Fetela kwa tshedimosetsong

Fetela go diteng

 SETLHOGO SA KA FA NTLE

Kafa o ka Nnang Rre yo o Molemo ka Gone

Kafa o ka Nnang Rre yo o Molemo ka Gone

“Ke paletswe kae?” Michael * wa mo Afrika Borwa o ne a tlhorwa boroko ke potso eno. Le fa a ile a leka ka natla go nna rre yo o molemo, nako le nako fa a akanya ka morwawe wa seganana wa dingwaga tse 19, o ne a ipotsa gore a go na le sengwe se a ka bong a se dirile gore a nne motsadi yo o botoka.

Ka fa letlhakoreng le lengwe, go lebega Terry yo o nnang kwa Spain a ile a kgona go godisa morwawe sentle. Morwawe e bong Andrew a re: “Dilo tse dintsi tse ke di gopolang ka Papa tsa fa ke ne ke sa le ngwana ke fa a ne a mpalela, a tshameka le nna, a tsaya maeto le nna a mo go one re neng re fetsa nako re le babedi fela. O ne a dira gore ke natefelelwe ke go ithuta.”

Gone ke boammaaruri gore ga go motlhofo go nna rre yo o molemo. Mme go na le melaometheo ya konokono e e ka thusang. Borre ba le bantsi ba fitlhetse gore bone le ba malapa a bone ba solegelwa molemo fa ba latela dikgakololo tse di mosola tse di mo Baebeleng. Mma re sekasekeng dingwe tsa dikgakololo tseno tse di ka thusang borre.

 1. Iphe Nako le ba Lelapa la Gago

Fa o le rre, o bontsha bana ba gago jang gore o ba tsaya ba le botlhokwa? Ruri go tshwanetse ga bo go na le dilo tse dintsi tse o di direlang bana ba gago, go akaretsa go itima dilo dingwe gore ba nne le dijo mmogo le legae le le ba siametseng. O ne o ka se dire dilo tse di ntseng jalo fa o ka bo o sa tseye bana ba gago ba le botlhokwa. Le fa go ntse jalo, fa o sa fetse nako e e lekaneng le bana ba gago, ba ka tsaya gore o amega thata ka dilo tse dingwe go feta bone, dilo tse di jaaka tiro ya gago, ditsala tsa gago kgotsa dilo tse o itlosang bodutu ka tsone.

Rre o tshwanetse go simolola leng go fetsa nako le bana ba gagwe? Mmè o simolola go nna le kamano le ngwana wa gagwe a sa ntse a le mo popelong. Losea lo lo iseng lo tsholwe lo ka nna lwa simolola go utlwa, mo e ka nnang dibeke di le 16 fa lo sena go imiwa. Mo go yone nako eno rre le ene a ka simolola go aga kamano e e kgethegileng le ngwana wa gagwe yo o iseng a tsholwe. A ka reetsa go itaya ga pelo ya gagwe, a utlwa fa a raga, a bua le ene kgotsa a mo opelela.

Molaomotheo wa Baebele: Mo metlheng ya Baebele, borre ba ne ba na le seabe ka tlhamalalo mo go rutiweng ga bana ba bone. E bile ba ne ba kgothalediwa gore ba fetse nako le bana ba bone ka metlha, jaaka go tlhalositswe mo mafokong a Baebele a a mo go Duteronome 6:6, 7, a a reng: “Mafoko ano a ke a go laolelang gompieno a nne mo pelong ya gago; o a jalele kwa teng mo go morwao o bo o bue ka one fa o ntse mo ntlong ya gago le fa o tsamaya mo tseleng le fa o rapama le fa o tsoga.”

2. Borre ba ba Molemo ba Reetsa ka Tlhoafalo

Reetsa o ritibetse o sa tshwayatshwaye diphoso

E le gore o kgone go buisana sentle le bana ba gago, o tshwanetse go nna motho yo o reetsang ka kelotlhoko. O tshwanetse wa ithuta go reetsa o sa tseege maikutlo.

Bana ba gago ba ka se tlhotlheletsege go le kalo go go bolelela maikutlo a bone fa ba akanya gore o tla galefa ka bonako le go ba tshwayatshwaya diphoso. Mme fa o ba reetsa o ritibetse, seo se ba bontsha gore o ba kgatlhegela ka tsela ya mmatota. Le bone ba tla ikutlwa ba gololesegile go go bolelela dilo tse ba di akanyang le kafa ba ikutlwang ka gone.

Molaomotheo wa Baebele: Kgakololo e e mosola e e mo Baebeleng e itshupile e solegela molemo mo dikarolong di le dintsi tsa botshelo jwa letsatsi le letsatsi. Ka sekai, Baebele ya re: “Motho mongwe le mongwe o tshwanetse go nna bonako go utlwa, bonya go bua, bonya go shakgala.” (Jakobe 1:19) Borre ba ba dirisang molaomotheo ono wa Baebele ba kgona go buisana botoka le bana ba bone.

