Fetela kwa tshedimosetsong

Fetela go diteng

Go Tlhoka Magae—Tharabololo ya Gone ke Eng?

Go Tlhoka Magae—Tharabololo ya Gone ke Eng?

 Go Tlhoka Magae—Tharabololo ya Gone ke Eng?

“FA O naya motho tlhapi, o a bo o mo naya dijo tsa letsatsi leo fela. Mme fa o mo ruta go tshwara ditlhapi, o a bo o mo otla botshelo jotlhe jwa gagwe.” Seane seno sa bogologolo se bontsha boammaaruri jwa gore go naya motho selo se a se tlhokang ka nako eo fela go mo tswela molemo ka nakwana. Go botoka go ruta batho go rarabolola mathata gore ba kgone go itlamela ka dilo tse ba di tlhokang. Batho ba le bantsi ba tlhoka go rutwa go dira ditiro dingwe tse di tla ba solegelang molemo mo botshelong kgotsa ba tlhoka go rutwa go leba botshelo ka tsela e e siameng.

Basupi ba ga Jehofa ba dumela gore tsela e e molemo thata ya go thusa batho ba ba se nang magae ke go ba ruta tsela e e molemo thata ya go tshela. Seno se raya go ba thusa go dirisa kgakololo e e molemo go di feta tsotlhe—e re e newang ke Mmopi wa rona. Ke ene fela yo o tshwanelegang sentle go ka naya batho kgakololo e e ntseng jalo. Kgakololo ya gagwe e thusa batho ba le bantsi gore ba se ka ba itsenya mo mathateng a a tla dirang gore ba feleletse ba se na magae. Gape, e thusa batho ba ba dipelo tse di ikanyegang ba ba nang le bothata jono gore ba kgone go bo fenya. Gone ke boammaaruri gore go bala Baebele ka bogone fela ga go ka ke ga nyeletsa mathata  otlhe a re nang le one. Le fa go ntse jalo, Baebele e ka thusa batho go tlogela mekgwa e e sa siamang, ba se ka ba tlhola ba inyatsa mme ba tshele botshelo jo bo nang le seriti.

Batho ba le bantsi ba latlhegetswe ke magae a bone ka ntlha ya go dirisa diokobatsi ka tsela e e sa tshwanelang, go tshela botshelo jwa bokebekwa, go nna le bothata jwa go tlhoka madi kgotsa go thubega ga malapa a bone. Baebele e re naya kgakololo e e molemo tota malebana le dilo tseno tsotlhe. Go dirisa kgakololo ya yone go setse go thusitse batho ba le dimilionemilione gore ba fetole tsela e ba lebang botshelo ka yone—le gore ba fetole botho jwa bone gotlhelele—gore e nne jo bo botoka. Gone ke boammaaruri gore go dirisa kgakololo e e tswang mo Dikwalong ka bogone fela ga go ka ke ga rarabolola mathata otlhe a a amanang le go tlhoka legae. Masetlapelo a tlholego, bolwetse, go anama ga lehuma, go tshwakgoga le mathata a mangwe, ke mathata a nakwana fela a gangwe le gape a batlang gore batho ba thusiwe ka ditsela tse dingwe. Le mororo Basupi ba ga Jehofa ba dira sotlhe se ba ka se kgonang go thusa batho ba ba bogisiwang ke ditlamorago tsa dilo tseno, ba a lemoga gore Mmopi wa batho ke ene fela a ka rarabololelang ruri mathata ano. A mme o tla a rarabolola?

Boikaelelo Jwa Ntlha Jwa Modimo

Go na le mabaka a a utlwalang a go dumela gore go ise go ye kae, go tla bo go sa tlhole go na le batho ba ba tlhokang magae. Ke eng se se dirang gore re dumele seo? Akanya ka dintlha tseno tse di latelang: Jehofa Modimo o ne a naya batho ba ntlha ba babedi legae le lentle. Modimo o ne a ba baya mo paradaiseng e ba neng ba sa tlhoke sepe fa ba le mo go yone. Fa ba ka bo ba ile ba ikobela kaelo ya Mmopi wa bone, ba ka bo ba ile ba kgona go atolosetsa Paradaise eo mo lefatsheng lotlhe. Bana ba bone ba ka bo ba ile ba itumelela letlotlo la dilo tse dintsi le go nna le magae a mantle. Batho botlhe mo lefatsheng ba ne ba tla ikaega ka lorato le tirisanommogo ya mongwe le mongwe wa bone. Joo, e ne le jone boikaelelo jwa ntlha jwa Modimo. O sa ntse a ikaeletse go bo diragatsa.—Pesalema 37:9-11, 29.

Mo godimo ga moo, Modimo o tla dira sengwe le sengwe fela se a ikaeletseng go se dira. (Isaia 55:10, 11) Baebele e bolelela pele gore nako e etla e mo go yone mongwe le mongwe a tla nnang le legae la gagwe le letlotlo. Boammaaruri ke gore, pele seo se direga, maemo otlhe a batho ba leng mo go one gone jaanong a tla tshwanelwa ke gore a fetoge pele. Modimo ke ene a tla tsayang kgato go tlisa phetogo eo. Ke sone se Jesu a neng a akantse ka sone fa a ne a raya barutwa ba gagwe a re ba rapele ba re: “A bogosi jwa gago bo tle. A thato ya gago e diragale le mo lefatsheng, jaaka kwa legodimong.”—Mathaio 6:9, 10.

