Fetela kwa tshedimosetsong

Fetela go diteng

Thekololo—Mpho “e e Itekanetseng” e e Tswang Kwa go Rara

Thekololo—Mpho “e e Itekanetseng” e e Tswang Kwa go Rara

“Mpho nngwe le nngwe e e molemo le neo nngwe le nngwe e e itekanetseng e tswa kwa . . . go Rara.”—JAK. 1:17.

PINA: 148, 109

1. Thekololo e dira gore re bone masego afe?

SETLHABELO sa thekololo sa ga Jesu Keresete se dira gore re bone masego a le mantsi. Thekololo e naya bana botlhe ba ga Adame ba ba ratang tshiamo tshono ya go nna karolo ya lelapa la Modimo mo isagweng. Gape thekololo e dira gore re nne le tsholofelo ya go tshelela ruri re itumetse. Le fa go ntse jalo, thekololo ya ga Keresete ga e re neye fela isagwe e e molemo, go na le sengwe gape sa botlhokwa se e se dirang. Lebaka la go bo Jesu a ne a iketleeleditse go swa a ikanyega le amana le dikgang tse di botlhokwa thata mo lobopong.—Baheb. 1:8, 9.

2. (a) Thapelo ya ga Jesu e umaka dintlha dife tsa botlhokwa? (Bona setshwantsho se se simololang setlhogo.) (b) Re tla sekaseka eng mo setlhogong seno?

2 Dingwaga di le pedi pele Jesu a swa le go ntsha botshelo jwa gagwe gore e nne setlhabelo sa thekololo, o ne a ruta barutwa ba gagwe gore ba rapele jaana: “Rraarona yo o kwa magodimong, a leina la gago le itshepisiwe. A bogosi jwa gago bo tle.  A thato ya gago e diragale le mo lefatsheng, jaaka kwa legodimong.” (Math. 6:9, 10) Mma re bone gore thekololo e amana jang le go itshepisiwa ga leina la Modimo, go busa ga Bogosi Jwa Modimo le go diragadiwa ga boikaelelo jwa gagwe. Seno se tla re thusa gore re annanele mpho eno e e botlhokwa le go feta.

“A LEINA LA GAGO LE ITSHEPISIWE”

3. Leina la ga Jehofa le tlhalosa eng, mme Satane o ile a senya jang leina leo le le boitshepo?

3 Selo sa ntlha se Jesu a neng a se kopa fa a ne a rapela e ne e le gore leina la Modimo le itshepisiwe. Leina la ga Jehofa le tlhalosa sentle gore o botlhale, o maatla le gore o boitshepo. Nako nngwe fa Jesu a ne a rapela, o ne a re Jehofa ke “Rara yo o Boitshepo.” (Joh. 17:11) E re ka Jehofa a le boitshepo, melaometheo le melao yotlhe ya gagwe e boitshepo. Le fa go ntse jalo, kwa tshimong ya Edene, Satane o ne a ganetsa tshwanelo ya Modimo ya go beela batho melao. O ne a senya leina le le boitshepo la Modimo ka go bua maaka.—Gen. 3:1-5.

4. Jesu o ne a itshepisa leina la Modimo jang?

4 Jesu ene o ne a farologane le Satane ka gonne o ne a rata leina la ga Jehofa. (Joh. 17:25, 26) Jesu o ne a itshepisa leina la Modimo. (Bala Pesalema 40:8-10.) Botshelo jwa ga Jesu mo lefatsheng bo supa gore go siame e bile go a tshwanela gore Jehofa a kaele dibopiwa tsotlhe tsa gagwe. Tota le fa Satane a ile a dira gore Jesu a feleletse a sule loso lo lo setlhogo, Jesu o ne a nna a ikanyega mo go Rraagwe yo o kwa legodimong. Ka go ikanyega, o ne a supa gore motho yo o itekanetseng a ka kgona go ikobela melao ya Modimo.

5. Re ka itshepisa leina la Modimo jang?

5 Re ka bontsha jang gore re rata leina la ga Jehofa? Ka tsela e re itshwarang ka yone. Jehofa o batla gore re nne boitshepo. (Bala 1 Petere 1:15, 16.) Seo se raya gore re obamele Jehofa a le nosi le gore re mo obamele ka pelo yotlhe. Tota le fa re bogisiwa, re leka ka natla go tshela go dumalana le melao le melaometheo ya gagwe e e siameng. Fa re dira dilo tse di siameng, re a bo re dira gore lesedi la rona le phatsime mme seo se dira gore leina la ga Jehofa le galalediwe. (Math. 5:14-16) E re ka re le boitshepo, tsela e re tshelang ka yone e bontsha gore melao ya ga Jehofa e siame le gore ditatofatso tsa ga Satane ke maaka. Fa re dira diphoso, re ikwatlhaya go tswa pelong re bo re tlogela ditiro tse di tlontlololang Jehofa.—Pes. 79:9.

