Fetela kwa tshedimosetsong

Fetela go diteng

1 E re Thusa go Tila Mathata

1 E re Thusa go Tila Mathata

Baebele ya re kgakololo ya yone e tlhotlheleditswe e bile e “tswela mosola mo go ruteng, mo go kgalemeleng, mo go tlhamalatseng dilo.” (2 Timotheo 3:16) A seo se boammaaruri? Bona gore botlhale jwa Baebele bo thusitse batho bangwe jang go tila mathata a a boima a botshelo pele ba nwelelela mo go one.

GO NWA BOJALWA THATA

Delphine yo go builweng ka ene mo setlhogong se se fetileng a re go tlhobaela go ne go dira gore a batle go nwa bojalwa thata. Baebele ga e re go phoso go nwa bojalwa, mme ya re: “O se ka wa nna mo gare ga ba ba nwang beine bobe.” (Diane 23:20) Go nwa bojalwa go feta selekanyo go baka mathata a a masisi a botsogo, go senya botsala e bile go baka dintsho tse dintsi ngwaga le ngwaga. Batho ba ne ba ka kgona go tila bontsi jwa dilo tseno fa ba ka bo ba ikobela kgakololo ya Baebele e e botlhokwa.

Delphine o ne a dira jalo. A re: “Ke ne ka lemoga gore bojalwa bo ne bo sa rarabolole mathata a me. Ke ne ka dirisa kgakololo e e mo go Bafilipi 4:6, 7 e e reng: ‘Lo se ka lwa tlhobaela ka sepe, mme . . . a dikopo tsa lona di itsisiwe Modimo.’ Maitseboa mangwe le mangwe fa ke utlwa ke tlelwa ke dikakanyo tse dintsi e bile ke simolola go tlhobaela, ke ne ke bolelela Jehofa. Ke ne ka mmolelela ka maikutlo a me otlhe go akaretsa le go galefa, go utlwa botlhoko le go kgobega marapo e bile ke mo kopa gore a nthuse go nna le boikutlo jo bo siameng. Ke ne ke tlhomamisa gore mo mosong ga ke tlhole ke ikutlwa jalo. Go itlwaetsa go rapela Jehofa go ne go nthusa gore ke tlhome mogopolo mo go se ke nang le sone, e seng se ke se nang sone. Ke ne ka tlogela go nwa bojalwa. E re ka ke ne ke bone kagiso ya mmatota, ke ne ke sa batle e ntatlhegela.”

 BOITSHOLO JO BO SA SIAMANG

Boitsholo jo bo sa siamang bo baka kutlobotlhoko le mahutsana. Mme Baebele e ka re thusa go tila mathata ao ka gonne e bua ka dilo tse di ka dirang gore re wele mo mathateng ao tse di jaaka go tshameka ka maikutlo le go leba ditshwantsho tsa tlhakanelodikobo. Lekawana lengwe le le bidiwang Samuel la re: “Go ne go le motlhofo go itira e kete ke rata motho yo mongwe. Ka dinako tse dingwe ke ne ke sa kgatlhegele motho yoo mme ke ne ke kgona go lemoga gore o a nthata, seo se bo se dira gore ke itumelele go tshameka jalo.” Samuel o ne a lemoga gore o ne a latofadiwa ka go tshameka ka maikutlo a ba bangwe le fa a ne a sa dire jalo, mme seo se ne sa dira gore a tshameke ka maikutlo ka boomo. Mme seo se ne se mo tshwenya. A re: “Go ne go le kotsi ka gonne go dira gore motho a ikakanyetse a le nosi.”

Samuel o ne a bala setlhogo sengwe sa basha mo website ya jw.org. Gape o ne a akanya ka Diane 20:11 e e reng: “Mosimane o dira gore a lemogiwe ka ditiro tsa gagwe gore a tiro ya gagwe e itshekile e bile e thokgame.” Seo se ne sa mo thusa jang? O ne a lemoga gore go tshameka ka maikutlo ga go a siama. A re: “Gape ke ne ka ithuta gore mosha yo o tshamekang ka maikutlo o nna le mekgwa e e dirang gore a nne molekane wa lenyalo yo o sa siamang. Ke ne ka simolola go ipotsa gore mosadi yo ke tla mo nyalang o tla ikutlwa jang fa a mpona ke tshameka ka maikutlo a mosadi yo mongwe. Seo se ne sa dira gore ke lemoge gore mokgwa oo o kotsi. Le fa go le motlhofo go dira jalo, ga go reye gore go siame.” Samuel o ne a fetoga. Go tila go tshameka ka maikutlo go mo thusitse go tila boitsholo jo bo sa siamang jwa tlhakanelodikobo.

Antonio o ne a le mo kotsing e e kgolo ya boitsholo jo bo sa siamang: O ne a rata go leba ditshwantsho tsa tlhakanelodikobo. Le fa a nyetse mosadi yo a mo ratang thata, o ne a tlwaela go leba ditshwantsho tseo. A re go akanya ka 1 Petere 5:8 go mo thusitse thata. Ya re: “Nnang lo thantse mo ditlhaloganyong, disang. Mmaba wa lona, Diabolo, o tsamayatsamaya jaaka tau e e kurutlang, e e batlang go kometsa mongwe.” Antonio a re: “Re dikologilwe ke ditshwantsho tsa tlhakanelodikobo e bile go ka nna thata gore di tswe mo mogopolong. Temana eo e ne ya nthusa go akanya ka gore ke mang yo o re raelang ka ditshwantsho tseo. Ke ne ka itlwaetsa go gakologelwa ka bonako gore ditshwantsho tseo ke tsa ga Diabolo. Jaanong ke a itse gore ke Jehofa fela a ka nthusang go ‘nna ke thantse mo tlhaloganyong le go nna ke disitse’ gore ke kgone go lwa le dikakanyo tseo mo mogopolong wa me, mo pelong le gore di se ka tsa senya lenyalo la me.” Antonio o ne a bona thuso e bile o ne a kgona go tlogela mokgwa oo o o sa siamang. Tota e bile, seo se ne sa mo thusa go tila mathata a magolo.

Ruri Baebele e re naya kgakololo e e botlhokwa e e ka re thusang go tila mathata. A e ka re thusa go lebana le mathata a a setseng a le gone e bile a sa fele? A re bone gore Lefoko la Modimo le ka re thusa jang go rarabolola mathata a a ntseng jalo.

Kgakololo e e botlhokwa ya Baebele e ka re thusa go tila mathata mangwe