Fetela kwa tshedimosetsong

Fetela go diteng

Dipotso Tse di Tswang Kwa Babading

Dipotso Tse di Tswang Kwa Babading

Go kopanngwa ga dithobane tse pedi go go tlhalosiwang mo go Esekiele kgaolo 37 go kaya eng?

Jehofa o ne a naya Esekiele molaetsa o mo go one a solofetsang gore setšhaba sa Iseraele se tla nna seoposengwe fa se sena go boela kwa Lefatsheng le le Solofeditsweng. Gape molaetsa oo o bolelela pele go nna seoposengwe ga batho ba Modimo go go neng ga simolola go direga mo malatsing a bofelo.

Jehofa o ne a bolelela moporofeti Esekiele gore a kwale mo dithobaneng tse pedi. Mo thobaneng ya ntlha, o ne a tshwanetse go kwala a re, “Ya ga Juda le ya bomorwa Iseraele balekane ba gagwe,” mme mo go e nngwe a kwale a re, “Ya ga Josefa, thobane ya ga Eferaime, le botlhe ba ntlo ya Iseraele balekane ba gagwe.” Mme di ne di tla nna thobane “e le nngwe fela” mo seatleng sa ga Esekiele.—Esek. 37:15-17.

 “Eferaime” o ne a emela mang? Kgosi ya ntlha ya bogosi jo bo kwa bokone jwa ditso tse di lesome e bong Jeroboame, o ne a tswa mo lotsong lwa Eferaime lo lo neng lo di goga kwa pele. (Dute. 33:13, 17; 1 Dikg. 11:26) Lotso lono lo ne lo tswa mo go morwa Josefa e bong Eferaime. (Dipa. 1:32, 33) Jakobe o ne a segofaditse Josefa ka tsela e e kgethegileng. Ka jalo, go ne go tshwanela gore thobane e e neng e emela bogosi jwa ditso tse di lesome e bidiwe “thobane ya ga Eferaime.” Ka nako ya fa Esekiele a ne a kwala boporofeti jono, go ne go setse go fetile lobaka lo loleele bogosi jo bo kwa bokone jwa Iseraele bo isitswe botshwarwa ke Baasiria ka 740 B.C.E. (2 Dikg. 17:6) Ka jalo, Baiseraele ba le bantsi ba ne ba nna mo mafelong a a farologaneng a Puso ya Babelona, e e neng e fentswe ke Puso ya Asiria.

Ka 607 B.C.E., bogosi jo bo kwa borwa jwa ditso tse pedi, gongwe go akaretsa le bangwe ba bogosi jo bo kwa bokone ba ba neng ba setse, ba ne ba isiwa botshwarwa kwa Babelona. Dikgosi tsa lotso lwa Juda di ne di busa ditso tseno tse pedi e bile baperesiti ba ne ba na le tsone ka gonne baperesiti ba ne ba direla mo tempeleng e e kwa Jerusalema. (2 Ditir. 11:13, 14; 34:30) Ka jalo, go a tshwanela go bo bogosi jwa ditso tse pedi bo ne bo emelwa ke thobane “ya ga Juda.”

Dithobane tseno tse pedi di ne tsa kopanngwa leng? Ka nako ya fa Baiseraele ba boela kwa Jerusalema go ya go aga tempele sesha ka 537 B.C.E. Batho ba bogosi jwa ditso tse pedi mmogo le ba bogosi jwa ditso tse di lesome, ba ne ba boa mmogo go tswa botshwarwa. Bomorwa Iseraele ba ne ba sa tlhole ba kgaogane. (Esek. 37:21, 22) Baiseraele ba ne ba direla Jehofa ba le seoposengwe gape. Moporofeti Isaia le Jeremia ba ne ba boleletse pele ka go letlanngwa gono.—Isa. 11:12, 13; Jer. 31:1, 6, 31.

Boporofeti jono bo gatelela boammaaruri bofe malebana le kobamelo ya boammaaruri? Gore Jehofa o tla dira gore baobamedi ba gagwe ba nne “bangwe fela.” (Esek. 37:18, 19) A seo se a direga le mo metlheng ya rona? Ee. Boporofeti jono bo ne jwa diragadiwa la ntlha ka 1919 fa batho ba Modimo ba ne ba boa ba rulaganngwa kgato ka kgato le go dirwa seoposengwe. Maiteko a ga Satane a go ba kgaoganya a iteile se fololetse.

Ka nako eo, bontsi jwa batho bao ba ne ba na le tsholofelo ya go nna dikgosi le baperesiti kwa legodimong le Jesu. (Tshen. 20:6) Ka tsela ya tshwantshetso, ba ne ba tshwana le thobane ya ga Juda. Le fa go ntse jalo, fa nako e ntse e ya, batho ba le bantsi ba ba nang le tsholofelo ya go tshela mo lefatsheng, ba ne ba simolola go nna seoposengwe le Bajuda bano ba semoya. (Seka. 8:23) Ba ne ba tshwana le thobane ya ga Josefa e bile ba se na tsholofelo ya go busa kwa legodimong le Keresete.

Gone jaanong ba dira mmogo ba le seoposengwe e le batho ba ga Jehofa, ba eteletswe pele ke Kgosi e le nngwe e bong Jesu Keresete yo boporofeti bo mmitsang “motlhanka wa me Dafide.” (Esek. 37:24, 25) Jesu o ne a rapela gore balatedi botlhe ba gagwe ba nne ‘mongwe fela, jaaka Rraagwe a le seoposengwe le ene mme le ene a le seoposengwe le Rraagwe.’ * (Joh. 17:20, 21) Gape o ne a bolelela pele gore balatedi ba gagwe ba ba tloditsweng ba tla nna “letsomane le le lengwe” le ba “dinku tse dingwe.” Botlhe ba tla etelelwa pele ke “modisa a le mongwe.” (Joh. 10:16) A bo mafoko ano a ga Jesu a tlhalosa kutlwano ya batho ba ga Jehofa jang ne go sa kgathalesege gore ba na le tsholofelo efe ka isagwe!

^ ser. 6 Re kgatlhiwa ke tatelano ya ditiragalo e Jesu a neng a e tlhalosa fa a ne a bua ka ditshwantsho tse e leng karolo ya sesupo sa go nna gone ga gagwe. Sa ntlha, o ne a bua ka “motlhanka yo o boikanyego le yo o botlhale,” e leng setlhotswana sa bakaulengwe ba ba tloditsweng ba ba re etelelang pele. (Math. 24:45-47) Go tswa foo, o ne a umaka setshwantsho se mo go sone a neng a bua le botlhe ba ba nang le tsholofelo ya go tshela kwa legodimong. (Math. 25:1-30) Kwa bofelong, o ne a bua ka botlhe ba ba nang le tsholofelo ya go tshela mo lefatsheng ba ba emang bomorwarraagwe Keresete nokeng. (Math. 25:31-46) Ka tsela e e tshwanang, mo motlheng wa rona, boporofeti jono jwa ga Esekiele bo bua pele ka se se tla diragalelang batho ba ba nang le tsholofelo ya go tshela kwa legodimong. Le fa bogosi jwa ditso tse di lesome e se ka metlha bo emelang batho ba ba nang le tsholofelo ya go tshela mo lefatsheng, go nna seoposengwe go go tlhalosiwang mo boporofeting jono go re gopotsa kutlwano e e leng teng fa gare ga ba ba nang le tsholofelo ya go tshela mo lefatsheng le ba ba nang le tsholofelo ya go tshela kwa legodimong.