Fetela kwa tshedimosetsong

Fetela go diteng

Botlhokwa Jwa go Nna Boingotlo

Botlhokwa Jwa go Nna Boingotlo

“Botlhale bo na le ba ba boingotlo.”—DIA. 11:2.

PINA: 38, 69

1, 2. Ke eng fa monna yo o kileng a bo a le boingotlo a ile a se ka a tlhola a amogelwa ke Modimo? (Bona setshwantsho se se simololang setlhogo.)

FA Kgosi Saulo wa kwa Iseraele a simolola go busa, o ne a le boingotlo e bile a tlotlega. (1 Sam. 9:1, 2, 21; 10:20-24) Mme morago fela ga gore e nne kgosi, o ne a dira dilo di le mmalwa tse a neng a se na tetla ya go di dira. Nako nngwe fa moporofeti wa Modimo e bong Samuele a ne a ise a tle kwa Gilegala ka nako e e beilweng, Saulo o ne a fela pelo. E re ka Bafilisitia ba ne ba ipaakanyetsa go ba lwantsha, Baiseraele ba ne ba simolola go tlhanogela Saulo mme ba tshaba. Saulo a ka tswa a ile a akanya jaana: ‘Ke tshwanetse go dira sengwe ka bonako.’ Ka jalo, o ne a ntshetsa Modimo setlhabelo le fa gone a ne a se na tetla ya go dira jalo. Jehofa o ne a sa itumelela seo.—1 Sam. 13:5-9.

2 Fa Samuele a goroga kwa Gilegala, o ne a kgalema Saulo. Go na le gore Saulo a amogele kgalemelo eo, o ne a dira diipato, a supa ba bangwe ka menwana e bile a tlhalosa gore se a se dirileng ga se sepe se se kalo. (1 Sam. 13:10-14) Morago ga moo, Saulo o ne a simolola go dira dilo tse dingwe tse di neng tsa dira gore a tlosiwe mo setulong sa gagwe sa bogosi mme se se utlwisang botlhoko le go feta, o ne a sa tlhole a amogelwa ke Jehofa. (1 Sam.  15:22, 23) Le fa gone Saulo a ne a dira dilo sentle kwa tshimologong, o ile a welwa ke mahutsana.—1 Sam. 31:1-6.

3. (a) Batho ba le bantsi ba akanya eng ka go nna boingotlo? (b) Ke dipotso dife tse re tlhokang go di sekaseka?

3 E re ka gompieno batho ba rata go gaisana, batho ba le bantsi ba akanya gore ba tshwanetse go tlhagelela ka magetla gore ba kgone go atlega. Mme ba ka tlogela go nna boingotlo fa ba dira jalo. Ka sekai, motshameki mongwe wa difilimi yo o itsegeng thata, yo gone jaanong e leng rradipolotiki, o ne a re: “Nna ga ke motho yo o boingotlo e bile ga nkitla ke tsamaya ke nna boingotlo.” A mme gone re tlhoka go nna boingotlo? Boingotlo ke eng? Mme re ka nna boingotlo jang le fa gone re lebana le maemo a a thata kgotsa re gatelelwa ke ba bangwe? Mo setlhogong seno, re tla sekaseka dipotso tsa ntlha tse pedi. Potso ya boraro e tla sekasekwa mo setlhogong se se latelang.

KE ENG FA GO LE BOTLHOKWA GO NNA BOINGOTLO?

4. Ditiro tsa boikgodiso ke eng?

4 Baebele e farologanya go nna boingotlo le go ikgodisa. (Bala Diane 11:2.) Dafide o ne a kopa Jehofa gore a mo “thibe . . . mo ditirong tsa boikgodiso.” (Pes. 19:13) ‘Ditiro tsa boikgodiso’ ke eng? Di tlhalosiwa e le fa mongwe a itlhaganelela go dira dilo tse a sa tshwanelang go di dira a sa akanya pele, motho yoo o a bo a ikgodisa. E re ka re sa itekanela, re a tle re ikgodise ka dinako dingwe. Le fa go ntse jalo, jaaka re bone mo sekaing sa ga Kgosi Saulo, fa re itlwaetsa go tlhagelela ka magetla, go ise go ye kae, kamano ya rona le Modimo e ka senyega. Pesalema 119:21 e bua jaana ka Jehofa: “O [kgalemela] ba ba boikgodiso.” Ke eng fa go le jalo?