6. Ke eng fa Jehofa a kgona go re tsaya re le basiami le fa gone re sa itekanela?

6 Ka ntlha ya setlhabelo sa ga Keresete, Jehofa o itshwarela maleo a batho ba ba nang le tumelo. O amogela batho ba ba ineelang mo go ene gore ba nne baobamedi ba gagwe. Jehofa o bitsa Bakeresete ba ba tloditsweng a re ke barwa ba gagwe mme o bolela gore ba “dinku tse dingwe” ke ditsala tsa gagwe. (Joh. 10:16; Bar. 5:1, 2; Jak. 2:21-25) Ka jalo, le gone jaanong thekololo e re thusa gore re kgone go nna le kamano e e molemo le Rraarona le gore re itshepise leina la gagwe.

“A BOGOSI JWA GAGO BO TLE”

7. Thekololo e tla dira gore go nne le masego afe fa Bogosi Jwa Modimo bo busa?

7 Jesu o ne a kopa Modimo selo se sengwe gape mo thapelong ya gagwe: “A bogosi jwa gago bo tle.” Thekololo e amana jang le Bogosi Jwa Modimo? Thekololo e dira gore ba ba 144 000 ba kgone go ya go direla le Keresete kwa legodimong e le dikgosi le baperesiti. (Tshen. 5:9, 10; 14:1)  Jesu le ba le 144 000 ba tla etelela pele mo go direng gore batho ba ba kutlo ba amogele melemo ya thekololo dingwaga di le sekete. Lefatshe le tla nna paradaise e bile batho botlhe ba ba ikanyegang ba tla itekanela mme seo se tla dira gore batlhanka botlhe ba Modimo ba mo lefatsheng le kwa legodimong ba nne seoposengwe. (Tshen. 5:13; 20:6) Jesu o tla gataka noga mo tlhogong le go fedisa dilo tsotlhe tse di nnileng gone ka ntlha ya botsuolodi jwa ga Satane.—Gen. 3:15.

8. (a) Jesu o ile a thusa jang barutwa ba gagwe gore ba lemoge botlhokwa jwa Bogosi Jwa Modimo? (b) Re bontsha jang gore re ema nokeng Bogosi Jwa Modimo?

8 Fa Jesu a ne a le mo lefatsheng, o ne a thusa barutwa ba gagwe gore ba lemoge botlhokwa jwa Bogosi Jwa Modimo. E rile fela fa a sena go kolobediwa, o ne a itsise “dikgang tse di molemo tsa bogosi jwa Modimo” kwa mafelong a le mantsi. (Luke 4:43) Lekgetlo la bofelo fa a ne a bua le barutwa ba gagwe pele a ya legodimong, o ne a ba laela gore e nne basupi ba gagwe ‘go ya kwa dikarolong tse di kwa kgakalakgakala tsa lefatshe.’ (Dit. 1:6-8) Tiro ya go rera ka Bogosi e naya batho botlhe tshono ya go ithuta ka thekololo le go nna babusiwa ba Bogosi Jwa Modimo. Gone jaanong, re bontsha gore re ema nokeng Bogosi Jwa Modimo ka go thusa batlodiwa go rera dikgang tse di molemo tsa Bogosi mo lefatsheng lotlhe.—Math. 24:14; 25:40.

