Fetela kwa tshedimosetsong

Fetela go diteng

Jehofa o Duela ba ba Mmatlang ka Tlhoafalo

Jehofa o Duela ba ba Mmatlang ka Tlhoafalo

“Yo o atamelang Modimo o tshwanetse go dumela gore o gone le gore o nna moduedi wa ba ba mmatlang ka tlhoafalo.”—BAHEB. 11:6.

PINA: 85, 134

1, 2. (a) Lorato le tumelo di amana jang? (b) Re tlile go sekaseka dipotso dife?

RE RATA Jehofa “ka gonne a re ratile pele.” (1 Joh. 4:19) Tsela nngwe e Jehofa a bontshang batlhanka ba gagwe ba ba ikanyegang gore o a ba rata, ke ka go ba segofatsa. Fa re rata Modimo thata, tumelo ya rona e a nonofa. Mme ga re dumele fela gore o teng, go na le moo, re dumela gore o duela ba a ba ratang.—Bala Bahebera 11:6.

2 Go segofatsa batho go botlhokwa tota mo go Jehofa. Tumelo ya rona e tla bo e tlhaela fa re sa tlhatswega pelo gore Modimo o duela ba ba mmatlang ka tlhoafalo, ka gonne “tumelo ke go lebelela ka tlhomamisego dilo tse di solofetsweng.” (Baheb. 11:1) Eleruri tumelo e akaretsa go tlhomamisega gore Modimo o tla re segofatsa. Mme gone, fa re na le tsholofelo ya gore Modimo o tla re duela, seo se ka re solegela molemo jang? Jehofa o ne a segofatsa batlhanka ba gagwe jang mo nakong e e fetileng, mme o dira jalo jang gompieno? Mma re bone.

JEHOFA O TLA SEGOFATSA BATLHANKA BA GAGWE

3. Malaki 3:10 e re solofetsa eng?

3 Jehofa Modimo o iphile boikarabelo jwa go duela batlhanka ba  gagwe ba ba ikanyegang, ke ka moo a re kopang gore re dire ka natla gore a tle a re segofatse. Baebele ya re: “‘Ntekang, tsweetswee, . . . ’ go buile Jehofa wa masomosomo, ‘gore a ga nkitla ke lo bulela dikgoro tsa morwalela tsa magodimo ke bo ke lo tshololela lesego go fitlha lo sa tlhole lo tlhoka sepe.’” (Mal. 3:10) Re bontsha kanaanelo le tebogo fa re amogela kopo eno ya ga Jehofa e e bontshang bopelotshweu.

4. Ke eng fa re ka ikanya mafoko a ga Jesu a a mo go Mathaio 6:33?

4 Jesu o ne a tlhomamisetsa barutwa ba gagwe gore fa ba baya Bogosi kwa pele, Modimo o tla ba ema nokeng. (Bala Mathaio 6:33.) Jesu o ne a tlhatswegile pelo ka se a neng a se bua ka gonne Jehofa o ile a itshupa ka botlalo gore o a ikanyega. Jesu o ne a itse gore ka metlha Modimo o diragatsa se a se solofeditseng. (Isa. 55:11) Le rona re ka tlhomamisega gore fa re bontsha gore ruri re dumela mo go Jehofa, o tla diragatsa tsholofetso eno ya gagwe: “Ga ke na ke go tlogela ka gope le fa e le go go latlha ka gope.” (Baheb. 13:5) Mafoko ao a tsamaisana le se Jesu a neng a se bua malebana le go batla Bogosi pele le tshiamo ya Modimo.