5. Ke eng fa ditiro tsa boikgodiso di le masisi?

5 Ditiro tsa boikgodiso di masisi thata go feta go dira diphoso. Sa ntlha, fa re se boingotlo, re a bo re tlontlolola Molaodimogolo wa rona e bong Jehofa. Sa bobedi, fa re ipagololela mogodu, seo se ka dira gore re nne le dikgotlhang le batho ba bangwe. (Dia. 13:10) Sa boraro, fa batho ba lemoga gore re ntse re ikgodisa, re ka tlhabiwa ke ditlhong. (Luke 14:8, 9) Go ikgodisa go ka re bakela mathata. Baebele e bua boammaaruri fa e re go botlhokwa go nna boingotlo.

GO NNA BOINGOTLO GO KAYA ENG?

6, 7. Boikokobetso ke eng, mme bo amana jang le boingotlo?

6 Boingotlo le boikokobetso ke di ya thoteng di bapile. Baebele ya re go nna boikokobetso ke go sa nne mabela. Boikokobetso bo tlhalosiwa e le go nna le “mogopolo o o ikokobeditseng.” (Bafil. 2:3) Go le gantsi motho yo o ikokobeditseng o boingotlo, o itse dilo tse a kgonang go di dira le tse a kgonneng go di dira, o amogela diphoso tse a di dirileng e bile o iketleeleditse go amogela dikakantso. Ruri go nna boikokobetso go itumedisa Jehofa.

7 Ka tsela e e tshwanang, Baebele e tlhalosa go nna boingotlo e le go itse dilo tse re ka kgonang go di dira le tse re ka se kgoneng go di dira. Puo e Baebele e kwadilweng ka yone e tlhomolola kafa go itse seno go tshwanetseng ga ama tsela e re dirisanang le ba bangwe ka yone.

8. Ke dilo dife tse di ka bontshang gore ga re sa tlhole re le boingotlo?

8 Ke eng se se ka dirang gore re simolole go akanya kgotsa go dira dilo tse di bontshang gore ga re boingotlo? Akanya ka dilo dingwe tse di ka bontshang gore seo se a direga. Re ka tswa re itseela kwa godimo kgotsa re tseela ditshiamelo tsa rona kwa godimo thata. (Bar. 12:16) Gape re ka tswa re dira gore batho ba re tseele kwa godimo mme re dira jalo ka tsela e e sa siamang.  (1 Tim. 2:9, 10) Kgotsa re ka tswa re buelela dilo dingwe ka ntlha ya maemo a re nang le one, batho ba re ba itseng kgotsa se rona re akanyang gore se siame. (1 Bakor. 4:6) Gantsi fa re dira dilo tseno, ga re lemoge gore ga re sa tlhole re le boingotlo mme re simolotse go ikgodisa.

9. Ke eng se se dirileng gore batho bangwe ba ikgodise? Naya sekai sa mo Baebeleng.

9 Go a kgonega gore motho ope fela a se ka a nna boingotlo fa a itetla gore a fenngwe ke dikeletso tsa nama. Go nna bogagapa, lefufa le go galefa thata go dirile gore batho ba le bantsi ba ikgodise. Batho ba go buiwang ka bone mo Baebeleng ba ba jaaka Abesalome, Usia le Nebukadenesare ba ne ba ineelela ditiro tsa nama mme Jehofa o ile a ba kokobetsa ka gonne ba ne ba ikgodisa.—2 Sam. 15:1-6; 18:9-17; 2 Ditir. 26:16-21; Dan. 5:18-21.

10. Ke eng fa re sa tshwanela go belaela maitlhomo a batho ba bangwe? Naya sekai sa mo Baebeleng.

10 Le fa go ntse jalo, go na le mabaka a mangwe a a ka dirang gore motho a ikgodise. Ka sekai, akanya ka dipego tseno tsa Baebele: Genesise 20:2-7 le Mathaio 26:31-35. A dikeletso tsa nama ke tsone di neng di dira gore Abimeleke le Petere ba ikgodise? Kgotsa a ba ne ba se na dintlha ka botlalo kgotsa ba tshoganyeditswe? E re ka re sa kgone go bona se se mo dipelong tsa batho, re tla bo re bontsha gore re botlhale e bile re na le lorato fa re sa belaele maitlhomo a batho ba bangwe.—Bala Jakobe 4:12.

GO KGOTSOFALELA MAEMO A RONA

11. Boingotlo bo amana jang le go kgotsofalela maemo a rona mo phuthegong?

11 Tsela nngwe ya botlhokwa e re ka bontshang ka yone gore re boingotlo ke ka go kgotsofalela maemo a rona mo phuthegong. E re ka Jehofa e le Modimo wa thulaganyo, o naya mongwe le mongwe maikarabelo mo phuthegong. Maikarabelo a re nang le one ga a tshwane, mme gone rotlhe re botlhokwa. Jehofa o re bontshitse bopelonomi jwa gagwe jo bo sa re tshwanelang ka go abela mongwe le mongwe wa rona dimpho, dithoto le bokgoni. Re ka dirisa dilo tseno go mo galaletsa le go thusa batho ba bangwe. (Bar. 12:4-8) Jehofa o a re tlotla, o a re ikanya e bile o re neile boikarabelo jwa botlhokwa e leng tiro ya bolebedi.—Bala 1 Petere 4:10.

