Fetela kwa tshedimosetsong

Fetela go diteng

Baebele ya Reng ka go Nyalana Kgotsa go Ratana ga Batho ba Bong jo bo Tshwanang?

Baebele ya Reng ka go Nyalana Kgotsa go Ratana ga Batho ba Bong jo bo Tshwanang?

KGANG ya manyalo a batho ba bong jo bo tshwanang e sa ntse e le kgang ya moruthutha mo dinageng di le dintsi. Mme kwa United States, ka 2015, Kgotlatshekelo ya Makgaolakgang e ne ya ntsha taelo ya gore manyalo a batho ba bong jo bo tshwanang a nne ka fa molaong mo nageng eo yotlhe. Go tswa foo, batho ba le bantsi ba ne ba dira dipatlisiso ka kgang eo mo Internet. Potso e e neng e bodiwa thata ke go re: “Baebele ya reng ka go nyalana ga batho ba bong jo bo tshwanang?”

Baebele ga e bue sepe ka ditshwanelo tsa semolao tsa go nyalana ga batho ba bong jo bo tshwanang. Mme potso ya botlhokwa ke go re, Baebele ya reng ka go nyalana kgotsa go ratana ga batho ba bong jo bo tshwanang?

Batho ba le bantsi ga ba sekaseke se Baebele e se buang ka kgang eno, le fa go ntse jalo, ba akanya gore ba itse karabo ya potso eo, mme gone dikarabo tsa bone di a ganetsana. Bangwe ba re Baebele e kgatlhanong le go ratana ga batho ba bong jo bo tshwanang. Ba bangwe ba re taelo ya Baebele ya gore o “rate moagelani wa gago,” e raya gore re tshwanetse go dumalana le boitshwaro bongwe le bongwe jwa thobalano.—Baroma 13:9.

BAEBELE YA RENG?

Ke kgopolo efe mo go tseno e o akanyang gore e boammaaruri?

  1. Baebele e kgatlhanong le dilo tse di dirwang ke batho ba bong jo bo tshwanang ba ba ratanang.

  2. Baebele e dumalana le dilo tse di dirwang ke batho ba bong jo bo tshwanang ba ba ratanang.

  3. Baebele e re rotloetsa gore re tlhoe batho ba bong jo bo tshwanang ba ba ratanang.

DIKARABO:

  1. BOAMMAARURI. Baebele ya re ‘banna ba ba robalanang le banna ga ba na go rua bogosi jwa Modimo.’ (1 Bakorintha 6:9, 10) Kgang eno e akaretsa le basadi.—Baroma 1:26.

  2. MAAKA. Baebele ya re thobalano e tshwanetse go dirwa fela ke monna le mosadi ba ba nyalaneng.—Genesise 1:27, 28; Diane 5:18, 19.

  3. MAAKA. Le fa Baebele e le kgatlhanong le dilo tse di dirwang ke batho bong jo bo tshwanang ba ba ratanang, ga e re kgothaletse gore re ba tlhaole, re ba tlhasele kgotsa re ba tshware makgwakgwa.—Baroma 12:18. [1]

 Basupi ba ga Jehofa ba Dumela Eng?

Basupi ba ga Jehofa ba dumela gore melao ya Baebele e e malebana le boitshwaro e gaisa melao yotlhe e e leng teng mme ba tlhopha go e ikobela. (Isaia 48:17) [2] Seno se raya gore Basupi ba ga Jehofa ba kgatlhanong le boitsholo jo bo sa siamang jwa thobalano, go akaretsa le go ratana kgotsa go nyalana ga batho ba bong jo bo tshwanang. (1 Bakorintha 6:18) [3] Eno ke tsela ya botshelo e Basupi ba tlhophang go tshela ka yone, e bile ba na le tshwanelo ya go dira jalo.

Basupi ba ga Jehofa ba leka go latela molao wa Baebele o o reng re tshware batho ka tsela e re batlang gore ba re tshware ka yone

Mme gone, Basupi ba ga Jehofa ba leka ka natla go ‘latelela go nna le kagiso le batho botlhe.’ (Bahebera 12:14) Le fa Basupi ba ga Jehofa ba le kgatlhanong le dilo tse di dirwang ke batho ba bong jo bo tshwanang ba ba ratanang, ga ba pateletse ba bangwe gore ba dumalane le bone, ga ba nne le seabe mo go tlhaseleng batho bano e bile ga ba itumele fa ba utlwa gore ba a tlhaselwa. Basupi ba ga Jehofa ba leka ka natla go latela Molao wa gore ba tshware ba bangwe fela jaaka ba batla gore le bone ba ba tshware.—Mathaio 7:12.

