Fetela kwa tshedimosetsong

Fetela go diteng

 BAEBELE YA RENG?

Baengele

Baengele

Gompieno go na le dibuka, ditshwantsho le difilimi tse di buang ka baengele. Baengele ke bomang e bile tiro ya bone ke eng?

Baengele ke bomang?

SE BAEBELE E SE BUANG

 

Pele Modimo a bopa lobopo le batho ba ntlha, o ne a setse a bopile dibopiwa tsa maemo a a kwa godimo e bile di le botlhale. Di maatla go gaisa batho e bile di nna kwa lefelong le Modimo a nnang kwa go lone, lefelo le batho ba sa kgoneng go fitlha kwa go lone le go le bona. (Jobe 38:4, 7) Baebele ya re dibopiwa tseo tsa maemo a a kwa godimo ke “meya” le “baengele.”—Pesalema 104:4. *

Go na le baengele ba le kae? Ba bantsi thata. Baengele ba ba dikologileng setulo sa Modimo sa Bogosi ke “dimiriate tsa dimiriate” kgotsa “dikete tsa dikete.” (Tshenolo 5:11) Fa re baya seno ka tsela e e tlwaelegileng, re ka re palo ya baengele ke dimilione di le makgolokgolo!

“Ka bona . . . baengele ba le bantsi go dikologa setulo sa bogosi . . . , mme palo ya bone e ne e le dimiriate tsa dimiriate le dikete tsa dikete.”—Tshenolo 5:11.

Baengele ba ne ba dira eng bogologolo?

SE BAEBELE E SE BUANG

 

Gantsi baengele e ne e le babueledi kgotsa barongwa ba Modimo. * Gape Baebele ya re ba ne ba dira dikgakgamatso tse Modimo a neng a re ba di dire. Modimo o ne a romela moengele go ya go segofatsa Aborahame le go mo thibela gore a se ka a ntsha morwawe e bong Isake setlhabelo. (Genesise 22:11-18) Moengele o ne a ya kwa go Moshe fa a le kwa setlhareng se se tukang go ya go mmolelela molaetsa o o neng o tla fetola botshelo jwa gagwe. (Ekesodo 3:1, 2) Fa moporofeti Daniele a sena go latlhelwa mo khuting ya ditau, “Modimo . . .  o ne a romela moengele wa gagwe mme a tswala molomo wa ditau.”—Daniele 6:22.

“Moengele wa ga Jehofa a bonala kwa go [Moshe] a le mo kgabong ya molelo o o tukang mo gare ga setlhare.”—Ekesodo 3:2, Baebele e e Boitshepo.

 Baengele ba dira eng gompieno?

SE BAEBELE E SE BUANG

 

Ga re ka ke ra itse dilo tsotlhe tse baengele ba di dirang gompieno. Le fa go ntse jalo, Baebele ya re ba thusa batho ba ba siameng go itse ka Modimo.—Ditiro 8:26-35; 10:1-22; Tshenolo 14:6, 7.

Jehofa o ne a dira gore tlhogo ya lotso e bong Jakobe a lore baengele ba tlhatloga le go fologa “lere” e e fa gare ga legodimo le lefatshe. (Genesise 28:10-12) Jakobe o ne a bua se le rona re ka se buang ka toro eo—gore Jehofa Modimo o romela baengele ba gagwe mo lefatsheng gore ba thuse batho ba ba ikanyegang ba ba tlhokang thuso.—Genesise 24:40; Ekesodo 14:19; Pesalema 34:7.

“Go ne go na le lere e emisitswe mo godimo ga lefatshe mme bogodimo jwa yone bo fitlha kwa magodimong; mme bona! go ne go na le baengele ba Modimo ba tlhatloga ba bo ba fologa mo go yone.”—Genesise 28:12.

^ ser. 6 Baebele ya re go na le meya e e neng ya tlhanogela bolaodi jwa Modimo mme ya re baengele bao ba ba sa siamang ke “madimona.”—Luke 10:17-20.

^ ser. 11 Lefoko la Sehebera le Segerika le le dirisitsweng mo Baebeleng e leng “moengele,” gape le kaya “morongwa.”