Fetela kwa tshedimosetsong

Fetela go diteng

Batho ba le bantsi ba dikereke tse di farologaneng ba dumela gore moya wa motho ga o swe

 SETLHOGO SA KA FA NTLE | BAEBELE YA RENG KA BOTSHELO LE LOSO?

Kgang ya Moruthutha

Kgang ya Moruthutha

BATHO ba na le dikgopolo tse dintsi tse di farologaneng ka botshelo le loso. Bangwe ba akanya gore fa ba sena go swa, ba ya go tshela kwa lefelong lengwe kgotsa ka sebopego se sengwe. Ba bangwe ba akanya gore ba tla tsholwa gape ba bo ba tshela golo gongwe. Mme ba bangwe bone ba akanya gore fa motho a sule ga go na sepe se se diregang.

Setso sa gago kgotsa tsela e o godisitsweng ka yone e ka tswa e dirile gore o dumele se se farologaneng ka kgang eno. E re ka go na le dikgopolo tse dintsi tsa gore go diragalang fa motho a swa, a go na le mongwe kgotsa golo gongwe kwa re ka bonang dikarabo tse re ka di ikanyang e bile di le boammaaruri ka kgang eno?

Go fetile dingwaga di le dintsi dikereke di ruta batho gore moya wa motho ga o swe. Batho ba le bantsi ba dikereke tse di farologaneng—Bakeresete, Bahindu, Bajuda, Bamoseleme le ba bangwe—ba dumela gore moya ga o swe, ba re o ya go tshela kwa lefelong lengwe la moya fa motho a sena go swa. Mme Babuda bone ba dumela gore fa motho a nna a tsalwa gape, maatla a gagwe a go akanya kgotsa a mogopolo a kgona go fitlha mo seemong se se bidiwang Nivarna, se moya wa gagwe o nnang o itumetse ka dinako tsotlhe mo go sone.

Dithuto tseo di dirile gore batho ba le bantsi ba dumele gore fa motho a swa o ya go tshela gape kwa lefelong le lengwe. Seo se dirile gore batho ba le bantsi ba akanye gore loso ke karolo e e botlhokwa mo botshelong le gore ke thato ya Modimo. Mme gone Baebele ya reng ka kgang eno? Tsweetswee bala ditlhogo tse di latelang. Se Baebele e se buang se ka go gakgamatsa.