Fetela kwa tshedimosetsong

Fetela go diteng

Mosamaria yo o Molemo wa Gompieno

Mosamaria yo o Molemo wa Gompieno

 Mosamaria yo o Molemo wa Gompieno

KA MOKWADI WA TSOGANG! KWA MEXICO

Bontsi jwa rona re kile ra utlwa polelo ya Baebele ka monna yo o siameng yo gantsi a bidiwang Mosamaria yo o Molemo. (Luke 10:29-37) Mo setshwantshong seno Jesu Keresete o ne a bontsha gore monna mongwe wa Mosamaria o ne a tsaya matsapa a kana kang go bontsha motho yo o neng a tlhoka thuso lorato. A batho ba ba tshwanang le Mosamaria yo o molemo ba sa ntse ba le teng gompieno? Akanya ka pego e e latelang go tswa kwa Mexico.

Fa Betuel le ba lelapa la gagwe ba ne ba boa go tswa kwa loetong longwe mme ba le dikilometara di le mmalwa go tsena kwa legaeng la bone ba ne ba bona kotsi e e maswe ya koloi mo tseleng e kgolo. Ba ne ba ema go thusa. Mongwe wa bakgweetsi yo o neng a amegile mo kotsing eno, e ne e le ngaka, mme o ne a ba kopa gore ba ise mosadi wa gagwe yo o imileng le basetsanyana ba gagwe ba babedi kwa bookelong jo bo gaufi gore ba alafiwe gone. Ba ne ba dira jalo, mme morago ga moo Betuel o ne a boela kwa lefelong le kotsi e diragetseng mo go lone go bona gore a ka thusa ka eng gape.

Betuel a re: “Mapodise a a tlhokometseng ditsela tse dikgolo a ne a setse a gorogile mme ngaka eno e ne e tlile go tshwarwa gore a botsolodiwe ka ntlha ya gore go na le mongwe yo o neng a tlhokafetse. Fa ngaka eno e ne e mpotsa gore ke ka ntlha yang fa ke ne ke mo thusa, ke ne ka mo tlhalosetsa gore re Basupi ba ga Jehofa mme re ithutile mo Baebeleng gore re tshwanetse go rata baagelani ba rona. Ke ne ka mmolelela gore ga a tlhoke go tshwenyega ka mosadi wa gagwe le bana ka gonne re tla ba tlhokomela. A geletse dikeledi mo matlhong ka ntlha ya boitumelo, o ne a nneela dilwana tse di botlhokwa gore ke di boloke.”

Betuel le ba lelapa la gagwe ba ne ba tseela ba lelapa la monna yono kwa legaeng la bone mme ba ba tlhokomela ka malatsi a le mmalwa. Betuel o ne a dirisa sebaka seo go simolola thuto ya Baebele le bone. Fa ngaka eno e ne e gololwa kwa kgolegelong, o ne a re o leboga le go tlotla Basupi ba ga Jehofa. O ne a solofetsa gore o tla tswelela a ithuta Baebele kwa motseng wa gaabo mme o ne a re fa mosadi wa gagwe a ka tshola mosimane, o tla mo teelela ka Betuel. Betuel o tswelela pele jaana: “Gone jaanong, morago ga dingwaga tse pedi, re ile ra ba etela. Se se neng sa nkgakgamatsa ke gore ba ne ba ithuta Baebele, e bile leina la mosimanyana wa bone e ne e le Betuel!”

[Setshwantsho mo go tsebe 15]

Betuel