Jesu o ne a bolelela barutwa ba gagwe gore ba tla segofadiwa ka gonne ba ile ba intsha setlhabelo (Bona serapa 5)

5. Ke eng fa mafoko a Jesu a neng a a raya Petere a kgothatsa?

5 Nako nngwe moaposetoloi Petere o ne a botsa Jesu jaana: “Re tlogetse dilo tsotlhe ra go sala morago; tota re tla bona eng?” (Math. 19:27) Jesu ga a ka a kgala Petere, go na le moo, o ne a bolelela barutwa ba gagwe gore ba tla segofadiwa ka gonne ba ile ba intsha setlhabelo. Baaposetoloi ba ba ikanyegang le ba bangwe ba tla busa le Jesu kwa legodimong. Tota le gone jaanong ba a segofadiwa. Jesu o ne a re: “Mongwe le mongwe yo o tlogetseng matlo kgotsa bomorwarraagwe kgotsa  bomorwadiarraagwe kgotsa rraagwe kgotsa mmaagwe kgotsa bana kgotsa masimo ka ntlha ya leina la me o tla amogela go menagane gantsi e bile o tla rua botshelo jo bo sa khutleng.” (Math. 19:29) Barutwa ba gagwe ba ne ba tla segofadiwa ka dilo di le dintsi thata go feta tse ba di tlogetseng. Borre, bommè, bomorwarre, bomorwadiarre le bana ba re nang le bone mo phuthegong, ba botoka thata go gaisa sepe fela se re se tlogetseng gore re kgone go direla Modimo.

“TSHETLEDI YA MOYA”

6. Ke eng fa Jehofa a solofetsa baobamedi ba gagwe gore o tla ba duela?

6 E re ka Jehofa a solofetsa baobamedi ba gagwe gore o tla ba duela, seno se ba thusa gore ba nne ba ikanyega fa ba lebane le diteko. Le fa gone batlhanka ba ba ikanyegang ba ga Jehofa Modimo ba itumelela masego gone jaanong, gape ba lebile pele go amogela masego a magolo le go feta mo isagweng. (1 Tim. 4:8) Eleruri fa re tlhomamisegile gore Jehofa “o nna moduedi wa ba ba mmatlang ka tlhoafalo,” tumelo ya rona e tla nonofa.—Baheb. 11:6.

7. Tsholofelo ya rona ke tshetledi ka tsela efe?

7 Mo therong ya kwa thabeng, Jesu o ne a re: “Ipeleng lo bo lo tlolake ka boipelo, e re ka maduo a lona a le magolo kwa magodimong; gonne ba ne ba bogisa baporofeti pele ga lona ka tsela eo.” (Math. 5:12) Ba ba nang le tsholofelo ya go tshelela ruri mo lefatsheng la Paradaise le bone ba na le lebaka la go ‘ipela le go tlolaka ka boipelo.’ (Pes. 37:11; Luke 18:30) Go sa kgathalesege gore a re na le tsholofelo ya go tshela kwa legodimong kgotsa mo lefatsheng, tsholofelo ya rona e ka nna “tshetledi ya moya, e e tlhomamisegang e bile e nitame.” (Baheb. 6:17-20) Fela jaaka tshetledi e thusa sekepe gore se se ka sa tsewa ke difefo, tsholofelo e re nang le yone ya gore Modimo o tla re duela, e ka re thusa gore re nne re tsepame mo maikutlong le gore kamano ya rona le Modimo e nne e nonofile. E ka re thusa gore re nne le nonofo ya go itshokela mathata.

8. Tsholofelo e ka re thusa jang go lepalepana le tlhobaelo?

8 Tsholofelo e re nang le yone e e theilweng mo Baebeleng e ka re thusa go lepalepana le dilo tse di re tlhobaetsang gone jaanong. Ditsholofetso tsa Modimo di tshwana le setlolo se se re okobatsang fa re tshwenyegile. Ruri go a gomotsa go ‘latlhela mekgweleo ya rona mo go Jehofa’ re itse gore ‘o tla re tshegetsa.’ (Pes. 55:22) Re ka tlhomamisega gore Modimo a ka dira “se se fetang thata dilo tsotlhe tse re di kopang kgotsa re di bopang mo mogopolong.” (Baef. 3:20) Akanya fela, Modimo a ka kgona go dira “se se fetang thata” dilo tsotlhe tse re di kopang!

