Dikgang tse di molemo tseo di akaretsa molaetsa wa gore Mmopi wa lobopo lotlhe e bong Jehofa Modimo, o tlhomile Bogosi jwa selegodimo jo bo tla senyang tsamaiso e e boikepo eno ya dilo mme bo tlise paradaise mo lefatsheng. Ebu, sesupo sa gore Modimo o tla tloga a tsaya kgato se a bonala gone jaanong, se supa gore matshelo a batho mo tsamaisong eno ya dilo a mo kotsing.—Bapisa 2 Timotheo 3:1-5; 2 Petere 3:3, 4; Tshenolo 6:1-8.

Letsatsi le le Boitshegang la ga Jehofa

Go tla diragala eng fa nako e setse e fitlhile ya gore Jehofa a diragatse katlholo ya gagwe? Reetsa kafa a tlhalosang ka teng ka tsela e e phepafetseng se se tla diragalang morago ga foo: “Ke tlaa bonatsa dikgakgamatso mo magodimong le mo lefatsheng, madi le molelo, le dithogomosi tsa mosi. Letsatsi le tlaa fetolwa lefifi le kgwedi madi, pele motlha o mogolo le o o boitshegang wa ga Jehofa o ise o tle.”—Joele 2:30, 31.

Letsatsi leo, le le boitshegang e bile e le le le tla senyang go gaisa go thunya le fa e le gope ga lekgwamolelo kana thoromo ya lefatshe, le gaufi. Moporofeti Sefania a re: “Letsatsi le legolo la ga Jehofa le gaufi, le gaufi le akofa thata. . . . . Lefatshe lotlhe le tlaa lailwa ke molelo wa lefufa la gagwe; gonne o tlaa dira bokhutlo, ee, bokhutlo jo bo boitshegang jwa botlhe ba ba agileng mo lefatsheng.” Le mororo “selefera sa bone le gouta ya bone, [di sa ka ke] tsa ba golola mo motlheng wa bogale jwa ga Jehofa,” go na le tsela ya go falola letsatsi le le boitshegang leo la ga Jehofa.—Sefania 1:14-18.

Fa Sefania a bontsha gore seo se ka dirwa jang, a re: “Bogale jo bo fisang bo ise bo tle mo go lona, le letsatsi la bogale jwa ga Jehofa le ise le tle mo go lona. Batlang Jehofa, lona bakgobaladi botlhe ba lefatshe . . . . Batlang kgobalalo; e ka tla ya re gongwe lwa sujwa mo letsatsing la bogale jwa ga Jehofa.” (Sefania 2:2, 3) Re ka bona botshabelo ka go ‘batla Jehofa, ka go batla tshiamo le ka go batla kgobalalo.’ Ke bomang bao gompieno ba batlang Jehofa?

O tshwanetse wa bo o amanya lefoko “Jehofa” le Basupi ba ga Jehofa ka ntlha ya tiro ya bone ya go rera. O ka tswa o ile wa amogela makasine ono mo go mongwe wa bone. Ba itsege e le baagi ba ba nang le boitsholo jo bontle ba ba tshelang botshelo jo bo siameng. Ba leka go apara “botho jo bosha,” jo bo akaretsang go tlhagolela bopelonomi. (Bakolosa 3:8-10) Ba dumela gore, seno se ntse jalo ka ntlha ya go rutwa ke mokgatlho wa ga Jehofa o o bonalang, o mo lefatsheng lotlhe o emelwang ke diphuthego tsa Basupi ba ga Jehofa tse di mo mafelong a ba leng mo go one. Ee, wena mmogo le ‘lesomo lotlhe la bakaulengwe’ lo ka bona botshabelo mo gare ga Basupi ba ga Jehofa mo lefatsheng lotlhe.—1 Petere 5:9.

