Fetela kwa tshedimosetsong

Fetela go diteng

 SETLHOGO SA KA FA NTLE

A Dikereke di a Thubega?

A Dikereke di a Thubega?

Gaffar yo o tsholetsweng kwa Turkey, o ne a tshwenngwa ke se a neng a se rutilwe kwa kerekeng gore Modimo o rata go ipusolosetsa. Mosadi wa gagwe e bong Hediye o ne a simolola go belaela kereke ya gagwe fa a le dingwaga di le robongwe. O ne a re: “Ke ne ka rutiwa go dumela gore dilo di laoletswe go sa le gale. E re ka ke se na batsadi, ke ne ka ipotsa gore ‘Ke dirileng gore ke diragalelwe ke seno?’ Ke ne ke tle ke lele bosigo jotlhe. Fa ke le dingwaga di le 15, ke ne ke sa tlhole ke rata kereke.”

A O ITLHOBOGILE ka dikereke? Fa go le jalo, ga se wena fela. Mo dinageng tse dintsi, palo ya batho ba ba reng ‘ga ba tsene kereke’ e a oketsega, e leng se se bontshang gore go tla nna le dikereke tse dintsi tse di sa tlhomamang. Dingwe tsa dinaga tseo di bontshitswe fano.

 Goreng batho ba tlogela dikereke?

Batho ba swabisiwa ke dikereke ka ntlha ya mabaka a a farologaneng. Ano a akaretsa dintwa le ditlhaselo tse di tlhotlhelediwang kgotsa tse di amogelwang ke dikereke, dikgang tsa thobalano tsa baeteledipele ba dikereke le mabaka a mangwe a a bofitlha a a ka dirang gore batho ba le bantsi ba tlogele kereke. Ano a akaretsa:

  • Dikhumo: Buka ya Global Index of Religion and Atheism ya re: “Fa o nna le dikhumo tse dintsi, o tlogela kereke.” Seno se a tshwanela ka gonne mo dinageng di le dintsi, palo ya batho ba ratang dikhumo e oketsegile thata. Porofesa wa tsa ikonomi e bong John V. C. Nye a re kwa mafelong a mangwe, batho ba itumelela “botshelo jwa maemo a a kwa godimo jo bo neng bo ka dira gore kgosi e e tumileng e e tshedileng dingwaga di le makgolo a mabedi tse di fetileng e fufege thata.”

    SE BAEBELE E SE BUANG: Baebele e ne ya bolelela pele gore mo “metlheng ya bofelo,” go rata madi le go rata menate go tla dira gore batho ba se ka ba rata Modimo le baagelani ba bone. (2 Timotheo 3:1-5) Fa mokwadi mongwe wa Baebele a sena go lemoga gore go rata dikhumo go ka mo katosetsa kgakala le Modimo, o ne a raya Jehofa Modimo a re: “O se ka wa nnaya lehuma le fa e le dikhumo.” Goreng a ne a bua jalo? O ne a oketsa jaana: “Gore ke se ka ka kgora mme ka go latola ka re: ‘Jehofa ke mang?’”—Diane 30:8, 9.

  • Meetlo ya kereke le boitshwaro: Batho ba le bantsi, segolobogolo basha, ba tsaya dikereke di se botlhokwa. Bangwe ba itlhobogile ka dikereke. Modiredimogolo wa mokgatlho wa Humanist Society Scotland e bong Tim Maguire o ne a re: “Fa o leba tsela e dikereke di ntseng di dira dilo ka yone ka dingwaga di le makgolo tse di fetileng, batho ba di tlogetse ka gonne ga di tlhole di kgothaletsa batho go itshwara sentle.”