9. Ke eng fa re ka tlhomamisega gore Jehofa o tla re segofatsa?

9 Fa re batla gore Jehofa a re segofatse, re tshwanetse go nna le tumelo le go ikobela melao ya gagwe. Moshe o ne a raya setšhaba sa Iseraele a re: “Ruri Jehofa o tla go segofatsa mo lefatsheng le Jehofa Modimo wa gago a le go nayang go nna boswa gore o le rue, fa fela e le gore ruri o tla reetsa lentswe la ga Jehofa Modimo wa gago gore o nne kelotlhoko go dira taelo eno yotlhe e ke e go laelang gompieno. Gonne ruri Jehofa Modimo wa gago o tla go segofatsa fela jaaka a go solofeditse.” (Dute. 15:4-6) A o tlhomamisegile gore Jehofa o tla go segofatsa fa o tswelela o mo direla ka boikanyegi? Ruri o na le mabaka a a utlwalang a go ikutlwa jalo!

JEHOFA O NE A BA SEGOFATSA

10, 11. Jehofa o ne a segofatsa Josefa jang?

10 Baebele e ne ya kwalwa gore re solegelwe molemo. E na le dipego di le dintsi tse di bontshang kafa Jehofa a ileng a segofatsa batlhanka ba gagwe ka gone. (Bar. 15:4) Mongwe wa bone ke Josefa. Bomorwarraagwe ba ne ba mo logela leano mme moragonyana  mosadi wa mong wa gagwe o ne a mo latofatsa ka maaka, ka jalo, o ne a feleletsa a le mo kgolegelong ya kwa Egepeto. A seno se raya gore Modimo o ne a sa tlhole a mo amogela? Le e seng! Baebele ya re: “Jehofa a nna le Josefa a bo a nna a mmontsha bopelonomi jwa lorato . . . Jehofa o ne a na le Josefa mme Jehofa o ne a dira gore se a neng a se dira se atlege.” (Gen. 39:21-23) Le fa go ne go le thata, Josefa o ne a nna a letile Modimo wa gagwe ka bopelotelele.

11 Moragonyana, Faro o ne a golola Josefa mo kgolegelong mme a mo tlhoma go nna molaodi wa bobedi mo Egepeto. (Gen. 41:1, 37-43) Fa mosadi wa gagwe a tshola bana ba babedi ba basimane, “Josefa a raya leitibolo leina a re Manase, ka gonne, go mo nopola, ‘Modimo o dirile gore ke lebale matshwenyego a me otlhe le ntlo yotlhe ya ga rre.’ Mme a raya wa bobedi leina a re Eferaime, ka gonne, go mo nopola, ‘Modimo o dirile gore ke ungwe mo lefatsheng la patikego ya me.’” (Gen. 41:51, 52) E re ka Josefa a ile a nna a ikanyega, Modimo o ne a mo segofatsa ka go mo naya tshiamelo ya go boloka matshelo a Baiseraele le Baegepeto. Ntlha ke gore, Josefa o ne a lemoga gore Jehofa ke ene a neng a mo duela le go mo segofatsa.—Gen. 45:5-9.

12. Ke eng se se neng sa thusa Jesu go nna a ikanyega fa a ne a lekwa?

12 Jesu le ene o ne a nna a ikanyega mo Modimong le fa a ne a lebane le diteko, mme o ne a segofadiwa. Ke eng se se neng sa mo thusa go itshoka? Lefoko la Modimo le a re: “Ka ntlha ya boipelo jo bo neng bo tlhomilwe fa pele ga gagwe o ne a itshokela kota ya tlhokofatso, a nyatsa ditlhong.” (Baheb. 12:2) Jesu o ne a itumelela go itshepisa leina la Modimo. Mo godimo ga moo, Rraagwe o ne a mo amogela le go mo naya ditshiamelo di le dintsi tse di molemo. Baebele ya re “o ntse kafa seatleng sa moja sa setulo sa bogosi sa Modimo.” Mme pego e nngwe ya Baebele ya re: “Modimo o ne a mo godisetsa kwa boemong jo bo kwa godimo mme ka bopelonomi a mo naya leina le le kwa godimo ga leina lengwe le lengwe le sele.”—Bafil. 2:9.