Senka Botshabelo Gone Jaanong

Fa re batla go bona botshabelo ka go batla Jehofa, re tshwanetse go nna ditsala tsa gagwe. Seo se akaretsa eng? Baebele e araba jaana: “A ga lo itse gore botsalano le lefatshe ke bobaba le Modimo? Jalo, lefa e le mang yo o batlang go nna tsala ya lefatshe o itira mmaba wa Modimo.” (Jakobe 4:4) Gore re nne ditsala tsa Modimo, re tshwanetse go fedisa dikamano tsotlhe tse re nang natso le lefatshe le le boikepo leno, le le nang le boikutlo jwa go tsuologela Modimo.

Baebele e re kgothatsa jaana: “Lo se ka lwa bo lo rata lefatshe lefa e le dilo tse di mo lefatsheng. Fa motho a rata lefatshe, lorato lwa ga Rara ga lo yo mo go ene; ka gonne sengwe le sengwe se se mo lefatsheng—keletso ya nama le keletso ya matlho le go bontsha ka mabela se motho a itshedisang ka sone—ga se thaege mo go Rara, mme se thaega mo lefatsheng. Go feta moo, lefatshe le a feta e bile go ntse jalo le ka keletso ya lone, mme yo o dirang thato ya Modimo o ntse ka bosaengkae.” (1 Johane 2:15-17) Batho ba le bantsi gompieno ba tlhotlhelediwa ke dikeletso tsa nama—go eletsa tlhakanelodikobo ka tsela e e sa laolesegeng, go batla madi ka tsela e e bogagapa le go dirisa maatla ka tsela e e sa tshwanelang. Mme gore motho a nne mo letlhakoreng la ga Jehofa, o tshwanetse a fenya dikeletso tse di ntseng jalo.—Bakolosa 3:5-8.

O ka tswa o ile wa bala lokwalopaka lono ka makgetlonyana mme o ka nna wa bo o dumalana le kafa lo tlhalosang boporofeti jwa Baebele ka teng. Le fa go ntse jalo, o ka tswa o etsaetsega go tsaya kgato e e latelang ya go kopanela le Basupi ba ga Jehofa. Le fa go ntse jalo, fa re lebane le masetlapelo, a go utlwa tlhagiso fela go lekane? Jaaka re ka bona mo kgannyeng ya go thunya ga Thaba ya Fugen, re tlhoka go tsaya kgato malebana le tlhagiso eo. Gakologelwa, bobotlana babegadikgang le batho ba ba tsayang ditshwantsho ba le 15 ba ile  ba swa ka go bo ba ne ba batla go tlhomamisa gore ba bona tshedimosetso e e lekaneng. Tota e bile, mongwe wa batho ba ba tsayang ditshwantsho o ile a swa monwana wa gagwe o le mo konopong e e tobediwang go tsaya setshwantsho ka khamera ya gagwe. Mongwe wa batho ba ba ithutang ka makgwamolelo—yo o kileng a bolela gore, “Fa nka swa ka letsatsi lengwe, ke batla go swa ke le gaufi le lekgwamolelo”—o ne a swa fela ka tsela e a neng a eleditse ka yone. Botlhe ba ne ba ineetse mo tirong ya bone le mo dilong tse ba batlang go di bona. Le fa go ntse jalo, seo se ne sa felela ka gore ba latlhegelwe ke matshelo a bone—ditlamorago tsa go itlhokomolosa tlhagiso.

Batho ba le bantsi gompieno ba utlwa molaetsa o o malebana le tshwetso ya Modimo ya go senya tsamaiso e e boikepo eno ya dilo mme go ya bokgakaleng jo bo rileng ba lemoga bomasisi jwa tlhagiso eno. Ba ka nna ba bo ba akanya gore, ‘Kgabagare go tla tla mme e seng gompieno.’ Ba ntse ba busetsa letsatsi la ga Jehofa kwa morago gore ba tle ba se ka ba kgorelediwa mo go se se bonalang se le botlhokwa thata mo matlhong a bone mo nakong eno.

