Fetela kwa tshedimosetsong

Fetela go diteng

 SETLHOGO SA KA FA NTLE | A GO NA LE BAENGELE? GORENG O TSHWANETSE GO ITSE?

Kafa Baengele Ba ka Go Thusang ka Gone

Kafa Baengele Ba ka Go Thusang ka Gone

Baengele ba ba ikanyegang ba rata go thusa batho e bile ba itumelela go dira thato ya ga Jehofa. Fa Modimo a bopa lefatshe, baengele ba ne ba “goa mmogo ka boipelo, le bomorwa Modimo botlhe ba ne ba simolola go goa ba baka.” (Jobe 38:4, 7) Baengele ga ba bolo go eletsa go “tlhodumela” boporofeti jo bo buang ka se se tla diregang mo lefatsheng mo nakong e e tlang.—1 Petere 1:11, 12.

Baebele e bontsha gore ka dinako dingwe baengele ba ne ba sireletsa baobamedi ba boammaaruri gore ba kgone go dira thato ya Modimo. (Pesalema 34:7) Ka sekai:

  • Fa Jehofa a senya motse o o bosula wa Sodoma le Gomora, baengele ba ne ba thusa Lote yo o ikanyegang le lelapa la gagwe go tshaba.—Genesise 19:1, 15-26.

  • Bogologolo kwa Babelona fa makau a mararo a Bahebera a ne a latlhelwa mo leubelong la molelo gore a swe, Modimo o ne a romela moengele wa gagwe mme a golola batlhanka bao ba gagwe.—Daniele 3:19-28.

  • Fa Daniele a sena go fetsa bosigo a latlhetswe mo khuting ya ditau, o ne a tlhalosa gore ga a ka a swa ka gonne Modimo “o ne a romela moengele wa gagwe mme a tswala molomo wa ditau.”—Daniele 6:16, 22.

Baengele ga ba bolo go nna ba thusa batho ba ba ikanyegang

BAENGELE BA NE BA THUSA PHUTHEGO YA BOKERESETE YA BOGOLOGOLO

Ka dinako dingwe baengele ba Modimo ba ne ba thusa phuthego ya Bokeresete ya bogologolo go diragatsa thato ya ga Jehofa. Ka sekai:

  • Moengele o ne a bula dikgoro tsa kgolegelo mme a raya baaposetoloi ba ba neng ba tswaletse gore ba ye go tswelela ba rera mo tempeleng.—Ditiro 5:17-21.

  • Moengele o ne a laela moreri yo o bidiwang Filipo go ya kwa tseleng ya sekaka e e neng e tswa kwa Jerusalema e ya Gasa gore a ye go rerela Moethiopia mongwe yo o neng a ile go obamela kwa Jerusalema.—Ditiro 8:26-33.

  • Ka nako ya fa Modimo a ne a letla batho ba e seng Bajuda go nna Bakeresete, moengele o ne a bonala kwa modiredimogolong wa masole a Roma e bong Korenelio a bo a mo raya a re a laletse moaposetoloi Petere kwa legaeng la gagwe.—Ditiro 10:3-5.

  • Fa moaposetoloi Petere a ne a tswaletswe mo kgolegelong, moengele o ne a bonala kwa go ene a bo a mo ntsha mo kgolegelong.—Ditiro 12:1-11.

KAFA BAENGELE BA KA GO THUSANG KA GONE

Gompieno ga go na bosupi jo bo bontshang gore Modimo o dirisa baengele go thusa batho ka  kgakgamatso jaaka mo Baebeleng. Le fa go ntse jalo, Jesu o ne a bua jaana: “Dikgang tse di molemo tseno tsa bogosi di tla rerwa mo lefatsheng lotlhe le le nang le banni gore e nne bosupi mo ditšhabeng tsotlhe; mme go tswa foo bokhutlo bo tla tla.” (Mathaio 24:14) A o ne o itse gore barutwa ba ga Keresete ba dira tiro eno ba kaelwa ke baengele?

Baengele ba thusa batho go rera dikgang tse di molemo mo lefatsheng lotlhe

Buka ya Baebele ya Tshenolo e bontsha gore baengele ba tshwaregile ka go thusa batho mo lefatsheng lotlhe go ithuta ka Jehofa Modimo le ka boikaelelo jwa gagwe ka batho. Moaposetoloi Johane o ne a kwala jaana: “Ka bona moengele yo mongwe a fofa mo gare ga legodimo, o ne a tshotse dikgang tse di molemo tsa bosakhutleng go di bolela e le mafoko a a itumedisang mo go ba ba nnang mo lefatsheng, le mo setšhabeng sengwe le sengwe le lotso le teme le batho, a bua ka lentswe le le kwa godimo a re: ‘Boifang Modimo lo bo lo mo neye kgalalelo, ka gonne nako ya gagwe ya go atlhola e gorogile, mme jalo obamelang Ene yo o dirileng legodimo le lefatshe le lewatle le metswedi ya metsi.’” (Tshenolo 14:6, 7) Gompieno go na le maitemogelo a batho ba le bantsi a a bontshang gore baengele ba tshegetsa tiro ya go rera e e dirwang mo lefatsheng lotlhe. Tota le fa moleofi a ikwatlhaya a bo a direla Jehofa gape, “go tsoga boipelo mo baengeleng ba Modimo.”—Luke 15:10.

Go tla diregang fa tiro ya go rera e weditswe? ‘Masomo a a kwa legodimong’ a baengele a tla bo a na le Jesu Keresete e leng Kgosi ya dikgosi, fa a ya “ntweng ya letsatsi le legolo la Modimo Mothatayotlhe” kwa lefelong le le bidiwang Haramagedona. (Tshenolo 16:14-16; 19:14-16) Baengele ba ba maatla ba tla diragatsa katlholo ya Modimo fa Morena Jesu a “tlisa pusoloso mo go . . . ba ba sa reetseng dikgang tse di molemo kaga Morena wa rona Jesu.”—2 Bathesalonika 1:7, 8.

Ka jalo, tlhomamisega gore baengele ba batla go go thusa. Ba kgatlhegela batho ba ba batlang go direla Modimo e bile Jehofa o ba dirisitse makgetlo a mantsi go nonotsha le go sireletsa batlhanka ba gagwe ba ba ikanyegang mo lefatsheng.—Bahebera 1:14.

Ka jalo, mongwe le mongwe wa rona o tshwanetse go dira tshwetso e e botlhokwa. A re tla reetsa le go ikobela dikgang tse di molemo tse di rerwang mo lefatsheng lotlhe? Basupi ba ga Jehofa ba ba mo lefelong la lona ba tla itumelela go go thusa gore o bone thuso ya baengele ba ba maatla ba Modimo.