Re ka ithuta eng mo sekaong sa ga Jesu fa re newa kabelo e nngwe? (Bona serapa 12-14)

12, 13. Ke eng fa re sa tshwanela go gakgamala fa maemo a rona mo phuthegong a fetofetoga?

12 Maemo a rona mo phuthegong a ka fetoga fa nako e ntse e ya. Akanya ka sekao sa ga Jesu. Kwa tshimologong, o ne a tshela le Jehofa ba le babedi fela. (Dia. 8:22) Go tswa foo, o ne a thusa go bopa dibopiwa tse dingwe tsa semoya, go bopa lobopo le batho. (Bakol. 1:16) Moragonyana o ne a newa kabelo e nngwe mo lefatsheng, ya ntlha e ne e le go nna ngwana yo o sa kgoneng go itirela sepe, go tswa foo o ne a newa kabelo e nngwe gape fa a setse a godile. (Bafil. 2:7) Fa a sena go swa loso lwa go intsha setlhabelo, o ne a boela kwa legodimong e le sebopiwa sa semoya mme o ne a nna Kgosi ya Bogosi Jwa Modimo ka 1914. (Baheb. 2:9) Mme o sa ntse a tla newa kabelo e nngwe gape. Morago ga Puso ya Dingwaga Tse di Sekete, Jesu o tla busetsa Bogosi kwa go Jehofa gore “Modimo a nne dilo tsotlhe mo go mongwe le mongwe.”—1 Bakor. 15:28.

13 Le rona re ka lebelela gore maemo a rona a fetofetoge ka ntlha ya ditshwetso tse re di dirang. Ka sekai, bosheng jaana a o ne wa nyala kgotsa wa nyalwa? A o simolotse go godisa bana? Fa nako e ntse e ya, a o ne wa tlhofofatsa botshelo jwa gago gore o kgone go tsenela tirelo ya nako e e tletseng? Ditshwetso tseno tsotlhe di dirile gore ditshiamelo kgotsa maikarabelo a rona a fetoge. Fa maemo a rona a fetoga, seo se ka dira gore maikarabelo a rona a oketsege kgotsa a  fokotsege. A o mosha kgotsa o setse o godile thata? A botsogo jwa gago bo siame kgotsa o a lwala? Jehofa o akanyetsa maemo a rona a bo a re naya dikabelo go ya kafa re kgonang ka gone. Ga a lebelela gore re dire dilo tse re ka se kang ra di kgona e bile o anaanela thata matsapa a re a tsayang.—Baheb. 6:10.

14. Go nna boingotlo go ka re thusa jang gore re dire ka natla le gore re itumelele dikabelo tsa rona?

14 Jesu o ne a itumelela dikabelo tsa gagwe tsotlhe mme le rona re ka kgona go itumelela dikabelo tsa rona. (Dia. 8:30, 31) Motho yo o boingotlo ga a tlhobaediwe ke dikabelo kgotsa maikarabelo a gagwe mo phuthegong. Ga a tshwenngwe ke go batla go newa ditshiamelo tse dingwe mo isagweng kgotsa ke ditshiamelo tse ba bangwe ba nang le tsone. Go na le moo, o tlhoma mogopolo mo tirong e a e abetsweng e bile o leka ka natla go e itumelela ka gonne a itse gore o e neilwe ke Jehofa. Mme go ntse go le jalo, o tlotla dikabelo tse Jehofa a di neileng batho ba bangwe. Go nna boingotlo go dira gore re itumelele go tlotla ba bangwe le go ba ema nokeng.—Bar. 12:10.

BOINGOTLO GA BO AKARETSE ENG?

15. Re ka ithuta eng mo sekaong sa ga Gidione sa go nna boingotlo?

15 Gidione ke sekao se se molemo sa go nna boingotlo. Fa moengele wa ga Jehofa a ne a bua le Gidione lekgetlo la ntlha, Gidione o ne a itlhalosa ka tsela e e bontshang gore o boingotlo. (Baatlh. 6:15) Fa a sena go amogela kabelo e Jehofa a mo neileng yone, o ne a tlhomamisa gore o tlhaloganya sentle gore go lebeletswe eng mo go ene e bile o ne  a ikaega ka kaelo ya ga Jehofa. (Baatlh. 6:36-40) Gidione o ne a le pelokgale. Le fa go ntse jalo, ka metlha o ne a le kelotlhoko e bile a bontsha temogo. (Baatlh. 6:11, 27) O ne a sa dirise kabelo ya gagwe gore a itshenkele kgalalelo. Go na le moo, fa a wetsa kabelo e a neng a e neilwe, o ne a boela kwa kabelong ya gagwe ya pele.—Baatlh. 8:22, 23, 29.