Baruke o ne a na le bothata jo bo ntseng jalo. E re ka e ne e le mokwaledi wa moporofeti wa bogologolo e bong Jeremia, Baruke o ne a tlhagisa Baiseraele ka bopelokgale ka masetlapelo a a tla welang Jerusalema. Le fa go ntse jalo, ka lekgetlo lengwe o ne a ngodiega mo thomong ya gagwe. Jehofa o ne a mo kgalemela jaana malebana le seo: “O nna o ntse o itshenkela dilo tse dikgolo. Se nne o ntse o senka.” E ka tswa e ne e le dikhumo, maemo kana dilo tse di bonalang, Baruke o ne a sa tshwanela go ‘itshenkela dilo tse dikgolo.’ O ne a tshwanetse gore a kgatlhegele go dira go rata ga Modimo fela, e leng go thusa batho gore ba eme mo letlhakoreng la Gagwe. Fa a dira jalo, o ne a tla newa ‘moya wa gagwe e le thopo.’ (Jeremia 45:1-5, NW) Ka mo go tshwanang, go na le gore re ‘itshenkele dilo tse dikgolo,’ re tshwanetse go senka Jehofa, e leng selo se se ka dirang gore re boloke matshelo a rona.

Kwa Thabeng ya Fugen, go ne go na le mapodise le batimamolelo ba ba ithaopileng ba le bantsi ba ba neng ba le mo tirong fa seretse se se gotetseng thata sa lekgwamolelo se ne se ba wela. Ba ne ba leka go thusa le go sireletsa batho ba ba neng ba le mo kotsing. Ba ne ba tshwana le banna le basadi ba ba nang le maitlhomo a a siameng ba ba tshwaregileng thata ka go tokafatsa lefatshe leno. Le fa maitlhomo a bone a ka tswa a le molemo jang, “se se sokameng ga se kake sa siamisiwa.” (Moreri 1:15) Tsamaiso eno ya dilo e e sokameng e ka se ka ya siamisiwa. A go a utlwala gore motho a itire “tsala ya lefatshe” ka go leka go boloka tsamaiso ya lefatshe lotlhe e Modimo a ikaeletseng go e senya?

Fa o Setse o Tshabile, O se Ka wa Boela

Go tshaba mo tsamaisong e e mo kotsing ke kgang e nngwe mme ke kgang e sele go nna re ntse re le mo tshireletsegong ya ‘lesomo lotlhe la bakaulengwe.’ (1 Petere 2:17) A re se ka ra lebala balemi ba e rileng ba sena go ntshiwa mo masimong a bone gaufi le Thaba ya Fugen ba bo ba boa ba ya go a tlhola. Gongwe ba ne ba tlhologeletswe go boa ba tshela botshelo jo bo “tlwaelegileng” jo ba neng ba bo tshela pele. Mme o lemoga gore tshwetso e ba e dirileng ya go boela morago e ne e se botlhale. Gongwe e ne e se lekgetlo la ntlha ba leka go tsena mo lefelong le le kotsi. Ba ka tswa ba ile ba tsena mo lefelong le le kotsi ka nakwana fela mme ga se ka ga diragala sepe. Mo lekgetlong le lengwe, ba ka tswa ba ile ba nna nakonyana e telele, mme ga se ka ga direga sepe gape. Gongwe go ise go ye kae, ba ile ba tlwaela go tsena mo lefelong le le thibetsweng mme ba nna bopelokgale go nna nako e telele mo lefelong le le kotsi.

Jesu Keresete o ne a bua ka boemo jo bo tshwanang jo bo tla diragalang ka nako ya “bokhutlo jwa tsamaiso eno ya dilo.” O ne a re: “Fela jaaka ba ne ba ntse mo malatsing ao pele ga morwalela, baa ja e bile baa nwa, banna ba nyala le basadi ba neelwa nyalong, go fitlha ka letsatsi le Noa o tseneng mo teng ga araka ka lone; mme ba se ka ba tsaya tsia go fitlha morwalela o tla o ba o ba gogola botlhe, go nna gone ga Morwa motho go tla nna jalo.”—Mathaio 24:3, 38, 39.