JEHOFA GA A LEBALE DITIRO TSA RONA

13, 14. Jehofa o ikutlwa jang ka dilo tse re mo direlang tsone?

13 Re ka tlhomamisega gore Jehofa o anaanela maiteko a re a dirang go mo direla. O a itse gore ka dinako dingwe re a tle re ikutlwe e kete ga re mo direle mo go lekaneng. O re utlwela botlhoko fa re imelwa ke dikoloto kgotsa fa bolwetse bo dira gore re se ka ra kgona go mo direla ka botlalo. Mo godimo ga moo, re ka tlhomamisega gore Jehofa o lemoga sotlhe se re se dirang gore re tswelele re ikanyega mo go ene.—Bala Bahebera 6:10, 11.

14 Gape gopola gore re ka rapela “Moutlwi wa thapelo” re tlhomamisegile gore o tla re reetsa fa re mmolelela dilo tse di re tshwenyang. (Pes. 65:2) “Rara wa mautlwelobotlhoko a manana le Modimo wa kgomotso yotlhe” a ka dirisa bakaulengwe le bokgaitsadi ba rona go re tshegetsa le go re thusa gore re nne le kamano e e molemo le ene. (2 Bakor. 1:3) Jehofa o a itumela fa re bontsha ba bangwe kutlwelobotlhoko. Baebele ya re: “Yo o utlwelang motho wa maemo a a kwa tlase botlhoko o adima Jehofa, mme o tla duela tsela e a neng a mo tshwere ka yone.” (Dia. 19:17; Math. 6:3, 4) Ka jalo, fa re thusa ba bangwe fa ba na le mathata, Jehofa o leba molemo o re o dirileng e le sekoloto se a tshwanetseng go se duela. Mme o solofetsa gore o tla re duela fa re dira jalo.

TUELO YA GONE JAANONG LE YA GO YA GO ILE

15. O lebile pele go amogela tuelo efe? (Bona setshwantsho se se simololang setlhogo.)

15 Batlodiwa ba na le tsholofelo ya go amogela ‘serwalo sa tshiamo, se Morena, moatlhodi yo o siameng, a tla se ba nayang e le maduo mo letsatsing leo.’ Tsholofelo eno e  ba thusa go itshokela diteko. (2 Tim. 4:7, 8) Mme gone, seno ga se reye gore ga o botlhokwa mo Modimong fa o se na tsholofelo eno. “Dinku tse dingwe” tsa ga Jesu di lebile pele go amogela tuelo ya botshelo jo bo sa khutleng mo lefatsheng la paradaise. Mo lefatsheng leo, “ba tla nna le boitumelo jo bogolo mo letlotlong la kagiso.”—Joh. 10:16; Pes. 37:11.

16. 1 Johane 3:19, 20 e na le mafoko afe a kgomotso?

16 Ka dinako dingwe, re ka nna ra akanya gore ga re dire go tlala seatla kgotsa re ka nna ra ipotsa gore a Jehofa o itumelela maiteko a rona. Re ka nna ra tsaya gore ga re tshwanelwe ke go newa tuelo epe. Le fa go ntse jalo, a re se ka ra lebala gore, “Modimo o mogolo go feta dipelo tsa rona e bile o itse dilo tsotlhe.” (Bala 1 Johane 3:19, 20.) O re segofaletsa tirelo epe fela e re mo direlang yone, le fa e ka tswa e le nnye go le kana kang, fa fela re mo direla ka pelo yotlhe, o tla re segofatsa.—Mar. 12:41-44.