A Baebele e Kgothaletsa Tlhaolele?

Batho bangwe ba ka nna ba re Baebele e kgothaletsa tlhaolele kgatlhanong le batho ba bong jo bo tshwanang ba ba ratanang le gore batho ba ba tshelang ka melao ya Baebele ba gana dikgopolo tsa ba bangwe. Batho bano ba re: ‘Baebele e kwadilwe ka nako ya fa batho ba ne ba sa akanyetse dilo tse dingwe tse ba sa di tlwaelang. Gone jaanong re amogela batho ba ditso le ditšhaba tsotlhe mmogo le ba ba itlhophelang go ratana kgotsa go nyalana le batho ba bong jo bo tshwanang le jwa bone.’ Ba tsaya gore fa o gana go amogela batho ba bong jo bo tshwanang ba ba ratanang, go tshwana le fa o tlhaola batho ka mmala. A mme gone papiso eno e a utlwala? Nnyaa. Ke eng re rialo?

Ka gonne go na le pharologano magareng ga go gana go amogela boitshwaro jwa batho ba bong jo bo tshwanang ba ba ratanang le go ba tlhoa. Baebele e laela Bakeresete gore ba tlotle batho ba mefuta yotlhe. (1 Petere 2:17) [4] Mme seo ga se reye gore Bakeresete ba tshwanetse go amogela mekgwa yotlhe ya boitshwaro.

Ka sekai, a re re o tsaya go goga motsoko go le kotsi e bile go ferosa sebete. O ne o tla dira eng fa o ne o bereka le motho yo o gogang? A batho ba ne ba tla tsaya gore o ikakanyetsa o le nosi ka gonne o sa rate go goga? A kgang ya go bo a goga mme wena o sa goge e bontsha gore o a mo tlhaola? Fa modirimmogo yono a ne a ka go pateletsa gore o fetole tsela e o lebang go goga ka yone, a seno se tla bo se sa bontshe gore ga a go akanyetse?

Basupi ba ga Jehofa ba tshela ka melao ya boitsholo e e mo Baebeleng. Ga ba amogele dilo tse Baebele e di kgalang. Le fa go ntse jalo, ga ba sotle batho ba ba sa lebeng dilo jaaka bone e bile ga ba ba tshware makgwakgwa.

A se Baebele e se Rutang ke Bosetlhogo?

Go tweng ka batho ba ba eletsang go ratana le batho ba bong jo bo tshwanang le jwa bone? A ba tshotswe ba ntse jalo? Fa go le jalo, a e tla bo e le bosetlhogo fa re re go phoso fa ba eletsa go latela dikeletso tsa bone?

Baebele ga e bue sepe ka kgang ya gore go tla jang gore motho a eletse go ratana le motho wa bong jo bo tshwanang le jwa gagwe mme gone e a dumalana gore batho bangwe ba na le dikeletso tse di tseneletseng. Le fa go ntse jalo, Baebele ya re fa re batla go itumedisa Modimo, re tshwanetse go tlhoa mekgwa mengwe, e e akaretsang go ratana ga batho ba bong jo bo tshwanang.—2 Bakorintha 10:4, 5.

Batho bangwe ba ka nna ba re Baebele e setlhogo. Mme ba bua jalo ka gonne ba akanya gore re tshwanetse go dira sengwe le sengwe se re eletsang go se dira kgotsa gore dikeletso tsa rona tsa thobalano di maatla thata jaana mo re sa kgoneng go di laola. Baebele yone e bontsha gore batho ba kgona go laola dikeletso tsa bone. Ga re tshwane le diphologolo ka gonne re kgona go itlhophela go sa laolwe ke maikutlo a rona.—Bakolosa 3:5. [5]

Akanya ka sekai seno: Baitseanape bangwe ba re mekgwa mengwe e e jaaka go galefa, e ka tswa e bakwa ke dilo dingwe tsa tlholego. Le fa gone Baebele e sa tlhalose gore go galefa  go amana le dilo tsa tlholego, e tlhalosa gore go na le batho ba ba “tlwaetseng go nna bogale” le ba ba “sekametseng mo tšararegong.” (Diane 22:24; 29:22) Gape Baebele ya re: “Tlogela bogale mme o lese tšararego.”—Pesalema 37:8; Baefeso 4:31.

