Fetela kwa tshedimosetsong

Fetela go diteng

Itumelele go Nna le Diphologolo ka Bosakhutleng

Itumelele go Nna le Diphologolo ka Bosakhutleng

 Itumelele go Nna le Diphologolo ka Bosakhutleng

A BO go na le mefuta e e farologaneng thata jang ne ya diphologolo, mme go bonala tsotlhe di na le mekgwa le dinonofo tse di sa tshwaneng! Fa motho a di rata e bile a di utlwela botlhoko, seno se mo thusa gore a atamalane le Mmopi wa tsone. Re ka bona sekai sa seno mo kgannyeng ya ga Maria.

Dingwaga di ka nna tharo tse di fetileng, fa Maria a ne a nna kwa Lisbon, kwa Portugal, ntša ya gagwe e ne ya latlhega, mme o ne a dira gore kgang eno e begiwe mo radiong. Mosupi mongwe wa ga Jehofa, yo o neng a tlhomamisegile gore o ne a bone ntša e e tshwanang le e e neng e tlhalosiwa mo radiong, o ne a ikgolaganya le Maria. Fa ba  ne ba kopana, ba ne ba bona ntša eo, mme Mosupi yono o ne a bolela gore e re ka Maria a ne a rata diphologolo thata jaana, ga go pelaelo gore o ne a ka itumelela go tshela mo lefatsheng le lesha le Modimo a le solofeditseng. Mosupi yono o ne a tlhalosa gore ka nako eo batho ba tla bo ba tshela ka kagiso le diphologolo tsotlhe.

Maria o ne a amogela taletso ya go ya kwa pokanong nngwe ya Basupi. Se a neng a se utlwa le go se bona koo, se ne sa dira gore a nne le kgatlhego thata mo a neng a batla gore a tshwarelwe thuto ya Baebele. Fa thuto eno e ntse e tsweletse, Maria o ne a amiwa maikutlo thata ke dilo tse a neng a di ithuta ka Jehofa Modimo le ka tsholofetso ya gagwe ya botshelo jo bo sa khutleng mo lefatsheng le lesha la tshiamo. (Pesalema 37:29; Johane 17:3) Kgabagare, ka February 16, 2002, o ne a bontsha boineelo jwa gagwe mo go Jehofa ka go kolobediwa mo metsing.

Boikaelelo Jwa Modimo Jwa Kwa Tshimologong

Jaaka Maria, batho ba le bantsi ba ile ba itumedisiwa thata ke go bona bosupi jo bo mo Baebeleng jwa gore kgabagare boikaelelo jwa Modimo jwa kwa tshimologong jwa gore batho ba tshelele ruri mo lefatsheng la paradaise le go tlhokomela diphologolo tsotlhe tse di mo go lone bo tla diragadiwa. (Genesise 1:28) Baebele e bolela gore Modimo ‘ga a ka a bopela lefatshe lefela,’ mme ‘o le bopetse go nniwa.’ Go bonala sentle gore batho ba ne ba tla itumelela lefatshe le diphologolo tse di mo go lone go ya go ile.—Isaia 45:18.

Gape Baebele e gatelela maitlhomo a Modimo a go diragatsa boikaelelo jwa gagwe jwa kwa tshimologong jwa go dira lefatshe paradaise. Modimo a re: “Ke bo buile,” a bo a re gape, “Ke tla bo tlisa.” Gape Jehofa o bolela jaana: “Lefoko la me le le tswang mo molomong wa me le tla nna fela jalo. Ga le kitla le boela mo go nna le se na matswela, ruri le tla dira selo se se intumedisang, ruri le tla atlega mo go se ke le rometseng kwa go sone.”—Isaia 46:11; 55:11.

Go bonala sentle gore boikaelelo jwa Modimo jwa kwa tshimologong e ne e le gore batho ba itumelele lefatshe la paradaise ka bosakhutleng. Re ka tlhomamisega ka botlalo gore kgabagare boikaelelo joo bo tla diragadiwa. A re sekasekeng kafa Baebele e tlhalosang ka teng gore botshelo bo tla nna jang kwa lefatsheng le lesha la Modimo. Re tla bona gore eleruri diphologolo tsotlhe, tsa mo gae le tsa naga, di tla tshela mmogo ka kagiso e bile di tla agisana le batho.—Isaia 65:17, 21-25; 2 Petere 3:13.

Diruiwa mo Lefatsheng le Lesha la Modimo

Mo lefatsheng le lesha la ga Jehofa, batho ba tla kgona go tshwaratshwara seriri sa tau, boboa jwa nkwe e e methalothalo le e leng go robala mo sekgweng ba sa boife gore phologolo epe e tla ba gobatsa. Ela tlhoko tsholofetso eno ya Modimo: “Ruri ke tla khutlisa sebatana sa naga se se utlwisang botlhoko mo lefatsheng, mme [batho] ba tla nna mo nageng ka polokesego ba bo ba robala mo dikgweng.”—Esekiele 34:25; Hosea 2:18.

Ee ruri, ka nako eo diphologolo di tla bo di ikobela batho, tota le bana ba bannye! Baebele ya re: “Phiri e tla nna nakonyana le kwanyana e tonanyana, mme lengau le tla botha le potsane, le namane le tawana e e seriri le phologolo e e fepilweng sentle tsotlhe di tla nna mmogo; mme mosimanyana o tla di etelela pele.”

Mme ga go a felela foo! Lekwalo leno le tswelela le re: “Kgomo le bera di tla fula mmogo; bana ba tsone ba tla botha mmogo. Le tau e tla ja lotlhaka jaaka poo. Mme ngwana yo o anyang o tla tshameka fa mosimeng wa kake; ngwana yo o kgwisitsweng o tla baya seatla sa gagwe mo mosimeng o o tsenyang lesedi wa noga e e botlhole. Ga di kitla di utlwisa botlhoko le fa e le go senya mo thabeng ya me yotlhe e e boitshepo; ka gonne lefatshe le tla tlala kitso ya ga Jehofa jaaka metsi a khurumeditse lewatle.”—Isaia 11:6-9.

Mo lefatsheng le lesha la ga Jehofa, ga go kitla go nna le bothata jwa gore batho ba tlale mo ditoropong tse dikgolo, tse ba sa kgoneng go tshela sentle mo go tsone le diruiwa tsa bone. Ke boammaaruri gore tota le gompieno batho ba le bantsi ba itumelela go nna le diphologolo tsa bone, mme ba le bantsi ba na le boikutlo jo bo tshwanetseng ka tsone le ka tsela e ba di tlhokomelang ka yone. Mme akanya fela ka tebelelo e e molemolemo ya go nna le diruiwa ka bosakhutleng mo lefatsheng le lesha la tshiamo! Ga go pelaelo gore tsela e e lorato e di tla bong di tlhokomelwa ka yone e tla tlotlomatsa Mmopi yo Mogolo wa dilo tsotlhe tse di tshelang.

Fa e le gore ga o ise o utlwe ka ditsholofetso tse di molemo tsa Modimo—fela jaaka go ne go ntse ka Maria yo o ratang diphologolo, pele a utlwa ka ditsholofetso tseno bosheng jaana—re go kopa ka lorato gore o ikgolaganye le bagatisi ba makasine ono kgotsa mongwe wa Basupi ba ga Jehofa, yo o tla itumelelang go go thusa gore o ithute ka ditsholofetso tseo.

[Setshwantsho mo go tsebe 18]

Mo lefatsheng le lesha la Modimo, batho ba tla itumelela go nna le diphologolo ka bosakhutleng