Fa Bogosi jo bo siameng jwa Modimo bo busa, batho ba ba kutlo ba tla bona go diragadiwa ga boporofeti jono jo bo itumedisang: “Ruri ba tla aga matlo ba nne mo go one . . . Ga ba kitla ba aga mme go nne o sele; ga ba kitla ba jala mme go je o sele. . . . Batho ba me ba ba tlhophilweng ba tla dirisa tiro ya diatla tsa bone ka botlalo.” (Isaia 65:21, 22) Go tla bo go se na ope yo o se nang legae.

Basupi ba ga Jehofa ba leka ka natla go thusa batho semoyeng, e leng thuso e ba e tlhokang gone jaanong. Ba batla go bontsha batho gore ba amega ka bone ka tsela e e lorato fela jaaka Jesu a ile a laela gore ba dire. (Mathaio 22:36-39) Go amega ka tsela e e ntseng jalo ka batho go ba tlhotlheletsa gore ba thuse ba ba latlhegetsweng ke magae a bone ka ntlha ya masetlapelo a tlholego. *

Gone Basupi ba a lemoga gore ga ba ka ke ba kgona go thusa mongwe le mongwe. Jacek, wa kwa Poland, yo o nnang mo lefelong le batho ba ba se nang magae ba nnang mo go lone, o bolela jaana ka batho ba ba se nang magae: “Bangwe ba bogale e bile ba nna fela ba tagilwe ke diokobatsi. Bangwe bone ga ba rate go tlotla sepe fela ka bodumedi, ka gonne ba akanya gore Modimo ga a ba kgathalele. Mme go na le ba ba  amogelang molaetsa wa Lefoko la Modimo.” Ka sekai, Jacek ke mongwe wa bone. O simolotse go ithuta go le gontsi ka se tota Baebele e se rutang.

Motho yo mongwe gape yo o se nang legae yo o neng a amogela molaetsa ono ke Roman, yo o nang le AIDS e bile a feditse nako e telele a nna mo mebileng go tla go fitlha bosheng fela jaana. O gakologelwa jaana: “Fa ke ne ke goroga kwa lefelong lengwe la katlaatleloloago, ke ne ke sa itse gore go ne go na le lefelo lengwe fa gaufi le Basupi ba ga Jehofa ba neng ba kopanela mo go lone. Go ise go ye kae, ba ne ba simolola motlotlo le nna mo mmileng ba bo ba tlhalosa gore ga se gore Modimo ga a utlwe dithapelo tsa batho ba ba se nang magae. Ba ne ba bo ba ntaletsa gore ke tle kwa go nngwe ya dipokano tsa bone.”—Pesalema 72:12, 13.

O ne a amiwa jang ke se a neng a se utlwa? “Ke ile ka ithuta gore nka kgona go tshelela ruri mo Paradaiseng mo lefatsheng le gore Modimo o nthata ka lorato lo logolo. E re ka ke ne ke dikaganyeditswe ke ditsala tse disha tse di amegang ka nna, ke ne ka tlogela go tlhoma mogopolo thata mo bothateng jwa me mme ka simolola go fetola botho jwa me. Ke ne ka tlogela go goga motsoko ka ntlha ya go bo ke rata Modimo mme ka mo solofetsa ka thapelo gore ke ikemiseditse go tsamaya mo tseleng ya tshiamo.”

Roman o ne a gatela pele sentle semoyeng mme go ise go ye kae, a kolobediwa gore a nne mongwe wa Basupi ba ga Jehofa. Badumedi bangwe ka ene le balaodi bangwe ba ne ba mo thusa gore a kgone go fudugela mo lefelong le le siameng la bonno. Roman o bolela jaana ka boitumelo: “Pelo ya me e tletse boitumelo jo ke sa kgoneng go bo tlhalosa. Ke atamalane le Modimo yo o lorato, yo o dirileng gore ke nne le sengwe se ke se tshelelang. O nneile bakaulengwe le bokgaitsadi ba ba molemo mmogo le legae!”

Isagwe ya Batho Ba ba Se Nang Magae

Basupi ba ga Jehofa ba leka go bontsha baagelani botlhe ba bone gore ba amega ka bone, go akaretsa le ba ba se nang magae. Ba tlhoafaletse go ba bolelela ka boammaaruri jwa Baebele jo bo buang ka isagwe e e botoka—e leng boammaaruri jo le e leng gone jaanong jaana bo kgonang go fetola matshelo a batho.—Johane 8:32.

Baebele ya re: “Se se sokamisitsweng ga se ka ke sa tlhamaladiwa.” (Moreri 1:15) Ee, go sa kgathalasege maitlhomo a mantle a baithaopi le balaodi bangwe ba nang le one, ga ba ka ke ba kgona go rarabolola mathata a a etegetseng mo setšhabeng a a jaaka go tlhoka magae le lehuma. Le fa go ntse jalo, Baebele yone e re tlhomamisetsa gore go ise go ye kae, batho botlhe ba ba kutlo ba tla itumelela botshelo jo bo siameng fa Bogosi jwa Modimo bo busa.

[Ntlha e e kwa tlase]

^ ser. 9 Go bona sekai sa seno, tsweetswee bona Tsogang! ya January 8, 1993, ditsebe 14-21; October 22, 2001, ditsebe 23-7 (ka Seesemane); le August 8, 2003, ditsebe 10-15.

[Setshwantsho mo go tsebe 8]

Mmè mongwe wa motshabi go tswa kwa Somalia o tshwere karata ya go abelwa dijo

[Motswedi wa Setshwantsho]

© Trygve Bolstad/Panos Pictures

[Setshwantsho mo go tsebe 9]

Mo godimo ga moo, batho ba ba se nang magae ba tlhoka go nna le tsholofelo ka isagwe

[Ditshwantsho mo go tsebe 10]

Fa Bogosi jwa Modimo bo busa, go tla bo go se na ope yo o tlhokang legae