Fetela kwa tshedimosetsong

Fetela go diteng

 SETLHOGO SA KA FA NTLE | A TOTA BAEBELE E TSWA KWA MODIMONG?

Baebele—A Tota e “Tlhotlheleditswe ke Modimo”?

Baebele—A Tota e “Tlhotlheleditswe ke Modimo”?

A O DUMELA gore Baebele e tswa kwa Modimong? Kgotsa a o akanya gore ke buka e batho ba e ikwaletseng?

Tota le batho ba ba ipitsang Bakeresete ba sa ntse ba ngangisana ka kgang eno. Ka sekai, patlisiso e e dirilweng ka 2014 ke mokgatlho wa Gallup kwa United States ya re batho ba le bantsi ba ba ipitsang Bakeresete ba dumela gore “Baebele e amana le Modimo ka tsela nngwe.” Mme motho a le mongwe mo go ba le batlhano ba ba botsoloditsweng a re Baebele ke buka ya “ditlhamane tsa bogologolo, bagaka, hisitori le melao e e kwadilweng ke batho.” Go sa dumalane gono go dira gore re batle go itse gore lefoko “tlhotlheleditswe” le le dirisitsweng mo Baebeleng, le kaya eng.—2 Timotheo 3:16.

LEFOKO “TLHOTLHELEDITSWE” LE KAYA ENG?

Baebele e dirilwe ka dibukana di le 66 tse di kwadilweng ke banna ba le 40 ka dingwaga di feta 1 600. Fa e le gore Baebele e kwadilwe ke batho, goreng go twe “e tlhotlheleditswe ke Modimo”? Mafoko a a reng e “tlhotlheleditswe ke Modimo” a kaya gore Modimo ke Motswedi wa tshedimosetso e e mo Baebeleng. Baebele ya re: “Batho ba ne ba bua se se tswang kwa Modimong e re ka ba ne ba tlhotlhelediwa ke moya o o boitshepo.” (2 Petere 1:21) Seno se kaya gore Modimo o dirisitse moya wa gagwe o o sa bonaleng o o nayang maatla, o o bidiwang moya o o boitshepo, go fetisetsa molaetsa wa gagwe mo bakwading ba dibuka tsa Baebele. Seno se ka tshwantshanngwa le fa rrakgwebo a bolelela mokwaledi wa gagwe gore a kwale eng mo lekwalong. Mokwadi wa lekwalo leo ke rrakgwebo, e seng mokwaledi.

Bakwadi bangwe ba Baebele ba ne ba bolelelwa molaetsa wa Modimo ka tlhamalalo ke baengele. Ba bangwe ba ne ba bona dipono. Ka dinako dingwe Modimo o ne a ba bolelela molaetsa wa gagwe a dirisa ditoro. Le fa Modimo a ne a letla bakwadi ba Baebele go dirisa mafoko a bone go kwala molaetsa wa gagwe, ka dinako dingwe o ne a ba bolelela mafoko a ba tshwanetseng go a kwala jaaka a ntse. Ka metlha bakwadi ba Baebele ba ne ba kwala se se tswang kwa Modimong, e seng mo go bone.

Re ka tlhomamisega jang gore Modimo ke ene a tlhotlheleditseng bakwadi ba Baebele? Ela tlhoko mabaka a mararo a a ntshang bosupi jwa gore ruri Baebele e tlhotlheleditswe ke Modimo.