 3. Ba Kgalemele Le go Ba Akgola ka Lorato

Tota le fa o betilwe ke pelo kgotsa o galefile, tsela e o kgalemelang ngwana wa gago ka yone e tshwanetse go bontsha gore o a mo rata e bile o batla gore dilo di mo tsamaele sentle mo botshelong. Go mo kgalemela go akaretsa go mo gakolola, go mo ruta le go mo otlhaya fa go tlhokega.

Mo godimo ga moo, kotlhao e nna mosola le go feta fa rre a akgola bana ba gagwe ka metlha. Seane sengwe sa bogologolo sa re: “Lefoko le le builweng ka nako e e le tshwanetseng le tshwana le diapole tsa gouta mo dilong tse di setilweng tsa selefera.” (Diane 25:11) Go akgola ngwana go mo thusa gore a nne le dinonofo tse di molemo. Bana ba gola sentle fa batsadi ba bontsha gore ba a ba anaanela. Fa rre a batla ditshono tsa go akgola bana ba gagwe, seo se ka ba thusa gore ba itshepe e bile se ka ba tlhotlheletsa gore ba se ka ba kgaotsa go leka go dira se se molemo.

Molaomotheo wa Baebele: “Lona borrabana, lo se ka lwa galefisa bana ba lona, gore ba se ka ba tshwenyega mo maikutlong.” —Bakolosa 3:21.

4. Rata Mosadi wa Gago O bo O mo Tlotle

Tsela e rre a tshwarang mosadi wa gagwe ka yone ruri e ama bana ba gagwe. Setlhopha sengwe sa baitse ba kgodiso ya bana se tlhalosa jaana: “Sengwe sa dilo tse di molemolemo tse rre a ka di direlang bana ba gagwe ke go tlotla mmaabone. . . . Fa rre le mmè ba tlotlana e bile ba dira gore bana ba bone ba kgone go bona seo, ba dira gore bana ba bone ba ikutlwe ba ratiwa e bile ba itumetse.”—The Importance of Fathers in the Healthy Development of Children [Seabe sa Borre mo go Thuseng Bana go Gola Sentle]. *

Molaomotheo wa Baebele: “Banna, tswelelang lo rate basadi ba lona . . . A mongwe le mongwe wa lona ka bongwe a rate mosadi wa gagwe jalo jaaka a ithata.”—Baefeso 5:25, 33.

 5. Dirisa Kgakololo e e Mosola ya Modimo

Borre ba ba ratang Modimo go tswa pelong ba ka naya bana ba bone boswa jwa botlhokwatlhokwa—kamano e e gaufi le Rraabone yo o kwa legodimong.

Morago ga gore Antonio yo e leng Mosupi wa ga Jehofa a fetse masome a dingwaga a dira ka natla go godisa bana ba le barataro, o ne a amogela lekwalo go tswa kwa go mongwe wa bomorwadie le re: “Papa yo o rategang, ke batla fela go go leboga go bo o nkgodisitse gore ke rate Jehofa Modimo, ke ithate, ke bo ke rate batho ba bangwe—ke gore, ke nne motho yo o tekatekano. O mpontshitse gore o rata Jehofa le gore o a nkgathalela. Ke a leboga Papa go bo o ile wa baya Jehofa kwa pele mo botshelong jwa gago le go tshwara bana ba gago jaaka dimpho tse di tswang kwa Modimong!”

Molaomotheo wa Baebele: “O rate Jehofa Modimo wa gago ka pelo yotlhe ya gago le ka moya otlhe wa gago le ka maatla otlhe a gago. Mme mafoko ano a ke a go laolelang gompieno a nne mo pelong ya gago.”Duteronome 6:5, 6.

Go bonala sentle gore go nna rre go akaretsa dilo tse di fetang dintlha tseno tse tlhano, tota e bile le fa o leka ka natla go nna rre yo o molemo, o ka se nne rre yo o sa direng diphoso. Mme fa o dirisa melaometheo eno ka go bontsha bana ba gago lorato le go dira sotlhe se o ka se kgonang go ba tlamela ka se ba se tlhokang, eleruri o ka kgona go nna rre yo o molemo. *

^ ser. 3 Maina mangwe mo setlhogong seno a fetotswe.

^ ser. 19 Tota le fa rre a sa tlhole a nyalane le mmaagwe bana ba gagwe, fa a mo tshwara ka tlotlo le ka seriti, seo se ka thusa bana gore ba nne le kamano e e molemo le mmaabone.

^ ser. 25 Go bona dintlha tse dingwe tse di ka kaelang malapa, bona buka ya Sephiri sa Boitumelo mo Lelapeng, e e gatisitsweng ke Basupi ba ga Jehofa kgotsa ya kwa karolong e e reng “Tsa Malapa” mo atereseng eno ya Internet www.jw.org/tn.