Fetela kwa tshedimosetsong

Fetela go diteng

Re Tlhoka Mokgatlho wa ga Jehofa

Re Tlhoka Mokgatlho wa ga Jehofa

 Re Tlhoka Mokgatlho wa ga Jehofa

A O KILE wa utlwa mongwe a re, “Ke dumela mo Modimong, e seng mo bodumeding jo bo rulagantsweng”? Gantsi batho ba ba kileng ba bo ba tsena kereke ka tlhagafalo, mme ba swabisiwa ke madumedi a bone ka a paletswe ke go kgotsofatsa dilo tse ba di tlhokang semoyeng le bone ba bua jalo. Le mororo ba kgobilwe marapo ke mekgatlho ya bodumedi ka kakaretso, ba le bantsi ba gatelela gore ba sa ntse ba batla go obamela Modimo. Le fa go ntse jalo, ba dumela gore go botoka go mo obamela ka tsela ya bone go na le gore ba dire jalo ba le mo kerekeng kana mo mokgatlhong mongwe.

Baebele ya reng? A Modimo o batla gore Bakeresete ba nne mo mokgatlhong mongwe?

Bakeresete ba Bogologolo Ba ne Ba Solegelwa Molemo ke go Dira Dilo ka Thulaganyo

Ka Pentekosete ya 33 C.E., Jehofa o ne a tshololela moya wa gagwe o o boitshepo, e seng mo badumeding ba le mmalwa ba ba neng ba phatlaletse, mme o o tshololetse mo setlhopheng sa banna le basadi ba ba neng ba phuthegetse “mo lefelong le le lengwe fela,” e leng, mo kamoreng nngwe e e kwa godimo kwa motseng wa Jerusalema. (Ditiro 2:1) Ka nako eo, phuthego ya Bokeresete, e e neng ya nna mokgatlho wa ditšhaba tsotlhe, e ne ya tlhongwa. Seno se ne sa itshupa e le tshegofatso tota mo barutweng bao ba bogologolo. Ka ntlha yang? Ka go bo, ba ne ba neilwe tiro nngwe e e botlhokwa—ya go rera dikgang tse di molemo tsa Bogosi jwa Modimo kgabagare “mo lefatsheng lotlhe le le nang le banni.” (Mathaio 24:14) Mo phuthegong basokologi ba basha ba ne ba tla ithuta mo badumedingkabone ba ba nang le maitemogelo gore ba dire jang tiro ya go rera.

Go ise go ye kae, molaetsa wa Bogosi o ne wa anamela ka kwa ntle ga Jerusalema. Gare ga 62 le 64 C.E., moaposetoloi Petere o ne a kwala lekwalo la gagwe la ntlha a le kwalela Bakeresete ba ba neng ba “[falaletse] kwa Ponto, Galatia, Kapadokia, Asia le Bithinia,” dinaga tse tsotlhe di leng kwa Turkey wa motlha wa segompieno. (1 Petere 1:1) Gape go ne go na le badumedi kwa Palesetina, Lebanone, Siria, Kupero, Gerika, Kereta le Italy. Jaaka fa Paulo a ne a kwalela Bakolosa ka 60-61 C.E., dikgang tse di molemo di ne di “[rerilwe] mo tlhōlong yotlhe e e leng tlase ga legodimo.”—Bakolosa 1:23.

Molemo wa bobedi wa go kopanela le mokgatlho e ne e le gore Bakeresete ba ka kgona go kgothatsana. Ka go kopanela le phuthego, Bakeresete ba ne ba tla kgona go utlwa dipuo tse di tlhotlheletsang, ba ithuta Dikwalo tse di Boitshepo mmogo, ba bolelelana maitemogelo a a nonotshang tumelo, le go rapela mmogo le badumedikabone. (1 Bakorintha, kgaolo 14) Mme banna ba ba godileng ba ne ba ka “[disa] letsomane la Modimo.”—1 Petere 5:2.

E re ka Bakeresete e le maloko a phuthego, ba ne ba kgona go itsane ba bo ba simolola go ratana. Go na le gore Bakeresete ba bogologolo ba ikutlwe  ba gateletswe ka go bo ba kopanela le phuthego, ba ne ba agiwa le go nonotshiwa ke gone.—Ditiro 2:42; 14:27; 1 Bakorintha 14:26; Bakolosa 4:15, 16.

Lebaka le lengwe la go bo go ne go tlhokega phuthego kana mokgatlho wa lefatshe lotlhe o o utlwanang, e ne e le go dira gore go nne le kutlwano. Bakeresete ba ne ba ithuta go “[bua] ka tumalano.” (1 Bakorintha 1:10) Seno se ne se le botlhokwa thata. Maloko a phuthego a ne a rutegile ka ditsela tse di farologaneng e bile a tswa mo ditlhopheng tse di farologaneng tsa batho. Ba ne ba bua dipuo tse di farologaneng, mme ga go na pelaelo gore le botho jwa bone bo ne bo farologane. (Ditiro 2:1-11) Ka dinako tse dingwe, ba ne ba na le dikgopolo tse di farologaneng tota. Le fa go ntse jalo, Bakeresete ba ne ba thusiwa go rarabolola dikgotlhang tse di ntseng jalo ba le mo phuthegong.—Ditiro 15:1, 2; Bafilipi 4:2, 3.

