Fetela kwa tshedimosetsong

Fetela go diteng

 BAEBELE YA RENG?

Go Itshokelana

Go Itshokelana

Go amogelana, go itshwarelana le go itshokelana go dira gore batho ba dirisane ka kagiso. A mme go itshokelana go na le mo go felelang gone?

Ke eng se se ka re thusang go itshokelana?

SE SE DIREGANG GOMPIENO

Mo lefatsheng lotlhe, batho ga ba tlhole ba kgona go itshokelana mme seo se gakadiwa ke dilo tse di jaaka go tlhaolana ka setso le mmala, bosetšhaba le go dirisa dikgoka mo dikerekeng.

SE BAEBELE E SE BUANG

Ka nako ya bodiredi jwa gagwe, Jesu Keresete o ne a tshela le batho ba ba sa itshokelaneng. Bajuda le Basamarea ba ne ba ilana go gaisa batho ba bangwe. (Johane 4:9) Basadi ba ne ba tsewa ba le kwa tlase mo banneng. Baeteledipele ba bodumedi ba Bajuda ba ne ba sotla batho ba maemo a a kwa tlase. (Johane 7:49) Jesu Keresete ene o ne a farologane thata le bone. Baganetsi ba gagwe ba ne ba re: “Monna yono o amogela baleofi e bile o ja le bone.” (Luke 15:2) Jesu o ne a le pelonomi, a le pelotelele e bile a itshokela ba bangwe ka gonne o ne a tletse go ba thusa go itse Modimo e seng go ba atlhola. O ne a tlhotlhelediwa ke lorato.—Johane 3:17; 13:34.

Jesu o ne a itshokela batho ka gonne o ne a tletse go ba thusa go itse Modimo e seng go ba atlhola

Lorato lo re thusa gore re itshokele ba bangwe, lo dira gore re ba rate le fa ba na le makoa kgotsa mekgwa e re sa e tlwaelang. Bakolosa 3:13 ya re: “Tswelelang lo itshokelana e bile lo itshwarelana lo gololesegile fa mongwe a na le lebaka la go ngongorega ka yo mongwe.”

“Mo godimo ga dilo tsotlhe, ratanang ka lorato lo logolo, ka gonne lorato lo bipa maleo a le mantsi.”1 Petere 4:8.

 Goreng go itshokelana go na le mo go felelang gone?

SE SE DIREGANG

Mekgatlho e mentsi e leka go tlhomamisa gore melao e a latelwa le gore dilo di dirwa ka thulaganyo. Ke gone ka moo e tlhomang melao ya gore batho ba itshware jang.

SE BAEBELE E SE BUANG

“[Lorato] ga lo itshware ka tsela e e sa tshwanelang.” (1 Bakorintha 13:5) Le fa Jesu a ne a itshokela batho, o ne a sa rotloetse go itshwara ka tsela e e sa siamang, go itimokanya kgotsa mekgwa epe fela e e sa siamang. Go na le moo, o ne a kgala dilo tseo a tiisitse. (Mathaio 23:13) O ne a re: “Gonne yo o ratang go dira dilo tse di bosula o tlhoile lesedi [la boammaaruri].”—Johane 3:20.

Moaposetoloi wa Mokeresete e bong Paulo o ne a kwala jaana: “Tlhoang se se boikepo, ngaparelang se se molemo.” (Baroma 12:9) O ne tshela go dumalana le mafoko ano. Ka sekai, fa Bakeresete ba Bajuda ba itlhaola mo badumeding ba e neng e se Bajuda, Paulo—yo e neng e le Mojuda—o ne a bua le bone ka bonolo mme a tiisitse. (Bagalatia 2:11-14) O ne a itse gore Modimo yo o se nang “tlhaolele” o ne a ka se letlelele batho ba Gagwe go tlhaolana ka ditso.—Ditiro 10:34.

E re ka Basupi ba ga Jehofa e le Bakeresete, ba ikaega ka Baebele gore e ba kaele mo boitsholong. (Isaia 33:22) Ka jalo, ga ba letlelele maloko a bone go dira dilo tse di sa siamang. Phuthego e e phepa ya Bokeresete ga e a tshwanela go kgotlelwa ke batho ba ba itlhokomolosang melao ya Modimo. Ke sone se Basupi ba ga Jehofa ba ikobelang taelo eno e e tlhamaletseng ya Baebele: “Tlosang motho yo o boikepo mo gare ga lona.”—1 Bakorintha 5:11-13.

“Lona ba lo ratang Jehofa, tlhoang se se bosula.”Pesalema 97:10.

A Modimo o tla itshokela bosula go ya go ile?

SE BONTSI BO SE DUMELANG

E re ka re tshotswe re dira diphoso, bosula bo tla nna bo le teng.

SE BAEBELE E SE BUANG

Moporofeti Habakuke o ne a rapela Jehofa Modimo jaana: “Ke ka ntlha yang fa o  . . . nnela go leba a e leng matshwenyego fela? Le gone ke ka ntlha yang fa thopo le thubakanyo di le fa pele ga me, mme ke ka ntlha yang fa go nna le komano, e bile ke ka ntlha yang fa go tsoga kgogakgogano?” (Habakuke 1:3) Modimo o ne a tlhomamisetsa moporofeti yono gore o tla atlhola badirabosula. Modimo o ne a bua jaana ka tsholofetso eo: “Ruri e tla diragala. Ga e kitla e tla morago ga nako.”—Habakuke 2:3.

Gone jaanong, badirabosula ba na le tshono ya go tlogela dilo tse di bosula tse ba di dirang. “‘A ke itumedisiwa ka tsela nngwe ke loso lwa moikepi,’ go bua Morena Molaodimogolo Jehofa, ‘e seng gore a boe ka morago mo ditseleng tsa gagwe mme a nne a tshela?’” (Esekiele 18:23) Ba ba tlogelang ditsela tsa bone tse di bosula ba bo ba batla Jehofa, ba na le isagwe e e molemo. Diane 1:33 ya re: “Fa e le yo o ntheetsang, o tla nna ka polokesego mme ga a na go tshwenngwa ke go boifa masetlapelo.”

Mo lobakanyaneng fela, moikepi o tla bo a sa tlhole a le teng . . . Ba ba pelonolo ba tla rua lefatshe, ruri ba tla nna le boitumelo jo bogolo mo letlotlong la kagiso.”—Pesalema 37:10, 11.