Fetela kwa tshedimosetsong

Fetela go diteng

Ke Mang Yo o Re Bogisang?

Ke Mang Yo o Re Bogisang?

Fa e le gore Modimo ga se ene a re bogisang, jaanong ke mang yo o bakang tlhaelo ya dijo, lehuma le le sa feleng, dintwa tse di setlhogo, malwetse a leroborobo le masetlapelo a dilo tsa tlholego? Lefoko la Modimo e leng Baebele le bua ka dilo tse tharo tse di dirang gore batho ba boge:

  1. Bopelotshetlha le Letlhoo. ‘Motho o laola motho yo mongwe go mo utlwisa botlhoko.’ (Moreri 8:9) Gantsi batho ba ba pelotshetlha le ba ba pelo e e maswe ke bone ba ba bogisang batho ba bangwe.

  2. Nako le Tiragalo E e Sa Lebelelwang. Gantsi batho ba welwa ke masetlapelo ka gonne “ba diragalelwa ke motlha le tiragalo e e sa bonelwang pele.” (Moreri 9:11) Seno se raya gore motho a ka iphitlhela a le mo lefelong le le sa siamang ka nako e e sa tshwanelang kgotsa gore mongwe a ka baka kotsi ka phoso kgotsa ka go sa nne kelotlhoko.

  3. Mmusi yo o Bosula wa Lefatshe. Baebele e tlhalosa lebaka la konokono le le dirang gore batho ba boge. Ya re: “Lefatshe lotlhe le namaletse mo maatleng a yo o boikepo.” (1 Johane 5:19) “Yo o boikepo” yo go buiwang ka ene fano ke moengele yo o maatla e bong Satane Diabolo yo kwa tshimologong e neng e le moengele yo o siameng yo o ileng a se ka a “a itsetsepela mo boammaaruring.” (Johane 8:44) Go na le baengele ba bangwe ba ba ileng ba etsa Satane mme ba tlhanogela Modimo e bo e nna madimona. (Genesise 6:1-5) Fa e sa le Satane le madimona a gagwe ba tlhanogela Modimo, ba ntse ba tlhotlheletsa batho go dira dilo tse di sa siamang. Le gompieno ba sa ntse ba dira jalo. Gone jaanong Diabolo o galefile thata e bile ‘o tsietsa lefatshe lotlhe’ mme seo se dirile gore lefatshe le hutsege. (Tshenolo 12:9, 12) Ruri Satane ke mmusi yo o setlhogo. O itumelela go bona batho ba boga. Ka jalo, Satane ke ene a dirang gore batho ba boge, e seng Modimo.

AKANYA KA SENO: Satane Diabolo ke ene fela a ka dirang gore batho ba ba siameng ba boge ka gonne o setlhogo. Mme Baebele ya re: “Modimo ke lorato.” (1 Johane 4:8) Ka jalo, “a go nne kgakala le Modimo wa boammaaruri go dira ka boikepo, le Mothatayotlhe go dira ka tshiamololo!”—Jobe 34:10.

Mme gone re ka ipotsa gore, ‘Modimo Mothatayotlhe o tla letlelela Satane ka lobaka lo lo kae gore a tswelele a dira dilo tse di bosula thata jaana?’ Re ithutile gore Modimo o tlhoile dilo tse di bosula e bile o utlwa botlhoko fa a re bona re boga. Gape Baebele ya re: “Latlhela tlhobaelo yotlhe ya lona mo go ene, ka gonne o a lo kgathalela.” (1 Petere 5:7) Modimo o tlile go fedisa dilo tsotlhe tse di bosula ka gonne o a re rata e bile o na le maatla a go dira jalo. Tsebe e e latelang e tlhalosa gore o tla dira seo jang. *

^ ser. 7 Fa o batla go itse gore goreng Modimo a letleletse gore batho ba boge, bala kgaolo 11 ya buka ya Baebele e re Ruta Eng? e e gatisitsweng ke Basupi ba ga Jehofa e bile e le gone mo www.jw.org/tn.