Ke batho ba le mmalwa fela ba ba tla ganetsanang le kgakololo eo kgotsa ba ba tla reng e setlhogo mo bathong ba ba nang le bothata jwa go galefa. Tota e bile, bone baitseanape bano ba ba dumelang gore go galefa go mo mading, le bone ba leka ka natla go thusa batho bao go laola kgalefo eo.

Basupi ba ga Jehofa le bone ba thusa batho go tila boitshwaro bongwe le bongwe jo bo kgatlhanong le melao ya Baebele go akaretsa le go tlhakanela dikobo pele ga lenyalo. Mo maemong ano otlhe, kgakololo eno ya Baebele e botlhokwa: “Mongwe le mongwe wa lona a itse kafa a ka tsholang . . . [mmele wa gagwe ka gone o le boitshepo e bile o tlotlega] e seng mo go eletseng tlhakanelodikobo ka bopelotshetlha.”—1 Bathesalonika 4:4, 5.

“Bangwe ba Lona Ba ne Ba Ntse Jalo”

Mo lekgolong la ntlha la dingwaga, batho ba ba neng ba batla go nna Bakeresete ba ne ba godisitswe ka ditsela tse di sa tshwaneng, ka jalo, bangwe ba bone ba ne ba tlhoka go dira diphetogo tse dikgolo mo matshelong a bone. Ka sekai, Baebele e bua ka “bagokafadi, . . . baobamedi ba medingwana, . . . baakafadi, . . . banna ba ba beetsweng maikaelelo a e seng a tlholego, . . . le banna ba ba robalang le banna,” mme go tswa foo, ya re: “Bangwe ba lona ba ne ba ntse jalo.”1 Bakorintha 6:9-11.

Fa Baebele e re “bangwe ba lona ba ne ba ntse jalo,” a e raya gore batho ba ba sa tlholeng ba ratana le batho ba bong jo bo tshwanang le jwa bone ba ka se tsamaye ba nna le dikeletso tseo gape? Go ka tswa go se jalo ka gonne Baebele ya re: “Nnang lo tsamaye ka moya mme ga lo na go diragatsa keletso epe ya senama ka gope.”—Bagalatia 5:16.

Ela tlhoko gore Baebele ga e re Mokeresete ga a kitla a nna le dikeletso tseo tse di sa siamang. Go na le moo, ya re Mokeresete o tla itirela tshwetso ya gore a o tla kgotsofatsa keletso eo kana jang. Bakeresete ba ithuta go laola dikeletso tseo e seng go nna ba akantse ka tsone mo ba feleletsang ba di dira.—Jakobe 1:14, 15. [6]

Baebele e bontsha gore go na le pharologano fa gare ga go eletsa sengwe le go se dira. (Baroma 7:16-25) Motho yo o nang le keletso e e maatla ya go batla go ratana le mongwe wa bong jo bo tshwanang le jwa gagwe, a ka laola se a akanyang ka sone fela jaaka a ne a ka laola keletso epe fela e e sa siamang go akaretsa le tshekamelo ya go galefa, go akafala le go nna pelotshetlha.—1 Bakorintha 9:27; 2 Petere 2:14, 15.

Le fa Basupi ba ga Jehofa ba tshela go ya ka melao ya boitsholo e e mo Baebeleng, ga ba pateletse batho ba bangwe gore ba lebe dilo jaaka ba di leba. Gape ga ba fetole melao e e sireletsang ditshwanelo tsa batho ba ba sa tsheleng jaaka bone. Molaetsa wa Basupi ba ga Jehofa o molemo thata e bile ba itumelela go o bolelela batho ba ba batlang go reetsa.—Ditiro 20:20.

^ 1. Baroma 12:18: “Agisanang le batho botlhe.”

^ 2. Isaia 48:17: “Nna Jehofa, ke Modimo wa gago, Yo ke go rutang gore o solegelwe molemo.”

^ 3. 1 Bakorintha 6:18: “Tshabang kgokafalo.”

^ 4. 1 Petere 2:17: “Tlotlang batho ba mefuta yotlhe.”

^ 5. Bakolosa 3:5: “Jalo, bolayang ditokololo tsa lona tsa mmele tse di mo lefatsheng ka ga kgokafalo, boitshekologo, keletso ya tlhakanelodikobo.”

^ 6. Jakobe 1:14, 15: “Mongwe le mongwe o lekwa ka go gogelwa a ba a hepisiwa ke keletso ya gagwe. Go tswa foo keletso, fa e sena go emera, e tshola boleo.”