    SE BAEBELE E SE BUANG: Jesu Keresete o ne a tlhagisa jaana ka baruti ba maaka: “Lo tla ba lemoga ka maungo a bone. . . . Setlhare sengwe le sengwe se se molemo se ungwa leungo le le molemo, mme setlhare sengwe le sengwe se se bodileng se ungwa leungo le le se nang mosola.” (Mathaio 7:15-18) “Leungo le le se nang mosola” le akaretsa go tsenela dipolotiki le go amogela dilo tse Modimo a di tlhoileng, jaaka bosodoma. (Johane 15:19; Baroma 1:25-27) Gape le akaretsa go emisetsa dingwao tse di se nang mosola ka dithuto tse di botlhokwa tse di mo Baebeleng. (Mathaio 15:3, 9) Jesu o ne a re: “Fepa dinku tsa me tse dinnye.” (Johane 21:17) Le fa go ntse jalo, batho ba le bantsi gompieno ba na le keletso ya go itse Modimo.

  •   Kereke le madi: Mokgatlho wa Pew Research Center wa re batho ba le bantsi ba re dikereke di gatelela thata gore go ntshiwe madi. Mo godimo ga moo, baeteledipele ba dikereke—go farologana le letsomane la bone—ba tshela botshelo jwa manobonobo. Ka sekai, kwa toropong nngwe kwa Jeremane, bishopo mongwe o ne a latofadiwa ka go re o tshela botshelo jwa manobonobo fa maloko a kereke one a sa kgone go itlamela. Go tshela jalo go ne ga kgopisa Bakatoliki ba le bantsi ba koo. Gape pego nngwe e e mo makasineng wa GEO ya re kwa Nigeria, “batho ba le dimilione di le 100 ba tshela ka madi a mannye letsatsi le letsatsi, fa botshelo jwa manobonobo jwa baruti e simolola go nna tlhobaboroko.”

    SE BAEBELE E SE BUANG: Mokwadi mongwe wa Baebele e bong Paulo o ne a kwala jaana: “Ga re babapatsi ba lefoko la Modimo.” (2 Bakorintha 2:17) Le fa Paulo e ne e le moreri yo o tlhoafetseng mo phuthegong ya Bokeresete ya bogologolo, o ne a tle a dire tiro ya diatla gore a se ka a itira mokgweleo mo go ba bangwe. (Ditiro 20:34) Tsela e a neng a itshwara ka yone e bontsha gore o ne a ikobela taelo eno ya ga Jesu: “Lo amogetse mahala, nayang mahala.”—Mathaio 10:7, 8.

Go dumalana le melaometheo eo, Basupi ba ga Jehofa ga ba duedisetse batho dibuka tsa bone kgotsa go ithuta Baebele le bone. E bile ga ba ntshe ditsabosome kgotsa go tsaya dikoleke kwa dipokanong tsa bone. Go na le moo, ba ithaopela go ntsha meneelo.—Mathaio 6:2, 3.

Go Boleletswe Pele Gore Batho ba Tla Tlogela Dikereke!

Masome a se kae a dingwaga a a fetileng, go ne go le thata go akanya gore dikereke di tla bo di le dintsi jaana gompieno. Le fa go ntse jalo, Modimo o ne a bonela pele seno mme a bua ka sone go sa le gale mo Baebeleng. Modimo o ne a dirisa puo ya tshwantshetso go tshwantsha madumedi otlhe a a sa ikanyegeng mo go ene le seaka se se aparang magasigasi se se bidiwang “Babelona o Mogolo.”—Tshenolo 17:1, 5.

Setshwantsho seo se a tshwanela ka gonne le fa dikereke tsa maaka di re di ikanyega mo Modimong, di ile tsa ikamanya le babusi ba lefatshe gore di tle di bone maatla le dikhumo. Tshenolo 18:9 ya re: ‘Dikgosi tsa lefatshe . . . di ne tsa dira kgokafalo le ene.’ Lefoko “Babelona” le lone le a tshwanela ka gonne dithuto di le dintsi tsa maaka le meetlo ya dikereke, jaaka gore moya ga o swe, medimo e le meraro mo go a le mongwe le thuto ya masaitsiweng, di tswa kwa Babelona wa bogologolo, motse o bodumedi jwa maaka le ditlhamane e neng e le ntletsentletse kwa go one. *Isaia 47:1, 8-11.

