Ditiragalo tsa lefatshe di bontshitse gore batho ba rata dikgoka. A maemo a tla tswelela a ntse jaana?

Modimo o leba dikgoka jang?

SE BATHO BA SE BUANG

Batho ba bantsi go akaretsa le ba ba tsenang dikereke ba re ga go phoso gore motho a nne dikgoka fa a rumolwa. E bile batho ba le bantsi ba tsaya gore dithulaganyo tsa thelebishene le difilimi tse go dirisiwang dikgoka mo go tsone ke boitlosobodutu jo bo seng phoso.

SE BAEBELE E SE BUANG

Gaufi le motse wa Mosul, kwa bokone jwa Iraq, go na le marope a motse o o kileng wa bo o nonofile—Ninife, motsemogolo wa Mmusomogolo wa bogologolo wa Asiria. Ka nako ya fa motse ono o atlegile, Baebele e ne ya bolelela pele gore Modimo o ne a tla “dira Ninife kgakgabalo.” (Sefania 2:13) Modimo o ne a re: “Ke tla go tlhoma gore o nne segakgamalelo.” Ka ntlha yang? Ka gonne Ninife e ne e le “motse wa tshololo ya madi.” (Nahume 1:1; 3:1, 6) Gape Pesalema 5:6 ya re: “Jehofa o tlhoile motho yo o tshololang madi.” Ka jalo, marope a Ninife a bontsha gore Modimo o ne a diragatsa se a neng a se buile.

Dikgoka di simologile ka mmaba yo mogolo wa Modimo le batho—Satane Diabolo, yo Jesu Keresete a neng a re ke “mmolai.” (Johane 8:44) Mme e re ka “lefatshe lotlhe le namaletse mo maatleng a yo o boikepo,” maano a gagwe a bonala mo tseleng e go nna dikgoka go anameng ka yone, go akaretsa le mo dithulaganyong tsa thelebishene le mo difiliming. (1 Johane 5:19) Gore re itumedise Modimo, re tshwanetse go tlhoa dikgoka le go rata se Modimo a se ratang. * A seo se a kgonega?

“Jehofa . . o tlhoile ope fela yo o ratang thubakanyo.”Pesalema 11:5.

A batho ba ba dikgoka ba ka fetoga?

SE BATHO BA SE BUANG

Go nna dikgoka ke karolo ya botshelo e bile go ka se fetoge.

SE BAEBELE E SE BUANG

Tlosang “tšhakgalo, bogale, bosula, puo ya go kgoba, le puo e e ferosang sebete e e tswang mo molomong wa lona.” Gape ya re: “Apolang botho jo bogologolo le ditlwaelo tsa jone, mme lo apare botho jo bosha.” (Bakolosa 3:8-10) A Modimo o batla gore re dire dilo tse re ka se kang ra di kgona? Nnyaa. Batho ba ka fetoga. * Mme jang?

Selo sa ntlha se motho a ka se dirang ke go nna le kitso ya boammaaruri ka Modimo. (Bakolosa 3:10) Fa motho a reetsa molaetsa wa Baebele e bile a ithuta ka dinonofo tsa  Mmopi tse di kgatlhang le melao ya gagwe, o simolola go rata Modimo le go batla go mo itumedisa.—1 Johane 5:3.

Sa bobedi ke gore re tlhopha ditsala tse di ntseng jang. “O se ka wa nna molekane le ope yo o tlwaetseng go nna bogale; mme o se ka wa ikopanya le motho yo o shakgalang thata, gore o se ka wa tlwaelana le ditselana tsa gagwe mme ruri wa tseela moya wa gago seru.”—Diane 22:24, 25.

Sa boraro ke go nna le temogo. Leba dikgoka e le bokoa jo bo masisi jo bo bontshang gore motho o palelwa ke go ikgapa. Batho ba ba kagiso bone, ba na le boikgapo. Diane 16:32 ya re: “Yo o bonya go galefa o botoka go gaisa monna yo o thata.”

“Latelelang go nna le kagiso le batho botlhe.”Bahebera 12:14.

A go dirisa dikgoka go tla fela?

SE BATHO BA SE BUANG

Batho ga ba bolo go nna dikgoka e bile ba tla tswelela ba ntse jalo.

SE BAEBELE E SE BUANG

“Mo lobakanyaneng fela, moikepi o tla bo a sa tlhole a le teng . . . Mme ba ba pelonolo ba tla rua lefatshe, ruri ba tla nna le boitumelo jo bogolo mo letlotlong la kagiso.” (Pesalema 37:10, 11) Gore Modimo a boloke ba ba pelonolo le batho ba ba ratang kagiso, o tla senya ba ba dirisang dikgoka fela jaaka a dirile ka motse wa bogologolo wa Ninife. Go tswa foo, go ka se tlhole go nna le batho ba ba dirisang dikgoka mo lefatsheng!—Pesalema 72:7.

“Ba ba bonolo . . . ba tla rua lefatshe.”—Mathaio 5:5

Ka jalo, eno ke nako ya gore re batle go amogelwa ke Modimo ka go nna batho ba ba kagiso. Petere wa bobedi 3:9 ya re: “Jehofa . . . o pelotelele le lona ka gonne ga a eletse gore ope a senngwe mme o eletsa gore botlhe ba fitlhe mo boikwatlhaong.”

“Ba tla thula ditšhaka tsa bone ba di dira magale a megoma le marumo a bone ba a dira dikere tse di pomang.”Isaia 2:4.

^ ser. 7 Modimo o ne a letla Baiseraele gore ba nne le seabe mo dintweng gore ba sireletse naga ya bone. (2 Ditiragalo 20:15, 17) Le fa go ntse jalo, seo se ne sa fetoga fa Modimo a fedisa kgolagano ya gagwe le Iseraele a bo a tlhoma phuthego ya Bokeresete, e e neng e se na melelwane.

^ ser. 11 Dikai tsa batho ba ba ileng ba fetola matshelo a bone di ka bonwa mo ditlhogong tsa “Baebele e Fetola Matshelo a Batho” tse di mo dimakasineng tsa Tora ya Tebelo.