Ela tlhoko gore Jesu o ne a umaka go ja, go nwa le go nyala. Ga go na sepe sa dilo tseo se se sa siamang mo matlhong a ga Jehofa. Phoso e ne e le kae he? Batho ba motlha wa ga Noa ga ba a “ka ba tsaya tsia,” mme ba ne ba tshela botshelo jwa bone ba ikaegile ka dilo tse ba neng ba di tlwaetse. Ka nako ya fa go direga se se sa lebelelwang, motho a ka se ka a kgona go tshela botshelo jo bo “tlwaelegileng.” Fa o setse o tshabile mo lefatsheng le le atlhotsweng leno kana o ikgaogantse le lone, o tshwanetse gore o lwantshe keletso epe fela ya go batla go boela o ya go dirisa tshono le fa e le efe ya  go iponela molemo mo go lone. (1 Bakorintha 7:31) O ka nna wa kgona go tswa mo lefelong le le sireletsegileng la semoya mme wa boa gape o sa gobala e bile go se na ope yo o go bonang. Le fa go ntse jalo, gongwe seo se tla dira gore o nne pelokgale mme sa dira gore o boele kwa lefatsheng gape, o bo o nna nakonyana e telele mo go lone. Go ise go ye kae o ka nna le boikutlo jwa gore: “Bokhutlo bo ka se tle gompieno.”

Akanya gape ka bakgweetsi ba bararo ba dithekisi ba ba suleng ba ne ba letile babegadikgang le batho ba ba tsayang ditshwantsho fa seretse sa lekgwamolelo se ne se elela mo mokgokoloseng. Bangwe gompieno ba ka nna ba tsamaya le ba bangwe ba ba itsenyang mo kotsing ya go boela gape kwa lefatsheng. Le fa lebaka e ka tswa e le eng, ga go na pelaelo gore go tlhotlhelediwa gore o boele mo lefelong le le kotsi go ka nna le diphelelo tse di botlhoko.

Batho botlhe ba ba amegileng mo kotsing ya go thunya ga Thaba ya Fugen ba ne ba tswa mo lefelong le le sireletsegileng mme ba tsena mo lefelong le le kotsi. Le fa ba ne ba lebeletse gore thaba eo e tla thunya ka letsatsi lengwe, ga go na ope yo o neng a akanya gore e tla nna ka letsatsi leo. Ka go tlhokomela sesupo sa bokhutlo jwa tsamaiso eno ya dilo, ba le bantsi ba lebeletse gore letsatsi la ga Jehofa le tla diragala ka nako nngwe mme e seng ka bonako. Bangwe e bile ba akanya gore letsatsi leo e ka se ka le ka motlha ya nna “gompieno.” Boikutlo jo bo ntseng jalo bo kotsi tota.

Moaposetoloi Petere o ne a tlhagisa gore “letsatsi la ga Jehofa le tla tla jaaka legodu.” Re tlhoka gore re nne re ntshitse matlho dinameng, re ‘letetse e bile re ntse re bolokile gaufi mo mogopolong go nna gone ga letsatsi la ga Jehofa,’ re dira ‘bojotlhe jwa rona gore kwa bofelong a re fitlhele re se na selabe e bile re se na setshubaba e bile re le mo kagisong.’ (2 Petere 3:10-14) Morago ga go senngwa ga tsamaiso eno e e boikepo ya dilo, re letetswe ke paradaise mo lefatsheng kafa tlase ga Bogosi jwa Modimo. E kete le ka motlha re ka se ka ra leka go tsena mo lefelong le le kotsi le fa re ka tswa re na le mabaka afe mo mogopolong wa rona, ka gonne ka letsatsi le re boelang mo lefatsheng e ka nna ya bo e le lone letsatsi la ga Jehofa.

Senka botshabelo mo bathong ba ga Jehofa mme o nne le bone.

[Ditshwantsho mo go tsebe 7]

Senka botshabelo mo bathong ba ga Jehofa mme o nne le bone

[Motswedi wa Setshwantsho mo go tsebe 4]

Iwasa/Sipa Press