“A THATO YA GAGO E DIRAGALE”

9. Ke eng fa re ka tlhomamisega gore Jehofa o tla diragatsa boikaelelo jwa gagwe ka batho?

9 Jesu o ne a kaya eng fa a ne a re: “A thato ya gago e diragale”? Jehofa ke Mmopi. Fa a re o dira sengwe, se tla direga fela jaaka a batla. (Isa. 55:11) A ka se letlelele botsuolodi jwa ga Satane gore bo thibele boikaelelo jwa gagwe ka batho. Kwa tshimologong, Jehofa o ne a batla gore lefatshe le tlale ka bana ba ba itekanetseng ba ga Adame le Efa. (Gen. 1:28) Fa Adame le Efa ba ne ba ka swa ba se na bana, boikaelelo jwa Modimo jwa gore lefatshe le tlale ka ditlogolwana tsa bone bo ne bo se kitla bo direga. Mme fa ba sena go leofa, Jehofa o ne a ba letla gore ba nne le bana. Ka ntlha ya thekololo, Modimo o naya botlhe ba ba nang le tumelo tshono ya go tshelela ruri ba itekanetse. Jehofa o rata batho e bile o batla gore batho ba ba kutlo ba tshele jaaka a ne a ikaeletse.

10. Thekololo e tla solegela batho ba ba tlhokafetseng molemo jang?

10 Gotweng ka batho ba le bantsi ba ba tlhokafetseng ba sa itse Jehofa e bile ba ise ba ko ba mo direle? Thekololo e dira gore go nne le tsogo ya baswi. Rraarona yo o lorato o tla dira gore baswi ba tshele mme o tla ba naya tshono ya go ithuta ka boikaelelo jwa gagwe le gore ba tshelele ruri. (Dit. 24:15) Jehofa o batla gore batho ba tshele, e seng gore ba swe. E re ka e le Motswedi wa botshelo, o nna Rre wa batho ba a ba tsositseng mo baswing. (Pes. 36:9) Ka jalo, go a tshwanela go bo Jesu a ile a re ruta gore re rapele re re: “Rraarona yo o kwa magodimong.” (Math. 6:9) Jehofa o neile Jesu seabe sa botlhokwa sa go tsosa baswi. (Joh. 6:40, 44) Kwa Paradaiseng, Jesu o tla diragatsa seabe sa gagwe sa go nna “tsogo le botshelo.”—Joh. 11:25.

11. Boikaelelo jwa Modimo ka “boidiidi jo bogolo” ke eng?

11 Jehofa ga a bontshe fela batho ba ba rileng bopelonomi ka gonne Jesu o ne a re: “Le fa e le mang yo o dirang thato ya Modimo, yono ke morwarre le kgaitsadiake le  mmè.” (Mar. 3:35) Modimo o batla gore “boidiidi jo bogolo” jwa batho ba ditšhaba, ditso le dipuo e nne baobamedi ba gagwe. Batho ba ba dumelang mo thekololong ya ga Keresete le ba ba dirang thato ya Modimo, ba tla goa ba re: “Poloko re e neilwe ke Modimo wa rona, yo o ntseng mo setulong sa bogosi, le ke Kwana.”—Tshen. 7:9, 10.

12. Go ya ka thapelo ya ga Jesu, boikaelelo jwa Modimo ka batho ke eng?

12 Thapelo ya ga Jesu e bontsha gore boikaelelo jwa Modimo ka batho ba ba kutlo ke eng. Re bontsha gore re dira dilo go dumalana le thapelo eno ka go leka ka natla gore re itshepise leina la ga Jehofa le go le tsaya le le boitshepo. (Isa. 8:13) Setlhabelo sa ga Jesu sa thekololo se re tla bolokwang ka ntlha ya sone se dira gore leina la Modimo le galalediwe. Tota e bile, leina la ga Jesu le kaya gore “Jehofa ke Poloko.” Bogosi Jwa Modimo bo tla dira gore batho ba ba kutlo ba solegelwe molemo ke thekololo. Eleruri, thapelo ya ga Jesu e re tlhomamisetsa gore ga go sepe se se ka thibelang boikaelelo jwa Modimo go direga.—Pes. 135:6; Isa. 46:9, 10.

BONTSHA GORE O LEBOGELA THEKOLOLO

13. Fa re kolobediwa, re a bo re bontsha eng?

13 Tsela nngwe e re bontshang gore re lebogela thekololo, ke ka go ineela mo go Jehofa le ka go kolobediwa ka gonne re dumela mo setlhabelong sa thekololo. Fa re kolobediwa, re bontsha gore “re ba ga Jehofa.” (Bar. 14:8) Re bontsha gore re batla gore Modimo a re neye segakolodi se se molemo. (1 Pet. 3:21) Jehofa o re naya sone ka go dira gore re solegelwe molemo ke madi a a ntlafatsang a setlhabelo sa ga Keresete. Re tlhomamisegile gore o tla re  naya dilo tsotlhe tse a re solofeditseng tsone.—Bar. 8:32.