Dipotso tse di masisi tse bagolwane ba mo lefelong leo ba neng ba sa kgone go di araba di ne di isiwa go balebedi ba ba etang ba ba godileng, ba ba jaaka Paulo. Dikgang tsa botlhokwa tse di neng di amana le dithuto tsa motheo di ne di isiwa kwa setlhopheng se segolo se se laolang se se neng se le kwa Jerusalema. Pele setlhopha se se laolang se ne se dirwa ke baaposetoloi ba ga Jesu Keresete mme moragonyana se ne sa okediwa gore se akaretse banna ba bagolo ba phuthego ya Jerusalema. Phuthego nngwe le nngwe e ne e tlotla taolo e Modimo a neng a e neile setlhopha se se laolang le baemedi ba sone gore ba rulaganye bodiredi, ba tlhome banna mo maemong a tirelo, le go dira ditshwetso malebana le dithuto tsa motheo. Fa kgang nngwe e ne e rarabolotswe ke setlhopha se se laolang, diphuthego di ne di amogela tshwetso eno e e dirilweng mme di ne di “ipela ka ntlha ya kgothatso eno.”—Ditiro 15:1, 2, 28, 30, 31.

Ee, Jehofa o ne a dirisa mokgatlho mo lekgolong la ntlha la dingwaga. Mme go tweng ka gompieno?

Re Tlhoka Mokgatlho Gompieno

Fela jaaka ditsala tsa bone tsa lekgolo la ntlha la dingwaga, Basupi ba ga Jehofa ba tsaya thomo eno ya go rera dikgang tse di molemo tsa Bogosi e le tiro e e masisi. Tsela nngwe e ba dirang tiro eno ka yone ke ka go anamisa Dibaebele le dikgatiso tse di thusang go ithuta Baebele, e leng selo se se tlhokang thulaganyo.

Dikgatiso tsa Bokeresete di tshwanetse go rulaganngwa ka kelotlhoko, go tlhatlhobiwa gore a di tlhomame, go gatisiwa, mme morago ga moo di romelwe kwa diphuthegong. Go tswa foo, Mokeresete mongwe le mongwe o tshwanetse gore a ithaopele go isa dikgatiso tseno kwa go bao ba batlang go di bala. Molaetsa wa Bogosi o ile wa fitlhelela dimilione tsa batho ka tsela eno. Baboledi ba dikgang tse di molemo ba leka go dira tiro ya bone ya go rera ka mokgwa o o rulagantsweng, ba tlhomamisa gore ga go na karolo epe ya tshimo e e berekiwang thata mme dikarolo tse dingwe tsone di tlhokomologiwa. Dilo tseno tsotlhe di tlhoka go rulaganngwa.

Ka ntlha ya gore ‘Modimo ga a tlhaole,’ Dibaebele le dikgatiso tsa Baebele di tshwanetse go ranolwa. (Ditiro 10:34) Gone jaanong, makasine ono o teng ka dipuo di le 132 mme molekane wa one, Tsogang!, e gatisiwa ka dipuo di le 83. Seno se tlhoka gore go nne le ditlhopha tse di rulagantsweng sentle tsa baranodi mo lefatsheng lotlhe.

Maloko a phuthego a a kgothadiwa fa a le kwa dipokanong le dikopanong tsa Bokeresete. Fa ba le koo ba utlwa dipuo tsa Baebele tse di tlhotlheletsang, ba ithuta Dikwalo mmogo, ba bolelelana maitemogelo a a agang, mme ba rapela mmogo le baobamedikabone. Mme, jaaka bakaulengwe ba bone ba lekgolo la ntlha la dingwaga, le bone ba ipelela maeto a a nonotshang tumelo a balebedi ba ba etang ba ba lorato. Ka gone, Bakeresete gompieno ba bopa “letsomane le le lengwe, modisa a le mongwe.”—Johane 10:16.

Gone mme, Basupi ba ga Jehofa ga ba a itekanela, fela jaaka ditsala tsa bone tsa bogologolo di ne di sa itekanela. Le fa go ntse jalo, ba dira mmogo ka kutlwano. Ka ntlha ya seno, tiro ya go rera ka Bogosi e dirwa mo lefatsheng lotlhe.—Ditiro 15:36-40; Baefeso 4:13.

[Setshwantsho mo go tsebe 31]

Bakeresete gompieno ba bopa “letsomane le le lengwe, modisa a le mongwe”