17. Jehofa o re segofatsa jang gone jaanong?

17 Tota le mo metlheng eno ya bofelo ya tsamaiso e e boikepo ya ga Satane, Jehofa o sa ntse a segofatsa batho ba gagwe. O tlhomamisa gore baobamedi ba boammaaruri ba itumelela go nna mo phuthegong ya gagwe, e e nang le kagiso e e seng kana ka sepe. (Isa. 54:13) Fela jaaka Jesu a solofeditse, gone jaanong Jehofa o re duela ka go re letla gore re nne karolo ya lelapa le le leng gone lefatshe lotlhe la bakaulengwe le bokgaitsadi ba ba ratanang. (Mar. 10:29, 30) Mo godimo ga moo, ba ba batlang Modimo ka tlhoafalo, ba segofadiwa ka kagiso ya mogopolo, kgotsofalo le boitumelo.—Bafil. 4:4-7.

18, 19. Batlhanka ba ga Jehofa ba ikutlwa jang ka tuelo e a ba nayang yone?

18 Batlhanka ba ga Jehofa mo lefatsheng lotlhe ba bone tsela e a ba segofatsang ka yone. Ka sekai, Bianca wa kwa Jeremane a re: “Ke leboga Jehofa fela thata ka gonne o nthusa ka mathata a me e bile o nkema nokeng letsatsi le letsatsi. Lefatshe le tlhakatlhakane e bile le nnela maswe go ya pele. Mme fa ke ntse ke dirisana le Jehofa, ke ikutlwa ke sireletsegile. Fa ke intsha setlhabelo mo tirelong ya gagwe, o ntshegofatsa thata go feta ka moo nna ke dirileng ka gone.”

19 Gape akanya ka Paula wa dingwaga di le 70 wa kwa Canada, yo o tshwerweng ke bolwetse jo bo botlhoko jwa mokwatla jo bo dirang gore go nne thata gore a kgone go tsamaya. A re: “Go palelwa ke go tsamaya ga go reye gore o ka palelwa ke go rera. Ke leka mefuta e mengwe ya go rera jaaka go rera ka founo le go rerela batho ba ke kopanang le bone. Ke na le buka e mo go yone ke kwalang ditemana le dintlha dingwe tse di tswang mo dikgatisong tsa rona, mme ke e bala nako le nako gore ke se ka ka kgobega marapo. Ke e bitsa ‘Buka Ya me Ya Boitshoko.’ Fa re tlhoma mogopolo mo ditsholofetsong tsa ga Jehofa, go kgobega marapo e tla nna selo sa nakwana fela. Ka metlha Jehofa o a re thusa le fa re ka tswa re le mo maemong a a ntseng jang.” O ka tswa o lebane le maemo a a farologaneng le a ga Bianca kgotsa a ga Paula. Le fa go ntse jalo, o ka tswa o gopola ditsela dingwe tse Jehofa a go segofaditseng kgotsa a segofaditseng bangwe ba o ba itseng ka tsone. Go molemo go akanya kafa Jehofa a go segofatsang ka gone, le kafa a tla go segofatsang ka gone mo isagweng.

20. Fa re direla Jehofa ka pelo yotlhe, re tla amogela eng?

20 Le ka motlha o se ka wa lebala gore fa o rapela Modimo ka tlhoafalo, o tla go ‘naya maduo a magolo.’ O ka tlhomamisega gore ‘fa o sena go dira thato ya Modimo, o tla amogela go diragadiwa ga tsholofetso.’ (Baheb. 10:35, 36) Ka jalo, a re nneng re nonotsha tumelo ya rona le go direla Jehofa ka pelo yotlhe. Fa re dira seno, re a itse gore Jehofa o tla re duela ka nako e e tshwanetseng.—Bala Bakolosa 3:23, 24.