Re bontsha jang gore re lebogela thekololo? (Bona serapa 13 le 14)

14. Ke eng fa re laelwa gore re rate baagelani ba rona?

14 Re ka bontsha jang gape gore re lebogela thekololo? E re ka sengwe le sengwe se Jehofa a se dirang se tlhotlhelediwa ke go bo a re rata, o batla gore le rona re ratane. (1 Joh. 4:8-11) Fa re rata baagelani ba rona, re bontsha gore re batla go nna ‘bana ba ga Rraarona yo o kwa magodimong.’ (Math. 5:43-48) Ditaelo tse pedi tsa botlhokwa ke gore re rate baagelani ba rona le gore re rate Jehofa. (Math. 22:37-40) Tsela nngwe e re bontshang ka yone gore re rata baagelani ba rona, ke ka go ikobela taelo ya gore re bolelele batho dikgang tse di molemo tsa Bogosi Jwa Modimo. Fa re rata batho ba bangwe, re bontsha gore Modimo o a galalela. Tota e bile, fa re rata batho ba bangwe, segolobogolo bakaulengwe ba rona, lorato lwa Modimo “lo itekanedisiwa mo go rona.”—1 Joh. 4:12, 20.

THEKOLOLO E DIRA GORE JEHOFA A RE NEYE “DIPAKA TSE DI LAPOLOSANG”

15. (a) Jehofa o re naya masego afe gone jaanong? (b) Re tla bona masego afe mo isagweng?

15 Fa re bontsha tumelo mo setlhabelong sa ga Jesu, Jehofa o re itshwarela a gololesegile. Lefoko la Modimo le re tlhomamisetsa gore maleo a rona a ka kgona go ‘phimolwa.’ (Bala Ditiro 3:19-21.) Fela jaaka re ithutile pelenyana, Jehofa o dirisa thekololo gore a tseye batlhanka ba gagwe ba ba tloditsweng gore e nne bana ba gagwe. (Bar. 8:15-17) Rona ba re leng ba “dinku tse dingwe,” go ntse jaaka e kete Jehofa o kwala lekwalo le mo go lone a tlhalosang gore o batla gore re nne bana ba gagwe. Fa re sena go itekanela le go falola teko ya bofelo, Jehofa o tla itumelela go saena lekwalo leo, mme a re tseye gore re nne bana ba gagwe. (Bar. 8:20, 21; Tshen. 20:7-9) Jehofa o tla tswelela a rata bana ba gagwe ba ba tlhwatlhwakgolo go ya go ile. Melemo ya thekololo ke e e nnelang ruri. (Baheb. 9:12) Mpho eno ga e kitla e felelwa ke boleng. Ga go na sepe se se ka re amogang mpho eno.

16. Thekololo e re thusa jang gore re bone kgololesego ya mmatota?

16 Satane a ka se thibele batho ba ba ikwatlhayang gore mo isagweng ba nne karolo ya lelapa la Modimo. Jesu o ne a tla mo lefatsheng a bo a swa “gangwe [fela].” Ka jalo, thekololo e dueletswe ruri. (Baheb. 9:24-26) E phimola gotlhelele boleo jo re bo ruileng mo go Adame. Ruri setlhabelo sa ga Keresete se re thusitse ka gonne ga re tlhole re le makgoba a lefatshe leno le le laolwang ke Satane e bile ga re tlhole re boifa loso.—Baheb. 2:14, 15.

17. Lorato lwa ga Jehofa lo kaya eng mo go wena?

17 Ka metlha ditsholofetso tsa Modimo di a direga. Fela jaaka melao ya gagwe ya tlholego e tlhomame e bile e sa fetoge, Jehofa le ene ga a fetoge. (Mal. 3:6) Jehofa ga a re neye fela botshelo mme gape o re bontsha lorato. Baebele ya re: “Rona ka borona re a itse e bile re dumetse lorato lo Modimo a re ratang ka lone. Modimo ke lorato.” (1 Joh. 4:16) Lefatshe lotlhe le tla nna paradaise e ntle mme batho botlhe ba tla ratana jaaka Modimo a re ratile. Mme batlhanka ba gagwe botlhe ba kwa legodimong le ba mo lefatsheng ba tla re: “Pako le kgalalelo le botlhale le ditebogo le tlotlo le maatla le nonofo di nne tsa Modimo wa rona ka bosaengkae le go ya go ile. Amen.”—Tshen. 7:12.