16, 17. Motho yo o boingotlo o nna a etse tlhoko eng fa a akanya ka go tokafatsa tsela e a direlang Jehofa ka yone?

16 Go nna boingotlo ga go reye gore ga re a tshwanela go kgaratlhela kgotsa go amogela ditshiamelo tse dingwe mo phuthegong. Dikwalo di re kgothaletsa gore re tokafatse tsela e re direlang Jehofa ka yone. (1 Tim. 4:13-15) A seno se raya gore re tshwanetse go nna re amogela dikabelo tse di farologaneng? E seng ka metlha. Fa Jehofa a re segofatsa, re ka tokafatsa tsela e re mo direlang ka yone go sa kgathalesege kabelo e re nang le yone. Re ka kgona go tokafatsa bokgoni jo Modimo a re neileng jone le go tswelela re dira ditiro tse di molemo.

17 Motho yo o boingotlo o tlhomamisa pele gore go lebeletswe eng mo go ene pele a ka amogela kabelo e ntšha. Go tswa foo, a ka kgona go sekaseka maemo a gagwe. Ka sekai, a o tla kgona go sikara maikarabelo a a oketsegileng mme a sa tlhokomologe dilo tse dingwe tsa botlhokwa? A a ka kgona go abela ba bangwe tiro nngwe e a ntseng a e dira gore a kgone go nna le nako e e oketsegileng ya go dira kabelo ya gagwe e ntšha? Fa e le gore karabo ya nngwe ya dipotso tseno ke nnyaa, gongwe go na le mongwe yo ene a ka kgonang go dira kabelo eno ntle le go tlhokomologa dilo tsa botlhokwa. Go rapela le go itshekatsheka sentle, go tla re thusa gore re se ka ra di ga re di tlatsa ’kobo di se na morwadi. Go nna boingotlo go tla re thusa gore re se ka ra nna madumelagotlhe.

18. (a) Go nna boingotlo go tla re tlhotlheletsa go dira eng fa re na le kabelo e ntšha? (b) Baroma 12:3 e ka thusa motho yo o boingotlo jang?

18 Fa re amogela kabelo e ntšha, sekao sa ga Gidione se re gopotsa gore ga re ka ke ra kgona go atlega ntle le kaelo le tshegofatso ya ga Jehofa. Kana e bile, re kgothalediwa gore re ‘nne boingotlo fa re tsamaya le Modimo wa rona.’ (Mik. 6:8) Ka jalo, ka metlha fa re nna le maikarabelo a masha, re tlhoka go rapela Jehofa gore a re kaele ka Lefoko le ka phuthego ya gagwe. Re tlhoka go nna re tokafatsa tsela e re dirang dilo ka yone gore e dumalane le se Jehofa a se batlang. A re gakologelweng gore boikokobetso jwa ga Jehofa ke jone bo re ‘godisang,’ e seng bokgoni jwa rona. (Pes. 18:35) Fa re tlhopha go nna boingotlo fa re tsamaya le Modimo, seo se tla dira gore re se ka ra itseela kwa godimo thata kgotsa ra inyatsa thata.—Bala Baroma 12:3.

19. Ke ka ntlha yang fa re tshwanetse go nna boingotlo?

19 E re ka Jehofa e le Mmopi wa rona le Molaodimogolo wa Lobopo, motho yo o boingotlo o a bo a mo naya tlotlo e e mo tshwanetseng. (Tshen. 4:11) Go nna boingotlo go re thusa gore re kgotsofalele dikabelo tse re nang le tsone mo phuthegong ya Modimo le go dira ka natla. Go nna boingotlo go re thusa gore re tlotle batho ba bangwe e bile go dira gore batho ba ga Jehofa ba nne seoposengwe. Boingotlo bo re tlhotlheletsa gore re akanyetse batho ba bangwe le gore re nne kelotlhoko, mme seno se tla re thusa gore re tile go dira diphoso tse di masisi. Eleruri go a utlwala go bo go le botlhokwa gore batho ba Modimo ba nne boingotlo e bile Jehofa o anaanela batho ba ba nang le nonofo eno. Mme gotweng fa re ikutlwa re gateletswe? Mo setlhogong se se latelang re tla sekaseka kafa re ka nnang re le boingotlo ka gone mo maemong a a thata.