Fetela kwa tshedimosetsong

Fetela go diteng

 SETLHOGO SA KA FA NTLE | DITSELA TSA GO ITUMELELA GO BALA BAEBELE

Lebaka la go Bala Baebele

Lebaka la go Bala Baebele

“Ke ne ke akanya gore go thata go tlhaloganya Baebele.”—Jovy

“Ke ne ke akanya gore e a lapisa.”—Queennie

“Fa ke bona tsela e Baebele e leng kima ka yone, ke ne ka felelwa ke keletso ya go e bala.”—Ezekiel

A o kile wa akanyetsa go bala Baebele mme o bo o itlhoboga ka gonne o ikutlwa jaaka batho ba ba fa godimo? Batho ba le bantsi ba fitlhela go kgoba marapo go bala Baebele. Mme o tla dira eng fa o lemoga gore Baebele e ka go thusa go itumela le go kgotsofala mo botshelong? O tla dira eng fa o lemoga gore go na le mekgwa mengwe e o ka e dirisang gore o itumelele go e bala? A o ka rata go bona se o ka ithuta sone mo Baebeleng?

Ela tlhoko se se buiwang ke batho ba ba ileng ba itumela fa ba simolola go bala Baebele.

Ezekiel yo o mo dingwageng tsa bo20 a re: “Kwa tshimologong, ke ne ke tshwana le motho yo o kgweetsang koloi a sa itse gore o ya kae. Mme go bala Baebele go dirile gore ke itumelele botshelo. E na le kgakololo e nka e dirisang letsatsi le letsatsi.”

Frieda yo le ene a leng mo dingwageng tsa bo20 a re: “Ke ne ke le motho yo o tlhogoethata. Mme go bala Baebele go nthusitse gore ke nne boikgapo. Seno se dirile gore ke nne botsalano mme gone jaanong ke na le ditsala tse dintsi.”

Mosadi mongwe yo o mo dingwageng tsa bo50 e bong Eunice a re: “Baebele e nthusa go tokafatsa botho jwa me le go fetola mekgwa e e sa siamang e ke nang le yone.”

Batho bano le ba bangwe ba le dimilione ba lemogile gore go bala Baebele go ka thusa motho gore a itumelele botshelo. (Isaia 48:17, 18) Gape Baebele e ka go thusa (1) go dira ditshwetso tse di siameng, (2) go nna le ditsala, (3) go lebana le ditlhobaelo, mme sa botlhokwa le go feta (4)  go ithuta boammaaruri ka Modimo. Kgakololo e e mo Baebeleng e tswa kwa Modimong, ka jalo, o tla atlega fa o e dirisa mo botshelong. Modimo ga a kitla a go naya kgakololo e e sa siamang.

Selo sa botlhokwa ke go simolola go e bala. Ka jalo, ke dikgato dife tse di ka go thusang gore o simolole go bala Baebele le go itumelela go dira jalo?