Babelona yo o Maatla o ne a wa fa metsi a a neng a sireleditse motse a ‘kgadisiwa’ gore masole a Bameda le Baperesia a kgone go gapa motse. (Jeremia 50:1, 2, 38) Tota e bile, Babelona e ne ya tlhaselwa mo bosigong bo le bongwe!—Daniele 5:7, 28, 30.

Babelona o Mogolo le ene o ‘ntse mo metsing a mantsi.’ Baebele ya re metsi ano a emela “boidiidi le ditšhaba”—dimilione tsa batho ba ba tshegetsang bodumedi jwa maaka.  (Tshenolo 17:1, 15) Baebele e boleletse pele gore metsi ano a tshwantshetso a tla kgala—sesupo sa gore Babelona wa segompieno o gaufi le go fedisiwa. (Tshenolo 16:12; 18:8) Mme ke mang yo o tla fedisang Babelona? Lorato lwa ditsala tsa gagwe tsa dipolotiki lo tla fetoga letlhoo. Gape di tla gapa dikhumo tsa gagwe, di bo di ja nama ya gagwe ya tshwantshetso.—Tshenolo 17:16, 17. *

Metsi a a neng a kgala kwa Babelona a tshwantshetsa batho ba ba tlogelang Babelona o Mogolo

“Tswang mo go Ene”!

E re ka Babelona o Mogolo a le gaufi le go fedisiwa, Modimo o re tlhagisa jaana ka lorato: “Tswang mo go ene, batho ba me, fa lo sa batle go tlhakanela le ene mo maleong a gagwe, le fa lo sa batle go amogela karolo ya dipetso tsa gagwe.” (Tshenolo 18:4) Ela tlhoko gore lefoko “fa” le umakiwa gabedi. Ee, tlhagiso ya Modimo e lebisitswe kwa bathong ba ba jaaka Gaffar le Hediye ba go builweng ka bone kwa tshimologong, ba ba tshwentsweng ke dithuto tse di utlwisang botlhoko le ba ba batlang go amogelwa ke Modimo.

Pele Gaffar a ithuta Baebele, o ne a tsaya Modimo e le Motho yo re tshwanetseng go mo ikobela ka gonne re mmoifa. O ne a re: “Go ne go itumedisa go itse gore Jehofa ke Modimo yo o lorato le gore o batla re mo ikobela ka gonne re mo rata.” (1 Johane 4:8; 5:3) Hediye o ne a nna le kagiso fa a ithuta gore ga se Modimo yo o dirileng gore e nne khutsana e bile boemo jwa gagwe bo ne bo sa laolelwa go sa le gale. O ne a gomodiwa ke ditemana tsa Baebele tse di jaaka Jakobe 1:13, e e reng Modimo ga a leke batho ka dilo tse di bosula. Ene le Gaffar ba ne ba ngangatlela boammaaruri jwa Baebele mme ba tswa mo go “Babelona.”—Johane 17:17.

Fa Babelona o Mogolo a fedisitswe, batho ba ka boikokobetso ba tswileng mo go ene gore ba ‘obamele Rara ka moya le boammaaruri,’ ga ba kitla ba utlwisiwa botlhoko. (Johane 4:23) Ba solofetse go bona lefatshe le “tlala kitso ya ga Jehofa jaaka metsi a khurumeditse lewatle.”—Isaia 11:9.

Ee, bodumedi jwa maaka le se se dirang gore bo nne gone, di tla fedisiwa, ka gonne Modimo ‘a ka se ka a aka.’ (Tito 1:2) Ka fa letlhakoreng le lengwe, bodumedi jwa boammaaruri bo tla nnela ruri!

^ ser. 16 Fa o batla tshedimosetso e e oketsegileng ka Babelona o Mogolo le gore Baebele ya re baswi ba kae, Modimo o tswa kae le thuto ya masaitsiweng, bona buka ya Totatota Baebele e Ruta Eng? E gone mo www.jw.org/tn.

^ ser. 18 Bona setlhogo se se reng “Baebele ya Reng?—Go Fedisiwa ga Lefatshe,” mo makasineng ono wa Tsogang!